Vahe 18

Ko e Fili ʻe Sīsū ʻEne Kau ʻĀposetoló

ʻI ha ʻaho ʻe taha, ne akoʻi ai ʻe Sīsū ʻa e kakaí mei ha vaka ʻi he matātahi ʻo e Tahi Kālelí. Ko e vaka ʻo e tangata ko Pita.

Luke 5:1–3

Naʻe toutai ʻa Pita mo hono ngaahi kaungāmeʻá he poó kotoa mo e ʻikai pē maʻu ha ika. Hili e akonaki ʻa Sīsuú, naʻá Ne tala kia Pita ke maʻumaʻu atu e vaká ki he lolotó. Peá Ne toki talaange kia Pita mo hono ngaahi kaungāmeʻá ke ʻaʻau honau kupengá ki tahi.

Luke 5:4–5

Naʻa nau maʻu e ika lahi pea kamata mahae honau kupengá.

Luke 5:6

Ne ui ʻa Pita ki hono kaungātoutai ʻi ha vaka ʻe taha ke nau omi ʻo tokoni. Ne fakafonu ika fakatouʻosi e ongo vaká pea kamata ke ngoto hifo.

Luke 5:7

Naʻe ofo ʻa Pita mo hono ngaahi kaungāmeʻá. Naʻa nau ʻilo ne fakahoko ʻeni ʻe Sīsū Kalaisi.

Luke 5:8–9

Naʻe fakatōmapeʻe ʻa Pita ʻi he vaʻe ʻo e Fakamoʻuí. Naʻá ne pehē naʻe ʻikai ke ne taau ke ofi kia Sīsū. Naʻe fakahā ange ʻe Sīsū kia Pita ke ʻoua ʻe manavahē.

Luke 5:8–10

Ko e toko ua ʻo e ngaahi kaungāmeʻa ʻo Pitá, ko Sēmisi mo Sione, ko e ongo tautehina. Naʻe fakahā ange ʻe Sīsū kia Pita, Sēmisi, mo Sione ke muimui ʻiate Ia pea hoko ko e “kau toutai tangata.” Naʻe siʻaki ʻe he kau tangatá e meʻa kotoa pē naʻa nau maʻú pea muimui ʻia Sīsū. Naʻe kole foki ʻe he Fakamoʻuí mo ha kau tangata kehe ke muimui ʻiate Ia.

Mātiu 4:18–22; 9:9; Luke 5:10–11; Sione 1:35–51

Naʻe fili ʻe Sīsū ʻa e Kau ʻAposetolo ʻe toko hongofulu mā ua ke tataki Hono Siasí. Naʻá Ne lotua he poó kotoa ke Ne lava ʻo fili ʻa e kau tangata totonú. ʻI he pongipongi hokó naʻá Ne fili mo fakanofo e kau tangata ʻe toko hongofulu mā ua, foaki ange kiate kinautolu ʻa e lakanga fakataulaʻeikí mo e mafai ke hoko ko e Kau ʻAposetoló.

Maʻake 3:14; Luke 6:12–16; Sione 15:16

Ne fononga e Kau ʻAposetoló ki ha ngaahi kolo lahi. Naʻa nau akoʻi e ongoongoleleí mo fakamoʻui e kakaí. Naʻa nau foki ke fakahā kia Sīsū e meʻa kuo nau faí.

Maʻake 6:30; Luke 9:1–6, 10