O le aiga o Liae o loo faimalaga atu i le toafa

Liae O Loo Faimalaga latalata i le Sami Ulaula, saunia e Gary Smith

6--12 Ianuari

1 Nifae 1–7

“O Le A Ou Alu ma Fai”

A o e faitau i le 1 Nifae 1--7, mafaufau i fuaiupu, aafiaga, fesili, ma isi punaoa e te lagona le musuia e faʻaaoga e aʻoaʻo ai tamaiti. O gaoioiga i lenei otootoga e mafai ona fetuunai mo tamaiti matutua pe laiti.

Tusi faamaumau Ou Lagona Uunai

aikona o le fefaasoaai

Valaaulia le Fefaasoaai

O nisi o tamaiti o lau vasega atonu ua uma ona latou faalogo pe faitau i mea na tutupu i le aiga o Nifae i le 1 Nifae 1--7. Valaaulia i latou e faasoa mai mea ua latou iloa. Afai e le iloa e tamaiti le tele o mea na tutupu ia Nifae, ia tuu atu ia i latou se avanoa i le faaiuga o le lesona e faasoa mai ai mea na latou aoaoina.

aikona o le aoao atu

Aoao atu le Aoaoga Faavae: Tamaiti Laiti

1 Nifae 2:16 

Ou te manaomia la’u lava molimau

Na talitonu Nifae i upu a lona tama ona sa ia manao ia iloa mo ia lava ma sa ia tatalo i le Alii. Fesoasoani i tamaiti ia aoao mai lana faataitaiga.

Gaoioiga e Mafai Ona Fai

• Aumai se atigipusa o loo tapunia ma se ata o le Faaola i totonu, ma tuu atu i tamaiti taitoatasi se avanoa e saili ai mo ia lava mea o loo i totonu o le pusa. Tau atu i tamaiti na manao Nifae e maua Lana lava molimau faapea na poloaiina e le Alii lona aiga e tuua Ierusalema. Fai atu i tamaiti e faalogo mo le mea na faia e Nifae ina ia maua ai lana lava molimau a’o e faitauina le 1 Nifae 2:16. Molimau atu e pei lava ona tatou taitoatasi ma tatalaina le pusa e saili ai mea oi totonu, e tatau ia i tatou uma ona ole atu i le Atua ia maua a tatou lava molimau.

• Aumai ni ata po o mea faitino e fai ma sui o mea atonu e ono sailia e tamaiti se molimau, e pei o se ata o Iesu Keriso, o le Tusi a Mamona, po o se ata o le perofeta soifua. Valaaulia tamaiti e filifili se ata po o se mea faitino ma faasoa mai a latou molimau o lena mea i le vasega.

1 Nifae 2:2--4; 3--4

O le a fesoasoani le Atua ia te au e tausi Ana poloaiga.

E faapefea ona e faaaogaina nei tala e fesoasoani ai i tamaiti ia malamalama e fesoasoani le Atua ia i tatou e tausia Ana poloaiga, e tusa lava pe foliga mai e faigata ona usitai?

Gaoioiga e Mafai Ona Fai

• Faitau le 1 Nifae 2:2--4 i tamaiti, ma faaali atu ni nai ata o mea atonu na ave e Liae ma lona aiga i le vao, e pei o se faleie, palanikeke, ma aufana ma ufanafana. Fai atu ia i latou e mafaufau pe o le a so latou lagona pe afai latou te tuua o latou fale ma o atu i le vao. O le a le mea o loo finagalo le Alii tatou te faia e usitai ai ia te Ia i aso nei?

• Fesoasoani i tamaiti e valivali ma oti ese ata pepa i le itulau o gaoioiga o lenei vaiaso; ona fai atu lea ia i latou e faaaoga ia ata pepa e aotele ai le tala ia Nifae ma ona uso o aumai papatusi apamemea (tagai 1 Nifae 3--4). O le pese “Lototele o Nifae” (Tusipese a Tamaiti, 64--65) ma le “Mataupu 4: O Papatusi Apamemea” (Tala o le Tusi a Mamona, 8--12; tagai foi i le vitio e fesootai i le ChurchofJesusChrist.org) e mafai ona fesoasoani ia te oe e faamatala lenei tala.

• Faaaoga ata 103--15 i le Tusiata o le Talalelei e fesoasoani ai i tamaiti e mafaufau i mea ua poloaiina i tatou e le Alii e fai. E faapefea ona faamanuiaina i tatou pe a tatou usiusitai ia te Ia? Fesoasoani ia i latou e teuteu ni pine e fai e i ai le fuaitau lea O le a ou alu ma fai mea ua poloaiina e le Alii (1 Nifae 3:7). Faitau faatasi le fuaitau lea mo ni nai taimi.

1 Nifae 3:19--21; 5:19--22

O tusitusiga paia o se oa sili.

E faapefea ona e fesoasoani e musuia tamaiti e faapelepele i tusitusiga paia, po o le afioga a le Atua?

Gaoioiga e Mafai Ona Fai

• Faaali atu i tamaiti se mea (po o se ata o se mea) e taua tele ia te oe. Talanoa pe faapefea ona e faaaogaina ma tausia. Faamalamalama atu i le aiga o Liae, o tusitusiga paia sa taua tele, e pei o se oa.

• Valaaulia tamaiti e fesoasoani ia te oe e faamatala pe faatino mea na faia e Nifae ma ona uso e aumai ai papatusi apamemea: na latou malaga i se mea mamao, tuu atu a latou auro ma siliva, ma lalafi i totonu o se ana e faasaoina ai o latou ola. Faitau le 1 Nifae 5:21. Aisea na taua tele ai tusitusiga paia i le aiga a Liae? E faapefea ona tatou faia ia tusitusiga paia ia pei o se oa?

Ua suesue Liae i papatusi apamemea

Mauaina e Liae o Papatusi Apamemea, saunia e Clark Kelley Price

aikona o le aoao atu

Aoao atu le Aoaoga Faavae: Tamaiti Matutua

1 Nifae 2:16, 19–20 

E mafai ona i ai la’u lava molimau.

O le a se mea ua e aoaoina mai le faataitaiga a Nifae e uiga i le mauaina o lau lava molimau? E mafai faapefea ona e fesoasoani i tamaiti e aoao mai lana faataitaiga?

Gaoioiga e Mafai Ona Fai

• Fai atu i tamaiti e saili le 1 Nifae 2:16, 19 ia iloa ai pe na faapefea ona maua e Nifae se molimau i upu a lona tama. Valaaulia i latou e tusi ia gaoioiga a Nifae i poloka po o isi mea faitino ona fausia lea o se mea i ia mea faitino e fai ma sui pe faapefea ona fesoasoani na mea ia i tatou e fausia ai se molimau.

• Tau atu i tamaiti pe na faapefea ona e mauaina lau molimau e uiga i le talalelei. Valaaulia i latou e faasoa mai ni aafiaga talitutusa na latou maua, ma uunaia i latou e mulimuli i faataitaiga a Nifae e faaauau ai ona atiina ae a latou molimau. E mafai faapefea ona fesoasoani ia i tatou le i ai o a tatou lava molimau?

1 Nifae 3:1--8 

E mafai ona ou tali atu ma le faatuatua i poloaiga a le Alii.

O le atiina ae o se uiga e pei o Nifae o le a fesoasoani i tamaiti pe a talosagaina i latou e le Alii e faia se mea e foliga faigata.

Gaoioiga e Mafai Ona Fai

• Vaevae le vasega i ni vaega se lua. Valaaulia le isi vaega e faitau le tali a Lamana ma Lemuelu ia Liae (tagai 1 Nifae 3:2--5) ma le isi vaega e faitau le tali a Nifae (tagai 1 Nifae 3:2--4 7). Valaaulia se tamaitiiti e faafoliga o ia o Liae ma fai atu i isi tamaiti e faafoliga e toe foi atu i Ierusalema e aumai papatusi apamemea. Valaaulia vaega taitasi e tali mai ia latou lava upu e pei latou o tagata na latou faitauina. O a nisi mea ua poloaiina i tatou e le Atua e fai? E mafai faapefea ona avea i tatou e pei o Nifae?

• Usu faatasi se pese e faatatau i le usiusitai, e pei o le “Lototele o Nifae” po o le “Tausi Poloaiga” (Tusipese a Tamaiti, 64--65, 68--69), ma fai atu i tamaiti e faalogo mo fuaitau o loo aoao mai ai pe faapefea ona tatou tali atu i le Alii.

1 Nifae 3--4 

O le Agaga Paia o le a taʻitaʻia au ao ou saili e faia le finagalo o le Alii.

Na mulimuli Nifae i le Agaga, “lē muaʼi iloa muamua mea e tatau ona [ia] faia” (1 Nifae 4:6). E faapefea ona e fesoasoani i tamaiti o loo e aoaoina ia saili le taitaiga a le Agaga Paia?

Gaoioiga e Mafai Ona Fai

• Valaaulia tamaiti e faatino le tala ia Nifae ma ona uso o taumafai e aumai papatusi apamemea (tagai 1 Nifae 3--4). Valaaulia se tamaitiiti e faitau le 1 Nifae 4:6, ma fai atu i le vasega e faalogo mo mea na faia e Nifae na mafai ai ona faamanuiaina i latou.

• Faasoa atu i tamaiti ni faataitaiga o mea e finagalo le Atua latou te faia, e pei o le faauo atu i se tasi i le aoga e foliga mai ua tuua na o ia, faamagalo se uso, pe taʻu le mea moni pe a uma ona faia se mea sese. Fai atu i tamaiti e faasoa mai pe mafai faapefea e le Agaga Paia ona fesoasoani ia i latou i na tulaga. E mafai faapefea ona tatou valaauliaina le Agaga Paia e fesoasoani ia i tatou e usiusitai i le Atua?

aikona o le aoaoina

Fautuaina le Aoaoina i le Aiga

Valaaulia tamaiti e faasoa mai ni aafiaga ma o latou aiga ina ua faamanuiaina i latou mo le tausia o poloaiga. Uunaia i latou e fai atu i tagata o o latou aiga e faasoa mai ni aafiaga talitutusa.

Faaleleia o Lo Tatou Aoao Atu

Fesoasoani i tamaiti laiti e aoao mai tusitusiga paia. Ina ia fesoasoani i tamaiti e aoao mai tusitusiga paia, taulai i se fuaiupu se tasi o le mau pe na o se fasifuaitau autu foi. E mafai ona e valaaulia tamaiti e tutu i luga pe sii o latou lima pe a faalogo i lena upu po o le fasifuaitau. (Tagai foi Aoao Atu i le Ala a le Faaola, 21.)

itulau o gaoioiga: E fesoasoani le Atua ia te au e tausia Ana poloaiga