21–27 Oketopa

1 ma le 2 Tesalonia

“Nei Vave Luluina o Outou Loto, pe Faaatuatuvaleina”

Afai tatou te le tusifaamaumauina ia lagona tatou te maua mai le Agaga, e mafai ona galo ia i tatou ia mea. O a ni mea ua uunaia oe e le Agaga e tusifaamaumau ao e faitau i le 1 ma le 2 Tesalonia?

Tusifaamaumau Lagona e Uunaia ai Oe

I le Tesalonia, sa tuuaia ai Paulo ma Sila i le “faatupu o le fouvale i le lalolagi uma” (Galuega 17:6). O le la talaiga sa feita ai ni taitai faapitoa i Iutaia, ma sa faaoso ai e nei taitai ia tagata i se vevesi (tagai Galuega 17:1–10). O le taunuuga, sa fautuaina ai Paulo ma Sila e o ese ma Tesalonia. Sa popole Paulo i tagata fou liliu mai o Tesalonia ma sauaga sa latou feagai, ae sa le mafai ona ia toe foi atu e asiasi ia i latou. “Ua ou le toe mafai ai ona onosai,” sa ia tusi ai, “ona ou auina atu lea e au, ina ia ou iloa lo outou faatuatua.” I le tali mai, sa aumai ai e le fesoasoani o Paulo, o Timoteo, o le sa auauna atu i Tesalonia, “le talalelei ia te i matou i lo outou faatuatua ma lo outou alofa” (1 Tesalonia 3:5–6). O le mea moni, sa lauiloa le Au Paia i Tesalonia o faaaoao “i e ua faatuatua” (1 Tesalonia 1:7), ma sa salalau atu le tala i lo latou faatuatua i nuu e mamao. Vaaifaalemafaufau i le olioli ma le toafilemu o Paulo i le faalogo atu o ana galuega ia i latou “e lei faaleaogaina lea” (1 Tesalonia 2:1). Ae sa iloa e Paulo o le faamaoni i le taimi ua tuanai, ua le lava lea mo le ola ai faaleagaga i le lumanai, ma sa faaeteete o ia i faatosinaga a faiaoga pepelo sa i ai i le Au Paia (tagai 2 Tesalonia 2:2–3). O lana savali ia i latou, ma i tatou, o le faaauau lea ona “faaatoatoaina ai mea e lei atoa i lo [tatou] faatuatua” ma ia “faasilisili pea i ai” i le alofa (tagai 1 Tesalonia 3:10; 4:10).

Manatu mo Suesuega Faaletagata Lava Ia o Tusitusiga Paia

1 Tesalonia 1-2

“O auauna o le talalelei e talai atu i le loto faamaoni ma le alofa.

I le 1 Tesalonia, o upu a Paulo ua faaalia ai le manatu popole ma le olioli o se tagata ua tuuina atu atoa o ia i le auauna atu i fanau a le Atua. Ae maise lava i mataupu muamua e lua o le 1 Tesalonia, o le a e maua ai upu ma fuaitau o loo faamatala ai le ala e aoao atu ai e auauna moni le talalelei. O le a le mea ua musuia oe e fai e faaleleia ai lou aoaoina atu o le talalelei?

1 Tesalonia 3:9–4:12

E mafai ona ou paia pe a ou mulimuli ia Iesu Keriso.

Tatou te faamoemoe uma lava “pe a afio mai lo tatou Alii,” o le a mafai ona tatou tutu i Ona luma ma ni “loto e le matauleagaina i le amiolelei i luma o le Atua” (1 Tesalonia 3:13). O le a le mea na aoao mai e Paulo e uiga i le avea ma [tagata] sili ona paia 1 Tesalonia 3:9–13; 4:1–12?

Tagai foi Moronae 10:32–33; Bible Dictionary, “Holiness”; Carol F. McConkie, “O Le Malumalu o le Matagofie,” Ensign po o le Liahona, Me 2017, 9–12.

1 Tesalonia 4:16–18; 5:1–10; 2 Tesalonia 1:4–10

Afai ou te faamaoni ma mataala, o le a ou saunia mo le Afio Mai Faalua o le Faaola.

I le 1 Tesalonia 5:1–10, sa faaaoga ai e Paulo ni faatusa e aoao ai upumoni taua e uiga i le taimi o le a toe foi mai ai Iesu i le lalolagi. A o e suesue i nei faatusa, mafaufau e tusi i lalo lagona e oo atu ia te oe e uiga i le Afio Mai Faalua o Iesu Keriso.

“O le gaoi i le po”:

“Faatiga o le fafine to a fanau se pepe”:

Isi faatusa e te maua:

O a ni upumoni faaopoopo ua e aoao i ai e uiga i le Afio Mai Faalua o Iesu Keriso mai le 1 Tesalonia 4:16–18; 5:1–10; 2 Tesalonia 1:4–10? O le a se mea ua musuia oe e fai e faaleleia ai lou aoaoina atu o le talalelei?

Tagai foi Dallin H. Oaks, “Sauniuniga mo le Afio Mai Faalua,” Ensign po o le Liahona, Me 2004, 7–10.

2 Tesalonia 2

O se liliuese, po o le o ese mai le upumoni, sa valoia e muamua mai i le Afio Mai Faalua.

I le ogatotonu i le faateteleina o sauaga, o le toatele o le Au Paia i Tesalonia sa talitonu ua lata mai le Afio Mai Faalua o le Faaola. Ae sa iloa e Paulo, ao lei oo i le toe foi mai o Iesu i le lalolagi, o le a i ai se liliuese—o se tetee po o se “tetea ese” mai le upumoni (tagai 2 Tesalonia 2:1–4). E mafai ona faaloloto lou malamalama i le Liliuese Tele—ma lou talisapaia mo le Toefuataiga—e ala i le suesueina o punaoa nei:

• Mau o loo muai tau mai ai le Liliuese: Isaia 24:5; Amosa 8:11–12; Mataio 24:4–14; 2 Timoteo 4:3–4

• Mau o loo faaali mai ai ua amata le Liliuese i le taimi o Paulo: Galuega 20:28–30; Kalatia 1:6–7; 1 Timoteo 1:5–7

• Iloiloga e uiga i le Liliuese Tele mai Kerisiano toefaatulagaina:

  Matini Luteru: “E leai se isi mea ua ou sailia i tua atu o le toefaatulagaina o le Ekalesia e tusa ai ma Tusitusiga Paia. … E pau lava lau tala, o le faaKerisiano ua le o toe i ai ia i latou o e e tatau ona faasaosaoina” (i le E. G. Schweibert, Luther and His Times: The Reformation from a New Perspective [1950], 590).

  Roger Williams: “O le liliuese … ua faapea ona faapiopioina ai mea uma, e le mafai ona i ai se toe sao ese mai i lena liliuese seia oo ina auina mai e Keriso ni aposetolo fou e totoina lotu fou” (i le Philip Schaff, The Creeds of Christendom [1877], 851).

  Erasmus: “Ua matuai lavelave mea uma i nei fesili [e uiga i aoaoga faavae] ma poloaiga ia ia aua lava nei o tatou faamoemoe e toe faafoi ai le lalolagi i le faaKerisiano moni” (The Praise of Folly, trans. Clarence H. Miller, 2nd ed. [2003], 155–56).

Tagai foi 2 Nifae 28; “Apostasy,” Gospel Topics, topics.lds.org.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia e iloa po o a mataupu faavae e talanoaina e faavae i manaoga o lou aiga. O ni nai fautuaga nei:

1 Tesalonia 3:9–13

O le a se vaega ua faagaeetia ai oe e uiga i lagona sa ia Paulo mo ana uo? E mafai faapefea ona tatou faamalolosia ni lagona faapena mo o tatou aiga, uo, ma uso a Au Paia?

1 Tesalonia 4:13–18

E mafai faapefea ona tatou faaaogaina nei fuaiupu e faamafanafana ai i tatou lava po o se isi tagata pe a maliu se tasi e pele?

1 Tesalonia 5:14–25

Toe faamanatu le fautuaga a Paulo i le 1 Tesalonia 5:14–25, ma sue se fasifuaitau e mananao lou aiga e taulai i ai. Mafaufau e tusi i luga o se pepa lautele e i ai se savali e faaali i totonu o le tou fale. E mafai e tagata o le aiga ona faaopoopo se faamatalaga i luga o le pepa lautele e i ai se savali pe a latou vaai i le tasi ma le isi o ola i le fautuaga o loo i luga o le pepa lautele o i ai se savali.

2 Tesalonia 3:13

Pe tatou te lagonaina ea le “faavaivai i le amio lelei”—atonu e lofituina i manaoga o le avea ma soo? O le a le mea e fesoasoani ia i tatou pe a tatou maua i ni lagona faapea? (Tagai Kalatia 6:9; MFF 64:33.) E faapefea ona tatou fesoasoani i le tasi ma le isi pe a tupu mai lenei mea?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o a Tatou Suesuega Faaletagata Lava ia

Saili faaaliga i aso uma. “O faaaliga e masani ona oo mai i“fuaitau i luga o lea fuaitau’ (2 Nifae 28:30), ae le oo mai uma i le taimi e tasi. ... Aua le mafaufau i [suesuega o le talalelei] o se mea e te faaavanoina le taimi e fai ai, ae o se mea o loo e faia i taimi uma” (Teaching in the Savior’s Way, 12),

O Le Keriso Toetu, saunia e Robert T. Barrett