14–20 Oketopa

Filipi; Kolose

“Ou te mafaia mea uma lava i le faamalosi mai o Keriso ia te au.”

Faitau le Filipi ma le Kolose, mafaufau e uiga i tamaiti o loo e faiaoga ai. Saili musumusuga pe faapefea ona aoao i latou i mataupu faavae o i nei tusi.

Tusifaamaumau Ou Lagona Uunai

Valaaulia le Fefaasoaai

Fesili i tamaiti po o a mea sa latou faia i le vaiaso ua mavae e aapa atu ai i se tasi sa manaomia se uo, e pei ona talanoaina i le vasega i le vaiaso ua te’a.

Aoao atu Aoaoga Faavae

Tamaiti Laiti Ifo

Filipi 1:3–4; Kolose 1:3, 9

E alolofa taitai o le Ekalesia ia te au ma tatalo mo au.

E tele taimi sa amata ai e Paulo ana tusi e ala i le faaali mai o lona alofa mo tagata o le Ekalesia ma ta’u atu ia te i latou o loo ia tatalo mo i latou. Mafaufau pe faapefea ona e fesoasoani i tamaiti ia malamalama e alolofa o latou taitai o le Ekalesia ia i latou.

Gaoioiga e Mafai Ona Fai

• Faitau leotele le Filipi 1:3–4 ma le Kolose 1:3, 9 ma fai i tamaiti e piilima ma punonou o latou ulu i taimi uma latou te faalogo ai i upu tatalo, aioi, ma le faatoga. Faamalamalama atu sa tatalo le Aposetolo o Paulo mo tagata o le Ekalesia, e faapei foi ona tatalo o tatou taitai o le Ekalesia mo i tatou i aso nei.

• Faaali atu se ata o Iesu Keriso, ma faasoa atu ni faataitaiga o Ia o loo tatalo mo se tasi (tagai Luka 22:32; 3 Nifae 19:21, 23). O le a le mea na aioi atu ai Iesu ina ua Ia tatalo mo isi?

• Fesoasoani i tamaiti e ta’u mai igoa o nisi o o latou taitai faale-Ekalesia, e pei o le peresitene o le Peraimeri, le epikopo, ma le Peresitene o le Ekalesia. Faamalamalama atu o nei taitai o loo aioi atu i le Tama Faalelagi e faamanuia ia tamaiti ma fesoasoani ia latou ola amiotonu. Mafaufau e ta’u i tamaiti mea e te fai atu ai pe a e tatalo mo i latou.

Filipi 4:4, 8.

E mafai ona ou olioli i le Alii.

Sa fautuaina e Paulo le Au Paia ia olioli—tusa lava pe sa latou feagai ma tofotofoga faigata ma o loo faapagotaina foi Paulo lava ia. E faapefea ona e fesoasoani i tamaiti ia iloa o le ola ai i le talalelei e aumaia ai le olioli?

Gaoioiga e Mafai Ona Fai

• Fai i tamaiti e faalogologo mo se upu e ta’u soo a o e faitauina le Filipi 4:4. Fai i tamaiti e faaali atu ia te oe mea latou te faia pe a latou olioli. Fesoasoani ia latou malamalama o le “olioli i le Alii” o lona uiga e lagona le fiafia ona ua ia i tatou le talalelei ma ona e alofa Iesu ia i tatou.

• Aumai ni mea faitino po o ni ata e faatusa i mea e fesoasoani ia te oe e “olioli ai i le Alii.” E mafai ona e aumaia se foafoaga matagofie a le Atua po o se ata o se malumalu, le Faaola toetu, po o se aiga. Tuu e feauauai ia tamaiti e filifili mai se ata po o se mea faitino ona ta’u lea i ai pe aisea e faafiafiaina ai oe i ia mea. Valaaulia i latou e faasoa mai ni mea e fesoasoani latou te olioli ai i le Alii.

• Faitau faatasi le Filipi 4:8 , ma fesoasoani i tamaiti e mafaufau i mea e fetaui ma le faamatalaga o i le fuaiupu (tagai foi Mataupu Faavae o le Faatuatua 1:13). Avatu i tamaiti ni fasipepa ma tuu i ai e tusi ni ata o nei mea e fesoasoani ai ia i latou e “mafaufau i” mea o loo faamatalatala mai e Paulo.

Kolose 1:23; 2:6–7

E tatau ona “mauaa” lo’u faatuatua ia Iesu Keriso.

Afai e mafai e tamaiti ona fausia o latou olaga ma o latou faatuatua i le Faaola, o le a latou mafai ona tatalia afa o le olaga.

Gaoioiga e Mafai Ona Fai

• Faaali atu le ata o se laau mai le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga a o e faitauina fasifuaitau autu mai le Kolose 1:23; 2:6–7. (Pe faaali foi le vitio “Spiritual Whirlwinds” on LDS.org.) Mata o le a le mea e tupu i lenei laau pe afai e sau le afa ae le’i i ai ni aa malolosi o le laau? Tuu atu i tamaiti e tutu ma faafoliga o se laau ua vaivai ona aa i se afa ona avea lea o se laau ua malolosi ona aa. E mafai faapefea e le faatuatua i le Faaola ona fesoasoani ia i tatou e faapei ai o se laau ua malolosi ona aa?

• Valaaulia se tamaitiiti e tusi se laau i luga o le laupapa. Fai i tamaiti e ta’u mai ni mea e mafai ona latou fai ia “mauaa” ai ia Iesu Keriso. O taimi taitasi e ta’u mai ai e se tamaitiiti se mea, valaaulia o ia e faaopoopo se a’a i le ata.

Aoao atu Aoaoga Faavae

Tamaiti Matutua Atu

Filipi 4:4–13

Afai ou te faatuatua ia Iesu Keriso, e mafai ona ou fiafia e oo lava i taimi faigata.

Sa puapuagatia Paulo i le tele o tofotofoga, ae sa fiafia o ia aua sa ia faatuatua ia Iesu Keriso.

Gaoioiga e Mafai Ona Fai

• Fai i tamaiti e mafaufau faapea o i ai i latou i le falepuipui, e faapei o le Aposetolo o Paulo i le taimi na ia tusia ai le tusi i Filipi. Faitau faatasi ma tamaiti le Filipi 4:4–13 ma fai i ai e vaavaai mo upu nei: olioli, manuia, toafilemu. Aisea na mafai ai ona olioli ia Paulo ma lagona le toafilemu e oo lava i le falepuipui? Fesoasoani i tamaiti e sue ia upu Alii, Atua, ma le Keriso i fuaiupu. Fesoasoani ia latou malamalama faapea o le faatuatua o Paulo ia Iesu Keriso na mafai ai ona olioli o ia.

• Valaaulia ia tamaiti e fesoasoani ia te oe e faatumu ia fuaiupu e pei o nei: E mafai ona ou i ai i le pogisa ae vaai lava pe afai e i ai so’u . E mafai ona ou i ai i fafo i se aso vevela ae lagona lava le malu pe afai e i ai so’u . E mafai ona i ai ni o’u taimi faigata ae maua lava le olioli pe afai ou te . Fesoasoani i tamaiti e mafaufau i ni auala e mafai ona latou maua le olioli ia Iesu Keriso pe a feagai ma ni taimi faigata. E mafai ona latou usuina se viiga, faitau se mau e fiafia i ai, auauna atu i se tasi, pe fai se tatalo o le faafetai. O le a se mea o fautuaina mai i le Filipi 4:4--13 ? Faasoa atu i tamaiti ni viiga po o ni mau e fesoasoani ia te oe ia maua le olioli i taimi faigata.

Filipi 4:8

E mafai ona ou mafaufau i ni mea e moni, faamaoni, ma mama.

E tele taimi e vaai ai tamaiti i mea leaga ma e le mama. E mafai ona e fesoasoani ia i latou e saili ni mea e faagaeetia ma mama.

Gaoioiga e Mafai Ona Fai

• Fai i se tamaitiiti e faitau leotele le Filipi 4:8 a o vaavaai isi mo upu o i le Mataupu Faavae o le Faatuatua 1:13 e tutusa pe taulalata. Valaaulia se tasi e tusi upu nei i luga o le laupapa. Saunia ni faauigaga faigofie o nei upu ma fai i tamaiti e faafetaui ia uiga o upu. Aisea e tatau ai ona tatou “mafaufau i” nei mea? E mafai faapefea ona tatou “sailia ia” mea?

• Fai i tamaiti e ta’u mai igoa o mea e fetaui ma faamatalaga o i le Filipi 4:8. Valaaulia i latou e tusi se lisi i lenei vaiaso o soo se mea latou te matauina e fetaui ma nei faamatalaga. Fautuaina i latou e aumai a latou lisi i le Peraimeri i le vaiaso lea ma faasoa mai mea sa latou mauaina.

Kolose 1:23; 2:6–7

E tatau ona “mauaa” lo’u faatuatua ia Iesu Keriso.

E taumafai Satani e faavaivaia le faatuatua o tamaiti e ala i faaosoosoga ma mataupu sese. E mafai faapefea ona e musuia tamaiti ia faamalolosia lo latou faatuatua i le Faaola ina ia latou “le o ese ai mai le faamoemoe o le talalelei”?

Gaoioiga e Mafai Ona Fai

• Valaaulia ia tamaiti e tusi ni ata e faatusa i upumoni latou te mauaina i le Kolose 1:23; 2:6–7. Tuu atu latou te faasoa maia a latou ata i le vasega ma faamalamalama mai upumoni e faatusa ia latou ata.

• Faaali le vitio o le “Spiritual Whirlwinds.” O a ni tofotofoga ma ni aoaoga faavae sese i le lalolagi i ona po nei e mafai ona faavaivai ai lo tatou faatuatua? O le a se mea e mafai ona tatou faia e faamalolosia ai lo tatou faatuatua ina ia tatou “mauaa” ai ia Iesu Keriso?

Fautuaina le Aoaoina i le Aiga

Valaaulia tamaiti e faasoa atu i o latou aiga mea sa latou aoaoina e uiga i le “mauaa” ia Keriso. E mafai ona latou faaaogaina le itulau o gaoioiga o le vaiaso lenei po o se mau sa latou faitauina i le vasega i le aso.

Faaleleia o Lo Tatou Aoao Atu

E fia iloa lava ma fia aoao tamaiti e ala i aafiaga fou eseese. Faaaoga gaoioiga e fesoasoani latou te feoai ai, faaaoga uma o latou sane, vailiili, ma taumafai ni mea fou. O fautuaga i le “Taulimaina o Manaoga o Tamaiti Laiti Ifo” i le amataga o lenei punaoa e mafai ona fesoasoani. (Tagai foi Aoao Atu i le Ala o le Faaola, 25–26.)