Fafanga Kinautolu, tā ʻa Jorge Cocco

Māʻasi 25–31

Mātiu 14–15; Maʻake 6–7; Sione 5–6

“ʻOua Te Mou Manavahē”

ʻI hoʻo mateuteu ke akoʻi mei he Mātiu 14–15; Maʻake 6–7; mo e Sione 5–6, fekumi ki ha ngaahi pōpoaki ʻoku feʻunga mo e moʻui ʻo e fānau ʻokú ke akoʻí. ʻOkú ke pehē ko e hā te ne tokoniʻi ke mahino ai e ngaahi pōpoaki ko ʻení kiate kinautolú? ʻE ala ʻoatu ʻe he lēsoni ko ʻení ha ngaahi fakakaukau.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fakaʻaliʻali ha fakatātā ʻo e ʻaʻeva ʻa Sīsū he fukahi vaí (vakai lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí), pea kole ki he fānaú ke nau vahevahe e meʻa ʻoku nau ʻilo fekauʻaki mo e talanoá.

Akoʻi e Tokāteliné

Fānau Iiki Angé

Sione 5:1–9

ʻOku ʻafioʻi ʻe Sīsū Kalaisi ʻetau fie maʻú pea lava ke Ne tokoniʻi kitautolu.

ʻI hoʻo lau fekauʻaki mo hono fakamoʻui ʻe Sīsū e tangata he anovai ʻo Petesaitá, fakalaulauloto ki he founga te ke lava ʻo tokoni ai ki he fānaú ke nau vakai ki he meʻa ʻoku akoʻi ʻe he talanoá fekauʻaki mo e angaʻofa, ʻofa, mo e ngaahi ʻulungaanga kehe ʻa Sīsuú.

Ngaahi ʻEkitivitī ʻe Ala Fakahokó

• Fakaʻaongaʻi e fakatātā Ko Hono Fakamoʻui ʻe Sīsū ʻa e Mahakí ʻi Petesaita (Tohi Fakatātā ʻo e Ongoongoleleí, fika 42) ke fai e talanoa ʻi he Sione 5:1–9 ki he fānaú. Kole ki he fānaú ke nau fakakaukau ko kinautolu e tokotaha naʻe fakamoʻui ʻe Sīsuú. Te nau ongoʻi fēfē nai ʻi he taimi naʻe fakamoʻui ai kinautolu ʻe Sīsuú?

• Kole ki he fānaú ke nau fakahingoa ha ngaahi meʻa ʻoku faingataʻa kiate kinautolu pe ngaohi kinautolu ke nau loto mamahi. Tala kiate kinautolu fekauʻaki mo ha taimi ʻi hoʻo moʻuí naʻá ke maʻu ai ha tokoni mei he Fakamoʻuí lolotonga ha faingataʻa lahi. Fakamoʻoniʻi ange ʻoku ʻafioʻi ʻe Sīsū e kotoa ʻo ʻetau ngaahi palopalemá pea ʻokú Ne fie tokoniʻi kitautolu.

Mātiu 14:13–21

ʻOku tau muimui ki he sīpinga ʻa Sīsuú ʻi he taimi ʻoku tau angaʻofa ai ki he niʻihi kehé.

Ko e founga ʻe taha ne fakahaaʻi ai ʻe Sīsū ʻa e ʻofá, ko hono fafanga ʻEne kau muimuí ʻi he taimi ne nau fiekaia aí. Te ke lava fēfē ʻo tokoniʻi e fānaú ke nau ako ke tokoni ki he niʻihi kehé ʻo hangē ko Sīsuú?

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha kato pea mo ha foʻi mā, ʻi hoʻo fai e talanoa ʻi he Mātiu 14:13–21. Fakamatalaʻi ange neongo naʻe feinga ʻa Sīsū ke maʻu ha feituʻu ke Ne ʻi ai toko taha pē, ka naʻe fie maʻu pē ʻe he kakaí ia ke nau ofi kiate Ia. Vahevahe ʻa e toenga ʻo e talanoá ki he fānaú, pea kole ange ke nau fakafanongo ki he meʻa naʻe fai ʻe Sīsū ke fakahaaʻi ʻaki ʻEne angaʻofá mo e ʻofá kiate kinautolú.

• Kole ki he fānaú ke vahevahe ha ngaahi founga naʻe angaʻofa ange ai ha taha kiate kinautolu. Ko e hā te nau lava ʻo fai ʻi he uiké ni ke angaʻofa ai ki he niʻihi kehé? ʻI he tali kotoa pē te nau ʻomí, tā ha foʻi mā pe mataʻi ika ʻi he palakipoé. Tala ange ki he fānaú, ʻi heʻenau fai e ngaahi meʻá ni, ʻoku nau muimui ai ki he sīpinga naʻe tā ʻe Sīsū ʻi he taimi naʻá Ne fafanga ai e kakai ʻe toko nima afe naʻe fiekaiá.

Mātiu 14:22–33

ʻE lava ke tokoni ʻetau tui kia Sīsū Kalaisí ke ʻoua te tau manavahē.

Naʻe fakahaaʻi ʻe Pita ha tui lahi ʻi he taimi naʻá ne lue ai ʻi he fukahi vaí kia Sīsuú. Ko e hā ha ngaahi lēsoni maʻá e fānaú ʻi he talanoa ko ʻení?

Ngaahi ʻEkitivitī ʻe Ala Fakahokó

• Fakaʻaliʻali e fakatātā Ko e Hāʻele ʻa Sīsū ʻi he Fukahi Vaí (Tohi Fakatātā ʻo e Ongoongoleleí, fika 43) ʻi hoʻo fai e talanoá ʻi he lea pē ʻaʻau. Fakakaukau ke fakaʻaongaʻi e peesi ʻekitivitī ʻo e uike ní ke tokoniʻi e fānaú ke nau toe fai atu ʻa e talanoá kiate koe. Te ke lava foki ʻo ʻomi ha kiʻi poulu vai siʻisiʻi pea fakaafeʻi ʻa e fānaú ke nau pehē pē ʻoku “ʻaʻeva” honau louhiʻi nimá ʻi he fukahi vaí.

• Hili ia pea kole ange ke nau fakamatala fekauʻaki mo ha ngaahi taimi ne nau ongoʻi manavahē ai pea vahevahe ki he meʻa naʻá ne tokoniʻi kinautolú. Tokoniʻi kinautolu ke nau ʻiloʻi ʻoku tokoniʻi kitautolu ʻe he tui kia Sīsū Kalaisí ke tau ikunaʻi ʻa e manavaheé.

Akoʻi e Tokāteliné

Fānau Lalahi Angé

Sione 5:17–47

ʻOku akoʻi kitautolu ʻe Sīsū Kalaisi fekauʻaki mo e Tamai Hēvaní.

ʻE lava fēfē ʻe he ngaahi akonaki ʻa Sīsū fekauʻaki mo ʻEne Tamaí ʻo tokoniʻi e fānaú ke nau ako kau ki he Tamai Hēvaní?

Ngaahi ʻEkitivitī ʻe Ala Fakahokó

• Faʻu ha ongo kaati tauhoa ʻo fakahingoa ʻaki e ngaahi lea ne fakaʻaongaʻi e Sīsū ke akoʻi fekauʻaki mo e Tamai Hēvani ʻi he Sione 5, hangē ko e ʻofá, moʻuí mo e ngāué (vakai, Sione 5:20, 26, 36). Fakafoʻohifo ʻa e kātí, pea kole ki he fānaú ke nau fekumi ki ha ngaahi kaati ʻoku hoa tataú ʻaki hano folahi ha ongo kaati ʻe ua ʻi he taimi pē taha. ʻI he fakahoa kotoa pē, lau e veesi ʻoku ʻi ai e foʻi leá, pea fehuʻi ki he fānaú pe ko e hā ʻoku akoʻi mai ʻe he foʻi leá fekauʻaki mo e Tamai Hēvaní.

• Kole ki he fānaú ke nau lau e Sione 5:30, pea fakakakato leva e sētesi ko ʻení: “ʻOku ʻikai te u fai ki hoku loto ʻoʻokú, ka …” Naʻe fakahoko fēfē ʻe Kalaisi e finangalo ʻo ʻEne Tamai Hēvaní? Te tau lava fēfē ʻo fakahoko e finangalo ʻo e Tamai Hēvaní?

Sione 6:5–14

ʻE lava ʻe heʻetau ngaahi feilaulau īkí ʻo fai ha meʻa lahi.

Ko ha kiʻi tamasiʻi siʻisiʻi naʻá ne foaki ange ʻa e mā mo e ika naʻe fakaʻaongaʻi ʻe Sīsū ke fafanga ʻaki e toko nima afé. Te ke tokoniʻi fēfē e fānau ʻokú ke akoʻí ke nau ʻiloʻi te nau lava ʻo tokoni ki he ngāue ʻa e ʻEikí?

Ngaahi ʻEkitivitī ʻe Ala Fakahokó

• Vahevahe ha mā pakupaku pe kongokonga mā ki he fānaú. Tokoniʻi kinautolu ke nau fakakaukau ki he tokolahi ʻo e kakai ʻe toko nima afé. ʻE fēfē nai hono fafanga e kakai tokolahi pehē ʻaki ha foʻi mā pē ʻe nima mo e mataʻi ika ʻe ua?

• Fakaafeʻi ha kiʻi tamasiʻi pe taʻahine ke ne fai e talanoa ʻo hono fafanga ʻo e toko nima afé ʻi heʻene lea pē ʻaʻana. Te tau lava fēfē ke hoko ʻo hangē ko e kiʻi tamasiʻi ʻi he Sione 6:9? Fakaafeʻi e fānaú ke nau tā ha ngaahi foʻi mā mo e ika ʻi ha laʻipepa pea tohiʻi ai ʻa e ngaahi meʻa ʻe niʻihi te nau lava ʻo foaki ki he ʻEikí ke tokoni ki Heʻene ngāué.

• ʻOange ki he fānaú ha pāsolo siʻisiʻi ke fokotuʻutuʻu. Ko e hā ʻe hoko kapau ʻe puli ha konga ʻe taha ʻo e pāsoló? Fakamatalaʻi ange ʻoku tau hangē kotoa pē ko ha konga ʻo ha pāsolo—ʻoku tau maʻu kotoa ha meʻa mahuʻinga ke tokoni ki he moʻui ʻa e niʻihi kehé. ʻOku tokoni fēfē ʻa e fānaú ki honau ngaahi fāmilí pe kalasí?

Naʻe fakahoko ʻe Sīsū ha mana ʻi hono fafanga e kakai ʻe toko 5,000 ʻaki ha foʻi mā ʻe nima mo ha mataʻi ika ʻe ua.

Mātiu 14:22–33

ʻE ala tokoni ʻetau tui kia Sīsū Kalaisí ke ʻoua naʻa tau manavahē.

Ko ha konga mahuʻinga ʻa e tuí mo e manavaheé ʻi he talanoa ki he ʻaʻeva ʻa Sīsū mo Pita ʻi he tahí. Ko e hā ʻe lava ke ako ʻe he fānaú mei he talanoa ko ʻení?

Ngaahi ʻEkitivitī ʻe Ala Fakahokó

• Fakaʻaliʻali ange ʻa e fakatātā ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Kole ki he fānaú ke nau kumi ha veesi ʻi he Mātiu 14 ʻa ia ʻokú ne fakamatalaʻi e fakatātaá.

• Kole ki he fānaú ke nau fekumi ki ha ngaahi fakaʻilonga ʻo e tuí mo e ngaahi fakaʻilonga ʻo e manavaheé, ʻi heʻenau lau e Mātiu 14:22–33. Ko e hā hono ʻuhinga ke tui kia Sīsū Kalaisí? ʻOku fetongi fēfē nai ʻe he tuí ʻa e manavaheé?

• Kole ki he fānaú ke nau fakakaukau pē ʻoku nau ʻi he taimi ne ʻaʻeva ai ʻa Sīsū mo Pita ʻi he tahí mo ha meʻafaitā. Ko e fē momeniti te nau fili ke faitaaʻí pea ko e hā hono ʻuhingá? Fokotuʻu ange ke nau fekumi ki ha ngaahi fakakaukau ʻi he Mātiu 14:22–33. Fakaafeʻi kinautolu ke nau tā ha fakatātā ʻo e momeniti ne nau filí, vahevahe ʻenau ngaahi fakatātaá, pea fakamatalaʻi ko e hā e ʻuhinga ne nau fili ai e momeniti ko iá.

Poupouʻi e Ako ʻi ʻApí

Kapau kuo fakakakato ʻe he fānaú e peesi ʻekitivitī ʻo e uike ní, fakaafeʻi kinautolu ke nau fakaʻaongaʻi ia ke akoʻi honau ngaahi fāmilí ʻa e meʻa ne nau ako he ʻaho ní.

Fakatupulaki ʻEtau Akoʻí

Fakaafeʻi ke vahevahe Fehuʻi ki he fānaú fekauʻaki mo ʻenau ngaahi fakakaukaú, ongó, mo e ngaahi aʻusiá. Te ke ʻilo ai ʻoku nau faʻa maʻu ha ngaahi fakakaukau faingofua kae mahuʻinga.