Miti a Liae, saunia e Steven Lloyd Neal

13--19 Ianuari

1 Nifae 8--10 

“O Mai ma Aai i le Fua”

I le faaopoopo atu i le vaai ia te oe lava i le faaaliga a Liae, taumafai e vaai i tamaiti o loo e aoaoina. E faapefea ona faatatau lenei faaaliga ia i latou?

Tusi faamaumau Ou Lagona Uunai

Valaaulia le Fefaasoaai

Faafesootai ni nai tamaiti muamua a’o le’i amataina le vasega ma fai atu ia i latou e mafaufau i ni aafiaga po o ni mau e mafai ona latou faasoa atu na fesoasoani ia i latou e lagona ai le alofa o le Atua.

Aoao atu le Aoaoga Faavae: Tamaiti Laiti

1 Nifae 8:2, 5--34 

O le afioga a le Atua e taitaia a’u i le Atua ma fesoasoani ia te a’u e lagona Lona alofa.

I le faaaliga a Liae, ua valaauliaina ai i tatou e taumamafa i le alofa o le Atua, ua faatusa i ai le laau ma ona fua. E mafai faapefea ona e fesoasoani i tamaiti e talia lenei valaaulia?

Gaoioiga e Mafai Ona Fai

• Valaaulia tamaiti e fesoasoani ia te oe e faamatala le tala i le faaaliga a Liae mai 1 Nifae 8:10--34. Ina ia fesoasoani ia i latou e vaai faalemafaufau i le tala, e mafai ona e faaali atu se ata o le faaaliga a Liae (tagai otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga) po o ata i le “Mataupu 6: O le Miti a Liae” (Tala o le Tusi a Mamona, 18--20 po o le vitio e fesootai i le ChurchofJesusChrist.org). Ia mautinoa ua iloa e tamaiti o le ai uamea ua faatusaina i le afioga a le Atua, lea tatou te faitauina i tusitusiga paia ma faalogoina mai perofeta soifua. Fesoasoani ia i latou ia malamalama o le laau o le faatusa lea o le alofa o le Atua mo i tatou.

• Aumai se maea e fai ma faatusa o le ai uʻamea i le faaaliga a Liae. Fai atu i tamaiti e pipii i ai ao e taitaia i latou faataamilo i le potu agai i se ata o se laau. Fesoasoani ia i latou ia malamalama o le afioga a le Atua tatou te latalata atili ai ia te Ia, e pei lava o le maea e faatusa i le ai uʻamea na taitaiina atu ai i tatou i le laau. Ina ia faaali atu o le laau e faatusa i le alofa o le Atua, e mafai ona e faaali atu ata o mea ua tuuina mai e le Atua ia i tatou e faaalia ai Lona alofa mo i tatou, e pei o le Faaola, o tatou aiga, ma le lalolagi matagofie.

• Aumai se fualaau aina ma se fatu e pipii i ai. Tuu atu i tamaiti se fasi fualaau aina e tofo ai ma fesili ia i latou e uiga ia latou fualaau aina e fiafia i ai. Faamalamalama atu o le fua i le faaaliga a Liae o le fua aupito suamalie na ia tofo i ai, ma na faatumulia ai lona agaga i le olioli. E pei ona faafiafiaina i tatou e fualaau aina suamalie, o le a tatou lagonaina le fiafia pe a tatou mulimuli ia Iesu ma toe mau faatasi ma le Tama Faalelagi.

• Faitau le 1 Nifae 8:12, ma valaaulia tamaiti e faalogo lelei mo le mea na manao Liae e fai ina ua uma ona ia tofoina le fua. Tuu tamaiti e auauai ona faataitai e pei o Liae ma valaaulia isi e omai ma aai i le fua. O le a se mea e mafai ona tatou faia e valaaulia ai isi e o mai ma fiafia i faamanuiaga o le talalelei faatasi ma i tatou?

1 Nifae 10:17, 19 

O le a faaalia mai e le Atua mea moni ia te au e ala i le mana o le Agaga Paia.

Ina ua maea ona faalogo e uiga i le faaaliga a lona tama, sa i ai ia Nifae se manao e tatau ia i tatou uma ona i ai---le manao ia iloa le upumoni mo ia lava.

Gaoioiga e Mafai Ona Fai

• Faitau le 1 Nifae 10:19, ma valaaulia tamaiti e sii o latou lima pe a latou faalogoina upu nei “faaali” ma le “Agaga Paia.” Fesoasoani i tamaiti ia malamalama i lenei mau, lea o loo aoao mai o le Agaga Paia o le a fesoasoani ia i tatou e iloa tali i a tatou fesili. Ina ia fesoasoani i tamaiti e vaai faalemafaufau pe o le a le uiga o le “faaali,” aumai se palanikeke ua gaugau ma se ata o le Faaola i totonu, ma fai atu i tamaiti e tatala.

• Usu se pese faatasi ma tamaiti e faatatau i le sailiga o le upumoni, e pei o le “Saili, Mafaufau Loloto, ma Tatalo” (Tusipese a Tamaiti, 66). Faaali atu ata e faaalia ai upu i le pese e fesoasoani ai i tamaiti ia manatua pe faapefea ona aoaoina i tatou e le Agaga Paia.

• Mafaufau e faasoa atu i tamaiti se aafiaga i se taimi na fesoasoani ai le Agaga Paia ia te oe ia iloa e moni se mea. Ta’u atu i tamaiti le auala na talanoa atu ai le Agaga Paia ia te oe.

Aoao atu le Aoaoga Faavae: Tamaiti Matutua

1 Nifae 8:2, 5--34 

O le afioga a le Atua e taitaia a’u i le Atua ma fesoasoani ia te a’u e lagona Lona alofa.

Ao aoao tamaiti o lau vasega e uiga i le faaaliga a Liae, ia uunaia i latou e suesue le afioga a le Atua ma faasoa atu le alofa o le Atua i isi.

Gaoioiga e Mafai Ona Fai

• A o faitau e tamaiti fuaiupu filifilia mai le 1 Nifae 8, valaaulia i latou e saili faamatalaga mai nei fuaiupu i se ata o le faaaliga a Liae (e pei o le ata i le otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga). Pe valaaulia foi i latou e tusi ata i luga o le laupapa o faamatalaga latou te faitau i ai. Ona fesoasoani lea i tamaiti e saili poo a uiga o faatusa i le miti (tagai 1 Nifae 11:21--22; 12:16–18; 15:23–33, 36).

• Afai e mafai, aumai se fasi uʻamea po o se isi uamea i le vasega ma valaaulia tamaiti e faʻamatala nisi o ona uiga ma mea atonu e faʻaaogaina ai. E faapefea ona avea le afioga a le Atua e pei o se ai u’amea? O fea tatou te maua ai le afioga a le Atua? Aisea e taua tele ai le ai u’amea i le faaaliga a Liae?

  

  O Liae o loo ‘ai i le fua o le laau o le ola. Laau o le Ola, saunia e Marcus Alan Vincent

• Valaaulia tamaiti e tusi i luga o se fasi pepa se aafiaga na fesoasoani ai le afioga a le Atua ia latou iloa le mea e tatau ona latou faia pe fesoasoani latou te lagona ai le latalata atu i le Tama Faalelagi. Ao latou faasoa mai mea na latou tusia, valaaulia i latou e taai a latou pepa i le foliga o se tootoo. E mafai foi ona e faapipii faʻatasi “tootoo” a tamaiti e fai ma sui o le ai uʻamea i le miti a Liae.

• Valaaulia nisi o tamaiti e faitau le 1 Nifae 8:10--12 ma faamatala mea na vaaia e Liae. Fai atu i isi e faitau le 1 Nifae 11:20--23 ma faamatala mea na vaaia e Nifae. Aisea na faaali atu ai e le agelu ia Nifae le pepe o Iesu e aoao atu ai ia te ia [Nifae] e uiga i le alofa o le Atua? Ina ia fesoasoani e tali lenei fesili, faitau faatasi le Ioane 3:16 pe usu faatasi se pese e faatatau i le Faaola, e pei o le “Na Ia Auina Mai Lona Alo” (Tusipese a Tamaiti, 20--21). Tau atu i tamaiti pe na faapefea ona e lagonaina le alofa o le Tama Faalelagi ma Lona Alo o Iesu Keriso i lou olaga.

• Tusi i luga le laupapa: O a mea tatou te aoaoina mai le faataitaiga a Liae? Valaaulia tamaiti e mafaufau e uiga i le faaaliga a Liae ma tusi le tele o tali e mafai ona latou maua. Valaaulia i latou e faasoa mai a latou tali i le vasega. Ona fai atu lea i tamaiti e mafaufau i se tasi e mafai ona latou faasoaina atu i ai le olioli o le talalelei.

1 Nifae10:17–19; 11:1

O le a faaalia mai e le Atua mea moni ia te au e ala i le mana o le Agaga Paia.

A tatou ole atu i le Tama Faalelagi, o le upu moni o le a “faaalia ia te i [tatou] i le mana o le Agaga Paia” (1 Nifae 10:19). E mafai faapefea ona e fesoasoani i tamaiti o e aoaoina e malamalama i lenei upu moni?

Gaoioiga e Mafai Ona Fai

• Valaaulia tamaiti e talanoa i auala e mafai ai ona latou maua ni tali i se fesili. Uunai tamaiti e faitau le 1 Nifae 10:17--19 ma le 11:1. O le a se mea o le a fai mai ai Nifae pe a fesili atu se tasi ia te ia pe faapefea ona maua tali i se fesili e uiga i le talalelei? E faapefea ona aoao tatou e le Atua e ala i le Agaga Paia? (tagai MF&F 8:2).

• Fai atu i tamaiti e talanoa e uiga i se taimi na fesoasoani ai le Agaga Paia ia latou iloa o se mea e moni. Fai atu ia i latou e vaai faalemafaufau e i ai se latou uo e manatu e le mafai e ia ona maua tali e ala i le Agaga Paia. O le a se mea e mafai ona latou faasoa mai le 1 Nifae 10:17--19 ma le 11:1 e fesoasoani ai i lena uo?

Fautuaina le Aoaoina i le Aiga

Uunai tamaiti e faaaoga le itulau o gaoioiga o lenei vaiaso e faasoa ai ma o latou aiga mea na latou aoaoina e uiga i le faaaliga a Liae i le laau o le ola.

Faaleleia o Lo Tatou Aoao Atu

E tele auala e aoao ai tamaiti. E fiafia lava tamaiti e aoao e ala i aafiaga eseese. Faaaoga gaoioiga e fesoasoani latou te feoai ai, faaaoga uma o latou sane, ma faataitai ni mea fou. (Tagai Aoao Atu i le Ala o le Faaola, 25–26.)