Folafolaga Faaperofeta

O le suesueina o le Tusi a Mamona o le a suia ai oe. O le a suia ai lou aiga. Ua faia e perofeta i aso e gata ai ni folafolaga e uiga i le mana o le Tusi a Mamona talu ona toefuataiina mai Le Ekalesia a Iesu Keriso o le Au Paia o Aso e Gata Ai. Mafaufau loloto i faamatalaga nei, ma toe faamanatu e le aunoa. O le fea o nei faamanuiaga e te manao e te mauaina? A o e faitau i le Tusi a Mamona, mafaufau e faamaumau ma faasoa atu i isi auala ua faataunuuina ai nei folafolaga i lou olaga.

O Le Perofeta o Iosefa Samita: “Sa ou ta’u atu i le usoga o le Tusi a Mamona o le tusi aupito sili ona sa’o i soo se isi lava tusi i luga o le lalolagi, o le maa ’au’au foi lea o la tatou tapuaiga, e sili foi ona latalata atili atu o le tagata i le Atua i lona ola ai i ona mataupu, nai lo se isi lava tusi” (Aoaoga a Peresitene o le Ekalesia: Iosefa Samita [2007], 64).

Peresitene Ezra Taft Benson: “Ua le na o le faapea ua aoao mai e le Tusi a Mamona ia i tatou upumoni, e ui ina moni lena mea. E le na o le faapea ua molimau mai le Tusi a Mamona ia i tatou e uiga ia Keriso, e ui ina tonu lena mea. Ae e i ai se mea e sili atu. O loo i ai se mana i le tusi o le a amata ona tafe mai i o outou olaga i le taimi tou te amata ai ona faitau ma suesue ma le loto i ai i le tusi. O le a outou maua ai le malosi sili atu e tetee atu ai i faaosoosoga. O le a outou maua ai le mana e aloese ai mai mea tau faasese. O le a outou maua ai le mana e tumau ai i le ala lauitiiti ma le vaapiapi. O tusitusiga paia ua ta’ua o ‘afioga o le ola’ (MFF 84:85), ma e leai se isi mea e sili atu ai ona moni lena faaupuga nai lo o le Tusi a Mamona. A amata ona e matelaina ma galala i le fia maua o ia upu, o le a faateleina ma saga faateleina ona e maua le ola” (Aoaoga a Peresitene o le Ekalesia: Ezra Taft Benson [2014], 141).

Peresitene Gordon B. Hinckley: “Uso e ma tuafafine, e aunoa ma le masalosalo ou te folafola atu ia te outou, afai o le a outou faitau ma le agaga tatalo i le Tusi a Mamona, e tusa lava pe ua faafia ona e faitauina muamua, o le a faapea ona oo atu i totonu o o outou loto se fuataga faaopoopo o le Agaga o le Alii. O le a oo mai ai se naunautaiga ua faamalosia e savavali i le usiusitai i ana poloaiga, ma o le a oo mai ai se molimau malosi atu i le soifua moni o le Alo o le Atua” (Aoaoga a Peresitene o le Ekalesia: Gordon B. Hinckley [2016], 233).

Peresitene Russell M. Nelson: “O’u uso e ma tuafafine pele, ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu—iaso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava ia i le Tusi a Mamona i aso taitasi, e mafai ona puipuia oe mai mea leaga o le aso, e aofia ai le mala faataumaoi o ponokalafi ma isi vaisu ua punitia ai le mafaufau i mea faaleagaga” (“O Le Tusi a Mamona: Faamata e Faape’i Lou Olaga e aunoa ma Ia?” Ensign po o le Liahona, Nov. 2017, 62–63).