“4–10 Māʻasi. Mātiu 8–9; Maʻake 2–5: ‘Kuo Fakamoʻui Koe ʻE Hoʻo Tuí’” Haʻu, ʻo Muimui ʻIate Au—Maʻá e Palaimelí: Fuakava Foʻou 2019 (2019)
“4–10 Māʻasi. Mātiu 8–9; Maʻake 2–5,” Haʻu, ʻo Muimui ʻIate Au—Maʻá e Palaimelí: 2019
Fakamoʻui ʻi Hono Kapakaú, tā ʻe Jon McNaughton
4–10 Māʻasi
Mātiu 8–9; Maʻake 2–5
“Kuo Fakamoʻui Koe ʻE Hoʻo Tuí”
Kamata ʻaki hono lau e Mātiu 8–9 mo e Maʻake 2–5. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e ngaahi vahe ko ʻení, pea lava ke ʻoatu ʻe he lēsoni ko ʻení ha ngaahi fakakaukau ki hono akoʻí.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Kole ki he fānaú ke nau vahevahe ha talanoa ne fakahoko ai ʻe Sīsū ha mana (vakai ki he lisi ʻo e ngaahi maná ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Te ke lava foki ʻo fakaʻaliʻali ha ngaahi fakatātā ʻoku fekauʻaki mo iá (vakai ki he Tohi Fakatātā ʻo e Ongoongoleleí, fika 40, 41, pe LDS.org).
Akoʻi e Tokāteliné
Fānau Iiki Angé
ʻOku maʻu ʻe Sīsū e mālohi ke fakahoko ha ngaahi mana.
ʻI hoʻo lau fekauʻaki mo e ngaahi mana ʻo e Fakamoʻuí, fakalaulauloto ki he ngaahi mana ke vahevahé. Te ke tokoniʻi fēfē e fānau ʻokú ke akoʻí ke mahino e fatongia ʻo e tuí ʻi he ngaahi mana ne fakahoko ʻe Sīsuú?
Ngaahi ʻEkitivitī ʻe Ala Fakahokó
-
Vahevahe e talanoa ʻo e tangata naʻe mahaki teté mei he tohi ʻa Maʻake 2:1–12. Ki ha tokoni, vakai ki he “Vahe 23: Ko e Tangata Pipikí,” Ngaahi Talanoa ʻo e Fuakava Foʻoú, 57–58, pe vitiō fekauʻakí (LDS.org). Talaange ki he fānaú naʻe ʻikai lava e tangata ne mahaki teté ʻo lue. Tokoniʻi ke mahino kiate kinautolu, naʻe fakamoʻui pea fakamolemoleʻi e tangata ko ʻení ʻe he Fakamoʻuí.
-
ʻI hoʻomou lau e Maʻake 5:22–23, 35–43 fakaafeʻi e fānaú ke nau pehē pē ʻoku nau “ʻā hake” hangē ko e ʻofefine ʻo Sailosí. Tokoni ke mahino kiate kinautolu, kuo ngaohi ʻe Sīsū ke tau malava kotoa ʻo maʻu e moʻui taʻengatá.
-
Lau ʻa e Maʻake 5:34. Tokoniʻi e fānaú ke nau ako maʻuloto ʻa e kupuʻi lea “Kuo fakamoʻui koe ʻe hoʻo tuí,” ʻaki hono ʻoange ki he fānau takitaha ha foʻi lea pea tuku ki he fānaú ke nau puʻaki ʻenau ngaahi leá ʻi he hokohoko tatau. Kuo ʻi ai nai ha taha ʻoku nau ʻilo, kuo fakamoʻui kinautolu ʻi he taimi naʻa nau puke aí?
-
Kole ki he fānaú ke kuikui honau matá pea fakafanongo Ki hoʻo lau mei he Mātiu 9:27–30. ʻI hoʻo lau fekauʻaki mo hono fakamoʻui ʻe Sīsū e kakai tangata kuí, fakaafeʻi e fānaú ke ʻāʻā honau matá. ʻE ongoʻi fēfē nai ʻa e fānaú kapau ne fakamoʻui kinautolu ʻe Sīsū?
-
Fakaafeʻi ʻa e fānaú ke nau talanoa fekauʻaki mo ha taimi ne nau puke ai. Fai e taha ʻo e ngaahi talanoa hono fakamoʻui ʻe Sīsū e mahakí, pea fakamoʻoniʻi ʻoku lava ʻe he mālohi ʻo Sīsuú ʻo fakamoʻui mo tāpuekina kitautolu ʻi heʻetau lotu mo maʻu e ngaahi tāpuaki ʻo e lakanga fakataulaʻeikí. Fakamatalaʻi ange neongo ko e taimi ʻe niʻihi ʻoku ʻikai foaki ʻe he ʻEikí kiate kitautolu ʻa e ngaahi mana ʻoku tau fie maʻú, ʻokú Ne ʻofeina kitautolu mo ʻafioʻi ʻetau ngaahi fie maʻú. Te Ne foaki mai e nonga ʻoku tau fie maʻú.
ʻI he taimi ʻoku ou manavasiʻi ai mo ʻi ha tuʻunga fakatuʻutāmakí, ʻoku lava ʻe Sīsū ke ne tokoniʻi au ke u ongoʻi nonga.
ʻE lava ke tokoni e talanoa ki hono fakanonga ʻe Sīsū e matangí, ke ʻiloʻi ʻe he fānaú ʻe lava ke Ne foaki kiate kinautolu e nongá ʻi he taimi ʻoku nau ongoʻi manavasiʻi aí.
Ngaahi ʻEkitivitī ʻe Ala Fakahokó
-
Tokoniʻi e fānaú ke nau fakakaukau ʻoku nau ʻi ha vaka, ʻi hoʻo lau e Maʻake 4:35–41. (Vakai foki, “Vahe 21: Ko Hono Lolomi ʻe Sīsū ʻa e Matangí mo e Tahí,” Ngaahi Talanoa ʻo e Fuakava Foʻoú, 53. Kole ki he fānaú ke nau fakamatalaʻi ha ongo te nau mei maʻu kapau ne nau ʻi ai. Ko e fē nai e taimi ne ilifia ai e fānaú? Ne nau maʻu fēfē e nongá?
-
Fakaafeʻi ʻa e fānaú ke nau ʻai e ongo ʻo ha matangi pea taʻofi ʻi he taimi ʻe pehē ai ʻe ha tokotaha “Fiemālie, peá ke toka lelei.” Fakamoʻoni ange, hangē ko hono lava ʻe Sīsū ke ʻomi e nongá he taimi ʻoku matangi ai ʻa tuʻá, te Ne lava ʻo ʻomi e nongá ki hotau lotó, ʻi he taimi ʻoku ʻikai ke tau ongoʻi lelei ʻi lotó.
-
Fakakaukau ki ha ngaahi ngāue ke fakatātaaʻi fakataha e veesi hono tolu ʻo e “Talamai ʻa e Ngaahi Talanoa ʻo Sīsū,” Tohi Hiva ʻa e Fānaú, 36.
Fakanonga ʻe Kalaisi ʻa e Matangí, tā ʻe Robert T. Barrett
Akoʻi e Tokāteliné
Fānau Lalahi Angé
ʻE lava ke fakahoko ʻe Sīsū ʻa e ngaahi mana ʻi heʻeku moʻuí ʻi heʻeku tui kiate Iá.
Naʻe fakahoko ʻe Sīsū ha ngaahi mana lahi lolotonga ʻEne ngāue ʻi he māmaní. Te ke lava fēfē ʻo tokoniʻi e fānaú ke nau fakatokangaʻi ʻoku hoko ha ngaahi mana ʻi he kuongá ni?
Ngaahi ʻEkitivitī ʻe Ala Fakahokó
-
Kole ki he fānaú ke nau fili ha taha ʻo e ngaahi mana ko ʻení, ke lau mo tā fakatātaaʻi: Maʻake 2:1–12; Maʻake 5:22–23, 35–43; pe Maʻake 5:24–34. Fakaafeʻi e fānaú ke nau fakamatalaʻi ʻenau ngaahi fakatātaá ki he kalasí. Ko e hā ʻoku nau ako fekauʻaki mo Sīsū ʻi he ngaahi talanoa ko ʻení?
-
Kole ki he fānaú ke nau fakatātaaʻi ʻenau ongo ʻi he taimi ʻoku nau puke, loto mamahi, manavahē, pe loto hohaʻa aí. ʻE tokoni fēfē kitautolu ʻe Sīsū ʻi he taimi ʻoku tau maʻu ai e ngaahi ongo ko ʻení? Fakamoʻoniʻi ange ʻoku lava ke tokoniʻi ʻe Sīsū ʻa e fānaú ʻi he ngaahi tūkunga kotoa ko ʻení.
-
Fakaafeʻi e fānaú ke nau vahevahe ʻenau ngaahi aʻusia ʻi he taimi ne nau maʻu ai pe ko ha tokotaha ʻoku nau ʻilo, ʻa e tāpuaki ʻo e lakanga fakataulaʻeikí. Naʻe fakamoʻui pe tāpuekina fēfē e tokotaha ko iá?
Te u lava ʻo fakahaaʻi ʻeku ʻofá ki he niʻihi kehé ʻo hangē pe ko Sīsuú.
Naʻe fakahaaʻi ʻe Sīsū ʻa e ʻofa lahi ʻaki hono fakamoʻui e mahakí mo e faingataʻaʻiá. Fakalaulauloto ki he founga te ke lava ʻo akoʻi ʻaki e fānaú ke nau ʻofa ki he kakai ʻoku nau tukuhausiá.
Ngaahi ʻEkitivitī ʻe Ala Fakahokó
-
Fili ha taha pe lahi ange ʻo e ngaahi mana ne fakahoko ʻe Sīsuú, ke toe vakaiʻi fakataha mo e fānaú, hangē ko ia ʻi he Maʻake 2:1–12; Maʻake 5:22–23, 35–43; pe Maʻake 5:24–34. (Vakai foki ki he ngaahi vitiō “Ko e Fakamolemoleʻi ʻe Sīsū e Ngaahi Angahalá mo Fakamoʻui ha tangata ne Mahakitete,” ʻi he LDS.org.) Fakaafeʻi e fānaú ke nau vahevahe ha taimi ne nau tokoniʻi ai ha tokotaha naʻe fie maʻu tokoni, pea naʻe fēfē ʻenau ongoʻí.
-
Fakamanatu ki he fānaú, ko e konga ʻo ʻenau ngaahi fuakava ʻi he papitaisó, ko hono tokoniʻi e niʻihi kehé (vakai, Mōsaia 18:8–10; ʻAlamā 34:28).
ʻI he taimi ʻoku ou manavasiʻi ai mo ʻi ha tuʻunga fakatuʻutāmakí, ʻoku lava ʻe Sīsū ke ne tokoniʻi au ke u ongoʻi nonga.
ʻOku fie maʻu ke ʻiloʻi ʻe he fānaú, ʻe lava ke foaki ʻe he Fakamoʻuí ʻa e nongá kiate kinautolu, ʻi he taimi ʻoku nau fehangahangai ai mo e ngaahi faingataʻa ʻo e moʻuí—ʻi he taimí ni pea ʻi he kahaʻú.
Ngaahi ʻEkitivitī ʻe Ala Fakahokó
-
Kole ki he taha ʻo e fānaú ke ne fakaʻaongaʻi e Maʻake 4:35–41 mo e fakatātā Ko Hono Fakanonga ʻe Sīsū ʻa e Matangí (Tohi Fakatātā ʻo e Ongoongoleleí, fika 40) ke fai e talanoa ʻo hono fakanonga ʻe Sīsū e matangí. Kole ki he fānaú ke nau fakamatalaʻi ha ongo ne nau mei maʻu kapau ne nau ʻi ai.
-
Fakaafeʻi e fānaú ke nau vahevahe ʻenau ngaahi aʻusia ʻi he taimi ne nau ongoʻi nonga ai hili haʻanau lotua ha tokoni. Fakamanatu ange, ʻoku maʻu e nonga ko ʻení mei he Fakamoʻuí.
-
Hivaʻi fakataha mo e fānaú e “Naʻe Tala pē ʻe Sīsū,” Ngaahi Himí, fika 51, ʻo fakaafeʻi kinautolu ke nau fanafana ʻi he taimi te nau hiva ai “Kātakí.”
-
ʻOange ki he fānau takitaha ha laʻipepa konga ʻao ʻuha, pea kole ange ke nau tohiʻi ai ha faingataʻa ʻoku ala tofanga ai ha taha. Fakatahatahaʻi e ngaahi konga ʻaó ʻi he palakipoé, ʻo fakapuliki ha fakatātā ʻo e Fakamoʻuí. Fakaafeʻi e tokotaha ke ne toʻo ha taha ʻo e ngaahi konga ʻaó, pea fokotuʻu ange e ngaahi founga te tau ala tokoniʻi ai ha tokotaha ʻokú ne tofanga ʻi he faingataʻa ko iá, ke ne maʻu ha nonga. ʻI he ʻosi kotoa e ngaahi konga ʻaó hono toʻó, fakamoʻoniʻi ange e mālohi ʻo e Fakamoʻuí ke fakanonga e ngaahi faingataʻa ʻi heʻetau moʻuí.
Poupouʻi e Ako ʻi ʻApí
Tokoniʻi e fānaú ke nau hiki ha foʻi ngāue tokoni te nau fakahoko maʻa ha tokotaha ʻi he uiké ni.
Fakatupulaki ʻEtau Akoʻí
ʻOku longomoʻui ʻa e fānaú. Te ke ongoʻi ʻi ha ngaahi taimi ʻoku tohoakiʻi ʻa e ivi ʻo e fānaú mei he akó. Ka te ke lava ʻo langa ʻi honau ngaahi natula longomoʻuí ʻaki hono fakaafeʻi kinautolu ke nau fakatātaaʻi ha talanoa pe fai ha ngaahi ngāue ʻoku fehokotaki mo ha ngaahi meʻa ʻoku hoko ʻi ha foʻi hiva pe folofola. (Vakai Ko e Faiako ʻi he Founga ʻa e Fakamoʻuí, 25.)