30 Tesema–5 Ianuari

Itulau tomua o le Tusi a Mamona

“O Se Tasi Molimau ia Iesu Keriso”

O au suesuega o le Tusi a Mamona e mafai ona faatamaoaigaina pe afai e amata i lou faitauina o itulau o loo muamua mai i le 1 Nifae. O le a se mea ua e iloa ua faamalosia ai lau molimau?

Tusifaamaumau Ou Lagona Uunai

Ae e te lei oo i le 1 Nifae mataupu 1, ua manino o le Tusi a Mamona e le o se tusi e pei ona masani ai. O ona itulau tomua o loo faamatala mai ai se talaaga e le pei o se isi lava—e aofia ai asiasiga a agelu, o se talafaamaumau anamua sa natia mo seneturi i se tafamauga, ma se faifaatoaga e le taualoa sa faaliliuina le talafaamaumau i le mana o le Atua. O le Tusi a Mamona ua le na o se talafaasolopito o tagata Amerika anamua. O loo i ai “le atoaga o le talalelei e faavavau” (Faatomuaga i le Tusi a Mamona), ma o le Atua lava Ia na faatonutonuina lona oo mai—le ala na tusia ai, le ala na faasaoina ai, ma le ala na mafai ai ona maua i o tatou taimi. O le tausaga lenei, a o e faitauina le Tusi a Mamona, tatalo i ai, ma faaaoga ona aoaoga, o le a e valaauliaina lona mana i lou olaga, ma e te ono lagonaina le faapea atu, e pei ona sa faia e Molimau e Toatolu i la latou molimau, “Ua ofoofogia i [o’u] mata.”

Manatu mo Suesuega Faaletagata Lava Ia o Tusitusiga Paia

Itulau autu o le Tusi a Mamona

E mafai e le Tusi a Mamona ona faamalosia lo’u faatuatua ia Iesu Keriso.

O le itulau autu o le Tusi a Mamona o loo aumaia ai mea e sili atu i lo na o se autu. Faatasi ai ma isi mea, o loo lisi mai ai ni faamoemoega o lenei talafaamaumau paia. Vaavaai mo faamoemoega nei, ona a o e suesueina le Tusi a Mamona i le tausaga lenei, matau ia fuaitau e te lagona e ausia ai nei faamoemoega. Mo se faataitaiga, o a fuaitau ua fesoasoani e faatalitonu ai oe “faapea o Iesu o le Keriso, le Atua e faavavau”?

Faatomuaga i le Tusi a Mamona

O le Tusi a Mamona o loo “aotele mai ai le ata o le faaolataga.”

O le ata o le faaolataga o le fuafuaga a le Tama Faalelagi e fesoasoani ai i Ana fanau ia oo ina faaeaina, e faapei o Ia, ma iloa le olioli o loo Ia lagonaina (tagai 2 Nifae 2:25–26). O le Togiola a Iesu Keriso ua mafai ai lenei fuafuaga, ma o aoaoga faavae uma, sauniga, feagaiga, ma poloaiga na tuuina mai e le Atua e fesoasoani ai ia ausia le fuafuaga.

Afai e te manao ia malamalama i le ata o le faaolataga, e leai se isi tusi e sili atu e faitau ai nai lo le Tusi a Mamona. O loo faasino i le fuafuaga a le Atua—e faaaoga ai ni igoa eseese—e silia ma le 20 taimi. I le taimi o au suesuega i lenei tausaga, matau pe a ta’ua le fuafuaga a le Atua pe faasino i ai ma le tala a le Tusi a Mamona e uiga i ai.

O se gaoioiga lenei e te amata ai. Faitau ia fuaitau nei, ma lisi mai igoa eseese o loo tuuina atu i le fuafuaga a le Atua: 2 Nifae 9:13; 11:5; ma le Alema 12:32–34; 24:14; 41:2; 42:15–16. O a ni mea o fautuaina atu ia te oe e uiga i le fuafuaga a le Tama i nei igoa?

“O Le Mau a Molimau e Toatolu”; “O Le Mau a Molimau e Toavalu”

E mafai ona avea au o se molimau o le Tusi a Mamona.

E mafai ona molimau atu ia te oe le Agaga Paia e faapea o le Tusi a Mamona e moni, tusa lava pe e te lei vaai i papatusi auro e pei ona sa vaai i ai Molimau e Toatolu ma Molimau e Toavalu. E faapefea e a latou molimau ona faamalosia ai lau molimau? E mafai faapefea ona e “tuu atu [lou igoa] i le lalolagi, e molimau atu i le lalolagi” le mea ua e iloa e uiga i le Tusi a Mamona? (“O Le Mau a Molimau e Toavalu”).

“O Le Molimau a le Perofeta o Iosefa Samita”

O le oo mai o le Tusi a Mamona o se vavega.

Afai e fesili atu se tasi ia te oe pe o fea na sau ai le Tusi a Mamona, o le a sau tala? E faapefea ona e faamatalaina le aao o le Alii i le aumaia i luma o le Tusi a Mamona? Na faamatalaina faapefea e le Perofeta o Iosefa Samita le oo mai o le Tusi a Mamona?

“O Le Molimau a le Perofeta o Iosefa Samita”

Na faapefea ona faaliliuina le Tusi a Mamona?

O le Tusi a Mamona sa faaliliuina “e ala i le meaalofa ma le mana o le Atua.” Tatou te le iloa ni faamatalaga se tele e uiga i le faagasologa faavavega o le faaliliuga, ae ua tatou iloa o Iosefa Samita o se tagatavaai, sa lagolagoina i meafaigaluega na saunia e le Atua: e lua maa manino sa faaigoaina o le Urima ma le Tumema ma lel isi maa sa ta’ua o se maa vaai. Sa vaaia e Iosefa i nei maa le faamatalatalaina Faa-Peretania o mataitusi i luga o papatusi, ma sa ia faitauina leotele le faaliliuga a o tusifaamaumauina e se tusiupu. Sa molimauina e tusiupu taitasi a Iosefa e faapea o le mana o le Atua sa faaalia i le faaliliuga o le galuega paia.

Tagai “Book of Mormon Translation” (Gospel Topics, topics.ChurchofJesusChrist.org).

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Itulau autu o le Tusi a Mamona

Atonu e mafai e lou aiga ona amata se lisi o fuaiupu mai le Tusi a Mamona ua fausia ai lo outou faatuatua “faapea o Iesu o le Keriso” ma faaopoopo i ai i le gasologa o le tausaga. Atonu foi o se taimi lelei lenei e fatufatu ai se fuafuaga faaleaiga mo le faitauina o le Tusi a Mamona: O afea ma pe o fea o le a outou faapotopoto ai e faitau? O le a faapefea ona auai ai tagata taitoatasi o le aiga. Mo se fesoasoani faaopoopo, tagai i “Manatu e Faaleleia ai la Outou Suesuega Faaleaiga o Tusitusiga Paia” i le amataga o le punaoa lenei.

Faatomuaga i le Tusi a Mamona

O se maaauau o se maa faaofuofu i le pito i luga o se faitotoa faaofuofu na te lokaina faatasi isi maa. Ina ia fesoasoani ia malamalama lou aiga pe faapefea ona avea le Tusi a Mamona “o le maaauau o la tatou tapuaiga,” e mafai ona e fauina pe tusi se faitotoa faaofuofu ma se maaauau i le pito i luga. O le a le mea e tupu pe a aveese le maaauau? O le a se mea e tupu pe ana fai e le o ia i tatou le Tusi a Mamona? E mafai faapefea ona tatou faia le Tusi a Mamona o le maaauau o lo tatou faatuatua ia Iesu Keriso?

O le Tusi a Mamona o le maaauau o la tatou tapuaiga.

“O Le Mau a Molimau e Toatolu”; “O Le Mau a Molimau e Toavalu”

E mafai e tagata o lou aiga ona tusi i lalo a latou lava molimau e uiga i le Tusi a Mamona, saini ai luga o latou igoa, ma mafaufau i ni auala e faasoa atu ai i isi a latou molimau.

“O Le Molimau a le Perofeta o Iosefa Samita”

I le tala a Iosefa Samita, o le a le faamaoniga ua tatou maua faapea sa aofia ai le Atua i le aumaia i luma o le Tusi a Mamona?

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.

Faaleleia o Suesuega Faaletagata Lava ia

O se folafolaga faaperofeta. Na saunoa Peresitene Russell M. Nelson, “Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga” (“O Le Tusi a Mamona: Faamata e Faape’i Lou Olaga e aunoa ma Ia?” Ensign po o le Liahona, Nov. 2017, 60–63).

Ua Tauaaoina Atu e Moronae ia Papatusi Auro, saunia e Gary L. Kapp