Vahe 33
Ko e Hā Mai ʻi he Nāunaú: Ko e Liliú
ʻI he lotu ʻa Sīsuú, naʻe ʻiate Ia ʻa e nāunau ʻo e ʻOtuá. Naʻe ngingila Hono fofongá ʻo hangē ko e laʻaá. Naʻe hā ʻa e ongo palōfita ʻo e Fuakava Motuʻá ko Mōsese mo ʻIlaiase kiate Ia. Naʻa nau fefolofolai ki Heʻene pekiá mo ʻEne toetuʻú.
Lolotonga e lotu ʻa Sīsuú, ne māʻumohe e Kau ʻAposetoló.
ʻI heʻenau ʻā haké, ne nau mamata ki he nāunau ʻo Sīsū Kalaisí, Mōsese, mo ʻIlaiasé. Naʻa nau fanongo ki he leʻo ʻo e Tamai Hēvaní ʻokú Ne fakamoʻoni, “Ko hoku ʻAlo ʻofaʻangá ʻeni ʻa ia ʻoku ou fiemālie lahi aí; mou fanongo kiate ia.”
Naʻe manavahē ʻa e Kau ʻAposetoló ʻo nau tō ki he kelekelé. Naʻe ala atu ʻa Sīsū kiate kinautolu mo tala ange ke ʻoua te nau manavahē. ʻI heʻenau hanga haké, kuo pulia e kau talafekau fakalangí. Naʻe tala ʻe Sīsū ki he Kau ʻAposetoló ke ʻoua naʻa nau fakahā ki ha taha ʻa e meʻa kuo nau sio ki aí kae ʻoua ke hili ʻEne pekiá mo ʻEne toetuʻú.