30 Tesema---5 Ianuari

Itulau o le Faatomuaga o le Tusi a Mamona

O Se Tasi Molimau ia Iesu Keriso

Amata lau tapenaga e aoao atu i le faitauina o le itulau autu o le Tusi Mamona ma le faatomuaga; o mau a Molimau e Toatolu, o Molimau e Toavalu, ma le Perofeta o Iosefa Samita; ma “O Se Faamalamalamaga Puupuu e Uiga i le Tusi a Mamona.” Mafaufau loloto pe faapefea ona e musuia tamaiti e aoao mai le Tusi a Mamona.

Tusi faamaumau Ou Lagona Uunai

Valaaulia le Fefaasoaai

Valaaulia tamaiti e faasoa mai tala latou te iloa mai le Tusi a Mamona, e faaaoga ai ata 67--86 o le Tusiata o le Talalelei poo isi ata o loo ia te oe.

Aoao atu le Aoaoga Faavae: Tamaiti Laiti

Itulau autu o le Tusi a Mamona

E mafai ona fesoasoani le Tusi a Mamona ia te au ia ou faatuatua ia Iesu Keriso.

Fesoasoani i tamaiti ia latou iloa o le faamoemoega o le Tusi a Mamona o le tuuina atu lea o le molimau ia Iesu Keriso.

Gaoioiga e Mafai Ona Fai

• Uu i luga se kopi o le Tusi a Mamona, ma faasino atu le soaautu, O Se Tasi Molimau ia Iesu Keriso. Fai atu i tamaiti e auauai i le fai mai, “O Se Tasi Molimau ia Iesu Keriso.” Otooto atu i tamaiti le auala na faamalosia ai e le Tusi a Mamona lou faatuatua ia Iesu Keriso.

• Faamatala atu se tala mai le Tusi a Mamona o loo aoao mai ai e uiga ia Iesu Keriso, e pei o le tala e uiga ia Samuelu le Sa Lamana o loo vavalo e uiga ia Keriso (tagai Helamana 14--16), le Faaola o faamanuiaina tamaiti (tagai 3 Nifae 17), po o le Uso o Iareto o loo vaai atu ia Iesu Keriso (tagai Eteru 2--3). O mataupu mai Tala o le Tusi a Mamona (ma vitio talafeagai i le ChurchofJesusChrist.org) e mafai ona fesoasoani. Faasino atu i tamaiti mea ua tatou aoaoina e uiga ia Iesu mai nei tala. Ta’u atu ia i latou o le a latou aoaoina le tele o mea e uiga ia Iesu Keriso mai le Tusi a Mamona i lenei tausaga.

• Usu se pese e faatatau i le Tusi a Mamona, pei o le “Tala o le Tusi a Mamona” (Tusipese a Tamaiti, 62). Usu faatasi le pese mo ni nai taimi, ma tuu atu i tamaiti e auauai i le uuina o se ata o le Faaola ao outou usuina.

Faatomuaga i le Tusi a Mamona

O le Tusi a Mamona o le maa‘au‘au o la tatou tapuaiga.

Na faamalamalama mai e Peresitene Thomas S. Monson: “Afai e moni [le Tusi a Mamona]—ma ou te molimau faamaoni atu e moni lava—o lona uiga o Iosefa Samita o se perofeta … , O Le Ekalesia a Iesu Keriso o le Au Paia o Aso e Gata Ai o le Ekalesia lea a le Alii i le lalolagi, ma ua toefuatai mai le perisitua paia a le Atua” (“O Le Mana o le Tusi a Mamona,” Ensign po o le Liahona Me, 2017, 86-87).

Gaoioiga e Mafai Ona Fai

• Faitau atu i tamaiti le faamatalaga lea a Iosefa Samita i le faatomuaga i le Tusi a Mamona: “O le Tusi a Mamona [o le] maa‘au‘au o la tatou tapuaiga.” Faamalamalama atu e pei ona taofia faatasi e se maa’au’au se faaofuofu atoa, o la tatou molimau o le Tusi a Mamona e taofia ma faamalosia la tatou molimau o isi mea, e pei o Iosefa Samita ma le talalelei.

• Valaaulia se matua o se tasi o tamaiti e faasoa mai pe na faapefea ona maua e ia se molimau o le Tusi a Mamona. Faitau faatasi ma tamaiti le valaaulia i le iuga o le faatomuaga i le Tusi a Mamona, ma fesoasoani ia i latou e faatino mea e mafai ona latou faia e maua ai a latou lava molimau.

“O Le Molimau a le Perofeta o Iosefa Samita”

O le Tusi a Mamona na tuuina mai ia i tatou e le mana o le Atua.

E mafai e le molimau a Iosefa Samita ona fesoasoani i tamaiti e malamalama i le faamoemoega paia o le Tusi a Mamona.

Gaoioiga e Mafai Ona Fai

• Otooto atu i tamaiti le tala o le oo mai o le Tusi a Mamona e pei ona faamatalaina i “Le Molimau a le Perofeta o Iosefa Samita.” E mafai foi ona e faaaogaina le “Mataupu 1: O le Ala na Tatou Maua Ai le Tusi a Mamona” (Tala o le Tusi a Mamona, 2--4, po o le vitio talafeagai i le ChurchofJesusChrist.org). Fesoasoani i tamaiti e faatino le tala mo ni nai taimi ao e toe faamatalaina.

• Faaali atu i tamaiti se ata o mataitusi mai papatusi auro. Faamatala atu na fesoasoani le Atua ia Iosefa e faaliliu ia mataitusi i upu e mafai ona tatou faitau ma malamalama i ai.

  

  Na faaliliuina e Iosefa Samita mataitusi na tusia i luga o papatusi auro.

Aoao atu le Aoaoga Faavae: Tamaiti Matutua

Itulau autu o le Tusi a Mamona

O le Tusi a Mamona e fesoasoani ia te a’u e faatuatua ia Iesu Keriso.

Manatua o lou faamoemoega i le aoaoina o tamaiti e uiga i le Tusi a Mamona o le atiina ae lea o lo latou faatuatua i le Faaola.

Gaoioiga e Mafai Ona Fai

• Vaevae le vasega i paga. Valaaulia paga taitasi e faitau le parakalafa lona lua o le itulau autu o le Tusi a Mamona, vaavaai mo se mea e taʻu atu ia i latou le mea e tatau ona faia e le Tusi a Mamona. Ona valaaulia lea o paga taitasi e faasoa mai i le vasega.

• Fesoasoani i tamaiti e sue i le itulau autu le fuaitau “mo le faatalitonuina foi o Iutaia ma Nuuese, o Iesu o le Keriso.” E faapefea e le Tusi a Mamona ona faatalitonu i tatou o Iesu o le Keriso? Valaaulia i latou e faasoa mai se tala mai le Tusi a Mamona lea na faamalosia ai lo latou faatuatua ia Keriso, pe faasoa atu foi sau lava tala.

Faatomuaga i le Tusi a Mamona

O le Tusi a Mamona o le maa‘au‘au o la tatou tapuaiga.

O le mauaina o se molimau i le Tusi a Mamona o le a fesoasoani i tamaiti ia iloa o Le Ekalesia a Iesu Keriso o le Au Paia o Aso e Gata Ai o le Ekalesia moni a le Atua.

Gaoioiga e Mafai Ona Fai

• Fai atu i tamaiti e faafoliga e te leʻi faalogo muamua i le Tusi a Mamona. Valaaulia i latou e galulue ma se paga e mafaufau i ni auala e mafai ona latou faʻamatalaina atu ia te oe pe o le a lea tusi ma le mea na sau mai ai, faʻaaoga faʻamatalaga mai le faatomuaga. Ona tuu atu lea i paga taitasi e auauai e aoao oe. O le ata O le Tusi Paia ma le Tusi a Mamona e Molimau ia Keriso (ChurchofJesusChrist.org) e mafai foi ona fesoasoani.

• Valaaulia se tamaitiiti e faitau le faamatalaga a Iosefa Samita i le parakalafa lona ono o le faatomuaga. Faaaoga le itulau o gaoioiga o lenei vaiaso, faamatala pe faapefea e se maaauau ona uu i luga se faitotoa faaofuofu. E tusa ai ma le parakalafa mulimuli o le faatomuaga, o a nisi mea tatou te iloa i le taimi lava tatou te maua ai se molimau e moni le Tusi a Mamona?

“O Le Mau a Molimau e Toatolu”, “O Le Mau a Molimau e Toavalu”

E mafai ona avea aʻu ma se molimau o le Tusi a Mamona.

E faapefea ona e fesoasoani i tamaiti ia maua ma faasoa atu a latou lava molimau i le Tusi a Mamona?

Gaoioiga e Mafai Ona Fai

• Valaaulia tamaiti e faamatala mai se mea na latou vaai i ai e leai se isi tagata i le vasega na vaai i ai. Faamalamalama atu o le Tusi a Mamona o loo i ai molimau a tagata e 11 e ese mai ia Iosefa Samita o e na vaai i papatusi auro lea na faaliliuina mai ai le Tusi a Mamona. Faitau faatasi ia molimau. Aisea na mananao ai nei molimau i isi tagata ia iloa a latou molimau?

• Fesili atu pe i ai nisi tamaiti e mananao e faasoa mai pe faapefea ona latou iloa e moni le Tusi a Mamona. Faitau faatasi le Moronae 10:3--5, ma valaaulia tamaiti taitasi e faitau le Tusi a Mamona i lenei tausaga ma maua pe faamalosia lana molimau e moni. Tau atu i tamaiti pe na faapefea ona e mauaina lau molimau e uiga i le Tusi a Mamona.

Fautuaina le Aoaoina i le Aiga

Afai e mafai, ia mautinoa ia tofu tamaiti uma ma se kopi o le Tusi a Mamona, ma valaaulia i latou e amata ona faitau na o i latou lava ma faatasi foi ma o latou aiga.

Faaleleia o Lo Tatou Aoao Atu

Sailia au lava musumusuga. Nai lo le vaai i nei otootoga faapea o ni faatonuga e tatau ona e mulimuli ai a’o e aoao atu, faaaoga o se faapogai o aitia e faamatua’ia ai au lava musumusuga a o e mafaufau loloto i manaoga o tamaiti o loo e faiaoga ai.