“2–8 Setema. 1 Korinito 14–16: ‘O Le Atua E Le o le Atua ia o le Faasoesa, a o le Filemu’” Sau, Mulimuli Mai ia te Au---Mo Tagata Taitoatasi ma Aiga: Feagaiga Fou 2019 (2019)
“2–8 Setema. 1 Korinito 14–16,” Sau, Mulimuli Mai ia te Au—Mo Tagata Taitoatasi ma Aiga: 2019
2–8 Setema
1 Korinito 14–16
“O Le Atua E Le o le Atua ia o le Faasoesa, a o le Filemu”
Tusifaamaumau ou lagona ao e faitau i le 1 Korinito 14–16. Tatalo mo mea ua aoaoina ai oe e le Agaga, ma ole atu i le Tama Faalelagi pe o i ai nisi mea e finagalo o Ia e te aoaoina.
Tusifaamaumau Lagona e Uunaia ai Oe
Talu ai ona sa fou le Ekalesia ma ona aoaoga faavae i Korinito, e malamalama lava le faapea, sa oo le Au Paia i Korinito i le vavao. Sa aoaoina muamua i latou e Paulo i upumoni faavae o le talalelei: “Na maliu Keriso ma sui o a tatou agasala … na tanu foi o ia ma toe tu mai i le aso tolu” (1 Korinito 15:3–4). Peitai e lei leva ae amata e nisi o tagata o le ekalesia ona aoao atu e faapea “e leai se toetu mai o e ua oti” (1 Korinito 15:12). Sa augani atu Paulo ia i latou e “taofi mau” i upumoni sa aoaoina ai i latou (1 Korinito 15:2). Pe a tatou fetaiai ma ni manatu feteenai e faatatau i upumoni o le talalelei, e lelei ona manatua o le “Atua e le o le atua ia o le faasoesa, a o le filemu” (1 Korinito 14:33). O le faalogo i auauna atofaina a le Alii ma le taofimau i upumoni faigofie latou te aoao mai pea lava pea, e mafai ona fesoasoani tatou te maua ai le filemu ma le “tumau i le faatuatua” (1 Korinito 16:13).
Manatu mo Suesuega Faaletagata Lava Ia o Tusitusiga Paia
E mafai ona ou sailia le meaalofa o valoaga.
Pe na e mafaufau ea po o le a lea mea o le meaalofa o valoaga? Pe o le tomai lea e valoia ai le lumanai? E mafai e soo se tasi ona maua lenei meaalofa? Pe e mo nao perofeta lava?
O le Peresitene o le Ekalesia ua pau lea o le tagata e mafai ona vavalo mo ma maua faaaliga e fai ma sui o le Ekalesia atoa; ae peitai, ua tau mai i le Taiala i Tusitusiga Paia, o le valoaga o “upu po o tusitusiga musuia paia, lea e maua e se tagata e ala i faaaliga mai le Agaga Paia. … A oo ina vavalo se tagata, e tautala o ia pe tusia mea e finagalo le Atua ia te ia e iloa, mo lona lava lelei po o le lelei o isi” (Taiala i Tusitusiga Paia, “Valoaga,” scriptures.lds.org; tagai foi MFF 100:5–8). O le Faaaliga 19:10 o loo tau mai ai foi o le agaga o valoaga o se “mau ia Iesu.”
O le a se mea ua e aoaoina e uiga i lenei meaalofa faaleagaga mai le 1 Korinito 14:3, 31, 39–40? Mata o le a le uiga o le faamatalaga a Paulo ina ua ia valaaulia tagata o Korinito e “naunau ina ia perofeta”? (1 Korinito 14:39). E mafai faapefea ona e talia lenei valaaulia?
Tagai foi i le Numera 11:24–29; Iakopo 4:6–7; Alema 17:3; Mataupu Faavae ma Feagaiga 11:23–28.
Aisea na fai mai ai Paulo e le tatau i tamaitai ona tautatala i le ekalesia?
Atonu sa nenefu le aoaoga a Paulo i le 1 Korinito 14:34–35, talu ai, i luma atu o lenei lava tusi sa ia tusia ai o tamaitai e tatalo ma perofeta ane (tagai 1 Korinito 11:5). O le Faaliliuga a Iosefa Samita ua suia ai le upu tautala i fuaiupu 34 ma le 35 i le upu pule. O lenei faamaninoga ua fautuaina ai atonu sa faatatau atu Paulo i tamaitai o e sa taumafai e fao faamalosi le pule i fonotaga a le Ekalesia. (Tagai foi 1 Timoteo 2:11–12.)
Tagai foi “Tamaitai i le Ekalesia” Gospel Topics, topics.lds.org.
Sa maua e Iesu Keriso le manumalo i le oti.
O le Toetu o Iesu Keriso ua matuai taua i le faaKerisiano, e ono faapea mai se tasi, a aunoa ma lea, ua leai se faaKerisiano—ina ia faaaoga upu a Paulo, “po ua faaleaoga la matou talai, ua faaleaoga foi lo outou faatuatua” (1 Korinito 15:14). Ae sa aoao atu nisi o le Au Paia i Korinito e faapea, o le a “leai se toetu mai o e ua oti” (1 Korinito 15:12). A o e faitau i le tali a Paulo i le 1 Korinito 15, faaalu sina taimi e mafaufau loloto ai po o le a se suiga o le a i ai lou olaga pe afai e te lei talitonu i le Toetu. O faapefea ona faamanuiaina ai oe? O a faamanuiaga o le a oo mai ia te oe ona sa toetu Iesu Keriso? (tagai 2 Nifae 9:6–19; Alema 40:19–23; Mataupu Faavae ma Feagaiga 93:33–34). O le a le uiga ia te oe o le fasifuaitau “Afai foi ua le toe faatuina Keriso, ua faaleaoga lo outou faatuatua”? (fuaiupu 17).
O tino toetutu e ese mai i tino faaletino.
Pe na e mafaufau ea pe faapei se tino toetu? E tusa ai ma le 1 Korinito 15:35, sa mafaufau foi faapena nisi o tagata Korinito. Faitau le tali a Paulo i fuaiupu 36–54, ma maitau upu ma fasifuaitau ua faamatalaina ai le eseesega i le va o tino faaletino ma tino toetu. Mo se faataitaiga, ua aoao mai fuaiupu 40–42 o tino toetu o le a susulu i le mamalu i tikeri eseese, e pei foi ona eseese le susulu o le la, masina, ma fetu (tagai foi Faaliliuga a Iosefa Samita, 1 Korinito 15:40; MFF 76:50–112).
Tagai foi Alema 11:43–45; Luka 24:39.
“E ese le pupula o le la” (1 Korinito 15:41).
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
Tatou te aoao mai i le fuaiupu 29 sa auai le Au Paia anamua i papatisoga mo e ua maliliu, e pei lava ona tatou faia i le Ekalesia i aso nei. O a mai lo tatou aiga i le sauniaina o igoa o o tatou tuaa mo sauniga o le malumalu? Tagai foi “Papatisoga mo e ua Maliliu,” Gospel Topics, topics.lds.org.
O a ni meafaitino po o ni ata e mafai ona e faaali atu e fesoasoani i lou aiga ia malamalama i nisi o upu sa faaaoga e Paulo e faamatala ai le eseesega o tino faaletino mai tino toetu? Mo se faataitaiga, ina ia faaali atu le eseesega i le va o le pala ma le le pala (tagai fuaiupu 52–54) e mafai ona e faaali atua le uamea ua elea (e pei o se uamea) ma le uamea e le elea (e pei o le sila e le maosia) Po o le, e mafai foi ona e faatusatusaina se mea vaivai i se mea malosi (tagai fuaiupu 43).
E faapitoa le anoa o se talanoaga e uiga i nei fuaiupu pe afai e iloa e lou aiga se tagata ua maliu. E mafai e tagata o le aiga ona molimau i le auala ua aveese ai e Iesu Keriso “le tui o le oti” (fuaiupu 56). O le savali a Elder Paul V. Johnson “Ma e Leai Foi Se Toe Oti” (Ensign po o le Liahona, Me 2016, 121–23) o se faaopoopoga lelei lea i le tou talanoaga.
Ina ia fesoasoani i tagata o le aiga ia fesootai i lenei fuaiupu, e mafai ona e tusia se lio i le palapala ma faatonu se tagata o le aiga e “tumau” ai i totonu a o fusi ona mata a o taumafai isi e aveese o ia mai le lio. O le a le eseesega o i ai pe afai e le fusia mata o le tagata o loo i totonu o le lio ma mafai ona “mataala”? O le a se mea e mafai ona tatou faia e “tutu malosi” ai i o tatou olaga pe a faaosoosoina i tatou e fai ni filifiliga le lelei?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava ia
Tagai mo ni mamanu. I tusitusiga paia tatou te maua ai mamanu o loo faaalia ai le ala e fai ai e le Alii Lana galuega. O a ni mamanu e te maua i le 1 Korinito 14 e fesoasoani tatou te malamalama ai i le ala e aoao ai ma faagaeetia ai le tasi ma le isi? Tagai foi MFF 50:13–23.
Funa e, Se a Le Mea E Te Tagi Ai? saunia e Simon Dewey