Christ Preaching in the Spirit World, tā ʻe Robert T. Barrett

25 Nōvema–1 Tīsema 

1 mo e 2 Pita

“Mou Fiefia ʻaki ʻa e Fiefia Taʻefaʻalaua pea Fungani Lelei”

Kamata hoʻo ʻo e 1 mo e 2 Pita ʻaki ha lotu. Manatuʻi ko hoʻo teuteu lelei taha ke akoʻí ʻe haʻu ia mei ho ngaahi aʻusia ʻi he ako fakatāutahá mo e fakafāmilí.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fakaʻaliʻali e fākatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea fakaafeʻi e fānaú ke nau talaatu ha meʻa ʻoku nau ʻilo kau kia Pita. Fakamanatu ange kiate kinautolu naʻe hoko ʻa Pita ko e taki ʻo e Siasí hili e toetuʻu ʻa Sīsuú, pea fakamatalaʻi ange ko e 1 Pita mo e 2 Pita ko e ngaahi tohi meiate ia ki he kau mēmipa ʻo e Siasí ʻi hono kuongá.

Akoʻi e Tokāteliné

Fānau Iiki Angé

1 Pita 1:6–7; 3:14

ʻE lava ke u fiefia neongo e ngaahi taimi faingataʻá.

Fakakaukau ki ha founga te ke lava ai ʻo akoʻi e ngaahi veesi ko ʻení ʻi ha founga ʻe tokoniʻi ai e fānaú ke nau tafoki ki he Fakamoʻuí ʻi he taimi te nau fehangahangai ai mo e faingataʻá.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau vahevahe ha ngaahi meʻa faingataʻa ne kātakiʻi ʻe Sīsū, hangē ko hono tutuki iá. Fakamatalaʻi ange ʻe ʻi ai ha ngaahi taimi faingataʻa ʻi heʻetau moʻuí. Lau fakataha e 1 Pita 1:6–7; 3:14, pea vahevahe ha aʻusia ʻi ha taimi naʻá ke fehangahangai ai mo ha “ʻahiʻahi ʻo [hoʻo] tuí.” Pe te ke vahevahe e lotu ʻa e Palōfita ko Siosefa Sāmitá ʻi he Fale Fakapōpula ʻi Lipetií mo e nonga naʻe ʻoange ʻe he ʻOtuá kiate iá (vakai T&F 121:1–8; 123:17). ʻOku tokoniʻi fēfē kitautolu ʻe he tui kia Sīsuú ke tau fiefia lolotonga e ngaahi taimi faingataʻá?

  

  Siosefa Sāmita ʻi he Fale Fakapōpula Lipetií, tā ʻe Greg K. Olsen

• Hivaʻi fakataha ha hiva ʻokú ne akoʻi e founga ke maʻu ai e fiefiá, hangē ko e “Te u Muimui he Palani ʻa e ʻOtuá” (Tohi Hiva ʻa e Fānaú, 86–87).

1 Pita 2:9–12

ʻOku finangalo e Tamai Hēvaní ke u hoko ko ha faʻifaʻitakiʻanga ki he niʻihi kehé.

Naʻe akonaki mai ʻa Paula ko e “kakai ʻa e ʻOtuá” ʻakitautolu pea ʻe lava ʻe heʻetau ngaahi ngāue leleí ʻo “fakamālō ai ki he ʻOtuá.”

Ngaahi ʻEkitivitī ʻe Ala Fakahokó

• Fakamatalaʻi ʻa e ngaahi meʻa ʻoku hā mahino mai mei honau ngaahi ʻātakaí, pe fakaʻaliʻali ha ngaahi fakatātā ʻo e ngaahi meʻa peheé. Hangē ko ʻení, ʻoku hā mahino mai ha temipale mei he ngaahi fale ʻi hono ʻātakaí pe ko e māʻolunga makehe ha moʻunga mei ha teleʻa. Fakamatalaʻi ange ʻi he taimi ʻoku tau tauhi ai ʻa e ngaahi fekaú, ʻoku tau makehe ange ai pea lava ke mamata ʻa e kakai kehé ki heʻetau ngaahi sīpingá. Talanoa ki ha ngaahi “ngāue lelei” ʻe niʻihi kuó ke mamata kuo fai ʻe he fānaú. Fakamatalaʻi ange, ʻoku hoko e ngaahi ngāue lelei ko ʻení ke “fakamālō ai ki he ʻOtuá”—ʻoku nau tokoni ke ongoʻi ʻe he niʻihi kehé ha ʻofa lahi ange ki he ʻOtuá mo holi ke tokoniʻi Ia.

• Fakakakato mo e fānaú ʻa e peesi ʻekitivitií. ʻOku fakamālōʻia fēfē ʻe he kakai ʻi he fakatātaá, ʻa e ʻOtuá?

1 Pita 3:18–20; 4:6

ʻOku ako e ngaahi laumālie ʻi he maama tataliʻanga ʻo e ngaahi laumālié kau ki he ongoongoleleí.

Hili e pekia ʻa Sīsuú, naʻá Ne hāʻele ki he maama tataliʻanga ʻo e ngaahi laumālié pea ʻave ʻa e ngaahi laumālie angatonú ke akoʻi e ngaahi laumālie kehe ʻa ia kuo teʻeki ai ke nau tali ʻa e ongoongoleleí.

Ngaahi ʻEkitivitī ʻe Ala Fakahokó

• Talanoa ki he fānaú ʻo kau ki ha taha ʻokú ke ʻilo kuo pekia. Fakamatalaʻi ange, ko e taimi ʻoku mate ai e kakaí, ʻoku mavahe honau ngaahi laumālié mei honau ngaahi sinó ʻo ʻalu ki he maama tataliʻanga ʻo e ngaahi laumālié. Lau e 1 Pita 3:19 pea fakamatalaʻi ange ko e taimi ne pekia ai ʻa Sīsuú, naʻá ne hāʻele ʻo ʻaʻahi ki he maama tataliʻanga ʻo e ngaahi laumālié. Naʻá Ne kole ai ki he ngaahi laumālie angatonú ke nau akoʻi e ongoongoleleí ki he ngaahi laumālie kehe kuo teʻeki ai ke nau tali ʻa e ongoongoleleí (vakai T&F 138:30).

• Tuku ha ʻotu sea ʻi he lotomālie ʻo e lokí ke hangē ha ʻā vahevahé. Kole ki ha niʻihi ʻo e fānaú ke nau tuʻu ʻi he tafaʻaki ʻe taha ke fakafofongaʻi e ngaahi laumālie ʻi he maama tataliʻanga ʻo e ngaahi laumālié ʻa ia naʻe ʻikai ke nau papitaiso lolotonga ʻenau ʻi he moʻui he māmaní. ʻOange ki ha taha ʻo e toenga e fānaú ha kī laʻi pepa lahi ʻoku tohiʻi ai ʻa e “papitaiso maʻá e kau pekiá” pea kole ange ke ne toʻo ʻa e ʻā vahevahé. Fakamatalaʻi ange leva ko e kau mēmipa ʻo e Siasí ʻoku taʻu 12  mo matuʻotuʻa ange aí, ʻe lava ke nau ʻalu ki he temipalé ʻo papitaiso maʻa honau ngaahi kui naʻe ʻikai papitaiso lolotonga ʻenau ʻi he māmaní. ʻE lava leva ke tali ʻe he ngaahi kui ko ʻení ʻa e ongoongoleleí ʻi he maama tataliʻanga ʻo e ngaahi laumālié.

• Tokoniʻi e fānaú ke nau fakafonu ha ʻakau fakafāmili faingofua

Akoʻi e Tokāteliné

Fānau Lalahi Angé

1 Pita 3:12–17; 4:13–14, 16

Te u lava ʻo maʻu ʻa e fiefiá mo e nongá neongo ʻa e ngaahi taimi faingataʻá.

Mahalo ʻe aʻusia ʻe he fānau ʻokú ke akoʻí ha faʻahinga ʻe niʻihi ʻo e fakaʻalumá mo e lumolumaʻí koeʻuhi ko e meʻa ʻoku nau tui ki aí. ʻE lava ke tokoniʻi kinautolu ʻe he ngaahi veesi ko ʻení lolotonga e ngaahi taimi ko iá.

Ngaahi ʻEkitivitī ʻe Ala Fakahokó

• Fakamatala fakanounouʻi ha ngaahi talanoa ʻe niʻihi kau ki hono fakatangaʻi ʻo Sīsuú, pe tuku ki he fānau ke nau lau kinautolu—vakai, ki ha sīpinga, Mātiu 12:9–14 pe Luke 22:47–54. Fehuʻi ki he fānaú pe kuo lumolumaʻi nai kinautolu koeʻuhi ko ʻenau moʻui ʻaki ʻa e ngaahi akonaki ʻo e ongoongoleleí. Lau fakataha leva e 1 Pita 3:12–14; 4:13–14, 16, pea kole ki he fānaú ke nau fekumi ki he meʻa ne leaʻaki ʻe Pita kau ki he faingataʻaʻia “koeʻuhi ko e māʻoniʻoní.” Ko e hā ʻe lava ai ke tau kei fiefia pē ʻi he taimi ʻoku lumolumaʻi ai kitautolu ʻe he kakaí ʻi he fai ʻa ia ʻoku totonú?

• Fakaafeʻi ha mēmipa ʻo e uōtí ke ne vahevahe ha aʻusia ʻi ha taimi naʻá ne fiefia pe nonga ai lolotonga ha faingataʻa, pe vahevahe e founga naʻe maʻu ai ʻe he Palōfita ko Siosefa Sāmitá ʻa e nonga lolotonga ʻene ʻi he Fale Fakapōpula Lipetií (vakai T&F 121:1–8; 123:17). Te tau maʻu fēfē ʻa e fiefia mo e melino lolotonga ʻetau ngaahi faingataʻá?

1 Pita 3:15

ʻOku totonu ke u mateuteu maʻu pē ke vahevahe ʻa e ongoongoleleí.

ʻE lahi ha ngaahi faingamālie ʻa e fānau ʻokú ke akoʻí ke tali ha ngaahi fehuʻi mei ha kakai kehe kau ki heʻenau tuí, ʻi he toenga ʻo ʻenau moʻuí. Fakakaukau ki he meʻa te ke lava ʻo fai ke tokoniʻi ai kinautolu ke “mateuteu maʻu pē ke fai ha tali.”

Ngaahi ʻEkitivitī ʻe Ala Fakahokó

• Talanoa ki ha taimi naʻe ʻeke atu ai ʻe ha taha ha fehuʻi kau ki he Siasí, pea fakamatalaʻi ange pe naʻá ke ongoʻi ʻokú ke mateuteu ke tali. Kole ki he fānaú ke nau talanoa kau ki ha faʻahinga taimi kuo faiange ai ʻe ha kakai ha ngaahi fehuʻi kau ki he Siasí. Lau fakataha e 1 Pita 3:15. Te tau muimui fēfē ki he akonaki ʻa Pita ʻi he veesi ko ʻení?

• Fakakaukau ki ha ngaahi fehuʻi ʻe niʻihi fakataha mo ha tokoni mei he fānaú, ʻe ala fai atu ʻe he kakaí kau ki he ngaahi akonaki ʻa e Siasí. Tuku ki he fānaú ke nau taufetongi ʻi hono fakamatalaʻi atu e founga te nau tali ʻaki e ngaahi fehuʻi ko ʻení kae lava ke nau “mateuteu maʻu pē.”

1 Pita 3:18–20; 4:6

ʻOku ako e ngaahi laumālie ʻi he maama tataliʻanga ʻo e ngaahi laumālié kau ki he ongoongoleleí.

Tokoniʻi ke mahino ki he fānaú ko e taimi ʻe mate ai ha taha anga māʻoniʻoni, ʻoku nau ʻalu ki he maama tataliʻanga ʻo e ngaahi laumālié ke akoʻi e ongoongoleleí kiate kinautolu naʻe ʻikai ke nau maʻu lolotonga ʻenau ʻi he māmaní.

Ngaahi ʻEkitivitī ʻe Ala Fakahokó

• Tā ʻi he palakipoé ha siakale mo ha laine ʻi lotomālie. Tohiʻi e Palataisi ʻo e ngaahi Laumālié ʻi he konga ʻe taha ʻo e siakalé pea Fale Fakapōpula ʻo e ngaahi Laumālié ʻi he konga ʻe tahá. Fakaafeʻi ha taha ʻi he fānaú ke ne lau e 1 Pita 3:18–20; 4:6 (vakai 1 Pita 4:6, ʻi heKo e Fakahinohino ki he Ngaahi Folofolá, ki ha toe vakaiʻi mei he Liliu ʻa Siosefa Sāmitá). Fakamatalaʻi ange, ʻi he taimi naʻe pekia ai ʻa Sīsuú, naʻá Ne hāʻele ki he palataisi ʻo e ngaahi laumālié. Naʻá ne fekau ki he ngaahi laumālie angatonu aí ke akoʻi e ongoongoleleí ki he ngaahi laumālie ʻi he fale fakapōpulá.

• Fakaafeʻi ha mātuʻa pe ko ha tokoua matuʻotuʻa ange ʻo e fānaú ke talanoa kau ki he ʻalu ki he temipalé mo hono fakakakato e ngāué maʻá e taha ʻo ʻenau ngaahi kuí.

• Fakaafeʻi e fānaú ke fakafonu ha ʻakau fakafāmili faingofua

Poupouʻi e Ako ʻi ʻApí

Fakaafeʻi e fānaú ke vahevahe ʻenau ʻakau fakafāmilí ki he ngaahi mēmipa ʻo honau fāmilí pea kole kiate kinautolu ha tokoni ki hono tānaki mai ki ai ha ngaahi hingoa.

Fakatupulaki ʻEtau Akoʻí

Feinga ke mahino kiate koe ʻa e fānau ʻokú ke akoʻí. ʻOkú ke ʻiloʻi ʻa e fānau ʻokú ke akoʻí, ko ia ke liliu e ngaahi fakakaukau ʻi he fokotuʻutuʻu ko ʻení ʻo ka fie maʻu, ke feau ʻenau ngaahi fie maʻú. Te ke lava ʻo fakaʻaongaʻi ha taha ʻi he ngaahi ʻekitivitī ʻoku fokotuʻu atu ʻi he fokotuʻutuʻu ko ʻení, kae ʻikai ko ia pē kuo tohi maʻá e taʻu motuʻa ʻo e fānau ʻokú ke akoʻí. (Vakai Ko e Faiako ʻi he Founga ʻa e Fakamoʻuí, 7