“Oktubre 28–Nobyembre 3. 1 ug 2 Timoteo; Tito; Filemon: ‘Pagkinabuhi Ingon nga Panig-ingnan’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Oktubre 28–Nobyembre 3. 1 ug 2 Timoteo; Tito; Filemon,” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019
Oktubre 28–Nobyembre 3
1 ug 2 Timoteo; Tito; Filemon
“Alang sa mga Magtotoo, Pagkinabuhi Ingon nga Panig-ingnan”
Usahay makatabang ang pagtuon sa imong kasulatan nga dunay usa o daghang mga pangutana sa hunahuna. Dapita ang Espiritu sa paggiya kanimo sa pagtubag samtang ikaw magtuon, ug irekord ang bisan unsa nga inspirasyon nga imong madawat.
Irekord ang Imong mga Impresyon
Sa mga epistola [sulat] nga gisulat ni Pablo ngadto ni Timoteo, Tito, ug Filemon, makasabut kita og gamay sa mga hunahuna ug pagbati sa sulugoon sa Ginoo. Dili sama sa ubang mga sulat ni Pablo ngadto sa tibuok mga kongregasyon, kini gisulat ngadto sa mga indibidwal—ang suod nga mga higala ug mga kauban ni Pablo sa buhat sa Dios—ug ang pagbasa niini sama sa nagpaminaw sa usa ka panag-istoryahanay. Makita nato nga si Pablo nag-awhag ni Timoteo ug Tito, duha ka lider sa kongregasyon, sa ilang pagserbisyo sa Simbahan. Makita nato siya nga nag-awhag sa iyang higala nga si Filemon sa pagpasaylo sa usa ka isig ka Santos ug pagtagad kaniya sama sa igsoon sa ebanghelyo. Ang mga pulong ni Pablo wala direktang gitumong ngari kanato, ug tingali wala siya magdahum nga daghan kaayong mga tawo ang mobasa niini sa umaabut. Apan makita nato nga niini nga mga sulat mao ang tambag ug awhag alang kanato, bisan unsa pa man ang atong personal nga pangalagad sa pagserbisyo ni Kristo.
Mga Ideya alang sa Personal nga Pagtuon sa Kasulatan
Kinsa sila si Timoteo ug Tito?
Sila si Timoteo ug Tito nagserbisyo uban ni Pablo sa iyang pipila ka misyonaryo nga pagpanaw. Atol sa ilang pagserbisyo, naangkon nila ang pagtahud ug pagsalig ni Pablo. Si Timoteo gitawag sa kaulahian isip usa ka lider sa Simbahan sa Efeso, ug si Tito gitawag nga usa ka lider sa Creta. Niini nga mga sulat, mihatag si Pablo sa mga lider og mga instruksyon ug pag-awhag kabahin sa ilang mga responsibilidad, nga naglakip sa pagsangyaw sa ebanghelyo ug pagtawag og mga tawo nga moserbisyo isip mga bishop.
Tan-awa sa Giya ngadto sa mga Kasulatan, “Timoteo, Epistola [Sulat] ngadto ni” “Tito, Epistola [Sulat] ngadto ni.”
Ang mga bishop gitawag sa paghatag og espirituhanong giya ngadto sa mga miyembro sa ward.
Kon ako “usa ka panig-ingnan sa mga magtutuo,” makagiya ko sa uban ngadto sa Manluluwas ug sa Iyang ebanghelyo.
Si Timoteo batan-on pa kaayo, apan nasayud si Pablo nga siya mahimong bantugang lider sa Simbahan bisan pa sa iyang kabatan-on. Unsa nga tambag ang gihatag ni Pablo ngadto ni Timoteo sa 1 Timoteo 4:10–16? Sa unsa nga paagi nga kini nga tambag makatabang nimo sa paggiya sa uban ngadto sa Manluluwas ug sa Iyang ebanghelyo?
Tan-awa usab sa Alma 17:11.
“Kay kita wala sa Dios hatagig espiritu sa katalaw; kondili sa espiritu sa gahum, ug sa gugma, ug pagpugong sa kaugalingon.”
2 Timoteo gituohan nga mao ang katapusang epistola [sulat] nga gisulat ni Pablo, ug ingon og nasayud siya sa iyang panahon sa yuta nga hamubo nalang (tan-awa sa 2 Timoteo 4:6–8). Samtang magbasa ka niini nga sulat, hunahunaa kon unsa kaha ang gibati ni Timoteo nga nasayud nga sa dili madugay mawala na ang iyang gisaligan nga tigtudlo ug lider. Unsay gisulti ni Pablo sa pag-awhag kaniya? Unsa ang gitudlo sa mga pulong ni Pablo kanimo mahitungod sa pag-atubang sa imong kaugalingong mga pagsulay ug mga kahadlok?
Ang pagpuyo sa ebanghelyo naghatag og kasiguroan gikan sa espirituhanong mga kakuyaw sa katapusang mga adlaw.
Nagpuyo kita “sa katapusang mga adlaw” nga gihisgutan ni Pablo, ug ang “panahon nga malisud” moabut (2 Timoteo 3:1). Samtang magbasa ka sa 2 Timoteo 3, isulat ang mga kalisud sa katapusang mga adlaw nga gihisgutan (tan-awa usab sa 1 Timoteo 4:1–3):
Makahunahuna ka ba og mga ehemplo niini nga mga kalisud sa kalibutan sa imong palibut—o sa imong kaugalingong kinabuhi? Sa unsa nga paagi nga kini nga mga kalisud, sama sa mga tawo nga gihulagway sa bersikulo 6, “magapanakasaka sa [inyong kabalayan], ug [kamo] mabihag”? Unsa nga tambag ang imong nakita sa 2 Timoteo 3, ug bisan asa niini nga mga sulat, nga makatabang nimo ug sa imong pamilya nga luwas gikan niining espirituhanong mga kakuyaw? (tan-awa, pananglitan, 1 Timoteo 1:3–11; 2 Timoteo 2:15–16; Tito 2:1–8).
Kinsa si Filemon?
Si Filemon usa ka Kristiyano nga nakabig ni Pablo ngadto sa ebanghelyo . Nanag-iya siya og ulipon nga ginganlan og Onesimo, kinsa nakaikyas sa pagkaulipon, nakahimamat ni Pablo, ug nakabig usab ngadto sa ebanghelyo. Sa usa ka sulat ngadto ni Filemon, si Pablo miawhag sa iyang higala sa pagpasaylo ni Onesimo ug dawaton siya “dili na ingon nga ulipon, kondili labaw na sa ulipon, ingon nga minahal nga igsoon” (bersikulo 16).
Ang mga sumusunod ni Kristo mopasaylo sa usag usa.
Nakasugat ka na ba og sitwasyon nga dunay nagtinguha sa imong pagpasaylo? Hunahunaa kana nga sitwasyon samtang magbasa ka sa sulat ngadto ni Filemon. Unsa ang gitudlo ni Pablo kang Filemon mahitungod kung ngano nga kinahanglan siya mopasaylo ni Onesimo? Aduna bay bisan unsa nga mensahe niini nga sulat nganha nimo?
Tan-awa usab sa 1 Nephi 7:16–21; Mosiah 26:30–31; Gospel Topics, “Forgiveness,” topics.lds.org.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Samtang ang mga aspeto sa tambag ni Pablo alang sa mga babaye nga magsinina og tarung dili magamit sa atong panahon, makakat-on kitang tanan gikan sa iyang tambag sa “ pagpatahum sa [atong kaugalingon] … uban sa maayong mga buhat.” Tingali ang imong pamilya malingaw nga maghimo og fashion show, nga ang mga sakop sa pamilya magsul-ob og sinina o alahas nga gibutangan og lain-laing mga matang sa maayong buhat. Unsa ang pipila ka maayong buhat nga mahimo sa imong pamilya karong semanaha?
Aron matabangan ang mga sakop sa imong pamilya nga magtinguha nga mahimong “usa ka panig-ingnan sa mga magtutuo,” ikonsiderar ang pagdapit kanila sa pagdrowing og mga litrato kon sa unsa nga paagi nga ang mga tawo nahimong maayong mga ehemplo ngadto kanila. Sa unsa nga paagi nga kini nga mga tawo nakadasig nato sa pagsunod ni Jesukristo? Ang mensahe ni Presidente Thomas S. Monson “Pagpakita og Ehemplo ug Kahayag ” (Liahona, Nob. 2015, 86–88) tingali makahatag og mga ideya.
Ngano kaha nga “ang pagkamahigugmaon og salapi” gikonsiderar nga “ang gamut sa tanang pagkadautan”? Unsa ang mga kakuyaw sa pagtutok sa atong kinabuhi sa salapi? Sa unsa nga paagi kita makontento sa mga panalangin nga ania kanato?
Sumala niini nga mga bersikulo, unsa nga mga panalangin ang moabut niadtong kinsa nakahibalo ug nagtuon sa mga kasulatan? Tingali ang mga sakop sa pamilya makapaambit og mga kasulatan nga ilang nakita nga makahatag og “kaayohan.”
Unsa ang andam nga buhaton ni Pablo alang ni Onesimo? Sa unsang paagi kini susama sa unsay andam nga buhaton sa Manluluwas alang kanato? (tan-awa usab sa 1 Timoteo 2:5–6; DP 45:3–5). Sa unsa nga paagi kita makasunod sa mga ehemplo ni Pablo ug sa Manluluwas?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Itudlo ang klaro ug yanong doktrina. Ang ebanghelyo matahum tungod sa kayano niini (tan-awa sa DP 133:57). Imbis maningkamot sa paglingaw sa imong pamilya uban sa mga leksyon nga nagkinahanglan og daghang pagpangandam, paningkamuti ang pagtudlo og putli ug yano nga doktrina (tan-awa sa 1 Timoteo 1:3–7).
Ang pagtuon sa pulong sa Dios makatabang nato nga luwas gikan sa espirituhanong mga kakuyaw sa katapusang mga adlaw.