30 Setema–13 Oketopa

Efeso

“Ina ia Faaatoatoaina ai le Au Paia”

A o e suesueina le Tusi i Efeso, mafaufau pe o a mataupu faavae e mafai ona e faamamafaina e faamanuiaina ai tamaiti o loo e faiaoga ai. Tusi ni manatu e oo atu i le mafaufau a o e faitauina.

Tusifaamaumau Ou Lagona Uunai

Valaaulia le Fefaasoaai

Valaaulia tamaiti e tutu i se laina. Fai i le tagata o muamua i le laina e faasoa mai se mea sa ia aoaoina talu ai nei i le taimi o la latou suesuega faaleaiga o tusitusiga paia, i le Peraimeri, po o se isi mea. Fai i le isi tamaitiiti i le laina e toe ta’u mai mea sa faasoa mai e le tamaitiiti muamua ona faaopoopo lea i ai o se mea sa ia aoaoina. Toe fai foi le mea lea ina ia tofu maua e tamaiti uma se avanoa e faasoa mai ai.

Aoao atu Aoaoga Faavae

Tamaiti Laiti Ifo

Efeso 2:19

E ao i tagata o le Ekalesia ona avea o ni uo ma ni “e nuu faatasi.”

Pe o ni “tagata ese” pe “nuu faatasi” ia tamaiti o lau vasega le tasi ma le isi faapea foi ma isi tagata o le uarota? Fesoasoani ia latou malamalama e ui ina i ai o tatou eseesega, e fesoasoani le Faaola ia i tatou ia soofaatasi ma fealofani.

Gaoioiga e Mafai Ona Fai

• Tuu se ata o le Faaola i le ogatotonu o le potu. Valaaulia ia tamaiti e tutu i vaega eseese o le potu e faatusa i “tagata ese” po o “e aumau.” A o e faitauina le Efeso 2:19, valaaulia i latou e agaigai atu i le ata o Keriso seia iu ina latou tutu faatasi. Ta’u atu ia i latou a o tatou latalata atu i le Faaola, e mafai ona tatou soofaatasi ma isi o ni uo ma “e nuu faatasi.”

• Sue ni ata o tamaiti mai vaega eseese o le lalolagi, ma nana solo i le potu. Tuu se ata o le Faaola i luma o le potu. Valaaulia lau vasega e fai paga e pei o ni faifeautalai ma feauauai e sue se ata o se “tagata ese” e tuu i autafa ole ata o le Faaola. Fesoasoani ia latou malamalama a oo ina papatiso ia tagata, e avea i latou o se vaega o lo tatou aiga faale-Ekalesia, po o le “aiga o le Atua.” E mafai faapefea ona tatou fesoasoani i se tasi e fou ina ia lagona le taliaina o ia?

Efeso 6:1–3

E finagalo le Tama Faalelagi ia ou usitai i o’u matua.

A o e faitauina le Efeso 6:1–3, mafaufau i ni auala e mafai ona e fesoasoani ai i tamaiti ia malamalama pe aisea e taua ai le usitai i o latou matua.

Gaoioiga e Mafai Ona Fai

• Faitau le Efeso 6:1 i le vasega, pe fesoasoani foi i se tasi o tamaiti e faitauina. Fai i tamaiti e faatino mai taga o taimi latou te usitai ai i o latou matua. Mata o le a le mea semanu e tupu pe ana latou le usitai?

• Usu faatasi se pese e uiga i le usitai, e pei o le “Quickly I’ll Obey” (Children’s Songbook, 197). Taofi pe a uma le laina muamua, ma fesili i tamaiti e ta’u mai se mea e fai atu ona matua ia te ia e fai; ona faauma lea o le pese. Toe fai ma toe fai ina ia mafai ona tofu tamaiti ma se avanoa.

• Faasoa atu se taimi na e usitai ai i ou matua ma faamanuiaina ai. Pe faamatala le tala e uiga ia Chloe mai le lauga a Sister Carole M. Stephens “Afai Tou te Alofa Mai ia te Au, Ia Outou Tausi i Au Poloaiga” (Ensign po o le Liahona, Nov. 2015, 118–20) po o le faaali o le vitio “Going to Grandma’s” (LDS.org).

Efeso 6:10–18

O le ofutau o le Atua e mafai ona puipuia ai au.

E faapefea ona e fesoasoani i tamaiti ia malamalama o le faia o mea amiotonu o le ofuina lea o le ofutau?

Gaoioiga e Mafai Ona Fai

• Faaali se ata o se tagata o ofuina le ofutau, e pei o lea e i le itulau o gaoioiga o le vaiaso lenei po o le otootoga o lenei vaiaso i le Sau, Mulimuli Mai ia te A’u–Mo Tagata Taitoatasi ma Aiga. A o e aoteleina le Efeso 6:10–18, faaali i tamaiti pe faapefea e fasi vaega eseese o le ofutau ona puipuia vaega eseese o le tino. (Tagai “O Le Ofutau Atoatoa o le Atua,” Friend, Iuni 2016, 70–71.)

• Aumai ni mea eseese i le vasega e mafai ona faatusa i fasi vaega o le ofutau o loo ta’ua i le Efeso 6:14–17 (mo se faataitaiga, o se pulou po o se taliufiufi), po o ni fasimea faigofie o le ofutau mai le pepa. Tuu i tamaiti e feauauai e faamaulu le “ofutau.” Talanoaina le uiga o le puipuia mai mea leaga ma pe faapefea i le faamaulu o fasimea taitasi o le ofutau ona puipuia i latou. E faapefea ona tatou ofuina le ofutau o le Atua? (mo se faataitaiga, o le suesueina o tusitusiga paia, auauna atu i isi, tatalo, usiusitai, ma isi mea).

Aoao atu Aoaoga Faavae

Tamaiti Matutua Atu

Efeso 2:13–19

Ua nuu faatasi i tatou i le aiga o le Atua.

E faamalolosia tamaiti pe a i ai ni a latou uo lelei i le talalelei. E mafai faapefea ona e fesoasoani ia i latou e atinae ni faauooga e sili atu o le tasi ma le isi?

Ua “nuu faatasi” i tatou ma le Au Paia a le Atua.

Gaoioiga e Mafai Ona Fai

• Faitau faatasi le Efeso 2:19 ma talanoaina le uiga o le avea o se tagata ese po o se tagata e aumau. Faasoa atu se aafiaga sa e lagona ai e pei o se tagata ese po o se e aumau ma sa fesoasoani se tasi ia e lagonaina le talileleia o oe. Valaaulia tamaiti e faasoa mai ni aafiaga faapena. O le a se mea e mafai ona tatou faia e avea ai ma “e nuu faatasi” nai lo ni tagata ese? Pe i ai ni tamaiti o lau vasega e le omai soo, atonu ona latou te lagona e pei i latou o ni tagata ese? Fesoasoani i tamaiti e faia se fuafuaga e fesoasoani ai i na tagata ia lagonaina le talileleia ma le alofagia.

• Ina ia fesoasoani i tamaiti e te faiaoga ai e felata’i le tasi ma le isi, tusi ni nai fesili i le laupapa e uunaia ai i latou e faasoa atu se mea e uiga ia i latou lava, e pei o le O anafea na tali mai ai sau tatalo? po o le O le a se mea e sili ona e fiafia i ai e fai faatasi ma lou aiga? Vaevae ia tamaiti i ni paga, ma valaaulia i latou e fai atu le tasi i le isi ia fesili. O le a se mea na latou aoaoina e uiga i le tasi ma le isi?

Efeso 6:1–3

E finagalo le Tama Faalelagi ia ou usitai ma ava i o’u matua.

Mafaufau i ni auala e mafai ona e fesoasoani ai i tamaiti ia malamalama pe aisea e taua ai le usitai i o latou matua.

Gaoioiga e Mafai Ona Fai

• Valaaulia ia tamaiti e faitau le Efeso 6:1–3 taitoatasi ma faailoa mai fasifuaitau e taua ia i latou. Valaaulia i latou e faasoa mai nei fasifuaitau ma pe aisea ua latou lagona ai e taua nei fasifuaitau.

• Valaaulia ia tamaiti e faasoa mai ni faataitaiga o tagata o i tusitusiga paia sa usitai ma ava i o latou matua, e pei o le Faaola (tagai Luka 2:42–52), Ruta (tagai Ruta 1), po o Nifae (tagai 1 Nifae 3:1–8). Aisea e taua ai le usitai ma ava i o tatou matua?

• Tuu atu i tamaiti taitasi se fasipepa ma le upu ava i le pito i luga. Talanoaina le uiga o le upu. Valaaulia ia tamaiti e fai se tusiga pe tusi se ata i a latou pepa, o se mea e mafai ona latou faia e faaali atu ai latou te ava i o latou matua.

Efeso 6:10–18

E mafai e le ofutau a le Atua ona puipuia au mai mea leaga.

A o e faitauina le Efeso 6:10–18, mafaufau i ni nai mea matautia faaleagaga e feagai ma tamaiti ma pe mafai faapefea ona e fesoasoani e faamalolosia ia tamaiti e faasagatau i ai.

Gaoioiga e Mafai Ona Fai

• A o faitauina e se tamaitiiti e toatasi le Efeso 6:10–18, fai i se isi tamaitiiti e lisi mai pe tusi i luga o le laupapa ni fasi vaega o le ofutau o loo ta’ua. Aisea e taua ai se ofutau i se taua? E mafai faapefea ona tatou ofuina le ofutau faaleagaga i aso uma?

• Tofi tamaiti taitasi e tusi ma faaigoa se fasi vaega o le ofutau o loo faamatala mai i le Efeso 6:14–17. E mafai faapefea e nei fasimea o le ofutau ona puipuia i tatou mai le leaga? O a mea ua folafola mai e le Alii ia i latou o e ofuina le ofutau atoatoa o le Atua? (tagai Efeso 6:13). O le a le uiga o le “tetee atu pe a oo i le aso vale”?

Fautuaina le Aoaoina i le Aiga

Valaaulia ia tamaiti e matau i lenei vaiaso se tasi e ono lagona e faapei o se tagata ese. Lu’i i latou e faia se mea e aapa atu ai i lena tagata.

Faaleleia o Lo Tatou Aoao Atu

Fesoasoani i tamaiti laiti e aoao mai tusitusiga paia. Ina ia fesoasoani i tamaiti e aoao mai tusitusiga paia, taulai i se fuaiupu se tasi o le mau pe na o se fasifuaitau autu foi. E mafai ona e valaaulia i latou e tutu i luga pe a latou faalogo i se upu po o se fasifuaitau patino. (Tagai Aoao Atu i le Ala a le Faaola, 25–26.)