Vahe 37
Ko e Kau Kilia ʻe Toko Hongofulú
Naʻe fononga ʻa Sīsū ki ha kiʻi kolo peá Ne mamata ai ki ha kau kilia ʻe toko hongofulu. Ko e kau kiliá ko e kakai ʻoku puke. ʻOku fakatupu ʻe honau puké ha ngaahi pala fakamanavahē ʻi honau sinó kotoa.
Naʻe ʻikai lava ʻe he kau toketaá ʻo fai ha tokoni ki he kau kiliá. Naʻe manavahē e kakaí ke ofi kiate kinautolu. Naʻe ʻikai foki ke nau fie puke mo kinautolu.
Naʻe kole ʻe he kau kiliá kia Sīsū ke fakamoʻui kinautolu. Naʻa nau ʻiloʻi te Ne lava ʻo fakamoʻui honau palá.
Naʻe loto ʻa Sīsū ke nau sai. Naʻá Ne tala ange ke nau ō ʻo fakahā kinautolu ki he kau taulaʻeikí.
Lolotonga e fononga ʻa e kau kilia ʻe toko hongofulú ki he kau taulaʻeikí, naʻe fakamoʻui kinautolu. Ne mole atu honau palá.
Naʻe ʻiloʻi ʻe he tokotaha ʻo e kau kiliá kuo fakamoʻui kinautolu ʻe Sīsū. Naʻá ne foki ke fakamālō kiate Ia. Naʻe fehuʻi ange ʻe Sīsū pe ko e fē ʻa e kau kilia ʻe toko hiva ko eé. Kuo ʻikai ke nau foki mai aí. Naʻe talaange ʻe Sīsū ki he tangata kilia kuó ne fakamālō kiate Iá kuo fakamoʻui ia ʻe heʻene tuí.