Perfect Love, tā ʻe Del Parson

Tīsema 2–8

1–3 Sione; Sute

“Ko e ʻOtuá Ko e ʻOfa”

ʻOku akoʻi mai ʻe he ngaahi Tohi ʻa Sione mo Suté ʻo kau ki he ʻofa mo e maama ʻa e Tamai Hēvaní. ʻI hoʻo ako ʻi he uike ní, fakakaukauloto ki he ʻuhinga ʻoku fie maʻu ai ʻe he fānau ʻokú ke akoʻí ʻa ʻEne māmá mo e ʻofá ʻi heʻenau moʻuí. Manatuʻi ke fakakaukau ki he kotoa ʻo e ngaahi ʻekitivitī ʻi he fokotuʻutuʻu ko ʻení, kae ʻikai ko ia pē kuo tohi maʻá e taʻu motuʻa ʻo e fānau ʻokú ke akoʻí.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fakaafeʻi e fānaú ke vahevahe e anga ʻo ʻenau ongoʻi e ʻofa ʻa e Tamai Hēvaní pe ko e ʻuhinga ʻoku nau pehē ai ʻoku hangē ʻa e Tamai Hēvaní ha māmá.

Akoʻi e Tokāteliné

Fānau Iiki Angé

1 Sione 1:5–7; 2:8–11

ʻOku ʻomi ʻe he muimui kia Sīsuú, ʻa e māmá ki heʻeku moʻuí.

ʻE lava fēfē ʻe hono fakafehoanaki ki he maama mo e fakapoʻuli fakatuʻasinó ʻo tokoniʻi koe ke akoʻi e fānaú kau ki he maama ʻoku ʻomi ʻe he Tamai Hēvaní ki heʻenau moʻuí?

Ngaahi ʻEkitivitī ʻe Ala Fakahokó

• Kole ki he fānaú ke nau fakahingoa e ngaahi meʻa ʻoku nau fakatupu e māmá. Tokoniʻi kinautolu ke mahino e ngaahi lelei ʻo e māmá, hangē ko hono tokoniʻi e ʻakaú ke tupú, fakaʻatā kitautolu ke tau sio, mo foaki mai e māfaná. Fakaafeʻi e fānaú ke nau taufetongi ʻi hono hulu ha kasa ki ha fakatātā ʻo Sīsū Kalaisi lolotonga ʻenau leaʻaki e, “Ko e maama ʻa e ʻOtuá” (1 Sione 1:5). Fakamoʻoni ange ʻoku lava ʻe he Tamai Hēvaní mo Sīsū Kalaisi ʻo ʻomi ha maama ki heʻetau moʻuí ʻi he taimi ʻoku tau talangofua ai ki he ngaahi fekaú.

• Ngaohi ke fakapōpōʻuli ʻa e loki akó, pea fakaafeʻi e fānaú ke nau fokotuʻu e ngaahi founga ʻe lava ai ke ʻomi ʻa e māmá ki he lokí. Tokoniʻi kinautolu ke nau fakakaukau ki ha ngaahi founga te tau lava ai ʻo ʻomi ʻa e maama ʻo Sīsū Kalaisí ki heʻetau moʻuí. ʻI heʻenau vahevahe ʻenau ngaahi talí, fakamoʻui e ngaahi kasá pe fakaava ha matapā sioʻata ke tānaki māmālie mai ʻa e māmá ki he lokí.

1 Sione 4:10–11, 20–21

ʻOku ou fakahaaʻi ʻeku ʻofa ki he ʻOtuá ʻi he taimi ʻoku ou ʻofa ai ki he niʻihi kehé.

Tokoni ke mahino ki he fānaú ʻa e fehokotaki ʻi he ʻofa ʻoku nau maʻu maʻá e Tamai Hēvaní pea mo e ʻofa ʻoku nau fakahaaʻi ki Heʻene fānaú.

Ngaahi ʻEkitivitī ʻe Ala Fakahokó

• Lau e 1 Sione 4:11 ki he fānaú, pea hivaʻi ha foʻi hiva kau ki he ʻofa ʻa e ʻOtuá, hangē ko e “ʻOku ʻOfa ʻEku Tamai Hēvaní ʻIate Au” (Tohi Hiva ʻa e Fānaú, 16-17). Kole ki ha fānau ʻe niʻihi ke vahevahe e founga ʻoku nau ʻiloʻi ai ʻoku ʻofa ʻa e Tamai Hēvaní ʻiate kinautolu. Hili e tali takitaha, fakaafeʻi e fānaú ke nau fefāʻofuaʻaki mo pehē, “Ko e ʻOtuá ko e ʻOfa pea ʻoku ʻofa ʻa e ʻOtuá ʻiate au.”

• Lau e 1 Sione 4:21 ki he fānaú. Fakaafeʻi kinautolu ke vahevahe pe fakatātaaʻi e ngaahi founga kehekehe te nau lava ai ʻo ʻofa ki ha kaungāmeʻa, hangē ko ha fāʻofua kiate ia pe faʻu ha kiʻi kaati. Ko e hā ʻoku ngaohi ʻe he ngaahi meʻa ko ʻení ke ongoʻi ʻe hotau ngaahi kaungāmeʻá? ʻOku ongoʻi fēfē ʻa e Tamai Hēvaní ʻi he taimi ʻoku tau fai ai ha ngaahi meʻa angaʻofa maʻá e niʻihi kehé?

1 Sione 2:3–5; 5:3

ʻOku ou ʻofa ki he ʻOtuá ʻi he taimi ʻoku ou tauhi ai ʻEne ngaahi fekaú.

ʻE lava ke ako kei siʻi ʻe he fānaú “ʻoku ʻikai fakamamahi ʻa [e] ngaahi fekau” ʻa e ʻOtuá pea ʻoku hoko ʻa e muimui ki he ngaahi fekaú ko ha founga ke fakahaaʻi ʻaki ʻetau ʻofá kiate Ia.

Ngaahi ʻEkitivitī ʻe Ala Fakahokó

• Lau e 1 Sione 5:3, pea kole ki he fānaú ke nau fakafanongo ki he meʻa ʻoku talamai ʻe he veesi ko ʻení kau ki he founga te tau lava ai ʻo fakahaaʻi ʻoku tau ʻofa ki he ʻOtuá. Fakaafeʻi ʻa e fānaú ke fakahingoa ʻa e lahi taha ʻo e ngaahi fekau te nau lavá. Ko e hā e ongo ʻoku maʻu ʻe he Tamai Hēvaní ʻi he taimi ʻoku tau talangofua ai ki Heʻene ngaahi fekaú?

• Fakaafeʻi e fānaú ke nau tā ha fakatātā ʻokú ne fakahaaʻi ha founga ʻe taha te nau lava ai ʻo fakahaaʻi ʻenau ʻofa ki he Tamai Hēvaní. Hangē ko ʻení, te nau lava ʻo tā ha fakatātā ʻo kinautolu ʻoku nau tauhi ha taha ʻo e ngaahi fekaú. Hivaʻi fakataha ha hiva kau ki he talangofuá, hangē ko e “Fili e Hala Totonú” (Tohi Hiva ʻa e Fānaú, 82). Ko e hā ʻetau ongoʻi ʻi he taimi ʻoku tau talangofua aí?

Akoʻi e Tokāteliné

Fānau Lalahi Angé

1 Sione 2:8–11; 4:7–8, 20–21

ʻOku ou fakahaaʻi ʻeku ʻofa ki he ʻOtuá ʻi he taimi ʻoku ou ʻofa ai ki he niʻihi kehé.

Te ke tokoniʻi fēfē ke mahino ki ha fānaú ʻoku kau ʻi he ʻofa ki he ʻOtuá ʻa e ʻofa ki he niʻihi ko ia ʻoku tau feohí—ʻo aʻu ki he kakai mahalo ʻoku kehe meiate kitautolu pe faingataʻa ke tau ʻofa ki ai?

Ngaahi ʻEkitivitī ʻe Ala Fakahokó

• Kole ki he fānaú ke nau fakakaukauloto ki ha taha foʻou kuó ne kau mai ki heʻenau akó pe uōtí pea ʻikai ke ne maheni mo ha taha ai. ʻOku ongoʻi fēfē nai ʻa e tokotahá ni? Fakaafeʻi ha taha ke ne lau e 1 Sione 4:7–8. Ko e hā ʻoku fokotuʻu mai ʻe he veesi ko ʻení ʻo kau ki he founga ʻoku totonu ke tau feohi ai mo e tokotahá ni? Vahevahe ha tūkunga tatau pē, pe kole ki he fānaú ke nau fakakaukau ki ha ngaahi tuʻunga te nau ala maʻu ai ha faingamālie ke fakahaaʻi ʻaki e ʻofá.

• Kole ki he fānaú ke lau e 1 Sione 4:7–8, 20–21, pea fakaafeʻi kinautolu ke nau takitaha tohi ha sētesi ʻe taha ke fakamatala fakanounouʻi ʻaki e meʻa ʻoku nau pehē ʻoku mahuʻinga taha ʻi he ngaahi veesi ko ʻení. Hili hono vahevahe ʻenau ngaahi sētesí, te ke ala fai e talanoa ʻo Sai Sionisoni mei he lea ʻa Brother David L. Beck ko e “Ko ho Fatongia Toputapu ke Tokoní” (Ensign pe Liahona, Mē 2013, 55). ʻE lava fēfē ʻa e fānaú ke nau muimui ki he ngaahi sīpinga ʻo e kau talavou ʻi he talanoá ʻa ia ne nau fakahaaʻi ʻenau ʻofá kia Chy? Fakaafeʻi e fānaú ke vahevahe ha ngaahi founga kehe te nau lava ai ʻo ʻofa kiate kinautolu ʻoku nau feohí.

1 Sione 2:3–6; 4:17–18; 5:2–5

ʻOku ou ʻofa ki he ʻOtuá ʻi he taimi ʻoku ou tauhi ai ʻEne ngaahi fekaú.

‘E lava ke faingofua ange ‘etau talangofua ki he ngaahi fekaú ʻi he taimi ʻe mahino ai kiate kitautolu e ngaahi moʻoni ʻoku akoʻi ʻi he 1 Sione 5:3. Te ke tokoniʻi fēfē ʻa e fānaú ke nau vakai ki he ngaahi fekaú ko ha ngaahi faingamālie ke fakahaaʻi ʻaki ʻenau ʻofa ki he ʻOtuá, kae ʻikai ko ha fakamafasia.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lisi ʻi he palakipoé ha ngaahi founga te nau lava ai ʻo fakahaaʻi ki he ʻOtuá ʻoku nau ʻofa ʻiate Ia. Lau fakataha leva e 1 Sione 2:5–6; 5:2–5 ki ha toe ngaahi fakakaukau makehe. ʻOku fakahaaʻi fēfē ʻe heʻetau talangofua ki he ngaahi fekaú, ʻoku tau ʻofa ʻi he Tamai Hēvaní?

  

  Neongo e faingataʻá, te tau lava ʻo fili ke tauhi e ngaahi fekaú.

• Lau e 1 Sione 4:17, pea fakamatalaʻi ange ki he fānaú, ʻoku ʻuhinga ʻa e “loto mālohi ʻi he ʻaho ʻo e fakamāú” ke tau maʻu ha loto falala mo ha nonga ʻi he taimi te nau tuʻu ai he ʻao ʻo e ʻOtuá ke fakamāuʻí. Ko e hā ʻoku akoʻi mai ʻe he veesi ko ʻení kuo pau ke tau fai ke tau maʻu ai e loto falala ko ʻení? Ko e hā ha ngaahi meʻa te tau lava ʻo fai he taimí ni ke tau loto falala ai ʻi he ʻao ʻo e ʻOtuá?

Sute 1:18–22

Te u lava ʻo faitotonu neongo e taimi ʻoku katakataʻi ai au ʻe he niʻihi kehé.

ʻE ala lumolumaʻi fānaú ko ʻenau tuí pe anga ʻo ʻenau moʻui ko ha ākonga ʻo Sīsū Kalaisí. ʻOku ʻi he ngaahi veesi ko ʻení ha akonaki ʻa Sute ki he founga ke tau tuʻu maʻu ʻi he faitotonu ʻi he ngaahi tuʻunga peheé.

Ngaahi ʻEkitivitī ʻe Ala Fakahokó

• Kole ki he fānaú ke nau vahevahe ki ha ngaahi taimi ne katakataʻi ai kinautolu ʻi heʻenau fai e meʻa ʻoku totonú. Fakaafeʻi e fānaú ke nau lau e Sute 1:18–22 mo fekumi ki he founga te tau lava ai ʻo tuʻu maʻu ʻi he totonú ʻi he taimi ʻoku lumolumaʻi pe katakataʻi ai kitautolú. Tohi e meʻa ʻoku nau maʻú ʻi he palakipoé, pea aleaʻi e ngaahi founga te nau lava ai ʻo muimui ki he faleʻi ko ʻení.

• Fakamatala fakanounouʻi e misi ʻa Līhaí (vakai 1 Nīfai 8:1–35), mo kole ki ha niʻihi ke nau lau ha ngaahi veesi mei he 1 Nīfai 8:26–28, 33. Aleaʻi e founga ʻoku hangē ai e kakai ʻi he fuʻu fale lahi mo ʻataʻataá, ko e kau fakaʻaluma naʻe lave ki ai ʻa Suté. Ko e hā te tau lava ʻo fai ke ʻoua ʻe tākiekina kitautolu ʻe he niʻihi ʻoku nau katakataʻi pe taʻetui ki he meʻa ʻoku tau tui ki aí? (vakai 1 Nīfai 8:30, 33).

Poupouʻi e Ako ʻi ʻApí

Poupouʻi e fānaú ke nau faʻu ha palani ke fai ai ha meʻa ke vahevahe ʻenau māmá mo honau ngaahi fāmilí.

Fakatupulaki ʻEtau Akoʻí

ʻOku longomoʻui ʻa e fānaú. Te ke ongoʻi ʻi ha ngaahi taimi ʻoku tohoakiʻi ʻa e ivi ʻo e fānaú mei he akó. Ka te ke lava ʻo kamata ʻi honau natula longomoʻuí ʻaki hono fakaafeʻi kinautolu ke nau fakatātaaʻi, tā fakatātaaʻi, pe hiva kau ki ha tefitoʻi moʻoni ʻo e ongoongoleí. (Vakai Ko e Faiako ʻi he Founga ʻa e Fakamoʻuí, 25–26.)