“23-29 Setema. Kalatia: ‘Savavali i la le Agaga’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“23-29 Setema. Kalatia,” Sau, Mulimuli Mai ia te Au—Mo Tagata Taitoatasi ma Aiga: 2019
23-29 Setema
Kalatia
“Savavali i la le Agaga”
A o e faitauina le Kalatia, tusifaamaumau ni lagona e te maua. O le faia o lena mea o le a fesoasoani e te manatua ma mafaufau loloto ai i ai i le lumanai.
Tusifaamaumau Lagona e Uunaia ai Oe
O le talalelei a Iesu Keriso e ofoina mai le saolotoga mai le pologa faaleagaga. Ae peitai o nisi taimi, o tagata o e ua oo i le saoloto o le talalelei, ua liliu ese mai ai ma “mananao ... ia ... toe nofo pologa” (Kalatia 4:9). O le mea lenei sa fai e nisi o le Au Paia i Kalatia—sa latou liliu ese mai le saolotoga na ofo atu e Keriso ia i latou (tagai Kalatia 1:6). O le Tusi la a Paulo i Kalatia, o se valaau faanatinati e toe foi mai i le “saolotoga ua faasaoloto mai ai Keriso ia te i tatou” (Kalatia 5:1). O le valaau lenei o le valaau foi e manaomia ona tatou faalogo ma usitai i ai, aua e ui ina suia tulaga, ae o le tauiviga i le va o le saolotoga ma le nofopologa e tumau lava. E pei ona aoao mai Paulo, e le lava le “valaauina i le saolotoga” (Kalatia 5:13); e tatau foi ona tatou “tumau” ai (Kalatia 5:1) e ala i le faalagolago ia Keriso.
Manatu mo Suesuega Faaletagata Lava Ia o Tusitusiga Paia
O le tulafono a Keriso ou te saoloto ai.
Sa tusi atu Paulo i le Au Paia i Kalatia ina ua iloa ua taitaieseina i latou e aoaoga sese. O le tasi o nei aoaoga o le, ina ia mafai ona faasaoina, o Tagata Nuuese o e na taliaina le talalelei e tatau ona peritomeina ma ia tausia isi tu ma aga o le tulafono a Mose. Sa ta’ua e Paulo nei tu ma aga o “le amo o le pologa” (Kalatia 5:1) aua sa latou taofiofia le Au Paia mai le ola atoatoa i le tulafono a Keriso, lea e aumaia ai le saolotoga moni. O le a se mea e te maua i le fautuaga a Paulo i Kalatia e mafai ona fesoasoani e te malamalama ai po o le a le saolotoga moni? E mafai faapefea ona e mafaufau loloto po o a ni amo o le pologa atonu o loo i ai i lou olaga? Pe o i ai lava se mea o taofia ai oe mai le mauaina o le saolotoga lea e ofo mai e le talalelei? O faapefea ona “faasaoloto [oe]” e Keriso ma Lana talalelei? (Kalatia 5:1).
Tagai foi 2 Nifae 2:27; 9:10–12.
O au o se suli i faamanuiaga na folafola atu ia Aperaamo.
Sa popole nisi o le Au Paia i Kalatia ona sa le o i latou o ni tupuaga (“fanau”) moni a Aperaamo, o le a latou le maua faamanuiaga na folafola atu ia Aperaamo, e aofia ai na faamanuiaga o le faaeaga. E tusa ai ma le Kalatia 3:7–9, 13–14, 27–29, o a mea e agavaa ai se tagata ina ia avea ma “fanau a Aperaamo”? Ina ia aoao e uiga i faamanuiaga na folafola atu ia Aperaamo ma faamanuiaga e mafai ona tatou maua i le avea ai ma ana fanau, tagai i le Bible Dictionary, “Abraham, covenant of,” ma le “Feagaiga Faa-Aperaamo,” Gospel Topics, topics.lds.org.
Pe sa i ai ia Aperaamo le talalelei a Iesu Keriso?
Sa faamalamalama mai e le Perofeta o Iosefa Samita: “Tatou te le talitonu, sa le malamalama tagata anamua i augatupulaga uma i le faatulagaga o le lagi e pei ona manatu ai le toatele o tagata, talu ai o mea uma sa faaolaina, sa faaolaina e ala i le mana o lenei fuafuaga sili o le faaolataga, e pei ona i ai talu mai lava ao lei afio mai Keriso. … Sa osi e Aperaamo taulaga, ma e ui lava i lenei mea, sa talaiina atu le Talalelei ia te ia” (“The Elders of the Church in Kirtland to Their Brethren Abroad,” The Evening and the Morning Star, Mar. 1834, 143, josephsmithpapers.org). Ua faaalia foi e mau nei sa talaiina atu le talalelei a Iesu Keriso i luma atu o le auaunaga a le Faaola i le tino: Helamana 8:13–20; Mose 6:50–66.
Afai ou te “savali i la le Agaga,” o le a ou maua le “fua o le Agaga.”
O le suesueina o fuaiupu nei e mafai ona fesoasoani e te faia ai se iloiloga po o le a le atoatoa o loo e savali ai i le Agaga. Pe o e mauaina le fua o le Agaga e pei ona taua i fuaiupu 22–23? O a isi fua, po o taunuuga, o le ola faaleagaga ua e maitauina? Mafaufau loloto i mea e manaomia ona e faia e atili atinae atoatoa ai lenei fua? E faapefea ona faaleleia le taua o sootaga i lou olaga i le atinaeina o lenei fua?
E tatau ona ou sailia le “fua o le Agaga” i lo’u olaga.
Atonu o loo e taumafai e savali i le Agaga, ae e foliga mai e le o fua mai au taumafaiga i fua ua folafolaina mai. Faitau le Kalatia 6:7–10 (e masani ona faatatau i ai o le tulafono o le seleselega). O le a le savali e te manatu o loo i ai i le Alii mo oe i nei fuaiupu? E faapefea ona e faaaogaina nei fuaiupu e faamalosiau ai i se tasi o loo tauivi e ola i le talalelei?
Tagai foi Alema 32:28, 41–43; Mataupu Faavae ma Feagaiga 64:32–34.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
O le a le uiga o le “ola i le faatuatua”? O a ni mea o loo faia e lou aiga e faaalia ai o loo tou ola i le faatuatua?
Atonu e te faalauiloa atua le Kalatia 4 e ala i le talanoaina o eseesega i le va o auauna a se tupu ma lana fanau. O a ni avanoa po o ni gafatia e i ai i se atalii/afafine o se tupu ae e le o i ai i se auauna? Mafaufau i lenei mea ao outou faitauina faatasi fuaiupu 1–7. O a ni mea o loo aoao mai e nei fuaiupu e uiga i la tatou sootaga ma le Tama Faalelagi?
Ina ia faaopoopo atu ni mea malie i le tou talanoaga o le Kalatia 5:22–23, e mafai ona faaigoa e lou aiga ni fualaau aina eseese i upu sa faaaoga e Peteru e faamatala ai le “fua o le Agaga.” Ona filifili lea e tagata taitoatasi o le aiga se fua se tasi, faamatala le uiga, ma talanoa e uiga i se tagata o fai ma faataitaiga o lena fua. O lenei mea e mafai ona oo atu i se talanoaga e uiga i auala e mafai ona valaaulia ai e lou aiga le Agaga i totonu o le tou fale ma atinae ai lenei fua. A uma le talanoaga, e mafai ona outou fiafia faatasi i le aina o le salati fualaau aina.
Atonu e i ai taimi e “maua [ai se tagata o lou aiga] i se tasi agasala.” O le a se fautuaga e te maua i le Kalatia 6:1 e uiga i le mea e fai i se tulaga faapena?
Afai sa totoina faatasi e lou aiga se mea, e mafai ona e faaaogaina lena aafiaga e faamalamalama ai le mataupu faavae “o le mea e luluina e le tagata, o le mea lava lea e seleseleina mai ai e ia” (fuaiupu 7). Pe e mafai foi ona e fesili atu i tagata o le aiga e uiga i a latou fualaau aina po o fualaau faisua e sili ona fiafia i ai, ma talanoa po o a mea e manaomia e toto ai se laau e maua mai ai lena meaai. (E mafai ona e faaaogaina le ata o loo avatu ai i lenei otootoga e fai ma fesoasoani vaaia.) Ona outou faia lea o se talanoaga e uiga i faamanuiaga e faamoemoe lou aiga e maua ma pe faapefea ona “selesele” na faamanuiaga.
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Fesoasoani i lou aiga e faatatau tusitusiga paia ia i latou lava. Na faapea mai Nifae “sa ou faatatauina tusitusiga paia uma ia te i matou, ina ia avea ma o matou manuia ma aoaoga” (1 Nifae 19:23). Ina ia fesoasoani ia fai e lou aiga lenei mea, e mafai ona e valaaulia i latou e mafaufau i ni taimi sa latou maua ai ni aafiaga i le fua o le Agaga o loo faamatalaina i le Kalatia 5:22–23. (Tagai Aoao Atu i le Ala a le Faaola, 21.)
Sa aoao mai Paulo, a tatou savali i la le Agaga, o le a tatou maua le fua o le Agaga i o tatou olaga.