Safe in a Stable, tā ʻe Dan Burr

16–22 Tīsema

Kilisimasí

“Ongoongolelei ʻo e Fiefia Lahi”

Ko e lēsoni ko ʻení ko ha faingamālie ia ke tokoniʻi ai e fānau ʻokú ke akoʻí ke nau fakafiefiaʻi ʻi he taimi Kilisimasí, ʻa e ʻaloʻi, moʻui, mo e ngāue fakafaifekau ʻa e Fakamoʻuí. Tauhi maʻu e fakakaukaú ni lolotonga hoʻo teuteu ke akoʻí.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fakaʻaliʻali e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea fakaafeʻi e fānaú ke nau vahevahe e meʻa ʻoku nau ʻilo kau ki he ʻaloʻi ʻo e Fakamoʻuí.

Akoʻi e Tokāteliné

Fānau Iiki Angé

Mātiu 2:1–12; Luke 2:1–14

Naʻe haʻu ʻa Sīsū Kalaisi ki māmani ko ha kiʻi pēpē.

ʻOku fakamānako ki he fānaú ʻa e talanoa ʻo hono ʻaloʻi ʻo Sīsū Kalaisí. Ko e hā ha ngaahi moʻoni fakatokāteline ʻokú ke maʻu ʻi he talanoa ko ʻení, ʻokú ke ongoʻi ʻoku totonu ke mahino ki he fānaú?

Ngaahi ʻEkitivitī ʻe Ala Fakahokó

• Lau e Luke 2:1–14 ki he fānaú, pe fakamatalaʻi e ngaahi meʻa ʻoku hoko ʻi he ngaahi veesi ko ʻení ʻaki hono fakahoa ki he “Vahe 5: ʻAloʻi ʻo Sīsū Kalaisí,” Ngaahi Talanoa ʻo e Fuakava Foʻoú, 13–15, pe ko e vitiō fakafekauʻakí ʻi he LDS.org. Fakaafeʻi e fānaú ke nau tā ha ngaahi fakatātā ʻo e ngaahi meʻa ko ʻeni ʻoku hokó pea fakaʻaongaʻi e ngaahi fakatātaá fai e talanoá ʻiate kinautolu pē. Ko e hā e ʻuhinga ʻokú ke fiefia ai ʻi he hāʻele mai ʻa Sīsū ki he māmaní ko ha kiʻi pēpeé?

• Kole ki he fānaú ke nau fai atu e talanoa ʻo e muimui e kau Tangata Potó ʻi he foʻi fetuʻú, ke nau ʻilo ʻa Sīsuú. Kapau ʻoku fie maʻu ke fakamanatu kiate kinautolu e talanoá, vakai ki he Mātiu 2:1–12 pe “Vahe 7: Ko e Tangata Potó,” Ngaahi Talanoa ʻo e Fuakava Foʻoú, 18, pe ko e vitiō fakafekauʻakí ʻi he LDS.org. Fufuuʻi ha fakatātā ʻo Sīsū ʻi he lokí. Tā pe kosi ʻo toʻo ha foʻi fetuʻu laʻi pepa pea puke ia ʻi he ʻeá. Fakaafeʻi e fānaú ke nau pehē pē ko ha kau tangata poto kinautolu ʻoku nau ʻomi ha ngaahi meʻaʻofa, pea tataki takai kinautolu ʻi he lokí ke maʻu ʻa Sīsū. Ko e hā ha ngaahi meʻaʻofa ʻe niʻihi te tau lava ʻo foaki kia Sīsū ʻi heʻetau moʻui he ʻaho ní?

• Hivaʻi ha ngaahi hiva Kilisimasi ʻe niʻihi mo e fānaú, hangē ko e “Fiefia ki Māmani” mo e “Pō Mālū” (Ngaahi Himí, fika 110, 111) pe “Ngaahi Fetuʻu Ne Uló,” “Naʻe ʻAloʻi Mai ʻa Sīsū Kalaisi,” and “Fiemālie Pē Siʻeku Tama” (Tohi Hiva ʻa e Fānaú, 24, 26-27, 30).

Sione 3:16

Naʻe fakafaingofuaʻi ʻe Sīsū Kalaisi ke u toe lava ʻo nofo mo e Tamai Hēvaní ha ʻaho.

ʻOku mahino nai ki he fānau ʻokú ke akoʻí ʻa e ʻuhinga naʻe hāʻele mai ai ʻa Sīsū Kalaisi ki he māmaní? Tuku ha taimi ke fakalaulauloto ai ki he meʻa kou fai ʻe he Fakamoʻuí maʻau fakataautaha pea mo e founga te ke lava ai ʻo tokoniʻi ke mahino ki he fānaú e meʻa kuó Ne fai maʻanautolú.

Ngaahi ʻEkitivitī ʻe Ala Fakahokó

• ʻOmi ha meʻaʻofa kuo ʻosi kofu ki he kalasí mo ha fakatātā ʻo Sīsū Kalaisi ʻi loto. Fakapipiki ha kiʻi laʻi pepa ʻi he meʻaʻofá ʻo tohiʻi e “Sione 3:16” pea talaange ki he fānaú ko ha fakaʻilonga tokoni ʻeni kau ki he ʻuhinga ʻo e meʻaʻofá. Lau mo e fānaú e Sione 3:16 pea fakaafeʻi kinautolu ke nau mateʻi pe ko e hā e meʻaʻofá pea fakaava leva. Ko e hā e ʻuhinga naʻe ʻomi ai ʻe he ʻOtuá ʻa Hono ʻAló?

• Fili ha ngaahi fakatātā mei he Tohi Fakatātā ʻo e Ongoongoleleí (hangē ko e fika 1, 30, 35–66, 84) ʻa ia ʻokú ne fakatātaaʻi e ngaahi founga ʻe niʻihi naʻe faitāpuekina ai ʻe Sīsū e kakai kehé lolotonga ʻEne moʻui ʻi he māmaní. Tuku ki he fānaú ke nau puke e ngaahi fakatātaá lolotonga hoʻo fai e ngaahi talanoá. Mahalo te ke fie maʻu ke fili ha ngaahi fakatātā ʻoku kaunga ki he “Naʻá Ne Fekau Hono ʻAló” and “Talamai ʻa e Ngaahi Talanoa ʻo Sīsū” (Tohi Hiva ʻa e Fānaú, 20–21, 36) pea tuku ki he fānaú ke nau puke hake e ngaahi fakatātaá lolotonga ʻenau hivaʻi e ngaahi hivá.

• Fakaafeʻi e fānaú ke vahevahe e ngaahi talanoa kau kia Sīsū ʻoku nau manako aí. Hili hono fai e ngaahi talanoa takitaha, tokoniʻi e fānaú ke nau fakaʻosiʻi e sētesi ko ʻení: “Naʻe hāʻele mai ʻa Sīsū Kalaisi ki he māmani ke.” Fakaʻaliʻali ange leva ha ngaahi fakatātā kau ki he feilaulau fakalelei ʻa e Fakamoʻuí, pekiá, mo e Toetuʻú (vakai ki he Tohi Fakatātā ʻo e Ongoongoleleí, fika 56, 57, 58, 59) pea talanoa nounou pē kau ki he ngaahi meʻa ko ʻeni ne hokó. Vahevahe hoʻo fakamoʻoni naʻe hāʻele mai ʻa Sīsū Kalaisi ki he māmaní ke pekia maʻatautolu pea mo toetuʻu kae lava ke tau toe foki ki he Tamai Hēvaní.

  

  Gethsemane, tā ʻe J. Kirk Richards

Akoʻi e Tokāteliné

Fānau Lalahi Angé

Mātiu 1:18–25; 2:1–12; Luke 1:26–38; 2:1–20

Naʻe haʻu ʻa Sīsū Kalaisi ki māmani ko ha kiʻi pēpē.

Te ke tokoniʻi fēfē ʻa e fānaú ke nau tokanga kia Sīsū Kalaisi ʻi he Kilisimasí?

Ngaahi ʻEkitivitī ʻe Ala Fakahokó

• Fakaafeʻi ha taha ʻi he fānaú ke ne lau kau ki he ngaahi meʻa naʻe hoko ʻoku kaunga ki he ʻaloʻi ʻo e Fakamoʻuí ʻi he Mātiu 1:18–25; 2:1–12; Luke 1:26–38; 2:1–20. Kole ki he fānaú ke nau taufetongi ʻi hono tā ʻi he palakipoé ha ngaahi fakatātā ʻo e meʻa ʻoku fakamatalaʻi ʻe he folofolá. Ko e hā e ngaahi meʻa ʻoku akoʻi mai ʻe he ngaahi talanoa ko ʻení kau kia Sīsū Kalaisi?

• Kole ki he fānaú ke nau tohi ha meʻa ʻoku nau fanongo ki ai te ne tokoniʻi kinautolu ke nau tokanga kia Sīsū Kalaisi ʻi he taimi Kilisimasí. Hili e vitioó, fakaafeʻi kinautolu ke vahevahe e meʻa ne nau tohí.

• Fakaafeʻi e fānaú ke tohiʻi i ha ngaahi laʻi pepa, ha ngaahi meʻa te nau lava ʻo fai ke tokoniʻi ai kinautolu ke nau tokanga taha ki he Fakamoʻuí lolotonga e faʻahitaʻu Kilisimasí. Faʻo ʻenau ngaahi laʻi pepá ʻi ha ngaahi kato pe faʻoʻanga meʻa maʻá e fānaú ke nau ʻalu mo ia ki ʻapi. ʻE ala kau he ngaahi fakakaukaú ʻa e lau ʻo e folofolá, hivaʻi ha ngaahi himi Kilisimasi, mo fai ha ngaahi ngāue ʻofa fai fakamaatoato.

• Hivaʻi ha ngaahi hiva Kilisimasi kau ki he Fakamoʻuí (vakai Tohi Hiva ʻa e Fānaú, 20–33; Ngaahi Himí, fika 110–122), pea fakaafeʻi e fānaú ke vahevahe ha laine pe kupuʻi lea ʻi he ngaahi hivá ʻoku nau manako ai.

Sione 3:16

Naʻe fakafaingofuaʻi ʻe Sīsū Kalaisi ke u toe lava ʻo nofo mo e Tamai Hēvaní ha ʻaho.

Te ke tokoniʻi fēfē ʻa e fānaú ke nau toe vakaiʻi e meʻa ne nau ako ʻi he taʻu ní mo mahino e ʻuhinga ʻoku nau fie maʻu ai ʻa Sīsū Kalaisi ʻi heʻenau moʻuí?

Ngaahi ʻEkitivitī ʻe Ala Fakahokó

• Fakahingoa ha ongo laʻi pepa ʻe ua ko e Ko hai ʻa Sīsū Kalaisi? mo e Ko e hā e ʻuhinga naʻá Ne hāʻele mai ai ki he māmaní? pea fakapipiki kinautolu ki ha ngaahi holisi kehekehe ʻi he loki akó Fakaafeʻi e fānau takitaha ke lau ha taha ʻo e ngaahi potufolofola ko ʻení: Mātiu 16:15–16; Sione 3:16; 1 Nīfai 10:4; Mōsaia 3:8; ʻAlamā 7:10–13; 3 Nīfai 27:14–15. Kole ki he fānaú ke nau fekumi ʻi he folofola ʻoku nau laú ki ha ngaahi tali ki he ongo fehuʻi ʻe ua ʻi he holisí. Fakaafeʻi kinautolu ke tohi ʻenau ngaahi talí ʻi ha ngaahi laʻi pepa pea fakapipiki kinautolu ki he holisi ʻi he tafaʻaki ʻo e fehuʻi taau mo iá. Te tau lava fēfē ʻo fakahaaʻi ʻetau houngaʻia ʻi he meʻa kuo fai ʻe Sīsū Kalaisi maʻatautolú?

• Fakaafeʻi e fānaú ke nau lisi ʻi he palakipoé ʻa e kotoa ʻo e ngaahi hingoa mo e ngaahi hingoa fakanofo ʻo Sīsū ʻoku nau lava ʻo fakakaukau ki aí (vakai Bible Dictionary, “Christ, names of”). Ko e hā ʻoku akoʻi mai ʻe he ngaahi talanoa ko ʻení kau kia Sīsū Kalaisi mo ʻEne ngāue fakafaifekaú? Ko e hā e ʻuhinga ʻoku tau fie maʻu ai ʻa Sīsū Kalaisi ʻi heʻetau moʻuí?

Poupouʻi e Ako ʻi ʻApí

Poupouʻi e fānaú ke nau ʻiloʻi ha founga ʻe taha ke tokoniʻi ai ha taha kehe pe haʻu ʻo ofi ange kia Sīsū Kalaisi ʻi he Kilisimasi ko ʻení.

Fakatupulaki ʻEtau Akoʻí

ʻOku saiʻia e fānaú ke vahevahe e meʻa ʻoku nau akó. ʻE lava foki mo e fānau īkí ʻo fakamālohia e ngaahi mēmipa honau fāmilí. Poupouʻi e fānau ʻokú ke akoʻí ke vahevahe ki honau fāmilí ha meʻa ne nau ako ʻi he Palaimelí. (Vakai Ko e Faiako ʻi he Founga ʻa e Fakamoʻuí, 30