“Oktubre 21–27. 1 ug 2 Mga Taga-Tesalonica: ‘Dili Unta Kamo Makuyawan Pagdali ni Makulbaan’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Oktubre 21–27. 1 ug 2 Mga Taga-Tesalonica,” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019
Oktubre 21–27
1 ug 2 Mga Taga-Tesalonica
“Dili Unta Kamo Makuyawan Pagdali ni Makulbaan”
Kon dili nato i-rekord ang impresyon nga atong nadawat gikan sa Espiritu, tingali malimtan nato kini. Unsay gidasig sa Espiritu nimo nga i-rekord samtang magbasa ka sa 1 ug 2 Mga Taga-Tesalonica?
Irekord ang Imong mga Impresyon
Sa Tesalonica, si Pablo ug si Silas giakusahan nga nakapagubot sa kalibutan” (Mga Buhat 17:6). Ang ilang pagsangyaw nakapasuko sa piho nga mga lider sa mga Judeo, ug kini nga mga lider miagni sa mga tawo nga moalsa (tan-awa sa Mga Buhat 17:1–10). Isip resulta, sila si Pablo ug Silas gitambagan nga mobiya sa Tesalonica. Nabalaka si Pablo mahitungod sa bag-ong mga kinabig nga taga-Tesalonica ug sa pagpanggukod nga ilang giatubang, apan siya wala makabalik aron sa pagbisita kanila. “Sa wala na ako makaantus,” misulat siya, “nagsugo ako aron masayud mahitungod sa inyong pagtuo.” Agig tubag, ang luyo-luyo [assistant] ni Pablo nga si Timoteo, kinsa nagserbisyo sa Tesalonica, “gikadad-an niya kami sa mga maayong sugilon mahitungod sa inyong pagtuo ug paghigugma” (1 Mga Taga-Tesalonica 3:5–6). Gani, ang mga Santos nga taga-Tesalonica nailhan isip mga ehemplo “ngadto sa tanang mga magtutuo” (1 Mga Taga-Tesalonica 1:7), ug ang mga balita sa ilang pagtuo mikatap ngadto sa lagyong mga siyudad. Hunahunaa ang kalipay ug kahupay ni Pablo nga makadungog nga ang iyang buhat taliwala kanila “wala mapakyas” (1 Mga Taga-Tesalonica 2:1). Apan si Pablo nasayud nga ang ilang pagkamatinud-anon kaniadto dili paigo alang sa espirituhanon nga paglahutay sa umaabut, ug nabalaka siya sa impluwensya sa mga magtutudlo nga mini taliwala sa mga Santos (tan-awa sa 2 Mga Taga-Tesalonica 2:2–3). Ang iyang mensahe ngadto kanila, ug ngari kanato, mao ang pagpadayon nga “makasangkap sa nakulang diha sa [atong] pagtuo” ug sa “paghimo niini sa labi pa gayud” pinaagi sa gugma (tan-awa sa 1 Mga Taga-Tesalonica 3:10; 4:10).
Mga Ideya alang sa Personal nga Pagtuon sa Kasulatan
Ang mga ministro sa ebanghelyo nagsangyaw sa kinasingkasing ug gugma.
Sa 1 Mga Taga-Tesalonica, ang mga pulong ni Pablo nagpadayag sa kabalaka ug kalipay sa usa ka tawo kinsa mihatag sa iyang kaugalingon sa hingpit sa pagserbisyo sa mga anak sa Dios. Ilabi na sa unang duha ka kapitulo sa 1 Mga Tesalonica, makita nimo ang mga pulong nga naghulagway kon sa unsa nga paagi nga ang usa ka tinuod nga ministro nagtudlo sa ebanghelyo. Unsay nadasig nimong buhaton aron sa pagpalambo sa imong pagtudlo sa ebanghelyo?
1 Mga Taga-Tesalonica 3:9–4:12
Sa akong pagsunod ni Jesukristo, mahimo akong balaan.
Kitang tanan naglaum nga “sa pag-abut unya sa atong Ginoo,” makabarug kita sa Iyang atubangan uban sa “mga kasingkasing nga walay ikasaway sa atubangan sa atong Dios” (1 Mga Taga-Tesalonica 3:13). Unsa ang gitudlo ni Pablo mahitungod sa pagkahimong mas balaan 1 Mga Taga-Tesalonica 3:9–13; 4:1–12?
Tan-awa usab sa Moroni 10:32–33; Giya ngadto sa mga Kasulatan, “Pagkabalaan”; Carol F. McConkie, “Ang Katahum sa Pagkabalaan,” Liahona, Mayo 2017, 9–12.
1 Mga Taga-Tesalonica 4:16–18; 5:1–10; 2 Mga Taga-Tesalonica 1:4–10
Kon ako magmatinud-anon ug magmabinantayon, makaandam ko alang sa Ikaduhang Pag-anhi sa Manluluwas.
Sa 1 Mga Taga-Tesalonica 5:1–10, migamit si Pablo og pipila ka mga simbolo sa pagtudlo sa importante nga mga kamatuoran mahitungod sa panahon kon si Jesus mobalik nganhi sa yuta. Sa imong pagtuon niini nga mga simbolo, ikonsiderar ang pagsulat sa mga impresyon nga moabut nganha nimo mahitungod sa Ikaduhang Pag-anhi ni Jesukristo:
“Kawatan sa kagabhion”:
“Moabut sa babaye nga tali-anak”:
Ubang mga simbolo nga imong makita:
Unsa nga dugang nga mga kamatuoran ang imong makat-unan mahitungod sa Ikaduhang Pag-anhi ni Jesukristo gikan sa 1 Mga Taga-Tesalonica 4:16–18; 5:1–10; 2 Mga Taga-Tesalonica 1:4–10? Unsa ang giaghat diha kanimo nga bantayan ug andamon alang sa Iyang pag-anhi?
Tan-awa usab sa Dallin H. Oaks, “Pagpangandam alang sa Ikaduhang Pag-anhi,” Liahona, Mayo 2004, 7–10.
Usa ka apostasiya, o pagsupil gikan sa kamatuoran, gipanagna nga mag-una sa Ikaduhang Pag-anhi.
Taliwala sa nagkagrabe nga pagpanggukod, daghang mga Santos nga taga-Tesalonica nagtuo nga ang Ikaduhang Pag-anhi sa Manluluwas duol na. Nasayud si Pablo nga sa dili pa mobalik si Jesus sa yuta adunay mahitabo nga apostasiya—usa ka rebelyon o “pagsupil” gikan sa kamatuoran (tan-awa sa 2 Mga Taga-Tesalonica 2:1–4). Mapalawman pa nimo ang imong pagsabut sa Dakong Apostasiya—ug ang imong pagpasalamat sa Pagpahiuli—pinaagi sa pagsuhid sa pipila sa mosunod nga mga kapanguhaan:
-
Mga kasulatan nga nanagna sa Apostasiya: Isaias 24:5; Amos 8:11–12; Mateo 24:4–14; 2 Timoteo 4:3–4
-
Mga kasulatan nga nagpakita nga ang Apostasiya nagsugod na sa panahon ni Pablo: Mga Buhat 20:28–30; Mga Taga-Galacia 1:6–7; 1 Timoteo 1:5–7
-
Mga obserbasyon mahitungod sa Dakong Apostasiya pinaagi sa mga Kristiyanong mga repormista:
Martin Luther: “Wala koy laing gitinguha lapas sa pagreporma sa Simbahan nga mahiuyon sa Balaang mga Kasulatan. … Yano akong moingon nga ang Pagkakristiyano mihunong taliwala niadtong kinsa mopreserbar unta niini” (in E. G. Schweibert, Luther and His Times: The Reformation from a New Perspective [1950], 590).
Roger Williams: “Ang apostasiya … mihugaw sa tanan nga wala nay makuha pa gikan niana nga apostasiya hangtud mopadala si Kristo og bag-ong mga apostoles aron sa pag-establisar pag-usab sa Simbahan” (sa Philip Schaff, The Creeds of Christendom [1877], 851).
Erasmus: “Ang tanan karon nalibug na niining mga pangutana [sa doktrina] ug mga balaod nga dili gani kita mangahas sa pagpahiuli sa kalibutan balik ngadto sa tinuod nga Pagka-Kristiyano” (The Praise of Folly, trans. Clarence H. Miller, 2nd ed. [2003], 155–56).
Tan-awa usab sa 2 Nephi 28; “Apostasy,” Gospel Topics, topics.lds.org.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamiya, ang Espiritu makatabang nimo nga makahibalo unsa nga mga baruganan ang hisgutan base sa mga panginahanglan sa imong pamilya. Ania ang pipila ka mga sugyot:
Unsa ang nakapadani nimo mahitungod sa mga pagbati ni Pablo alang sa iyang mga higala? Sa unsa nga paagi nato mapalambo ang maong mga pagbati alang sa atong pamilya, mga higala, ug isig ka Santos?
Unsaon nato sa paggamit niini nga mga bersikulo sa paghupay sa atong kaugalingon o sa usa ka tawo kon dunay minahal nga mamatay?
Ribyuha ang tambag ni Pablo sa 1 Mga Taga-Tesalonica 5:14–25, ug pangita og mga pulong nga gusto nga tutukan sa imong pamilya. Ikonsiderar ang pagsulat niini aron i-display sa imong panimalay. Ang mga sakop sa pamilya mahimong modugang og mubo nga sulat diha sa poster kon magkita sila sa usag usa nga nagsunod sa tambag nga anaa sa poster.
Mibati ba kita nga “nagpataka sa pagbuhat og maayo”—nabug-atan tingali, sa mga gikinahanglan sa pagka-disipulo? Unsay makatabang nato kon mobati kita niining paagiha? (Tan-awa sa Mga Taga-Galacia 6:9; DP 64:33.) Unsaon nato sa pagsuporta ang usag usa kon mahitabo kini?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Personal nga Pagtuon
Pagtinguha og pagpadayag matag adlaw. “Ang pagpadayag sa kasagaran moabut “pagtulun-an human sa usa ka pagtulun-an” (2 Nephi 28:30), dili nga kausahon ra. … Ayaw hunahunaa ang [pagtuon sa ebanghelyo] isip usa ka butang nga gahinan nimo og panahon apan isip usa ka butang nga kanunay nimong gibuhat” (Pagtudlo sumala sa Pamaagi sa Manluluwas, 12).
Nabanhaw nga Kristo, ni Robert T. Barrett