“Ob Hlis Ntuj 10–16. 2 Nifais 6–10: ‘Auj Peb tus Vajtswv txoj Hau Kev Tseem Ceeb Kawg!’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Ob Hlis Ntuj 10–16. 2 Nifais 6–10,” Los, Nrog Kuv Mus—Rau Ib Leeg thiab Tsev Neeg: 2020
Thov Koj Ua Raws Li Koj lub Sib Nyiam Xwb, los ntawm Harry Anderson
Ob Hlis Ntuj 10–16
2 Nifais 6–10
“Auj Peb tus Vajtswv txoj Hau Kev Tseem Ceeb Kawg!”
Thaum koj nyeem 2 Nifais 6–10, cia li xav seb tus Tswv sim qhia dab tsi rau koj. Thaum koj to taub tej yam tseeb no, cia li sau ntawv thiab thov Vajtswv xav tias koj yuav ua li cas kom ua raws li koj tau kawm.
Sau Ntawv txog Koj tej Kev Tshoov Siab
Twb yog 40 xyoos tom qab Lihais tsev neeg tawm Yeluxalees mus. Lawv tau nyob hauv ib thaj av tshiab uas txawv heev, nyob deb ntawm Yeluxalees thiab Vajtswv cov neeg khi lus. Lihais twb tas sim neej lawm, thiab nws cov tub ki twb tau pib txoj kev sib cav sib ceg uas yuav kav ntev li ob peb txhiab xyoos los ntawm cov Neeg Nifais—“cov uas ntseeg tej lus ceeb toom thiab Vajtswv tej kev tshwm sim”—thiab cov Neeg Lamas, uas tsis ntseeg (2 Nifais 5:6). Hauv lub caij nyoog no, Yakhauj, tus uas yog Nifais tus kwv thiab tus uas yog ib tug xib hwb rau cov Neeg Nifais, xav kom cov neeg khi lus paub tias Vajtswv yeej yuav nco ntsoov lawv, yog li ntawd lawv thiaj li yuav tsum nco ntsoov Nws. Nov yog ib zaj lus uas peb yuav tsum muaj hauv peb lub ntiaj teb, vim nyob no tib neeg thuam kev khi lus thiab xyeej kev tshwm sim. Nws hais tias, “Cia peb nco ntsoov txog nws, … vim Vajtswv tsis tau muab peb tso pov tseg. … Tus Tswv tej lus cog tseg uas nws tau cog rau lawv … muaj nuj nqis heev” (2 Nifais 10:20–21). Hais txog tej lus cog tseg no, tsis muaj ib yam uas muaj nqis tshaj qhov uas yuav muaj ib “txoj kev theej txhoj uas tsis muaj qhov kawg” kom kov yeej kev tuag thiab ntuj txias teb tsaus (2 Nifais 9:7). Yakhauj hais tias, “Yog li ntawd, nej cia li zoo siab hlo”! (2 Nifais 10:23).
Tej lub Tswv Yim Kawm Vaj Lug Kub ntawm Yus Ib Leeg
Tus Tswv muaj siab hlub tshua Nws cov neeg thiab Nws yuav ua raws li Nws tau cog lus tseg.
Xwv kom pab nws cov neeg to taub tias lawv yog ib feem ntawm tsev neeg Ixayees thiab tsim nyog tso siab rau Vajtswv thiab Nws cov lus tseg, Yakhauj tau hais Yaxayas tej lus qhia tej uas yuav muaj los yav tom ntej, uas sau tseg hauv 2 Nifais 6–8. Yaxayas piav txog Ixayees txoj kev tawg khiav ri niab thiab tus Cawm Seej txoj kev cog lus tias Nws yuav muab Nws cov neeg sau los ua ke thiab txhiv lawv dim. Thaum koj nyeem, cia li xav txog tej lus nug zoo li no:
-
Kuv kawm dab tsi txog tus Cawm Seej txoj kev hlub uas txhiv dim rau kuv?
-
Tus Cawm Seej muab kev nplij siab li cas rau cov uas nrhiav Nws?
-
Kuv yuav ua li cas kom rau siab “tos ntsoov” tus Cawm Seej thiab cov koob hmoov Uas Nws cog lus tias kuv yuav txais?
Los ntawm Nws txoj Kev Theej Txhoj, Yexus Khetos tso txhua tus neeg dim kev tuag ntawm sab cev nqaij daim tawv thiab sab ntsuj plig.
Koj yuav siv tej lus twg los sis tej daim duab twg kom qhia ib tug neeg txog qhov uas peb yuav tsum muaj ib tug Txhiv Dim kom cawm peb dim kev tuag thiab kev txhaum? Yakhauj tau siv tej lus “qias neeg” thiab “tus tsiaj dab.” Yakhauj tau qhia dab tsi txog “tus tsiaj dab, txoj kev tuag thiab ntuj txiag teb tsaus” thiab “ib txoj kev rau peb khiav kom dim” uas Vajtswv tau npaj rau peb? (2 Nifais 9:10). Thaum koj nyeem 2 Nifais 9:1–26, tej zaum koj yuav xav siv ib xim kom sau lub cim rau tej yam uas peb yuav raug yog tias tsis muaj Yexus Khetos txoj Kev Theej Txhoj. Ces siv lwm xim sau lub cim rau tej yam uas peb txais tau los ntawm tus Cawm Seej txoj Kev Theej Txhoj. Koj kawm tej yam tseeb twg txog Yexus Khetos txoj Kev Theej Txhoj uas ua rau koj qhuas “Vajtswv lub tswv yim, nws txoj kev hlub tshua thiab txoj kev tshav ntuj”? (2 Nifais 9:8).
Kuj saib “Atonement of Jesus Christ,” Gospel Topics, topics.ChurchofJesusChrist.org.
Kuv muaj peev xwm los cuag Khetos thiab txais cov koob hmoov zoo kawg ntawm Nws txoj Kev Theej Txhoj.
Yexus Khetos tau “los rau hauv lub ntiaj teb xwv kom nws yuav cawm tau noob neej txhua tus yog tias lawv mloog nws lub suab” (2 Nifais 9:21; ntxiv qhov uas ntawv qaij) Los yog hais tias, peb yuav tsum txaus siab lees txais cov koob hmoov cawm txoj sia uas Nws muab rau peb. Tom qab nws piav txog txoj hau kev txhiv dim zoo kawg, Yakhauj tau ceeb toom thiab caw peb ua tej yam tseem ceeb, uas muaj nyob hauv 2 Nifais 9:27-54, kom pab peb txais cov koob hmoov ntawm txoj Kev Theej Txhoj. Tej zaum koj yuav xav sau tej ntawd hauv ib daim phiaj zoo li no:
|
Lus Ceeb Toom |
Lus Caw |
|---|---|
Lus Ceeb Toom | Lus Caw |
Lus Ceeb Toom | Lus Caw |
Koj xav tias tus Ntsuj Plig tshoov koj lub siab ua dab tsi thaum txais tej lus ceeb toom thiab tej lus caw no?
Vim Yexus Khetos tau theej txhoj lawm, kuv thiaj li “zoo siab hlo” los tau.
Yakhauj zaj lus yeej yog ib zaj lus xyiv fab heev. Nws hais tias, “Kuv hais tej no rau nej xwv kom nej yuav zoo siab, thiab tsa nej lub taub hau mus ib txhis li” (2 Nifais 9:3). Thaum koj nyeem 2 Nifais 10:20, 23–25, koj nrhiav tau dab tsi uas ua rau koj muaj kev cia siab? Koj nrhiav tau dab tsi ntxiv nyob hauv 2 Nifais 9–10 uas ua rau koj muaj kev cia siab? Koj yuav ua li cas kom nco txog tej no thaum koj poob siab?
Kuj saib Yauhas 16:33.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
2 Nifais 8:3–7
Thaum nej nyeem 2 Nifais 8:3, tej zaum nej yuav xav muab daim duab txog tej tiaj suab puam thiab ib lub vaj rau txhua tus saib. Tus Tswv ua li cas ho muab tej tiab suab puam hloov los ua lub vaj? Nyob hauv nqe 4–7, tus Tswv hais kom peb ua dab tsi kom txais tau kev xyiv fab uas piav txog nyob hauv nqe 3?
2 Nifais 8:24–25
Yaxayas tej lus uas txhawb nqa cov neeg Xi-oos yuav ua li cas txhawb peb lub zog thaum peb sim ua Yexus Khetos cov thwj tim uas rau siab ntseeg ntxiv? Vim li cas qhov uas peb tsim los thiab hnav khaub ncaws zoo li qhov uas Vajtswv xav kom peb ua ntawm sab ntsuj plig?
2 Nifais 9:1–26
Koj tsev neeg ua tau dab tsi zoo dua kom to taub tias Yexus Khetos “txoj kev theej txhoj uas tsis muaj qhov kawg” loj li cas? (nqe 7). Tej zaum lawv yuav xav saib los sis xav txog tej yam uas zoo li tsis muaj qhov kawg—cov nyom hauv ib thaj teb, cov xuab zeb nyob rau ntawm ntug hiav txwv, los sis cov hnub qub saum ntuj. Tus Cawm Seej txoj Kev Theej Txhoj tsis muaj qhov kawg li cas? Tej lus twg nyob hauv 2 Nifais 9 ua rau peb muaj kev ris txiaj rau qhov uas tus Cawm Seej ua rau peb?
2 Nifais 9:27–44
Tej zaum muaj ib hnub hauv lub lim tiam no uas nej tsev neeg xav nyeem 2 Nifais 9:27–38, nrhiav tej lus ceeb toom (uas muaj tej lus “kev txom nyem raug” no ua ntej). Nej xav tias tej lus twg yog tej yam tseem ceeb heev rau nej tsev neeg sib tham txog? Tej zaum lwm hnub, nej nyeem tau 2 Nifais 9:39–44, nrhiav tej yam uas Yakhauj caw nws cov neeg kom nco ntsoov.
2 Nifais 9:28–29, 50–51
Yam ntxwv txog tib neeg “txoj kev muaj plhus, txoj kev qaug zog, thiab txoj kev ruam” yog dab tsi? (nqe 28). Peb ua tau dab tsi kom saib tej yam los ntawm Vajtswv rau nqi ntxiv thiab tsis txhob saib tej yam los ntawm lub ntiaj teb rau nqi pes tsawg?
2 Nifais 9:45
Tej zaum nej tsev neeg yuav nyiam ua ib txoj xov ntawv ces ib leeg zuj zus khi rau lawv tus kheej es co co kom hle. Vim li cas kev txhaum yeej zoo li tej saw hlau? Tus Cawm Seej ua li cas kom pab peb hle tej saw hlau?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Cia li ua yooj yim rau lawv nrog nej sib tham. “Tej lub sij hawm zoo tshaj plaws qhia lwm tus mas ib feem yog thaum ib tug hauv yus [tsev neeg] muaj ib lo lus nug los yog muaj kev txhawj xeeb. … Cia lawv paub lso ntawm nej tej lus thiab tej yam nej ua hais tias nej xav mloog lawv” (Teaching in the Savior’s Way, 16).
Tus Cawm Seej yuav cawm tag nrho Vajtswv cov me nyuam “yog lawv yuav mloog nws lub suab” (2 Nifais 9:21). Nws Kho Neeg Coob cov uas Nyias Raug Nyias Mob, los ntawm J. Kirk Richards