Vahe 49
Ko e Fuofua Sākalamēniti
Naʻe fie maʻu ʻe Sīsū mo e Kau ʻAposetolo ʻe Toko Hongofulu Mā Uá ha feituʻu ke fai ai ʻa e kai ʻo e kātoanga Laka Atú. Naʻe fekauʻi ʻe he Fakamoʻuí ʻa Pita mo Sione ke kumi ha loki mo vakai ke mateuteu e meʻa kotoa pē ki he kātoanga kaí.
Naʻá na ʻilo ha loki peá na teuteuʻi ʻa e kātoanga kaí.
Naʻe hāʻele ki ai ʻa Sīsū mo e Kau ʻAposetoló kotoa. Naʻa nau kai fakataha ʻa e kātoanga kai ʻo e Laka Atú.
Ko e fuofua taimi ia ne ʻoange ai ʻe Sīsū ʻa e sākalamēnití ki Heʻene Kau ʻAposetoló. Naʻá Ne toʻo ʻa e maá ʻi Hono nimá, tāpuakiʻi ia, pea pakipaki ke kongokonga iiki. Naʻá Ne talaange ki Heʻene Kau ʻAposetoló ke nau kai ʻa e maá.
Naʻe tala ange ʻe Sīsū kiate kinautolu ke nau fakakaukau ki Hono sinó ʻi heʻenau kai ʻa e maá. Naʻá Ne kole ange ke nau manatuʻi te Ne pekia maʻa nautolu.
Naʻe lingi ʻe Sīsū e uainé ki ha ipu. Naʻá Ne tāpuakiʻi e uainé pea tala ange ki he kau ʻAposetoló ke nau inu ia.
Naʻe tala ange ʻe Sīsū ke nau fakakaukau ki Hono totó he taimi naʻa nau inu ai ʻa e uainé. Naʻá Ne kole ange ke nau manatuʻi ʻe lilingi Hono totó pea mamahiʻia koeʻuhí ko e ngaahi angahala ʻa e kakaí kotoa.
Naʻe fakahā foki ʻe Sīsū ki he Kau ʻAposetoló ʻe vavé ni pē hano tamateʻi Ia ʻe he kau tangata anga koví. Naʻe loto mamahi e toko hongofulu mā taha ʻo e Kau ʻAposetoló. Naʻa nau ʻofa ʻi he Fakamoʻuí pea naʻe ʻikai te nau loto ke Ne mate. Naʻe ʻiloʻi ʻe Sīsū ʻe tokoniʻi ʻe he toko taha ʻo e Kau ʻAposetoló ʻa e kau tangata anga koví. Ko hono hingoá ko Siutasi ʻIsikaliote.