Na Vakasama Eso me Vakatorocaketaka na Vuli iVolanikalou ni Nomu Vuvale

Na vulici wasoma ni ivolanikalou e sala kaukauwa sara me vukea na nomu matavuvale me vulica na kosipeli. Na levu se balavu ni ka dou wilika vakamatavuvale e sega soti ni bibi mai na nomu sasaga me vakayacori tikoga. Ni o cakava na vuli ivolanikalou me tiki bibi ni bula ni nomu matavuvale, o na vukea mera veivolekati sara ka toro voleka yani na leweni nomu vuvale vei Jisu Karisito ka taracake na nodra ivakadinadina e yavutaki ena Nona vosa.

Vakasamataka na taro eso oqo:

• O na rawa ni vakauqeta vakacava na leweni nomu matavuvale me ra vulica vakataki ira na ivolanikalou?

• Na cava e rawa ni o cakava mo vakauqeti ira na nomu lewe ni matavuvale me ra wasea na veika era sa vulica tiko?

• E rawa vakacava mo vakabibitaka na ivakavuvuli o vulica tiko ena Vunau kei na Veiyalayalati ena gauna ni veivakavulici ena veisiga?

Nanuma tiko ni vale sa vanua vinaka duadua me caka kina na vulici ni kosipeli. E rawa ni o vulica ka vakatavulica na kosipeli e vale ena sala e sega ni na rawa kina ena kalasi ena Lotu. Mo dau bulibuli ni o vakasamataka eso na sala mo vukea na nomu vuvale me ra vuli mai na ivolanikalou.

Vakasama ni iTaviqaravi

Vakayagataka eso na vakasama oqo mo vakavinakataka kina na vuli ivolanikalou ni nomu vuvale.

Vakayagataka na sereivakatagi.

Lagata na sere e dau vaqaqacotaka na ivakavuvuli e vakatavulici ena ivolanikalou. E dau vakaturi ena ituvatuva e veimacawa yadua e dua na serenilotu se nodrasere na lalai. Sa rawa mo taroga na taro me baleta na vosa se malanivosa eso ena qaqa ni sere. Me ikuri ni lagasere, e rawa ni ra matanataka na nomu vuvale na qaqanisere se vakarogoca na sere e vakatagi malua tu ni ra cakava tale tiko eso na itaviqaravi.

Wasea na ivolanikalou e vakaibalebale

Solia na gauna vei ira na leweni vuvale me ra wasea eso na tikini volanikalou era kunea ni vakaibalebale ena gauna ni nodra vuli yadua.

Vakayagataka ga na nomu vosa

Sureti ira na lewe ni vuvale me ra vakalekalekataka ena nodra vosa ga na veika era vulica mai na ivolanikalou.

Bulataka na ivolanikalou ena nomu bula.

Ni o wilika oti na tikini volanikalou, kerei ira na leweni vuvale me ra wasea na sala ena tikina oya e veiganiti ki na nodra bula.

Taroga e dua na taro

Sureti ira na leweni vuvale me ra taroga na taro vakosipeli, ka qai taura na gauna me ra vakasaqara na veitikina ena rawa ni sauma na taro.

Vakaraitaka e dua na ivolanikalou.

Digia e dua na tikina e vakaibalebale vei iko, ka qai vakaraitaka tu ena vanua era na raica vakawasoma kina na lewe ni vuvale. Sureti ira tale eso na lewe ni vuvale me ra vakaitavi kece ena kena digitaki e dua na ivolanikalou me dau vakaraitaki.

Cakava e dua na lisi ni ivolanikalou

Vakamatavuvale, digia e vica na tikina o na vinakata me veitalanoataki ena macawa ka tarava.

Vulica vaka‑vakanananu na ivolanikalou

Digia e dua na ivolanikalou e vakaibalebale ki na nomu vuvale, ka sureti ira na leweni vuvale me ra vulica vaka‑vakanananu ni ra cavuta vakavica vata ena veisiga se qitora e dua na qito ni cavuqaqa.

Wasea nai ivakaraitaki ni lesoni e vakaibalebale.

Vakasaqara eso na ivakaraitaki ni lesoni ena wase se tikina e wilika tiko na nomu matavuvale. Sureta na leweni vuvale me ra veitalanoataka na kedrau isema na ivakaraitaki kei na ivakavuvuli ena ivolanikalou.

Digia e dua nai ulutaga

Me ra veivukevuke na leweni vuvale ena digitaki ni ulutaga ena vulica vata na matavuvale. Vakayagataka na Topical Guide, na Bible Dictionary, se na Guide to the Scriptures (scriptures.ChurchofJesusChrist.org) mo raica na tiki ni volanikalou eso me baleta na ulutaga.

Droinitaka e dua na iyaloyalo

Wilika vata vakamatavuvale eso na tikina, ka qai solia na gauna vei ira na lewe ni vuvale me ra droinitaka e dua na ka e sema vata kei na veika dou sa wilika. Taura na gauna mo dou veitalanotaka na nomudou dui droini.

Vakatasuasuataka e dua na italanoa

Ni wiliki oti e dua na italanoa, sureti ira na lewe ni vuvale me ra vakamatanataka. Ni oti oya, veitalanoataka na isema ni talanoa kina veika dou sotava yadua tiko se vakamatavuvale.

Nodra Vakavulici na Gonelalai

Kevaka era tiko na gonelalai ena nomu vuvale, oqo eso na itaviqaravi ena rawa ni vukei ira me ra vuli:

Lagata

na Sere ni Lotu kei na sere mai na Nodra iVolanisere na Lalai e vakavulica vagumatua na ivunau. Na ituvatuva yadua ena ivola oqo e oka kina e dua na sere vakaturi. Sa rawa mo vakayagataka talega na ituvatuva vakaivola ena daku ni Nodra iVolanisere na Lalai mo kunea kina na sere e veiwekani kei na ivakavuvuli ni kosipeli o vakavulica tiko. Vukei ira na luvemu me ra semata na itukutuku ni sere ki na nodra bula.

Vakarogoca se matanataka e dua na italanoa.

Era dau taleitaka na gonelalai sobu na italanoa—mai na ivolanikalou, mai na nomu bula, mai na itukutuku makawa ni Lotu, se mai na mekesini ni Lotu. Vakasaqara na sala me vakaitavitaki ira ena tukuni ni italanoa. E rawa ni ra taura tu na iyaloyalo se iyaya, droinitaka na iyaloyalo me baleta na veika era rogoca tiko, matanataka na italanoa, se veivuke ena tukuni ni italanoa. Vukei ira na luvemu me ra raica donu na dina vakosipeli ena italanoa o wasea.

Wilika a dua na ivolanikalou.

Era sega beka ni rawa ni wilivola vakalevu na gonelalai sobu, ia se rawa tikoga ni o vakaitavitaki ira ena vuli mai na ivolanikalou. O na gadreva beka mo vakanamata ga ena dua na tikina, malanivosa bibi, se vosa.

Raica toka e dua na iyaloyalo se sarava e dua na vidio.

Taroga na taro me baleta e dua na iyaloyalo se vidio e semati ki na ivakavuvuli ni kosipeli o wasea tiko. Kena ivakaraitaki, e rawa ni o taroga, “Na cava e yaco tiko ena iyaloyalo se vidio oqo? Na cava o a vakila mai kina?” Na Gospel Library app, na Kosipeli ni Laibari ni itukutuku vakaraitaki ena ChurchofJesusChrist.org, kei na children.ChurchofJesusChrist.org sa vanua vinaka me raici kina na iyaloyalo kei na vidio.

Bulia

E rawa vei ira na gone mera bulia, droinitaka, se rokataka na ka e veisemati ki na italanoa se ivakavuvuli era vulica tiko.

Vakaitavi ena lesoni ivakaraitaki.

E dua na lesoni ivakaraitaki ena rawa ni vukei ira na luvemu me ra kila vinaka na ivakavuvuli ni kosipeli ena via dredre me ra kila. Ni vakayagataki tiko na lesoni ivakaraitaki, vakasaqara na sala me ra vakaitavi kina na luvemu. Ena levu cake na ka era vulica ni ra na vakaitavi tiko, mai na nodra sarava walega e dua na ka e vakaraitaki tiko.

Vakatasuasua

Ni ra vakatasuasuataka na gone e dua na ituvaki e rawa ni ra sotava ena nodra bula, sa rawa me ra kila vakavinaka cake na iwalewale ena yaga kina ena nodra bula e dua na ivakavuvuli ni kosipeli.

Tokaruataki na itaviqaravi.

Era na gadreva na gonelalai sobu me ra rogoca vakavica e dua na vakasama me ra qai kila. Me vakataka, o na wasea beka e dua na italanoa ni ivolanikalou vakavica vata ena sala duidui eso—wilika mai na ivolanikalou, vakalekalekataka ena nomu vosa ga, vakatara me ra vukei iko na luvemu mo talanoataka e dua na italanoa, ka sureti ira me ra matanataka na italanoa, kei na so tale.

Semata vata ki na nodra takete ni torocake yadudua

Na vuli ivolanikalou vakamatavuvale e rawa ni solia na veivakauqeti me baleta na itabagone kei na gonelalai me ra vakotora na takete me baleta na nodra tubu vakayalo, vakayago, vakasama, kei na bula veimaliwai (raica na Luke 2:52).

Nodra Vakavulici na iTabagone

Kevaka era tiko na itabagone ena nomu vuvale, oqo eso na itaviqaravi ena rawa ni vukei ira me ra vuli:

Sureta ira mera na wasea.

Eda dau vulica vakalevu cake na gauna eda vakavulica kina e dua na ka mai noda rogoca walega. Solia na madigi vei ira na nomu itabagone mera liutaka na veivosaki vakamatavuvale me baleta na ivolanikalou.

Semata ki na semineri

Ena yabaki oqo era na vulica tiko na gonevuli ni semineri na Vunau kei na Veiyalayalati. Kevaka era sa lewena na nomu itabagone na semineri, sureti ira me ra wasea na veika era sa vulica tiko e kea.

Vakatauvatana na ivolanikalou

Eso na gauna era dau sotava na itabagone na dedre mera semata na vunau kei na ivakavuvuli ena ivolanikalou ki na nodra bula. Vukei ira mera raica na italanoa kei na ivakavuvuli ni ivolanikalou e semati vakacava ki na veituvaki yadua era sotava e vale, e koronivuli, se vata kei ira na nodra itokani.

Taroga na taro ena vakauqeta na vakasama vakatitobu

E vuqa na itabagone era sauma vinaka na taro ka rawa kina vei ira me ra vakaraitaka na nodra vakanananu kei na veika vakilai me baleta na ivolanikalou ka sega ni tokaruataka ga na veika e tukuna na ivolanikalou. Me vakataka, o rawa ni taroga, “Na cava beka e vakavulica tiko na Turaga vei iko ena veitikina oqo?” se “Na cava o nanuma ni a rawa ni vakaibalebale kina na ivakatakila oqo vei ira na Yalododonu ena 1830?”

Semata vata ki na nodra takete ni torocake yadudua

Na vuli ivolanikalou vakamatavuvale e rawa ni solia na veivakauqeti vei ira na itabagone kei na gonelalai me ra vakotora na takete me baleta na nodra tubu vakayalo, vakayago, vakasama, kei na bula veimaliwai (raica na Luke 2:52).

Dau dolavi iko ki na nodra taro

Na taro mai vua e dua na itabagone sa madigi vakamareqeti me ra wasea na dina ka vakasaqara na kila‑ka ena dua na ulutaga sa malele dina kina o koya. Kakua ni rerevaka na taro se biuta tani, kevaka sara mada ga era sega ni veisemati ki na iulutaga ni veivosaki. Sa ikoya tiko, kevaka e sega vei iko na isau ni taro kecega. Na vuvale sa ikoya na vanua uasivi duadua mera vakaraica vata kina na isau ni taro.

Vakayaloqaqataki ira mera mai wasea na nodra raititobu eso.

Sa tu vei ira na itabagone na raititobu kei na vakasama totoka mera cau kina ki na vuli ivolanikalou vakamatavuvale. Me ra kila ni ko kauwaitaka na veika e vakavulici ira kina na Yalotabu me baleta na ivolanikalou. E rawa sara mada ga mo kerei ira me ra wasea na raititobu eso mai na nodra vuli yadua.

Mo vakarawarawataka

Kevaka e tiko e dua na itabagone ka ra sega ni tu vakarau me ra na vakaitavi ena vulici ni ivolanikalou vakamatavuvale, vakaraica eso na sala mera semati koya kina. Me vakataka, e rawa ni o kauta mai na kosipeli vakai iko ena nomu veivosaki se wasea e dua na ivolanikalou e vakaibalebale cake ena dua na sala ni sega ni vunau se veivakasaurarataki vakasivia? Na vulici ni ivolanikalou e sega ni dodonu me ra tautauvata ena veimatavuvale yadua. Eso beka era na vinaka cake ni ra vulica na ivolanikalou vakayadudua. Mo dau masu ka vakamuria na veivakauqeti ni Yalotabu.

E kaya o Peresitedi Russell M. Nelson: “Au yalataka ni ko cakacaka vagumatua mo vakatura vou nomuni itikotiko me vale ni vuli kosipeli, ena yaco nomuni Siga ni Vakacecegu me ka rekitaki vakaidina. Era na nanamaki na luvemuni mera vulica ka bulataka na ivakavuvuli ni iVakabula, ka me na yaco na veiuqeti nei vunimeca ena nomuni bula kei na nomuni itikotiko me malumalumu. Eso na veisau ena nomu matavuvale ena vakalevutaki ka veitokoni” (“Yaco mo iVakaraitaki Yalododonu Edaidai,” Ensign se Liaona, Nove. 2018, 113).