Ko Hono Akoʻi ʻe Sīsū ʻa e Kakaí he Veʻe Matātahí, tā ʻa James Tissot

25 Fepueli–3 Māʻasi

Mātiu 6–7

“Naʻá Ne Akonakiʻi ʻa Kinautolu ʻo Taau mo Ia ʻOku Mālohí”

Kamata ʻaki hano lau eMātiu 6–7 lolotonga hoʻo fakakaukau ki he fānau ʻokú ke akoʻí. Ko e hā e ngaahi pōpoaki mei he ongo vahe ko ʻení ʻoku nau fie maʻu ke fanongoá? ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e lēsoni ko ʻení ke ʻoatu ha ngaahi fakakaukau ki hono akoʻí, ʻo fakatatau mo e fie maʻú.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Kole ki he fānaú ke nau vahevahe e meʻa ne nau fai ʻi he uike kuo ʻosí ke hoko ai ko ha maama pe sīpinga ki ha taha kehe.

Akoʻi e Tokāteliné

Fānau Iiki Angé

Mātiu 6:5–13

Te u lava ʻo lotu ki heʻeku Tamai Hēvaní ʻo hangē ko Sīsuú.

ʻE lava ke ako ʻa e fānaú ke lotu ʻaki ʻenau fanongo ki he ngaahi lotu e niʻihi kehé. Te ke tokoniʻi fēfē kinautolu ke nau ako mei he lotu ʻa Sīsū Kalaisi ʻi he ngaahi veesi ko ʻení?

Ngaahi ʻEkitivitī ʻe Ala Fakahokó

• Toe vakaiʻi e ngaahi akonaki ʻa Sīsū fekauʻaki Mātiu 6:5–13. ʻE lava ke ke fakaʻaongaʻi ʻa e “Vahe  20: Akoʻi ʻe Sīsū ʻa e Lotú,” Ngaahi Talanoa ʻo e Fuakava Foʻoú, 51–52.

• Fakaʻaongaʻi e peesi ʻekitivitī ʻo e uike ní ke tokoniʻi e fānaú ke nau manatuʻi e ngaahi konga faingataʻa ʻo e lotú.

• Fakaʻilongaʻi ʻa e nima ʻo e kiʻi tamasiʻi pe taʻahine takitaha ʻi ha laʻipepa. Talanoa fekauʻaki mo e meʻa ʻoku totonu ke fai ʻe hotau ongo nimá mo e umá lolotonga ʻetau lotú. ʻI he fakaʻilonga takitaha, tohiʻi ha meʻa te tau fai ke fakahaaʻi ʻaki ʻetau loto ʻapasia ʻi he taimi ʻoku tau lotu aí (hangē ko ʻení, punou hotau ʻulú, kuikui hotau matá, mo e alā meʻa pehē).

• Tokoniʻi e fānaú ke nau faʻu ha pousitā pe saati, ʻa ia ʻe tokoniʻi ai kinautolu ke nau manatuʻi ke lotu he pongipongí mo e poʻulí, pea fakaafeʻi kinautolu ke nau vahevahe ia ki honau ngaahi fāmilí.

• Hivaʻi mo e fānaú ha hiva fekauʻaki mo e lotú (hangē ko e “Punou Ho ʻUlu,” Tohi Hiva ʻa e Fānaú, 18B), pea vahevahe ange hoʻo fakamoʻoni ki he mālohi ʻo e lotú. Te ke lava foki ʻo fakaafeʻi e fānaú ke vahevahe ʻenau ngaahi aʻusia ʻi he lotú.

Te u lava ʻo lotu ki heʻeku Tamai Hēvaní ʻo hangē ko Sīsuú.

Mātiu 7:12

ʻOku totonu ke u fai ki he niʻihi kehé ʻa e founga ʻoku ou fie maʻu ke fai kiate aú.

ʻOku ʻomi ʻe he akonaki ʻa Sīsū ʻi he Mātiu 7:12—ʻiloa foki ko e Lao Koulá—ha fakahinohino faingofua ki he founga ke tau fakaʻapaʻapaʻi ai e niʻihi kehé. Ko e hā te ne tokoniʻi e fānau ʻokú ke akoʻí ke nau moʻui ʻaki e tefitoʻi moʻoni ko ʻení?

Ngaahi ʻEkitivitī ʻe Ala Fakahokó

• Lau e Mātiu 7:12, pea toe fakalea ia ʻi ha ngaahi lea faingofua ʻe lava mahino ki he fānaú. Tokoniʻi e fānaú ke nau fakakaukau ki ha ngaahi founga ʻe niʻihi ke fakakakato ai ha sētesi hangē ko ʻení: “ʻOku ou saiʻia ʻi he taimi ʻoku ai e niʻihi kehé maʻakú.” Hili e sētesi takitaha, fakaafeʻi kinautolu ke nau toutou lea fakataha mo koe, “Ko ia ai ʻoku totonu ke u ki he niʻihi kehé.”

• Hivaʻi mo e fānaú e “Jesus Said Love Everyone,” Childrenʻs Songbook, 61, pea faʻu ha ngaahi fakatātā faingofua ke fakahoko fakataha mo e hivá. Fehuʻi ki he fānaú ko e hā ʻoku nau ako mei he sīpinga ʻo e Fakamoʻuí fekauʻaki mo e founga ʻoku tau feohi ai mo e niʻihi kehé.

• Fakaafeʻi e fānaú ke nau lisi e ngaahi ngaahi meʻa lelei ne fai heʻenau mātuʻá pe ngaahi mēmipa kehe ʻo e fāmilí maʻanautolú. Lau e Mātiu 7:12, pea fakaafeʻi e fānaú ke nau faʻu ha lisi ʻo e ngaahi meʻa lelei ʻe lava ke nau fai maʻa honau ngaahi fāmilí.

Mātiu 7:24–27

Te u lava ʻo langa ha fakavaʻe mālohi ʻaki ʻeku muimui kia Sīsū.

ʻE lava ke hoko hono fakaʻaongaʻi e talanoa fakatātā ʻa e Fakamoʻuí fekauʻaki mo hono langa ʻo ha fale ʻi he ʻoneʻoné pe ʻi ha maka, ko ha founga fakangalongataʻa ke akoʻi e fānaú fekauʻaki mo e mahuʻinga ʻo hono ngāueʻi e meʻa ʻoku tau akó.

Ngaahi ʻEkitivitī ʻe Ala Fakahokó

• Hivaʻi fakataha mo e fānaú e “Ko e Tangata Potó mo e Tangata Valé,” Tohi Hiva ʻa e Fānaú, 132, pea fakaʻaongaʻi e ngaahi ngāue ke fakatātaaʻí fakatatau mo e lea ʻo e hivá.

• Fakaʻaongaʻi e Mātiu 7:24 ke akoʻi fekauʻaki mo e ngaahi faikehekehe he vahaʻa ʻo e tangata potó mo e tangata valé. Fakaafeʻi ʻa e fānaú ke nau pehē pē ʻoku nau langa ha fale. Te tau lava fēfē ke tau hoko ʻo hangē ko e tangata potó?

• Tuku ki he fānaú ke nau tā ha ngaahi fakatātā ʻo e talanoa fakatātā e tangata potó mo e tangata valé.

Akoʻi e Tokāteliné

Fānau Lalahi Angé

Mātiu 6–7

ʻOku ʻi ia ha pōpoaki maʻaku ʻi he Malanga ʻi he Moʻungá.

ʻOku ʻi ai ha ngaahi pōpoaki lahi ʻi he ngaahi vahe ko ʻení ʻa ia ʻe lava ʻaonga ki he fānau ʻokú ke akoʻí. Lau fakataha ia mo hoʻo fakakaukau ki he fānaú. Ko e hā ne hā makehe kiate koé?

Ngaahi ʻEkitivitī ʻe Ala Fakahokó

• Fakamanatu ki he fānaú, kuo nau ako eni fekauʻaki mo e meʻa ne akoʻi ʻe Sīsū lolotonga e Malanga ʻi he Moʻungá. Ko e hā ha ngaahi moʻoni ʻoku lava ke nau manatu ne nau ako ki ai ʻi he uike kuoʻosí?

• Hiki he palakipoé ha ngaahi kupuʻi lea mei he Malanga ʻi he Moʻungá mo ha ngaahi kupuʻi lea kehe ʻe niʻihi ʻa ia ʻoku ʻikai mei he folofolá. Fakaafeʻi ʻa e fānaú ke nau feinga ke ʻiloʻi pe ko e fē e kupuʻi lea mei he Malanga ʻi he Moʻungá pea vahevahe ko e hā ʻoku nau ako mei aí.

• Fili ha ngaahi veesi mei he Mātiu 6–7 ʻa ia ʻokú ke ongoʻi ʻoku ʻuhingamālie ki he fānaú. Hiki ʻa e ngaahi potu folofolá ʻi ha ngaahi kaati pea fufuuʻi kinautolu ʻi he lokí. Tuku ki he fānaú ke nau fekumi ki ai, lau ʻa e ngaahi vēsí, pea fakamatalaʻi ange e ʻuhinga ʻoku mahuʻinga ai ʻa e ngaahi akonaki ko ʻení kiate kinautolú.

• Vahevahe ha potu folofola ʻokú ke manako ai mei he Mātiu 6–7, pea fakamatalaʻi e ʻuhinga ʻokú ke saiʻia ai aí. Kapau ʻoku maʻu ʻe he fānaú ha potu folofola ʻoku nau manako ai, fakaafeʻi kinautolu ke nau vahevahe e ʻuhinga ʻoku nau saiʻia ai aí mo e meʻa ʻoku nau ako mei aí.

• Hivaʻi fakataha mo e fānaú e “ʻOku ou Feinga ke Hangē ko Sīsuú,” Tohi Hiva ʻa e Fānaú, 40-41, pea taʻofi e hivá ʻi hoʻomou aʻu ki he kupuʻi lea ʻoku fehokotaki mo ha tefitoʻi moʻoni naʻe akoʻi ʻi he Mātiu 6–7 (hangē ko e “ako ke tokoniʻi kaumeʻá”). Tokoniʻi e fānaú ke nau fakafehokotaki ki he ngaahi meʻa ʻoku nau ako mei he ongo vahe ko ʻení.

Mātiu 6:5–13; 7:7–11

ʻE fanongoa mo tali mai ʻe he Tamai Hēvaní ʻi he taimi ʻoku ou lotu aí.

ʻI hoʻo ako e Mātiu 6:5–13; 7:7–11, ko e hā ʻokú ke ongoʻi ʻoku fie maʻu ke mahino ki he fānaú fekauʻaki mo e lotú?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau leʻolahi e Mātiu 6:9–13 pea nau lisi e ngaahi meʻa ne leaʻaki ʻe he Fakamoʻuí ʻi Heʻene lotú. Te tau muimui fēfē ʻi Heʻene sīpingá ʻi he taimi ʻoku tau lotu aí?

• Hivaʻi ha hiva mo e fānaú fekauʻaki mo e lotú, hangē ko e “Fai Haʻo Lotu” Ngaahi Himí, fika 70. Tokoniʻi e fānaú ke nau fekumi ʻi he ngaahi lea ʻo e hivá ke maʻu e ngaahi ʻuhinga ʻoku tau lotu aí, pea mo e ngaahi tāpuaki ʻoku maʻu mei he lotú.

• Tokoniʻi e fānaú ke nau maʻuloto e Mātiu 7:7 ʻaki e vaʻingaʻi ha foʻi vaʻinga hangē ko ʻení: Lau maʻuloto ʻe ha tokotaha ʻa e ʻuluaki foʻi lea pe kupuʻi lea mei he vēsí pea lī ha foʻi pulu ki ha tokotaha kehe, ʻa ia te ne lau maʻuloto e foʻi lea pe kupuʻi lea hokó.

• Fakatātaaʻi mo e fānaú ʻa e Mātiu 7:9–10 ʻaki hano fakaʻaongaʻi ha ngaahi meʻangāue faingofua. Kole ki he fānaú ke nau vahevahe ʻa e meʻa ko ʻeni ʻoku akoʻi kiate kinautolu fekauʻaki mo e lotú.

• Vahevahe ha aʻusia ʻa ia naʻe tali ai hoʻo ngaahi lotú.

Mātiu 6:19–21

ʻE lava ke u fekumi ki ha ngaahi koloa taʻengata kae ʻikai ko e ngaahi koloa fakaemāmaní.

Te ke tokoniʻi fēfē ʻa e fānau ʻokú ke akoʻí, ke nau fakamahuʻingaʻi lahi ange ʻa e ngaahi meʻa taʻengatá ʻo laka hake ʻi he ngaahi meʻa fakamāmaní?

Ngaahi ʻEkitivitī ʻe Ala Fakahokó

• ʻOmi ha puha “tauhi koloa” ‘oku fonu ʻi ha ngaahi meʻa pe fakatātā ʻa ia ʻokú ne fakafofongaʻi e ngaahi meʻa ʻoku fakamahuʻingaʻi ʻe he māmaní—hangē ko e paʻangá pe meʻavaʻingá. Lau fakataha e Mātiu 6:19–21 pea kole ki he fānaú ke tokoni atu ke ke fakakaukau ki he ngaahi koloa fakalangi ʻe lava fetongi ʻaki e ngaahi meʻa fakamāmani ʻi he puhá.

• Fakaafeʻi e fānaú ke nau fakahingoa pe tā ha ngaahi meʻa te nau lava ʻo fai ke “fokotuʻu … ʻa e koloa ʻi māmani” (Mātiu 6:20).

Poupouʻi e Ako ʻi ʻApí

Fakaafeʻi e fānaú ke nau vahevahe mo honau ngaahi fāmilí, ʻa e akonaki ʻoku nau saiʻia ai mei he Malanga ʻi he Moʻungá.

Fakatupulaki ʻEtau Akoʻí

Feinga ke mahino kiate koe e kau mēmipa hoʻo kalasí. ʻOkú ke ʻiloʻi e fānau ʻokú ke akoʻí. ʻE ala fie maʻu ke liliu e ngaahi fakakaukau ʻi he ngaahi lēsoni ko ʻení, ke feau e ngaahi fie maʻu ʻo hoʻo kalasí. Mahalo ʻe fie maʻu ke ke toe vakaiʻi e ngaahi ʻekitivitī kotoa ʻoku lisi ʻi he lēsoni ko ʻení, ʻo ʻikai ko e ʻekitivitī pē ʻoku fakataumuʻa maʻá e taʻu motuʻa ʻo e fānau ʻokú ke akoʻí, kae lava ke maʻu ha ngaahi fakakaukau ki hoʻo kalasí. (Vakai Ko e Faiako ʻi he Founga ʻa e Fakamoʻuí, 7.)