23–29 Setema

Kalatia

“Savavali i la le Agaga”

A o e faitauina le Kalatia, o a ni uunaiga ua e maua e uiga i le mea e manaomia e tamaiti o lau vasega ona aoaoina?

Tusifaamaumau Ou Lagona Uunai

Valaaulia le Fefaasoaai

Tuu atu ni nai minute i tamaiti e tusi ai se mea sa latou aoaoina mai se talanoaga lata mai o le talalelei i le fale po o le lotu. Ao mai ia ata, ma tuu i tamaiti latou te mate maia po o a mea o faatatau i ai ata taitasi.

Aoao atu Aoaoga Faavae

Tamaiti Laiti Ifo

Kalatia 5:22–23

E fesoasoani le Agaga Paia ia te au e lagona le alofa, olioli, ma le filemu.

E mafai ona iloa e tamaiti le fua o le Agaga. O le a saunia ai i latou e sailia le tosinaga a le Agaga Paia i o latou olaga atoa.

Gaoioiga e Mafai Ona Fai

• Faaali ni ata o ni fualaau suamalie eseese, ma fesili i tamaiti e faamatala mai pe faapefea ia tofo i fualaau taitasi. Faamalamalama atu e pei ona eseese le tofo o fualaau, e mafai foi ona tatou lagonaina le Agaga Paia i ala eseese, e pei o le alofa ma le filemu. Fesili i tamaiti e faamatala pe faapefea lagona o le Agaga Paia ia latou.

  

  E mafai e tamaiti o tausaga uma ona iloa fua o le Agaga.

• Faitau faatasi ma tamaiti le Kalatia 5:22–23 ma faamalamalama ia upu atonu latou te le masani ai. Valaaulia tamaiti taitasi e filifili se fua o le Agaga o loo ta’ua i nei fuaiupu ma ta’u mai e uiga i se taimi na ia iloa ai lena fua o le Agaga. Valaaulia ia tamaiti e tusi ni ata faigofie o o latou aafiaga.

Kalatia 6:2

E finagalo Iesu Keriso ia te au e fesoasoani i e manaomia le fesoasoani.

O faatonuga o i le Kalatia 6:2 e tali tutusa ma aoaoga a Alema o i le Mosaea 18:8 i tagata o e o le a papatisoina. Faaaoga le avanoa lea e fesoasoani ai i tamaiti e sauniuni mo feagaiga o le papatisoga.

Gaoioiga e Mafai Ona Fai

• Faaali se ata o se tamaitiiti ua papatiso (pei o le Tusiata o le Talalelei, nu. 103). Fesili i tamaiti po o le a le mea a le tamaitiiti o fai. Faamalamalama atu pe a tatou papatiso, tatou te osia feagaiga, po o folafolaga. Faitau le Kalatia 6:2 po o le Mosaea 18:8 e fesoasoani ai i tamaiti e aoao se tasi o mea tatou te folafola atu e fai: tauave avega a isi. Valaaulia ia tamaiti e tusi ni ata o auala e mafai ona latou fesoasoani ai i isi o e tauaveina avega.

• Faitau atu i tamaiti le fasifuaitau lea mai le Kalatia 6:2: “Ia outou fesui i a outou avega e ave.” Ina ia faapupula atu le uiga o lenei mea, tuu atu i se tasi o tamaiti se mea mamafa e amo. Ona fesili lea mo se tasi e ofo mai e fesoasoani e amo pe sii le mea faitino. Faamalamalama atu i tamaiti e tele mea e mafai ona pei o se avega, e pei o le ma’i po o le lagonaina le faanoanoa po o le tuulafoaiina. O le a se mea e mafai ona tatou faia e fesoasoani ai i se tagata i lea ituaiga o avega?

Kalatia 6:7–9

O a tatou taga, pe lelei pe leaga, e i ai taunuuga.

E taua mo tamaiti le malamalama o a tatou filifiliga e i ai taunuuga. E mafai ona e faaaogaina le Kalatia 6:7–9 e faapupula ai lenei upumoni.

Gaoioiga e Mafai Ona Fai

• Faaali atu se fatu ma se fualaau faisua. Faitau le Kalatia 6:7--9 i tamaiti. Fai i tamaiti e faafoliga o la e toto se fatu pe a latou faalogo i le upu “lulu.” Fai i ai e faafoliga o la e piki se fualaau faisua mai se laau pe a latou faalogo i le upu “seleseleina.”

• Faaali i tamaiti ni ituaiga eseese o fualaau faisua, ma fesoasoani ia i latou e sue ia fatu mai fualaau taitasi. Tuu ia fatu i se koneteina, ma fai i tamaiti e feauauai e filifili se tasi ma faamatala mai po o le a le fualaau faisua o le a ola mai ai pe afai latou te totoina. Fesoasoani ia i latou ia iloa e faapei lava o fatu tatou te totoina e iloa ai le fualaau faisua tatou te maua mai ai, o filifiliga foi tatou te faia e iloa ai taunuuga ma faamanuiaga e iu ina tatou mauaina.

• Fai se laina i luga o le fola i se teipi. Tuu se foliga fiafia ma se foliga faanoanoa i pito faafeagai o le laina. Valaaulia se tamaitiiti e tu i le ogatotonu o le laina, ma tuu atu i isi tamaiti e ta’u mai ia filifiliga o le a tau atu i le fiafia po o le faanoanoa (atonu e manaomia ona e saunia ni nai faataitaiga). Mo filifiliga taitasi, fai i le tamaitiiti o i le ogatotonu e laa agai i le itu fiafia po o le itu faanoanoa. Toe fai ma saga fai le gaoioiga, ma tuu atu e feauauai ia tamaiti e tutu i luga o le teipi.

Aoao atu Aoaoga Faavae

Tamaiti Matutua Atu

Kalatia 5-1

Ua faasaolotoina e Iesu Keriso i tatou.

E manatu nisi tagata o le talalelei a Iesu Keriso e faatapulaa ai lo latou saolotoga. Mafaufau pe faapefea ona e fesoasoani i tamaiti ia iloa e aumaia moni ai lava le saolotoga mai le agasala ma le oti.

Gaoioiga e Mafai Ona Fai

• Valaaulia tamaiti e faitau le Kalatia 5:1. Na faapefea ona faasaoloto e Iesu Keriso i tatou ina ia mafai ai ona tatou toe foi atu i le Tama Faalelagi? Faaali atu ata o Iesu o mafatia i Ketesemane ma Lona Toetu e fesoasoani ai ia malamalama ia tamaiti pe na faapefea e Iesu ona faasaoloto i tatou mai le agasala ma le oti (tagai Tusi Ata o le Talalelei, nu. 56, 59).

• Usu faatasi ma toe iloilo ia upu i se pese e uiga i le Faaola, e pei o le “Ua Ou Iloa Lo‘u Fa‘aola” (Viiga, nu. 73). Fai i tamaiti e sue mai upu o le pese lenei o loo faamatala ai auala e mafai e Iesu Keriso ona faasaoloto ai i tatou mai le nofopologa faaleagaga.

Kalatia 5:22–23

Afai ou te “savali i la le Agaga,” e mafai ona ou olioli i “fua o le Agaga.”

E faapefea ona e fesoasoani i tamaiti ia iloa pe a latou lagonaina le Agaga Paia?

Gaoioiga e Mafai Ona Fai

• Tuu atu ia tofu le tamaitiiti ma se fasipepa e faafoliga i se fualaau aina suamalie, ma fai i tamaiti e sue se “fua o le Agaga” o loo lisi mai i le Kalatia 5:22–23. Valaaulia i latou e tusi se tasi o fua i le tasi itu o a latou pepa ma se upu e faafeagai lona uiga i le isi itu. (Fesoasoani ia latou malamalama i upu latou te le masani ai.) Valaaulia i latou e faasoa mai a latou fua i le vasega.

• Valaaulia ia tamaiti e faitau e uiga i le fua o le Agaga i le Kalatia 5:22--23 ma fai se tusiga pe tusi se ata o se taimi na fesoasoani ai le Agaga Paia ia i latou ia lagonaina se tasi o na fua. Fai i ai e faasoa atu i se isi tagata o le vasega a latou tala. Aisea ua avea ai fua ma auala lelei e fesoasoani tatou te malamalama ai i le ala e tosina ai i tatou e le Agaga?

Kalatia 6:7–9

O a tatou taga, pe lelei pe leaga, e i ai taunuuga.

Fesoasoani i tamaiti ia malamalama o taunuuga o a tatou amioga o nisi taimi e oo vave mai ma o isi taimi e ono oo mai “i ona po e tatau ai” (fuaiupu 9).

Gaoioiga e Mafai Ona Fai

• Faitau faatasi le Kalatia 6:7–9. Valaaulia ia tamaiti e tusi ni ata faigofie e toto ai e se tasi le fatu o se fua ae selesele mai e ese le fua. Aisea e le tatau ai lenei mea? E faapefea foi ona le mafai i le faia o filifiliga sese ona maua ai o taunuuga lelei?

• Fai faatasi o se vasega se paso felavasa’i e pei o lea e i le itulau o gaoioiga o le vaiaso lenei. Valaaulia ia tamaiti e mafaufau i nisi upu nai lo upu o i le paso e faatusa i lagona lelei mai le Agaga Paia po o filifiliga leaga ia e ono tuliesea ai o Ia. Talanoaina ia taunuuga o filifiliga sa latou mafaufau i ai.

• Valaaulia ia tamaiti e lisi mai ni faamanuiaga ua latou faamoemoe e maua mai le Tama Faalelagi. Fesoasoani ia latou mafaufau i “fatu” e tatau ona latou totoina ina ia “selesele ai” nei faamanuiaga.

Fautuaina le Aoaoina i le Aiga

Valaaulia ia tamaiti e vaavaai mo taunuuga lelei, po o “fua” ia e maua ona o faaiuga lelei latou te faia i lenei vaiaso. Tau i ai o le vaiaso a sau, e mafai ona latou faasoa maia o latou aafiaga.

Faaleleia o Lo Tatou Aoao Atu

Fetuunai gaoioiga mo le matutua o tamaiti. Tuu atu i tamaiti ia avanoa e auai ai i le faatinoina, ae ia manatua o lo latou tomai e faia ai o le a eseese ona o o latou tausaga ma le matutua. E ono manaomia e tamaiti laiti ifo nisi taiala ma taitaiga. A o faasolo ina matutua, e mafai e tamaiti ona latou saofaga atili mai ma lelei atu i le faasoa mai o latou mafaufauga. (Tagai Aoao Atu i le Ala o le Faaola, 25–26