30 Setema–13 Oketopa

Efeso

“Ina ia Faaatoatoaina ai le Au Paia”

O e vaai i ni fesootaiga i le va o savali i le konafesi aoao ma le Tusi a Paulo i Efeso?

Tusifaamaumau Lagona e Uunaia ai Oe

Ina ua amata ona salalau atu le talalelei i Efeso, sa faapea ona tupu ai “le faanunununu” (Galuega 19:23) i Efeso. O tufuga i le lotoifale o e sa gaosia nofoaga paia i le tupua atua fafine, sa latou vaaia le faaKerisiano o se mea taufaamatau i a latou tupe maua, ma e lei leva ae “tutumu ai lea o i latou i le feita, … ma sa matua tumu le aai atoa i le le mautonu” (tagai Galuega 19:27–29). Vaai faalemafaufau i le avea ma se tagata fou liliu mai i le talalelei i se tulaga faapea. E toatele tagata Efeso sa talia ma ola i le talalelei e ui lava i lenei “taalili vale” (Galuega 19:40), ma sa faamautinoa atu e Paulo ia i latou o “Keriso … tatou te lelei ai” (Efeso 2:13–14). O nei upu, faapea ma lana valaaulia ia “tea ma outou upu faafiufiu uma lava, ma le lotoa, ma le ita, ma le leotele, ma le upu leaga” (Efeso 4:31) e foliga mai ua fetaui lelei ma faalaeiau i le taimi nei e pei foi ona sa i ai i aso la. Mo Efeso, faapea foi ma oe, o le malosiaga e faafetauia ai le fili e sau mai “i le Alii, ma le malosi o lona mana” (Efeso 6:10–13).

Manatu mo Suesuega Faaletagata Lava Ia o Tusitusiga Paia

Efeso 1:4–11, 17–19

Pe ua “filifilia” pe “muai faauuina” e le Atua nisi o Ana fanau ina ia faasaoina?

Sa saunoa Paulo e uiga i le Au Paia ua “tofia anamua” e le Atua ma “filifili mai … a o lei faavaeina le lalolagi” e fai ma Lona nuu. E pei ona saunoa ai Peresitene Henry B. Eyring, o le mea moni e faapea, o le anoanoai o tagata e ola ma maliliu e aunoa ma le avanoa e maua ai le talalelei, ua mafua ai ona faapea nisi ua “leva lava ona fuafua e le Atua po o ai Ana fanau o le a Ia laveaiina ma faia le talalelei ia avanoa ia i latou, ae o i latou e lei faalogo lava i le talalelei sa lei ‘filifilia’ lava i latou. Ae ... o le fuafuaga a le Atua e matua sili lava le alofa ma le amiotonu nai lo lena. O loo naunau lo tatou Tama Faalelagi ia faapotopoto ma faamanuia Lona aiga atoa” (“Faapotopotoina o le Aiga o le Atua,” Ensign po o le Liahona, Me 2017, 20–21). E mafai e fanau uma a le Atua ona talia le talalelei ma ona sauniga ona o le galuega sa faatinoina i malumalu paia mo e ua maliliu.

E ui lava e leai se tasi ua muai tofia e faasaoina pe le faasaoina, ae ua aoao mai e faaaliga i onapo nei, o nisi sa filifilia pe “muaifaauuina” i le muai olaga e faataunuu ni tiutetauave faapitoa iinei i le lalolagi. O lenei mea e aofia ai le tiutetauave ua tofusia ai le Au Paia o Aso e Gata Ai, ia faasoa atu le talalelei ma fesoasoani i fanau uma a le Atua i itu e lua o le veli e o mai ia Keriso. (Tagai foi “Foreordination,” Gospel Topics, topics.lds.org.)

Efeso 1:10

O le Atua o le a “faaopoopoina ia Keriso.”

Pe sa i ai se taimi sa e tau mafaufau ai po o le a “tisipenisione o le atoaga o taimi” po o le a le uiga o le “faaopoopoina ia Keriso”? A o e mafaufau loloto i nei fuaitau, faitau ia mau nei: Efeso 4:13; 2 Nifae 30:7–8; Mataupu Faavae ma Feagaiga 110:11–16; 112:30–32; 128:18–21. Atonu e te lagona le musuia o oe e tusi i lalo la oe faamatalaga o nei fuaitau.

Efeso 2:19–22; 4:11–16

Ua faavaeina le Ekalesia i luga o aposetolo ma perofeta, ma o Iesu Keriso o le maatulimanu autu.

O le faitau i le aoaoga a Paulo e uiga i aposetolo ma perofeta, e mafai ona fesoasoani e te sauniuni ai e faalogo i savali a aposetolo ma perofeta o onapo nei i le taimi o le konafesi aoao. E tusa ai ma le Efeso 2:19–22; 4:11–16, o le a le mafuaaga o le i ai o a tatou perofeta ma aposetolo? Na faapefea ona fesoasoani a latou aoaoga ia te oe ina ia e le “feaveaiina i matagi uma lava o mataupu”?

Tagai foi i le Galuega 4:10–12.

E valaauina e le Alii ia perofeta ma aposetolo e taitai i Lana Ekalesia.

Efeso 5:21–6:4

E mafai ona ou faamalosia ou sootaga faaleaiga.

A o e faitau i le Efeso 5:21–6:4, o a ni mafaufauga e oo mai ia te oe e uiga i le pe faapefea ona faamalosia ou sootaga faaleaiga?

E taua le matau o upu a Paulo i le Efeso 5:22 sa tusia i le anomea o aganuu faaleagafesootai o lona vaitaimi. Ua aoao mai perofeta ma aposetolo i aso nei, e le sili ae alii i tamaitai, ma o ulugalii e tatau ona avea ma se “paaga tutusa” (tagai “O Le Aiga: O Se Folafolaga i le Lalolagi,” Ensign po o le Liahona, Me 2017, 145). E ui i lea, e mafai lava ona e maua le fautuaga talafeagai i le Efeso 5:23–33, ae maise lava pe afai ua e faaipoipoina pe sauniuni foi mo le faaipoipoga. Mo se faataitaiga, e faapefea ona faaalia e le Alii Lona alofa mo le Au Paia? O le a le mea o faaataata mai i lenei auala e tatau ona faia ai e tane o latou faletua? O a ni savali ua e maua mo oe lava i lenei fuaiupu?

Efeso 6:10–18

O le faamaulu “o le ofutau atoatoa mai le Atua” o le a puipuia ai i tatou mai le amioleaga.

Ao e faitau i le Efeso 6:10–18, mafaufau pe aisea atonu na faaigoa ai e Paulo ia vaega taitasi o le ofutau i le faiga sa ia faia ai. O le a le mea o le a “puipui mai ai i tatou e le ofutau atoatoa o le Atua?“ O le a se mea e mafai ona e faia ina ia faamaulu atoatoa ai vaega taitasi o le ofutau i aso uma lava?

Tagai foi 2 Nifae 1:23; Mataupu Faavae ma Feagaiga 27:15–18.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:

Efeso 1:10

E ala mai i le Toefuataiga i aso e gata ai, ua faapotopoto mai ai e le Atua mea uma ia tasi, e aofia ai mataupu faavae ma sauniga uma o le talalelei. Ina ia faaali atu le manatu lenei, e mafai ona e nanaina ni mea faitino pe tusi ni fuaitau faataamilo i lou fale ua faatusa i mea ua toefuatai mai i o tatou aso (e pei o ki o le perisitua, sauniga o le malumalu, tusitusiga paia, ma meaalofa faaleagaga). E mafai ona sue e tagata o le aiga ma “faapotopoto” faatasi mai i latou. Aisea tatou te faafetai ai i le ola ai i le “tisipenisione o le atoatoaga o taimi”?

Efeso 2:4–10; 3:14–21

Valaaulia tagata o le aiga e faasoa atu ni aafiaga sa faapea ona latou lagonaina ai le alofa ma le alofa mutimutivale o le Atua ma Iesu Keriso e pei ona faamatalaina i nei fuaiupu.

Efeso 2:12–19

Atonu e fiafia lou aiga e fau ni puipui i aluga po o isi mea faitino o i ai i lou fale ona toe tu’i lea i lalo. O a ituaiga puipui ua vavaeina ai tagata i aso nei? Na faapefea ona “soloia [e Iesu Keriso] le … pa sa vaeluaina ai” tatou ma le Atua?

Efeso 6:10–18

E mafai ona fai e lou aiga a latou lava “ofutau o le Atua” e faaaoga ai mea e maua i le fale. E mafai ona fesoasoani le vitio “The Armour of God” (LDS.org) i tagata o le aiga e vaai faalemafaufau ai i lenei ofutau, ma e mafai ona latou maua ai ni faamalamalamaga faigofie i le “The Whole Armor of God” (Friend, Iuni 2016, 24–25). E faapefea ona puipuia i tatou faaleagaga e vaega taitasi o le ofutau? O a ni mea e mafai ona tatou faia e fesoasoani ai i le tasi ma le isi ia “oofu i le ofutau atoatoa o le Atua” (Efeso 6:11) i aso uma lava?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Suesuega Faaletagata Lava ia

Tuu atu i le Agaga e taitaia au suesuega. Ia nofouta i le Agaga ao Ia taitai atu oe i mea e manaomia ona e aoaoina i aso taitasi, e tusa lava pe o lenei mea e taitai atu ai oe e suesue se autu e te lei fuafuaina muamua.

O le faamaulu “o le ofutau atoatoa o le Atua e mafai ona puipuia ai i tatou faaleagaga.