ʻOfa Haohaoá, tā ʻa Del Parson

2–8 Tīsema

1–3 Sione; Sute

“Ko e ʻOtuá ko e ʻOfa”

ʻI hoʻo lau ʻa e ngaahi Tohi ʻa Sione mo Suté, fekumi ki ha ueʻi fakalaumālie ki he founga te ke lava ʻo fakahaaʻi ai hoʻo ʻofa ki he ʻOtuá. Hiki ʻa e ngaahi ongo ko ʻení pea ngāueʻi kinautolu.

Lekooti e Ngaahi Ongo ʻOkú ke Maʻú

ʻI hono tohi ʻe Sione mo Sute ʻena ngaahi ʻipiselí, naʻe kamata ke hoko ʻa e Hē Mei he Moʻoni naʻe kikiteʻí, ko ha ola ia ʻo e hulu ʻa e fakatangá mo e tokāteline halá. Naʻe fehuʻia ʻe ha kau faiako loi pe naʻe hā mai nai ʻa Sīsū Kalaisi “ʻi he sinó” (hangē ko ʻení, vakai, 1 Sione 4:1–3; 2 Sione 1:7). Naʻe kamata ʻe he ʻAposetolo ko Sioné ʻene ʻuluaki ʻipiselí ʻaki ʻene fakamoʻoni ʻaʻana ki he Fakamoʻuí: “Ko e fakamoʻoni ʻeni ʻoku mau fai ʻa ia naʻe talu mei he kamataʻangá, ʻa ia naʻa mau ongoʻi, pea mamata ki ai ʻaki homau matá, pea mau vakai pau ki ai, pea ala ki ai homau nimá, ki he Folofola ʻo e moʻuí” (Liliu ʻa Siosefa Sāmita, 1 Sione 1:1 [ʻi he Fakahinohino ki he Ngaahi Folofolá]).   Kae mahalo ko e pōpoaki mālohi taha ʻo e ngaahi ʻipiseli ʻa Sioné ko e ʻofá: Ko e ʻofa ʻa e ʻOtuá kiate kitautolú pea mo e ʻofa ʻoku totonu ke tau maʻu kiate Ia mo e kotoa ʻo ʻEne fānaú. Ko hono moʻoní, naʻe aʻusia fakataautaha ʻe Sione ʻa e ʻofa ʻa e Fakamoʻuí (vakai, Sione 13:23; 20:2), pea naʻá ne fakaʻamu ke tofuhia mo e Kāingalotú ʻi he ʻofa tatau pē ʻi heʻenau fehangahangai mo e faingataʻá mo e filí, he “ʻoku ʻikai ha manavahē ʻi he ʻofá; ka ʻoku tekeʻi atu ʻa e manavaheé ʻe he ʻofa haohaoa” (1 Sione 4:18).

Ngaahi Fakakaukau ki hono Ako Fakataautaha ʻo e Folofolá

1 Sione

Ko e ʻOtuá ko e maama, pea ko e ʻOtuá ko e ʻofa.

Kapau ʻe tuku atu ke ke fili ha foʻi lea ʻe taha pe ua ke fakamatalaʻi ʻaki ʻa e ʻOtuá, ko e hā te ke filí? Naʻe fakaʻaongaʻi ʻe Sione ʻi heʻene ngaahi ʻipiselí ʻa e ongo foʻi lea ko e “maama” mo e “ʻofa” (1 Sione 1:5; 4:8, 16). ʻI hoʻo lau ʻa e 1 Sioné, fakalaulauloto ki he ngaahi aʻusia ʻa Sioné ʻi hono lekooti ʻi he Ongoongolelei ʻa Sioné, pea fakakaukau ki he founga ne akoʻi ai ʻe he ngaahi aʻusia ko ʻení ʻa Sione fekauʻaki mo e maama mo e ʻofa ʻa e ʻOtuá. Ko e hā ha ngaahi aʻusia fakataautaha kuó nau akoʻi atu kiate koe ko e ʻOtuá ko e maama mo e ʻofa?

Vakai foki, Sione 3:16–21; 15:9–17; 2 Nīfai 26:24; Tokāteline mo e Ngaahi Fuakava 50:24; 88:6, 12–13; 93:36–37.

1 Sione 2:24–3:3

Te u lava ʻo hangē ko Sīsū Kalaisí.

Kuo hoko nai ʻa e taumuʻa ke hoko ʻo Kalaisi ʻataá ʻo ngali taukakapa kiate koe? Fakakaukau ki he faleʻi fakalotolahi ʻa Sioné: “ʻE fānau ʻofeina, mou nofo pē kiate ia; koeʻuhí, ʻo ka hā mai ia, ke tau maʻu ai ʻa e mālohi … [pea] te tau tatau pē mo ia” (1 Sione 2:28; 3:2). Ko e hā ʻokú ke ʻiloʻi ʻi he 1 Sione 2:24–3:3 ʻokú ne ʻoatu ai ʻa e loto-falala mo e fiemālie ʻi hoʻo hoko ko ha ākonga ʻo Sīsū Kalaisí? ʻI hoʻo ako ʻa e ngaahi ʻipiseli ʻa Sioné, fekumi ki ha ngaahi tefitoʻi moʻoni pe faleʻi kehe ʻe ala tokoni kiate koe ʻi hoʻo feinga ke ke anga faka-Kalaisi angé.

Vakai foki, Molonai 7:48; Tokāteline mo e Ngaahi Fuakava 88:67–68.

Liliu ʻa Siosefa Sāmita, 1 Sione 4:12

Kuo “ʻikai ha tangata ʻe mamata ki he ʻOtuá ʻi ha kuonga”?

ʻOku fakamahinoʻi ʻe he Liliu ʻa Siosefa Sāmita, 1 Sione 4:12 “kuo ʻikai ha tangata ʻe mamata ki he ʻOtuá ʻi ha kuonga, tuku kehe pē ʻa kinautolu ʻoku tuí”;  vakai foki, Sione 6:46; 3 Sione 1:11 ʻOku lekooti ʻi he folofolá ha ngaahi taimi naʻe fakahā ai ʻe he ʻOtua ko e Tamaí Ia ki ha niʻihi faivelenga, ʻo kau ai ʻa Sione (vakai, Fakahā 4; vakai foki, Ngāue 7:55–56; 1 Nīfai 1:8; Tokāteline mo e Ngaahi Fuakava 76:23; Siosefa Sāmita—Hisitōlia 1:16–17).

1 Sione 5

ʻI heʻeku fakamālohia ʻeku tui kia Sīsū Kalaisí pea toe fanauʻi foʻou aú, te u lava ʻo ikunaʻi ʻa e māmaní.

ʻOku tā tuʻo lahi ʻa e hā ʻa e fakakaukau ʻo hono ikunaʻi ʻo e māmaní ʻi he ngaahi tohi ʻa Sioné. Naʻe lekooti ʻe Sione ʻa e folofola ʻa Sīsū ʻo pehē, “Te mou maʻu ʻa e mamahí ʻi māmani; ka mou loto toʻa; kuó u ikuʻi ʻa māmani” (Sione 16:33). Pea ʻi he Fakahā 2–3, naʻe lekooti ai ʻe Sione ʻa e ngaahi talaʻofa ʻa e ʻEikí kiate kinautolu ʻoku nau ikunaʻi ʻa e māmaní. Ko e hā naʻe lea ʻaki ʻe Sione fekauʻaki mo hono ikunaʻi ʻo e māmaní ʻi he 1 Sione 5:3–5? ʻI hoʻo lau ʻa e 1 Sione 5, fekumi ki he meʻa kuo pau ke tau fai ke ikunaʻi ai ʻa e māmaní mo maʻu ʻa e moʻui taʻengatá. ʻOku fōtunga fēfē ʻa hono ikunaʻi ʻo e māmaní ʻi hoʻo moʻuí? Te ke lava foki ʻo maʻu ha ngaahi tali mo e fakakaukau ʻi he pōpoaki ʻa ʻEletā Neil  L. Andersen “Ko Hono Ikunaʻi ʻo e Māmaní” (Ensign pe Liahona, Mē 2017, 58–62).

Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí

ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu ho fāmilí. Ko ha ngaahi fokotuʻu fakakaukau ʻeni:

1 Sione 2:8–11

Ke tokoni ki ho fāmilí ke nau fakalaulauloto ki he ngaahi akonaki ʻa Sioné, mou fakataha ki ha loki fakapoʻuli pea tuku ki he kau mēmipa ʻo e fāmilí ke nau aʻusia ʻa e faikehekehe ʻo e ʻaʻeva “ʻi he poʻulí” mo e ʻaʻeva “ʻi he māmá.” ʻOku fakatupu fēfē ʻe he tāufehiʻá ke tau ʻaʻeva ʻi he fakapoʻulí pea humú? ʻOku ʻomi fēfē ʻe he feʻofaʻakí ʻa e māmá ki heʻetau moʻuí?

1 Sione 3:21–22

Ko e hā ʻa e meʻa ʻi he ongo veesi ko ʻení ʻokú ne fakatupulaki ʻa e “loto-falala” ʻoku tau maʻu ʻi he ʻOtuá pea mo ʻetau malava ke maʻu ha tali ki heʻetau lotú? Te ke lava foki ʻo kumi ʻa e “Lotú” ʻi he Fakahinohino ki he Ngaahi Folofolá (scriptures.lds.org), pe Gospel Topics (topics.lds.org).

1 Sione 5:2–3

ʻOku ʻi ai nai ha ngaahi fekau ʻoku tau fakakaukau ʻoku “fakamamahi” pe faingataʻa ke muimui ki ai? ʻOku liliu fēfē heʻetau ʻofa ki he ʻOtuá ʻa e ongo ʻoku tau maʻu fekauʻaki mo ʻEne ngaahi fekaú?

ʻOku tokoni hono tauhi ʻa e ngaahi fekau ʻa e ʻOtuá ke tau ikunaʻi ai ʻa e māmaní.

Sute 1:3–4

ʻOku ʻi ai nai ha ngaahi fakatuʻutāmaki fakalaumālie kuo “fetōlofi” mai ki heʻetau moʻuí mo e fāmilí? (Sute 1:4). Te tau lava fēfē ʻo muimui ki he naʻinaʻi ʻa Sute ke “fekuki fakamātoato koeʻuhí ko e tuí” mo fakafepakiʻi ʻa e ngaahi fakatuʻutāmaki ko ʻení? (Sute 1:3). Ko e hā te tau lava ʻo fai ke fakapapauʻi ʻoku tupulaki ʻa e “melino mo e ʻofá” ʻi hotau fāmilí? (Sute 1:2).

Ki ha ngaahi fakakaukau lahi ange ki hono ako’i ‘o e fānaú, vakai ki he lesoni ʻo e uike ko ‘eni ʻi he Haʻu, ‘o Muimui ʻIate Au— Ki he Palaimeli.

Fakatupulaki e Ako Fakataautahá

Fekumi ki he ʻofa ʻa e ʻOtuá. Naʻe akoʻi ʻe ʻEletā M. Russell Ballard ʻo pehē, “[Ko e] ongoongoleleí ko ha ongoongolelei ʻo e ʻofa—ʻofa ki he ʻOtuá mo e ʻofa ki he niʻihi kehé” (“Godʻs Love for His Children,” Ensign, May 1988, 59). ʻI hoʻo lau e folofolá, fakakaukau ke fakaʻilongaʻi ʻa e ngaahi foʻi lea mo e kupuʻi lea ʻokú ne fakamoʻoniʻi e ʻofa ʻa e ʻOtuá.

ʻAʻeva mo Au, fai ʻe Greg K. Olsen