“Nobyembre 18–24. Santiago: ‘Hinoon Tumana Ninyo ang Pulong, ug Dili kay Magpaminaw ra Kamo Niini’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Nobyembre 18–24. Santiago,” Dali, Sunod Kanako—Alang mga Indibidwal ug sa mga Pamilya: 2019
Abraham sa Kapatagan sa Mamre, ni Grant Romney Clawson
Nobyembre 18–24
Santiago
“Hinoon Tumana Ninyo ang Pulong, ug Dili kay Magpaminaw ra Kamo Niini”
Samtang magbasa mo sa Sulat [Epistola] ni Santiago, bantayi ang mga pulong nga importante kanimo, ug irekord kini. Sa unsa nga paagi kamo naaghat sa pagsunod niini nga mga kamatuoran?
Irekord ang Imong mga Impresyon
Usahay usa lang ka bersikulo sa kasulatan makausab na sa kalibutan. Santiago 1:5 ingon og usa ka yano nga tambag—kon nagkinahanglan ka og kaalam, pangayo sa Dios. Apan sa dihang ang 14 anyos nga si Joseph Smith mibasa niana nga bersikulo, “kini ingon og misulod uban sa makusog nga gahum ngadto sa matag tipik sa [iyang] kasingkasing” (Joseph Smith—Kasaysayan 1:12). Sa ingon nga nadasig, si Joseph mibuhat sa tambag ni Santiago ug nagtinguha og kaalam gikan sa Dios pinaagi sa pag-ampo. Ug ang Dios mihatag nga madagayaon gayud, mihatag ni Joseph sa usa sa labing talagsaong langitnong mga pagbisita sa kasaysayan sa tawo—ang Unang Panan-awon. Kini nga panan-awon nakausab sa dagan sa kinabuhi ni Joseph ug misangpot ngadto sa Pagpahiuli sa Simbahan ni Jesukristo dinhi sa yuta. Kita tanan napanalanginan karon tungod kay si Joseph Smith mibasa ug mibuhat sa Santiago 1:5.
Unsay imong makit-an samtang ikaw magtuon sa Epistola [Sulat] ni Santiago? Tingali usa ka bersikulo o duha ang makausab kanimo o sa usa ka tawo nga imong gihigugma. Ikaw makakaplag og giya samtang ikaw maningkamot sa pagtuman sa imong misyon sa kinabuhi. Tingali maawhag ka nga mosulti nga mabination o mas mapailubon. Bisan unsa ang makadasig nimo, himoa kini nga mga pulong nga “mosulod … ngadto sa matag pagbati sa [inyong] kasingkasing.” Hinumdumi ang “pagdawat sa kaaghup sa … pulong,” sumala sa gisulat ni Santiago, “nga arang nga makaluwas sa inyong mga kalag” (Santiago 1:21).
Mga Ideya alang sa Personal nga Pagtuon sa Kasulatan
Kinsa si Santiago?
Gituohan sa kadaghanan nga ang tagsulat sa Epistola [Sulat] ni Santiago mao ang anak ni Maria, ang inahan ni Jesukristo, ug busa ang igsoon sa Manluluwas sa inahan. Gihisgutan si Santiago sa Mateo 13:55; Marcos 6:3; Mga Buhat 12:17; 15:13; 21:18; ug Mga Taga-Galacia 1:19; 2:9. Makita niini nga mga kasulatan nga si Santiago mao ang lider sa Simbahan sa Jerusalem ug gitawag isip usa ka Apostol (tan-awa sa Mga Taga-Galacia 1:19).
Mapailubon nga paglahutay mosangpot ngadto sa kahingpitan.
“Ang paghulat malisud,” gitudlo ni Presidente Dieter F. Uchtdorf. “Buot natong angkunon ang atong gusto, ug buot nato nga karon dayon. Busa, ang mao nga pailub ingon og dili makapahimuot” (“Ipadayon ang Pagpailub,” Liahona, Mayo 2010, 56–57). Human makabasa sa Santiago 1:2–4; 5:7–11, unsay imong ikasulti nga importante nga mensahe ni Santiago mahitungod sa pailub? Unsa ang imong dugang nga mga pagsabut human mabasa ang nahibiling mensahe ni Presidente Uchtdorf? Unsaon nimo sa pagpakita sa Ginoo nga ikaw andam nga magpailub?
Santiago 1:3–8, 21–25; 2:14–26; 4:17
Ang pagtuo nagkinahanglan og buhat.
Unsaon nako pagkahibalo kon ang usa ka tawo adunay pagtuo diha ni Jesukristo? Sa unsa nga paagi nga ang imong mga buhat nagpakita sa imong pagtuo sa Dios? Hunahunaa kini nga mga pangutana samtang magtuon ka sa mga pagtulun-an ni Santiago mahitungod sa pagtuo. Makapaikag tingali ang pagbasa usab mahitungod nila ni Abraham ug Rahab, duha ka ehemplo nga gihisgutan ni Santiago (tan-awa sa Genesis 22:1–12; Josue 2). Giunsa nila sa pagpakita nga sila adunay pagtuo sa Dios?
Ang pagbasa sa Santiago 1:3–8, 21–25; 2:14–26; 4:17 makatabang nimo sa paghunahuna og mga paagi nga ikaw mahimong mas maayo nga motuman sa pulong. Irekord ang bisan unsa nga mga impresyon nga imong madawat, ug paghimo og mga plano sa pagbuhat niini.
Tan-awa usab sa Alma 34:27–29; 3 Nephi 27:21.
Ang mga pulong nga akong isulti adunay gahum sa pagpasakit o pagpanalangin sa uban.
Uban sa detalyado nga imahe nga gigamit ni Santiago sa sulat, ang pipila sa iyang labing makadasig nga pinulongan makita sa iyang tambag mahitungod sa pinulongan. Ikonsiderar ang paghimo og lista sa tanang mga paagi nga paghulagway ni Santiago sa dila o ba-ba. Unsa ang gisugyot sa matag pagtandi o imahe mahitungod sa mga pulong nga atong isulti? Paghunahuna og butang nga imong mahimo sa pagpanalangin og usa ka tawo sa imong mga pulong (tan-awa sa DP 108:7).
Isip usa ka disipulo ni Jesukristo, kinahanglan nakong higugmaon ang tanang tawo, bisan pa sa ilang mga sirkumstansya.
Gipasidan-an ni Santiago ang mga Santos ilabi na batok sa pagpabor sa datu ug pagtamay sa kabus, apan ang iyang pasidaan mahimong magamit sa bisan unsa natong mga pagpihig o ngil-ad nga paghukom sa uban. Mahimong lisud ang pag-ila sa mga paagi diin kita negatibong mohukom sa uban, apan ang Ginoo misaad nga Siya motabang nato nga makakita asa dapit kita mopalambo (tan-awa sa Ether 12:27). Samtang ikaw mainampoong magtuon sa Santiago 2:1–9, siksika ang imong kaugalingong kasingkasing ug paminaw sa mga pag-aghat sa Espiritu Santo. Nakakita ba ikaw og bisan unsa nga mga kausaban nga kinahanglan nimong himoon sa paagi sa imong pagtagad o paghunahuna sa uban?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug maghisgutanay base sa mga panginahanglan sa imong pamilya. Ania ang pipila ka mga sugyot:
Ikonsiderar ang pagbasa sa Santiago 1:5 ug sa pagdapit og miyembro sa pamilya sa pag-summarize sa istorya sa Unang Panan-awon (tan-awa sa Joseph Smith—Kasaysayan 1:8–13 o ang video “Ask of God: Joseph Smith’s First Vision” sa LDS.org). Dapita ang mga sakop sa pamilya sa pagpaambit sa ilang mga pagpamatuod bahin ni Propeta Joseph Smith ug sa mga kasinatian sa dihang gitubag sa Langitnong Amahan ang ilang mga pag-ampo.
Ikonsiderar ang pagtan-aw sa video “True Christianity” (LDS.org) agig sumpay niini nga mga bersikulo. Dayon basaha ang kahulogan ni Santiago sa putli nga relihiyon ug hisguti ang mga paagi nga masunod sa imong pamilya ang inyong relihiyon nga mas putli.
Santiago 3 naglakip sa daghang mga ideya nga makapadasig sa halandumong mga leksyon nga may butang nga gigamit sa pagtabang sa imong pamilya nga makahinumdom sa pagsulti sa mabinationg paagi. Pananglitan, makahisgot ka kon sa unsa nga paagi nga ang gamay nga kidlap o posporo makasugod og dakong kalayo, ug ang mga sakop sa pamilya makahunahuna sa mga panahon sa dihang ang dili mabination nga pulong nakahatag og problema (tan-awa sa mga bersikulo 5–6). O makadalit ka og aslom o pait nga pagkaon nga sa kasagaran gigamit alang sa matam-is nga pagkaon—sama sa lemon juice sa garapon sa dugos. Makagiya kini sa panaghisgutan mahitungod sa pagsiguro nga ang atong pulong matam-is ug makabayaw (tan-awa sa mga bersikulo 9–14).
Nganong kinahanglan nga kita “moduol sa Dios” kon mag-atubang kita og tintasyon?
Tingali ang pagpakigbahin og personal nga kasinatian mahitungod sa pagdawat og panalangin sa priesthood makaawhag sa mga sakop sa pamilya sa “pagpangayo og panalangin sa priesthood kon [sila] nanginahanglan og espirituhanong gahum” (Dallin H. Oaks, “Ang Importansya sa mga Panalangin sa Priesthood,” New Era, Hulyo 2012, 4).
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Buhata unsay imong nakat-unan. Samtang ikaw magtuon, paminaw sa mga pag-aghat gikan sa Espiritu mahitungod kon unsaon nimo sa paggamit unsay imong nakat-unan sa imong kinabuhi. Pasalig sa pagsunod niini nga mga pag-aghat ug sa hingpit nga pagsunod sa ebanghelyo. (Tan-awa sa Pagtudlo sumala sa Pamaagi sa Manluluwas, 35.)
Papangayoa Siya sa Dios, ni John McNaughton