Liae O Loo Faimalaga latalata i le Sami Ulaula saunia e Gary Smith

6--12 Ianuari

1 Nifae 1–7

“Ou Te Alu ma Faia”

Na tusifaamaumauina e Nifae o “mea a le Atua” (1 Nifae 6:3). A o e suesueina talafaamaumau a Nifae, ia uai atu i mea a le Atua e te maua, aemaise o uunaiga mai le Agaga

Tusifaamaumau Ou Lagona Uunai

O loo amata le Tusi a Mamona i se tala o se aiga moni na feagai ma ni tauiviga moni lava. Na tupu i le 600 TLM, ae o loo i ai mea e uiga i lenei tala e ono masani ai aiga i ona po nei. O lenei aiga sa nonofo i se lalolagi o le amioleaga faatupulaia, ae sa folafola atu e le Alii ia i latou e faapea afai latou te mulimuli ia te Ia, o le a Ia taitaiina i latou i le saogalemu. I le ala sa i ai o latou taimi lelei ma taimi foi e leaga; sa latou feagai ma faamanuiaga sili ma vavega, ae sa ogaoga foi le tauaimisa ma fefinauaiga sa latou feagai. E seasea maua i tusitusiga paia se tala umi o se aiga sa taumafai e ola i le talalelei: o se tama sa tauivi e musuia le faatuatua i lona aiga, atalii sa filifili pe o le a talitonu ia te ia, o se tina sa popole mo le saogalemu o lana fanau, ma uso sa feagai ma le lotovale ma le finauga—ma o nisi taimi sa fefaamagaloai ai le tasi ma le isi. O le aotelega, e i ai le mana i le mulimuli i faataitaiga o le faatuatua na faaalia—e lenei aiga—e uiga i o latou le atoatoa.

Manatu mo Suesuega Faaletagata Lava Ia o Tusitusiga Paia

1 Nifae 1–6

E taua tele tusitusiga paia.

O uluai mataupu e ono o le Tusi a Mamona o loo i ai le tele o mau faasino i tusi e paia, talafaamaumau paia, ma le afioga a le Alii. A o e faitauina le 1 Nifae 1–6, o le a se mea e te aoaoina mai ai e uiga i le mafuaaga e “taua tele” ai le afioga a le Atua”? (1 Nifae 5:21). O a ni mea o loo aoao mai e nei fuaitau e uiga i tusitusiga paia? O a ni mea e te maua e musuia ai oe e sailiili i tusitusiga paia ma se tuuto sili atu?

Tagai foi i le “Scriptures Legacy” (video, ChurchofJesusChrist.org).

1 Nifae 1:7–15

O loo Molimau le Tusi a Mamona e uiga ia Iesu Keriso.

E faamaoni i le faamoemoega o loo ta’ua i lona itulau tomua—e faatalitonu ai tagata uma o Iesu o le Keriso—o loo tatala lava le Tusi a Mamona i le faaaliga ofoofogia a Liae o le Faaola. O le a se mea ua e aoaoina mai e uiga ia Iesu Keriso mai mea na vaai i ai Liae? O a ni nai galuega “tetele ma le ofoofogia” a le Faaola i lou olaga? (1 Nifae 1:14).

1 Nifae 2

Pe a ou saili ma faalagolago i le Alii, e mafai e Ia ona faamaluluina lo’u loto.

E ui ina sa tutupu ae Lamana, Lemuelu, ma Nifae i le aiga e tasi ma sa tutusa o latou aafiaga, e i ai lava sina eseesega o le ala sa latou tali atu ai i faatonuga paia sa maua e lo latou tama i le mataupu lenei. A o e faitauina le 1 Nifae 2, vaai pe mafai ona e faailoa mai pe aisea na faamaluluina ai le loto o Nifae ae lei faamaluluina loto o ona uso. Atonu foi e te mafaufau e uiga i au lava tali i le taitaiga mai le Alii, pe ala mai i le Agaga Paia po o Lana perofeta. O anafea na e lagonaina ai ua faamaluluina e le Alii lou loto ina ia mafai ai ona e naunau atili e talia Lana taitaiga ma fautuaga?

1 Nifae 3–4

O le a saunia e le Atua se ala mo a’u e faia ai Lona finagalo.

Ina ua poloaiina e le Alii ia Liae ma lona aiga ia aumai ia papatusi apamemea mai ia Lapana, Na te lei tuuina mai ni faatonuga patino i le ala e faataunuu ai lenei poloaiga. E tele lava foi ina moni lea mea i isi poloaiga po o faaaliga patino tatou te maua mai le Atua, ma e ono taitai atu ai i tatou e lagona e pei o la sa Ia manaomia mai “se mea faigata” (1 Nifae 3:5). O le a se mea o musuia ai oe e uiga i le tali a Nifae i le poloaiga a le Alii, o loo maua i le 1 Nifae 3:7, 15–16? Pe o i ai se mea ua e lagonaina le uunaia e “alu ma fai”?

A o e suesue i le 1 Nifae 1–7, vaavaai mo ni auala na saunia ai e le Atua le ala mo Liae ma lona aiga. Na faapefea ona Ia faia lea mea mo oe?

Tagai foi i le Faataoto 3:5–6; 1 Nifae 17:3; “Usiusitai,” Gospel Topics, topics.ChurchofJesusChrist.org; Book of Mormon Videos collection on ChurchofJesusChrist.org po o le polokalama o le Gospel Library.

1 Nifae 4:1–3; 5:1–8; 7:6–21

O le manatuaina o galuega a le Atua e mafai ona ou maua ai le faatuatua e usiusitai i Ana poloaiga.

Pe a oo ina muimui ia Lamana ma Lemuelu, e masani lava ona lata ane Nifae ma Liae e faamalosi atu ma apoapoai atu ia i la’ua. Pe a oo ina e muimui, o le faitauina o upu a Nifae ma Liae e mafai ona maua mai ai fautuaga ma ni manatu taua. Na faapefea ona taumafai Nifae ma Liae e fesoasoani i tagata o le latou aiga ina ia fausia le faatuatua i le Atua? (tagai i le 1 Nifae 4:1–3; 5:1–8; 7:6–21). O le a se mea ua e aoao mai ia la’ua faataitaiga e mafai ona fesoasoani ia te oe i le isi taimi e faaosoosoina ai oe e te muimui pe fouvale?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

1 Nifae 1–7

I le 1 Nephi 1–7, atoa, e mafai ona e fautuaina tagata o le aiga e matau fegalegaleaiga i le va o tagata o le aiga o Liae ma Sarai. O le a se mea ua mafai ona tatou aoaoina mai nei sootaga e mafai ona fesoasoani i lo tatou aiga?

Sa faatauaina e Nifae ma lona aiga upu a perofeta.

1 Nifae 2:20

O le mataupu faavae o i le 1 Nifae 2:20 o loo ta’ua soo i le Tusi a Mamona atoa. E mafai faapefea e tagata o lou aiga ona faaaoga i o latou olaga a o outou suesue faatasi i le Tusi a Mamona i lenei tausaga? Atonu e mafai ona outou faia faatasi se pepa tele e tusia ai le folafolaga a le Alii i lenei fuaiupu ma faapipii i luga o le tou fale. E mafai ona avea o se faamanatu e talanoaina i lea taimi ma lea taimi pe o faapefea ona outou vaai ua faamanuiaina e le Alii lo outou aiga ina ua outou tausia Ana poloaiga. Mafaufau e tusia nei aafiaga i luga o le pepa lautele o i ai se savali.

1 Nifae 2:11–13; 3:5–7

Atonu o le a manuia lou aiga mai le matauina o eseesega i le tali atu a Lamana ma Lemuelu i poloaiga a le Alii ma le tali a Nifae. O le a se mea e mafai ona tatou aoaoina mai le 1 Nifae 2:11–13; 3:5–7 e uiga i le muimui? O a faamanuiaga e oo mai pe a tatou faaaoga le faatuatua?

1 Nifae 3:19–20; 5:10–22; 6

O nei fuaiupu e mafai ona musuia ai lou aiga e tausia se talafaamaumau o mea taua e tutupu ma aafiaga mai o outou olaga. Atonu e mafai ona e amataina se api talaaga faaleaiga, e pei o talafaamaumau na tausia e Nifae ma Liae e uiga i aafiaga o lo latou aiga. O le a se mea e mafai ona e faaaofia ai i le talafaamaumau o lou aiga?

1 Nifae 7:19–21

O le a se mea ua faagaeetia ai i tatou e uiga i le faataitaiga a Nifae i nei fuaiupu? Ua faamanuiaina faapefea lou aiga pe a tatou “faamagalo atu” le tasi ma le isi?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Lo Tatou Aoao Atu

Suesue e le aunoa i tusitusiga paia. O se tasi ki i le aoao atu anoa i le fale o le fatuina lea o avanoa faifai pea e aoao ai mo lou aiga. Na aoao mai Peresitene Thomas S. Monson, “O kosi pupuu faatopetope ia ausia se mea, e le taitai ona tutusa le lelei ma le faitauina o tusitusiga paia i aso taitasi ma faaaoga i o tatou olaga” (“Ia Avea ma Tagata Sili e Mafai ona Avea ai Oe,” Ensign po o le Liahona, Me 2009, 68).

Sa Ou Faalogo i le Leo o le Agaga, saunia e Walter Rane