Vahe 23
Ko e Tangata Pipikí
ʻI he ʻaho ʻe taha ne akoʻi ʻe Sīsū ha falukunga kakai ʻi ha fale.
Naʻe fata mai ʻe ha kau tangata hanau kaungāmeʻa ʻi ha mohenga ke ʻave kia Sīsū. Naʻe ʻikai lava honau kaungāmeʻá ʻo ʻalu. Ne ʻikai lava ke fakahū ʻe he kau tangatá ia ki fale koeʻuhí ko e fonu ʻa e kakaí.
Naʻe ʻave ʻe he kau tangatá honau kaungāmeʻá ki he funga falé. Naʻa nau toʻo e konga ʻo e ʻató pea tukutuku hifo ai honau kaungāmeʻá ki he loto falé.
ʻI he mamata ʻa Sīsū ki he fuʻu tui lahi pehē ʻa e kau tangatá, naʻá Ne tala ange ki he tangata mahakí kuo fakamolemole ʻene ngaahi angahalá. Naʻá Ne tala ange ke toʻo hono mohengá pea ʻalu ki ʻapi. Naʻe tuʻu e tangatá ki ʻolunga. Kuo fakamoʻui ia. Naʻá ne toʻo hono mohengá pea ʻalu ki ʻapi. Naʻá ne fakamālō ki he ʻOtuá.