Vahe 10

Ko Hono Papitaiso ʻo Sīsuú

Naʻe nofo ʻa Sione he toafá ʻi ha ngaahi taʻu lahi. Naʻá ne tui ha ngaahi kofu fulufuluʻi kāmeli, pea naʻá ne kai ʻa e heʻe mo e meʻa huʻamelie ʻo e vaó. Naʻe omi e kakaí mei he ngaahi koló ke fanongo ki heʻene akonakí. Naʻe ʻiloa ia ko Sione ko e Papitaisó.

Mātiu 3:1–5

Naʻe akoʻi ʻe Sione ko e Papitaisó ʻa e kakaí ʻo kau kia Sīsū Kalaisi. Naʻá ne fakahā ange ke nau fakatomala mei heʻenau ngaahi angahalá pea papitaiso. Naʻe papitaiso ʻe Sione ʻa e faʻahinga naʻe fakatomala mei heʻenau ngaahi angahalá.

Mātiu 3:2–3, 5–6

Naʻe ʻeke ange ʻe he kakaí kia Sione ko e Papitaisó pe ʻoku founga fēfē ha toe lelei ange ʻenau moʻuí. Naʻá Ne fakahā ange kiate kinautolu ke nau ʻofa ki he masivá, lea moʻoni, pea angalelei ki he niʻihi kehé. Naʻá ne pehē kuo vavé ni mai ke haʻu ʻa Sīsū. ʻE foaki ʻe Sīsū kiate kinautolu ʻa e meʻaʻofa ʻo e Laumālie Māʻoniʻoní.

Mātiu 3:2, 11–12; Luke 3:10–14

ʻI he ʻaho ʻe taha, naʻe haʻu ʻa Sīsū kia Sione ko e Papitaisó ʻi heʻene papitaiso ha kakai ʻi he Vaitafe Soataní. Naʻá Ne kole kia Sione ke papitaiso Ia. Naʻe ʻilo ʻe Sione naʻe talangofua maʻu pē ʻa Sīsū ki he ngaahi fekau ʻa e ʻOtuá pea naʻe ʻikai fie maʻu ia ke fakatomala. Naʻe fakakaukau ʻa Sione naʻe ʻikai fie maʻu ia ke papitaiso ʻa Sīsū

Mātiu 3:13–15; 2 Nīfai 31:5–7

Ka kuo fekau ʻe he ʻOtuá ʻa e kakai kotoa pē ke papitaiso, ko ia naʻe fekau ʻe Sīsū kia Sione ke papitaiso Ia. Naʻe tā ʻe Sīsū ha sīpinga kiate kitautolu ʻaki ʻEne talangofua ki he fekau ʻa e ʻOtuá ke papitaisó.

Mātiu 3:16; 2 Nīfai 31:7–9

ʻI he ʻalu hake ʻa Sīsū mei he vaí, naʻe ʻiate Ia ʻa e Laumālie Māʻoniʻoní. Naʻe folofola mai ʻa e ʻOtuá mei he langí ʻo pehē, “Ko hoku ʻAlo ʻofaʻangá ʻeni, ʻa ia ʻoku ou fiemālie lahi aí.” Naʻe fakamoʻoni foki ʻa Sione ko e Papitaisó ko Sīsū ʻa e ʻAlo ʻo e ʻOtuá.

Mātiu 3:16–17; Sione 1:33–36; Jesus the Christ, 150