“14–20 Oketopa. Filipi; Kolose: ‘Ou Te Mafaia Mea Uma Lava i le Faamalosi Mai o Keriso Ia Te Au’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“14–20 Oketopa. Filipi; Kolose,” Sau, Mulimuli Mai ia te Au—Mo Tagata Taitoatasi ma Aiga: 2019
14–20 Oketopa
Filipi; Kolose
“Ou Te Mafaia Mea Uma Lava i le Faamalosi Mai o Keriso Ia Te Au”
O le a se taimi mulimuli sa e faitau ai i uunaiga faaleagaga sa e tusifaamaumauina i le taimi o au suesuega o le Feagaiga Fou? Atonu e aoga le toe faamanatu o uunaiga sa e maua.
Tusifaamaumau Lagona e Uunaia Ai Oe
Na tusi e Paulo ana tusi ia Filipi ma Kolose a o i ai o ia i le falepuipui. Ae o nei tusi e le o i ai le ituaiga leo lea e te ono faamoemoeina mai se tasi e i totonu o le falepuipui. Sa matele ina talanoa Paulo e uiga i le olioli, fiafia, ma le faafetai nai lo le talanoa e uiga i faigata ma tofotofoga: Fai mai o ia, “Ua talaiina atu ai Keriso, o le mea lea ua ou olioli ai, e moni ou te olioli ai lava” (Filipi 1:18). “Aua e ui lava ina ou le i ai ia te outou i le tino, a e peitai ou te i ai ia te outou i le agaga, o loo ou fiafia ma ou vaai atu … ma le mausali o lo outou faatuatua ia Keriso” (Kolose 2:5). O le mea mautinoa, “o le manuia foi mai le Atua” lea sa maua e Paulo i ona tulaga faigata, e “silisili lava i mea uma e manatu i ai” (Filipi 4:7), ae ui i lea e moni. I o tatou lava tofotofoga, e mafai ona tatou lagona lenei lava manuia ma le “olioli i le Alii aua le aunoa” (Filipi 4:4). E mafai ona tatou faalagolago atoa atu, e pei ona sa faia e Paulo, ia Iesu Keriso, “o ia ua tatou maua ai le togiola” (Kolose 1:14). E mafai ona tatou fai atu, e pei ona sa fai mai o Paulo “Ou te mafaia mea uma lava i le faamalosi mai o Keriso ia te au” (Filipi 4:13; tagai foi Kolose 1:11).
Manatu mo Suesuega Faaletagata Lava Ia o Tusitusiga Paia
Pe tatou te “galulue aiai ... ina ia faaolaina [tatou]”?
O le fasifuaitau “galulue aiai ... ina ia faaolaina outou” ua faaaogaina e nisi o tagata e lagolago ai le manatu e faapea, e nao a tatou lava taumafaiga e faaolaina ai i tatou. Peitai o se manatu papau lena manatu, e pei lava ona papau le malamalama i le aoaoga a Paulo—“aua o le alofa tunoa ua faaolaina ai outou i le faatuatua” (Efeso 2:8)—ia faauiga faapea, e le manaomia ni galuega mo le faaolataga. O loo manino le aoao mai a tusitusiga paia, e aofia ai tusitusiga a Paulo, i le manaomia uma o le alofa tunoa o Iesu Keriso ma taumafaiga a le tagata lava ia ina ia maua ai le faaolataga. E pei ona fai mai Nifae, “E faaolaina i tatou i le alofa tunoa, pe a uma mea uma e mafai ona tatou faia” (2 Nifae 25:23). E ui lava i a tatou taumafaiga e galulue ai mo lo tatou faaolataga, “O le Atua, o ia le galue i totonu ia te outou” (Filipi 2:13; tagai foi Filipi 1:6; Bible Dictionary, “Grace”).
E matuai aoga osigataulaga uma mo le talalelei a Iesu Keriso.
Sa tele mea na lafoai ese e Paulo ina ua liliu mai o ia i le talalelei a Iesu Keriso, e aofia ai le tulaga iloga sa ia umia i le faapotopotoga o tagata Iutaia, o le avea ma se Faresaio. I le Filipi 3:5–14, vaavaai mo le mea na maua e Paulo ona sa naunau o ia e faia ni ositaulaga mo le talalelei. Na faapei ona lagona e uiga i ana taulaga?
Ona e mafaufau lea i lo oe lava avea ma se soo. O le a se mea ua e ositaulagaina mo le talalelei a Iesu Keriso? O a ni mea na e mauaina? Pe o i ai nisi osigataulaga faaopoopo e te manatu e tatau ona e faia e avea ai o se soo tuuto atili o le Faaola?
Tagai foi 3 Nifae 9:19–20; Mataupu Faavae ma Feagaiga 58:2–5; Robert C. Gay, “Se a Foi Se Mea e Avatu e le Tagata e Togiola A’i Lona Ola?” Ensign po o le Liahona, Nov. 2012, 34–36.
E mafai ona ou maua le olioli ia Keriso, e tusa lava po o a ou tulaga.
O le olaga o Paulo o se faaaliga manino lelei lea o le upumoni na tautalagia e Peresitene Russell M. Nelson: “Afai o le taulaiga o tatou olaga e … ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia” (“Olioli ma le Ola ai Faaleagaga,” Ensign po o le Liahona, Nov. 2016, 82).
Ao e faitau i le Filipi—ae maise lava le mataupu 4—saili mo faamatalaga e mafai ona fesoasoani e te maua ai le olioli i soo se tulaga o lou olaga. O le a se taimi sa e maua ai “le manuia mai le Atua” i se taimi sa luitauina? (fuaiupu 7). O le a se taimi na e maua ai le malosi “[mai ] ia Keriso” e fai ai ni mea faigata? (fuaiupu 13). Aisea e te manatu ai e taua le “toa filemu” i tulaga uma lava? (fuaiupu 11). E mafai faapefea e le faataitai i uiga faaalia o loo i le fuaiupu 8 ona fesoasoani ia te oe ia maua le olioli i ou tulaga?
Tagai Alema 33:23; Dieter F. Uchtdorf, “Ia Lotofaafetai i Soo Se Tulaga,” Ensign po o le Liahona, Me 2014, 70–77.
Ua faavae lo’u faatuatua ia Iesu Keriso.
O se faiga lenei o le suesuega e mafai ona e faataitaia i le toetoe o soo se mataupu o mau, e ui ina faapitoa le aoga i le Kolose 1:12–23. Suesue i fuaiupu mo soo se mea e te aoao ai e uiga ia Iesu Keriso, fai se lisi o mea e te maua. Aisea e te manatu e taua ai le iloa o nei mea e uiga i le Faaola?
E oo ina “fou” soo o Iesu Keriso, a o latou ola i Lana talalelei.
E faapefea ona e iloa pe o fesoasoani le talalelei a Iesu Keriso ia te oe ia e avea ma se “alii [po o se tamaitai] fou”? O se tasi o auala e iloa ai, o le vailiili o le Kolose 3:1–17 ma fai se lisi o uiga faaalia, uiga auaumama, ma faatinoga a le “tagata tuai” ma se isi lisi o uiga faaalia, uiga auaumama, ma faatinoga a le “tagata fou.”
Pe o musuia e lou suesueina o nei fuaiupu ni manatu e uiga i le auala ua sui ai oe e le talalelei? Tusifaamaumau ou manatu ina ia mafai ona e toe faamanatuina i le lumanai ma mafaufau loloto pe o faapei mai lou alualu i luma.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
Atonu e maitau e lou aiga le taua faafia o upu fiafia po o le olioli i le Filipi. Soo se taimi lava e te tau ai i se tasi o nei upu, e mafai ona e taofi ma talanoa po o le a le mea sa aoao mai e Paulo i le pe faapefea ona maua le olioli.
E mafai faapefea ona tatou “susulu ose malamalama i le lalolagi”?
Atonu e mafai e lou aiga ona faailoa mai ni mea e “manatunatu i [ai]” e fetaui ma faamatalaga o loo i le fuaiupu lenei (tagai foi Mataupu Faavae o le Faatuatua 1:13). O le a faapefea ona faamanuiaina lou aiga e ala i le mulimuli i le fautuaga a Paulo?
O le a se mea e mafai ona tatou faia ia faateleina ai pea “le iloa lelei o le Atua”? O a “oloa uma o le poto atoa ma le malamalama” tatou te maua i le talalelei?
Atonu e mafai ona faitau e lou aiga nei fuaiupu ao saofafai faataamilo i se laau pe ao vaavaai atu i se ata o se laau (e pei o le laau o loo faaalia i le aotelega lenei). O le a le uiga o le ia “mausali” ma “mauaa” ia Keriso? E mafai faapefea ona tatou fesoasoani i le tasi ma le isi ia faamalosia o tatou aa faaleagaga?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Ola i lau molimau. “E te aoao atu mea o loo avea ai oe,” na aoao mai ai Elder Neal A. Maxwell. “O le a sili atu le manatuaina o ou uiga tulaga ese … nai lo o se upumoni faapitoa i se lesona faapitoa” (i le Teaching in the Savior’s Way, 13).
Sa aoao mai Paulo o o tatou faatuatua e tatau ona “mauaa” ia Iesu Keriso (Kolose 2:7).