16–22 Setema

2 Korinito 8–13

“E Fiafia le Atua i Le ua Foai ma le Loto Malie”

O au aitia aupito sili faafaiaoga mo tamaiti i lau vasega o le a maua a o e suesue ma le agaga tatalo i le 2 Korinito 8–13 . E mafai ona maua ni manatu faaopoopo faafaiaoga i le otootoga lenei.

Tusifaamaumau Ou Lagona Uunai

Valaaulia le Fefaasoaai

O se tasi auala lelei e valaaulia ai le fefaasoaai o tamaiti o le faamanatu atu lea ia i latou i se mea sa e valaaulia i latou e fai i le taimi o se lesona ua mavae. Fai atu ia i latou e faasoa mai o latou aafiaga.

Aoao atu Aoaoga Faavae

Tamaiti Laiti Ifo

2 Korinito 9:6-7

E mafai ona ou foai atu ma le loto malie i tagata e manaomia le fesoasoani.

O se mea lelei pea lava le auauna atu i isi, ae e sili atu ai le auauna atu ma le loto malie. Mafaufau po o le a se mea o le a musuia ai tamaiti taitoatasi e “foai atu ma le loto malie.”

Gaoioiga e Mafai Ona Fai

• Valaaulia tamaiti e toe fai mai le fasifuaitau “E fiafia le Atua i le ua foai ma le loto malie” (2 Korinito 9:7). O le a le uiga o le “foai ma le loto malie”? Faaali atu se ata o se foliga fiafia ma se foliga faanoanoa, ma fesili i tamaiti po o le fea ua foliga mai o se ua foai ma le loto malie.

• Usu ma toe usu faatasi se pese e faatatau i le auauna atu, e pei o le “Pe A Tatou Fesoasoani” (Tusipese a Tamaiti, 108) O le taimi muamua, fai i tamaiti e usu ma le fiafia; ona fai lea i ai e usu le pese ma ni lagona po o nisi uiga e ese, e pei o le faanoanoa, lelavava, feitai, po o le fefefe. Faamanatu i tamaiti e finagalo le Tama Faalelagi ia tatou fesoasoani ma le fiafia i isi. Ona toe usu fiafia lea o le pese.

• Avatu i tamaiti ni ata o foliga ataata. Fai atu i ai e tuu i luga a latou ata pe a latou faalogo i upu ataata po o le fiafia a o latou usuina le “Ataata” (Tusipese a Tamaiti, 128). E mafai ona latou faia le mea lava lea e tasi i ata o foliga faauu ma upu faauu ma le fa’auu. Ta’u i tamaiti o foliga faauu e le o le fiafia; o se tasi o auala e laumata fiafia ai ma auauna i isi o le ataata ma fesoasoani i isi e ataata.

• Fuafua se gaoioiga a le vasega e auauna atu i se tasi, e pei o se tamaitiiti e le sau i le Peraimeri po o se tagata o le uarota po o se tuaoi e manaomia le fesoasoani. Atonu tou te fuafua e asiasi i le tagata lea i lona fale, tusi ni faaupuga agalelei pe tusi ni ata, pe fai sina mea e ‘ai e faasoa i ai.

• Valaaulia tamaiti taitasi e fuafua ma faatino se auaunaga ma le lotomalie mo se tagata o lona aiga. I le taimi o le lesona i le vaiaso a sau, fai i ai e faasoa mai mea sa latou faia.

2 Korinito 12:7–10

E tali mai e le Tama Faalelagi e le aunoa ia tatalo, ae Na te le aumaia i taimi uma mea uma tatou te ole atu ai.

O le poto masani o Paulo i le tatalo mo lona “mea matuitui i le tino” ina ia aveesea ua aoao mai ai i tatou e faapea o nisi taimi e faaalia e le Atua Lona alofa mo i tatou e ala i le le aumaia o mea tatou te mananao ai.

Gaoioiga e Mafai Ona Fai

• Faaali atu i tamaiti se laau e i ai mea talatala (po o se ata o se laau faapena). Fesoasoani latou te vaai faalemafaufau ai pe mata o le a le faalogoga pe a tu se tala i o latou pa’u mo se taimi umi. Aotele le 2 Korinito 12:7–10 mo tamaiti, e faaaoga ai upu o le a latou malamalama ai. Faamalamalama atu o le “mea matuitui i le tino” o Paulo o se tofotofoga, e pei o se vaivaiga faaletino. E ui ina sa ole atu Paulo i le Atua e aveese le tofotofoga, ae sa lei aveesea e le Atua. Ae, na aoao atu e le Atua ia Paulo e faapea o tofotofoga e mafai ona fesoasoani tatou te aoao ai ia lotomaualalo ma faalagolago ia te Ia. Ona mafai lea ona faia e le Atua ia tatou malolosi.

• Molimau atu e silafia e le Tama Faalelagi le mea e aupito sili mo i tatou, ma o le a Ia foai mai ia i tatou le mea tatou te manaomia, tusa lava pe ese mai le mea ua tatou manatu tatou te manaomia. Atonu foi e te faasoaina atu se aafiaga ina ua tali mai au tatalo i se auala po o se taimi na ese mai le mea sa e faamoemoeina. O le tala “Aua Nei Galo ona Tatalo mo Erik” (Friend, Ian. 2017, 74–75) e mafai foi ona fesoasoani.

• Usu faatasi ma tamaiti se pese e uiga i le alofa o le Tama Faalelagi e pei o le “O Le Tatalo A Le Tamaititi” (Tusipese a Tamaiti, 6). Fesili i tamaiti pe o le a sa latou tala e fai i se tasi o taumanatunatu pe faafofoga ma tali mai le Tama Faalelagi i tatalo. Toe usu le pese, ma faasino i ai laina o loo faamatala mai ai lagona o le Tama Faalelagi mo i tatou.

Aoao atu Aoaoga Faavae

Tamaiti Matutua Atu

2 Korinito 9:6–9

E mafai ona ou foai atu ma le loto malie i tagata e manaomia le fesoasoani.

Sa manao ia Paulo e musuia le Au Paia e foai atu a latou mau mea e fesoasoani ai i e matitiva. E faapefea ona e faaaogaina ana upu e musuia ai tamaiti e auauna atu i isi?

Gaoioiga e Mafai Ona Fai

• Tusi ia upu o le 2 Korinito 9:7 i le laupapa, ae tuu avanoa mo upu autu. Valaaulia ia tamaiti e mate mai po o a upu na e misi. Ona tuu atu lea latou te faitauina le fuaiupu o i le mau e faatumu ai avanoa. O le a le uiga o le foai atu “ma le tiga, po o le aua foi ma le faatauanauina”? O le a le uiga o le “foai ma le loto malie”?

• Valaaulia ia tamaiti e fesoasoani ia te oe i le sueina o ata o le Faaola o loo auauna atu i isi (e tele o loo maua i le Sau, Mulimuli Mai ia te A’u—Mo Tagata Taitoatasi ma Aiga). Fesili atu i ai pe o a mea o latou vaaia i nei ata e fesoasoani latou te iloa ai sa auauna atu Iesu i isi ma le alofa. Faatu se sini o se vasega e fai atu ioe pe a talosaga atu ia tagata o aiga po o isi e auauna atu i le vaiaso a sau, e pei o le fesoasoani i feau i le fale po o le tausiga o isi.

• Fesoasoani i tamaiti e teuteu ni tamai maa. Valaaulia i latou e tuu a latou “maa auauna atu” i a latou taga i lenei vaiaso e fesoasoani ai ia latou manatua e auauna atu i isi ma le loto malie.

• Fesoasoani i tamaiti e fatu ni fuaiupu fou i se pese e uiga i le auauna atu, e pei o le “Mea Malie e Fai” (Children’s Songbook, 129), lea e aoao mai ai o se mea malie le auauna atu i isi i ni auala eseese.

2 Korinito 12:7–10.

E tali mai e le Tama Faalelagi e le aunoa ia tatalo, ae Na te le aumaia i taimi uma mea uma tatou te ole atu ai.

Sa ole atu Paulo i le Atua e aveese ona vaivaiga, ae na silafia e le Atua o vaivaiga o Paulo o le a faalotomaualaloina ai o ia ma faamalosiina ai foi o ia.

Gaoioiga e Mafai Ona Fai

• Valaaulia ia tamaiti e faatusatusa le 2 Korinito 12:9–10 ma le Eteru 12:27. O a upu po o fasifuaitau o loo fai ma toe fai? O a mea o aoao mai e nei fuaiupu? (Atonu e manaomia lou faamalamalama atu sa faatusatusa e Paulo lona luitau i se mea matuitui i lona tino.) O le a le mea na aoao atu e le Atua ia Paulo e uiga i tofotofoga?

• Valaaulia ia tamaiti e lisi mai ni tofotofoga o tagata i le olaga. Fesoasoani ia latou mafaufau pe mafai faapefea e se tagata ona aoao mai nei tofotofoga ma faamanuiaina ai.

• Faitau faatasi ma tamaiti le “Mata o le a tali mai i taimi uma e le Tama Faalelagi a’u tatalo?” (Friend, Ian. 2017, 69). Fai i tamaiti e faasoa mai ni aafiaga ina ua latou tatalo mo se mea ae lei maua mai. Fai atu ia i latou e faasoa mai mea na latou aoaoina mai o latou aafiaga. Atonu e i ai foi ni ou lava aafiaga e faasoa mai foi. Tuu atu lau molimau faapea e tali mai pea e le Tama Faalelagi a tatou tatalo i le ala ma i le taimi o le a sili ona faamanuiaina ai i tatou.

Fautuaina le Aoaoina i le Aiga

Valaaulia ia tamaiti ia foi atu ma le loto malie i o latou aiga i le vaiaso lenei ma ia o mai i le vasega i le vaiaso lea ua saunia e lipoti mai pe na faapefea ona latou auauna atu i se tasi na manaomia le fesoasoani.

Faaleleia o Lo Tatou Aoao Atu

Taulimaina faalavefau i le alofa “O isi taimi e amio ai se tamaitiiti i ni auala e faalavelave ai i le aotauina o isi i le vasega. A tupu lenei mea, ia onosai, alofa, ma malamalama e uiga i luitau o loo feagai ma lea tamaitiiti. … Afai o le tamaitiiti o loo faalavelave e i ai ni manaoga faapitoa, talanoa i se tagata tomai o manaoga faapitoa a le uarota po o le siteki pe asiasi i le disabilities.lds.org ina ia e iloa ai pe faapefea ona sili atu ona taulimaina na manaoga” (Aoao Atu i le Ala a le Faaola, 25).