Fakamoʻui ʻi Hono Toʻukupú, tā ʻe Jon McNaughton

4–10 Māʻasi.

Mātiu 8–9; Maʻake 2–5

“Kuo Fakamoʻui Koe ʻe Hoʻo Tuí”

ʻI hoʻo lau ʻa e Mātiu 8–9 mo e Maʻake 2–5, ʻai ke ke ongoʻingofua e ngaahi ueʻi te ke maʻu mei he Laumālie Māʻoniʻoní. ʻE lava ke ke hiki e ngaahi ueʻi ʻokú ke maʻú mo e ngaahi meʻa te ke lava ʻo fai ke ke talangofua ai ki he ngaahi ueʻi ko iá.

Lekooti e Ngaahi Ongo ʻOkú ke Maʻú

ʻOku faingataʻa ke te lau ʻa e Fuakava Foʻoú taʻe mālieʻia ʻi he ngaahi fakamatala ki he faifakamoʻui ʻa e Fakamoʻuí ki he kau fokoutuá mo e faingataʻaʻiá—ʻa e tokotaha kotoa pē, mei he fefine naʻe mofí ki he kiʻi taʻahine naʻe pehē kuo maté. Ko e hā nai ha ngaahi pōpoaki heni maʻatautolu ʻi he ngaahi mana ko ʻeni ʻo e faifakamoʻui fakatuʻasinó? Ko hono moʻoní ko ha pōpoaki mahino ʻe taha ko Sīsū Kalaisi ko e ʻAlo Ia ʻo e ʻOtuá, ʻokú Ne maʻu ʻa e mālohi ki he meʻa kotoa pē, ʻo kau ai ʻetau ngaahi mamahi fakatuʻasinó mo e tōnounoú. Ka ko ha ʻuhinga ʻe taha, ʻoku hā ia ʻi Heʻene folofola ki he kau tangata tohi taʻetuí: “Ka koeʻuhí ke mou ʻilo ʻoku ʻi he Foha ʻo e tangatá ʻa e mālohi ʻi māmani ke fakamolemole ʻa e angahalá” (Maʻake 2:10). Pea ʻi hoʻo laukonga fekauʻaki mo hano fakamoʻui ʻo ha tokotaha kui pe kilia, ʻe lava ke ke fakakaukau ki he faifakamoʻuí—fakalaumālié mo e fakatuʻasinó fakatouʻosi—te ke lava ʻo maʻu mei he Fakamoʻuí pea fanongo ki Heʻene folofola atu kiate koe, “Kuo fakamoʻui koe ʻe hoʻo tuí” (Maʻake 5:34).

Ngaahi Fakakaukau ki hono Ako Fakataautaha ʻo e Folofolá

Mātiu 8–9; Maʻake 2; 5

ʻE lava ke fakamālohia ʻe he Fakamoʻuí ʻa e kau vaivaí mo e mahamahakí.

ʻOku lekooti ʻi he ngaahi vahe ko ʻení ha ngaahi sīpinga ʻo e ngaahi faifakamoʻui fakaofo ne fakahoko ʻe he Fakamoʻuí. ʻI hoʻo ako e ngaahi faifakamoʻui ko ʻení, fekumi ki ha ngaahi pōpoaki ʻe ala tokoni kiate koé. Mahalo te ke fehuʻi loto pē kiate koe: Ko e hā ʻoku akoʻi mai ʻe he fakamatalá fekauʻaki mo e tuí? Ko e hā ʻoku akoʻi mai ʻe he fakamatalá fekauʻaki mo e Fakamoʻuí? Ko e hā ʻoku finangalo e Tamai Hēvaní ke u ako mei he mana ko ʻení?

• Ko ha tangata naʻe kilia (Mātiu 8:1–4)

• Ko ha tamaioʻeiki ʻa ha ʻeikitau (Mātiu 8:5–13)

• Ko e faʻē ʻi he fono ʻa Pitá (Mātiu 8:14–15)

• Ko ha ongo tangata kui (Mātiu 9:27–31)

• Ko ha tangata naʻe mahaki tete (Maʻake 2:1–12)

• Ko ha tangata naʻe teʻia ʻe he laumālie ʻulí (Maʻake 5:1–20)

• Ko e ʻofefine ʻo Sailosí (Maʻake 5:22–23, 35–43)

• Ko ha fefine naʻe fokoutua ʻi he ʻau totó (Maʻake 5:24–34)

Vakai foki, Dallin H. Oaks, “Fakamoʻui ʻo e Mahakí,” Ensign pe Liahona, Mē 2010, 47–50.

Ko Hono Fakamoʻui ʻe Sīsū ʻa e Mahakí, tā fakatātaaʻi ʻe Joseph Brickey, ʻo fakatatau kia Heinrich Hofmann

Mātiu 8:5–13; Maʻake 5:24–34

Te u lava ʻo fekumi ki he tokoni ʻa e ʻOtuá neongo ʻeku ongoʻi taʻetāú.

Naʻe ongoʻi taʻetaau ha ʻeikitau, ko ha Senitaile, ke hūfia ʻe he Fakamoʻuí hono ʻapí. Naʻe lau ʻoku taʻemaʻa ʻa e fefine naʻe fokoutua ʻi he ʻau totó pea naʻe motuhi ia mei he sosaieti faka-Siú. Ka naʻe tāpuekina fakatouʻosi kinaua ʻe he Fakamoʻuí. Ko e hā ʻokú ke ako mei he ongo fakamatalá ni fekauʻaki mo e kumi tokoni ki he ʻEikí?

Mātiu 8:18–22; Maʻake 3:31–35

ʻOku ʻuhinga e hoko ko ha ākonga ʻa Sīsū Kalaisí ke u fakamuʻomuʻa Ia ʻi heʻeku moʻuí.

Naʻe akoʻi ʻe Sīsū ʻi he ngaahi veesi ko ʻení, ʻi heʻetau hoko ko ia ko ʻEne kau ākongá ʻoku fie maʻu ke tau fakamuʻomuʻa Ia ʻi heʻetau moʻuí, ʻo tatau ai pē kapau ʻe iku ke tau feilaulauʻi ai e ngaahi meʻa kehe ʻoku tau mahuʻingaʻia aí. ʻI hoʻo ako e ngaahi potufolofola ko ʻení, fakalaulauloto ki hoʻo tuʻunga fakaākongá. Ko e hā hono ʻuhinga kuo pau ai ke loto-fiemālie e kau ākongá ke ʻuluaki fakamuʻomuʻa ʻa e Fakamoʻuí? Ko e hā ha meʻa ʻe fie maʻu ke ke tukuange kae lava ke ʻuluaki fakamuʻomuʻa ʻa Sīsū? (Vakai foki, Luke 9:57–62.)

Mātiu 8:23–27; Maʻake 4:35–41

ʻOku maʻu ʻe Sīsū Kalaisi ʻa e mālohi ke fakanonga e ngaahi haʻahaʻa ʻo e moʻuí.

Kuo ʻi ai nai ha taimi kuó ke ongoʻi tatau ai mo e kau ākonga ʻa Sīsuú ʻi heʻenau fepaki mo e matangi ʻi he tahí—ne nau mamata ki hono fakafonu ʻe he ngaahi peaú ʻa e vaká pea nau fehuʻi, “ʻEiki, ʻoku ʻikai te ke tokangaʻi te tau mate?”

Te ke maʻu ʻi he Maʻake 4:35–41, ha ngaahi fehuʻi ʻe fā. Hiki kinautolu takitaha, pea fakalaulauloto ki he meʻa ʻokú ne akoʻi atu fekauʻaki mo e fehangahangai ko ia mo e ngaahi faingataʻa ʻo e moʻuí ʻi he tui kia Sīsū Kalaisí. ʻOku fakanonga fēfē ʻe he Fakamoʻuí e ngaahi matangi ʻi hoʻo moʻuí?

Mātiu 9:1–13; Maʻake 2:15–17

Te u lava ʻo taukaveʻi ʻeku tuí ʻaki hono akoʻi e ngaahi tefitoʻi moʻoni ʻoku moʻoní.

ʻOku faʻa faingataʻa ke ʻiloʻi e founga ke tali ʻaki hono fakaangaʻi ʻe he kakaí ʻetau tuí mo e ngaahi tōʻonga fakalotú. ʻI hoʻo lau ʻa e Mātiu 9:1–13 mo e Maʻake 2:15–17, fekumi ki he ngaahi fakaanga ʻa e kau fakatangá mo e tali naʻe fai ʻe he Fakamoʻuí. ʻE lava ke ke fakaʻilongaʻi lanu kehekehe e ngaahi fakaangá mo e ngaahi talí pe hiki hifo kinautolu. Ko e hā ʻokú ke fakatokangaʻi ʻi he founga akoʻi ʻa e Fakamoʻuí? ʻE hoko fēfē ʻa e muimui ki Heʻene tā sīpingá ke tokoniʻi koe ʻi hoʻo taukaveʻi ha tefitoʻi moʻoni ʻo e ongoongoleleí pe tōʻonga moʻui ʻa e Siasí?

Vakai foki ki he vitiō, “Everyday Example: When Beliefs Are Questioned” (LDS.org).

Mātiu 9:1–8

Te u lava ʻo fiefia, koeʻuhí ko e fakatomalá.

ʻI he taimi naʻe ʻomi ai ha tangata mahaki tete ki he Fakamoʻuí, naʻe mahino ki he kakaí naʻe fie maʻu ke fakamoʻui fakatuʻasino ia. Ka naʻe ʻuluaki fakahā ʻe Sīsū ʻa e fie maʻu vivili ʻa e tangatá—ke fakamolemoleʻi ʻene ngaahi angahalá. Neongo kapau ne ʻikai fakamoʻui fakatuʻasino ʻa e tangatá, ka te ne kei lava pē ʻo muimui ʻi he akonaki ʻa Sīsū “ke ke fiemālié” (Mātiu 9:2). Ko e fē nai ha taimi naʻá ke ongoʻi fiefia ai koeʻuhí kuo fakamolemoleʻi koe? (Vakai foki, ʻAlamā 36:18–24.)

Ngaahi Fakakaukau ki hono Ako Fakafāmili ʻo e Folofolá mo e Efiafi Fakafāmili ʻi ʻApí

ʻI hoʻo hokohoko atu ke ako mo ho fāmilí fekauʻaki mo e ngāue fakafaifekau ʻa e Fakamoʻuí, ʻe lava ke tokoniʻi koe ʻe he Laumālié ke ke ʻiloʻi e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu ho fāmilí. Ko ha ngaahi fokotuʻu fakakaukau ʻeni:

Mātiu 8–9; Maʻake 2; 5

ʻE lava ke ke faʻu ha lisi ʻo e ngaahi mana ʻoku fakamatalaʻi ʻi he ngaahi vahe ko ʻení pea fekumi ki honau ngaahi fakatātaá (vakai ki he Tohi Fakatātā ʻo e Ongoongoleleí pe LDS.org). Te ke lava ʻo kole ki he mēmipa takitaha ʻo e fāmilí ke nau fakamatalaʻi ha taha ʻo e ngaahi maná (ʻo fakaʻaongaʻi ha fakatātā kapau ʻe maʻu) pea vahevahe e meʻa ne nau ako mei aí. Te ke lava ʻo vahevahe ha niʻihi ʻo e ngaahi mana kuó ke aʻusia pe laukonga ki ai ʻi he hisitōlia ʻo e Siasí ʻi he kuonga ní.

Mātiu 9:10–13

Ko e hā ʻoku tau ako mei he founga hono tali ʻe he Fakamoʻuí ʻa e kau tānaki tukuhaú mo e kau faiangahalá, ʻa ia naʻe fakasītuʻaʻi ʻe he niʻihi kehé? Te tau lava fēfē ke muimui ki Heʻene tā sīpingá ʻi heʻetau feohi mo e niʻihi kehé?

Mātiu 9:36–38

Te ke tokoni fēfē ke mahino ki ho fāmilí e kole ʻa e Fakamoʻuí ki ha kau ngāue ke tokoni ki hono vahevahe e ongoongoleleí? Te mou lava ʻo fai ha ngāue hangē ko hoʻomou fetokoniʻaki ʻi hono fai ha ngāue faingofua ʻa ia ne mei lōloa ange hano fakahoko ʻe ha toko taha pē, hangē ko hono fakamaau e peitó hili e maʻu meʻatokoni efiafí. Ko e hā ʻe lava ke tau fai ke vahevahe e ngaahi pōpoaki ʻo e ongoongoleleí?

Maʻake 4:35–41

ʻE lava nai ke tokoni e fakamatala ko ʻení ki he kau mēmipa ʻo e fāmilí ʻi he taimi ʻoku nau ongoʻi manavahē aí? Mahalo naʻa lava ke nau lau ʻa e veesi 39 pea vahevahe e ngaahi aʻusia ʻi he taimi naʻe tokoniʻi ai kinautolu ʻe he Fakamoʻuí ke nau ongoʻi nonga lolotonga e ngaahi moveuveú pe manavasiʻí.

Ki ha ngaahi fakakaukau lahi ange ki hono ako’i ‘o e fānaú, vakai ki he lesoni ʻo e uike ko ‘eni ʻi he Haʻu, ‘o Muimui ʻIate Au— Ki he Palaimeli.

Fakatupulaki ʻEtau Founga Akoʻí

Fakafaingamālieʻi mo anga fakafaingofua. ʻOku kamata ha niʻihi ʻo e ngaahi momeniti akoʻi lelei tahá ʻi he ngaahi fehuʻi pe loto hohaʻa ʻa e kau mēmipa ʻo e fāmilí. Tuku ke ʻiloʻi ʻe he kau mēmipa ʻo e fāmilí hoʻo vēkeveke ke fanongo kiate kinautolú ʻaki hoʻo leá mo e tōʻongá (vakai, Faiako ʻi he Founga ʻa e Fakamoʻuí, 16).

Ko Kalaisi mo e Tangata Mahaki Teté, tā ʻe J. Kirk Richards