Aoao Atu o Tamaiti Laiti

Afai e i ai sau fanau laiti i lou aiga, o nai gaoioiga nei e mafai ona fesoasoani latou te aoao ai:

• Faalogologo i le tala pe faatino foi se tala. E fiafia lava tamaiti laiti i tala---mai tusitusiga paia, mai lou olaga, mai le talafaasolopito o le Ekalesia, pe mai mekasini a le Ekalesia. Vaavaai mo auala e faaaofia ai i latou i le faamatalaina o tala. E mafai ona latou uuina ata po o meafaitino, tusi ata o mea latou te faalogo i ai, faatino le tala, pe fesoasoani foi i le faamatalaina o le tala. Fesoasoani i lau fanau ia iloa upumoni o le talalelei i tala o loo e faasoa atu.

• Faitau se mau. Atonu e le mafai e tamaiti laiti ona faitau lelei, ae e mafai lava ona e faagalulue i latou e aoao mai tusitusiga paia. Atonu e manaomia lou taulai atu i se fuaiupu se tasi, fasifuaitau autu, po o se upu. Atonu foi e mafai ona latou taulotoina ni fasifuaitau pupuu mai mau pe a faifai soo. A o latou faalogo i le upu a le Atua, o le a latou lagonaina le Agaga.

• Tilotilo i se ata pe matamaa se vitio. A e faaali atu i lau fanau laiti se ata po o se vitio e faatatau i se mataupu faavae o le talalelei po o se tala mai le tusi paia, fesili i ai ni fesili e fesoasoani latou te aoao ai mai mea latou te vaai i ai. Mo se faataitaiga, e mafai ona e fesili, “O le a le mea lea e tupu i le ata lea po o le vitio? O a ni ou lagona ua maua ai? O le Gospel Library app, Biblevideos.lds.org, medialibrary.lds.org, ma le children.lds.org o ni nofoaga lelei ia e sue ai ata ma ni vitio.

• Usu. Viiga ma pese mai le Tusipese a Tamaiti e aoao atu ai ma le mamana ia aoaoga faavae. Faaaoga le faasino autu o i tua o le Tusipese a Tamaiti e sue ai ni pese e fetaui ma mataupu faavae o le talalelei o loo e aoao atu. Fesoasoani i lau fanau e faafetaui le savali o pese i o latou olaga. Mo se faataitaiga, e mafai ona e faia fesili e uiga i upu po o fasifuaitau i fatuga o pese. E le gata ina pepese, ae e mafai foi e lau fanau ona faatino ia taga e o faatasi ma pese pe faalogologo foi i pese e tata a o faia isi a latou gaoioiga.

• Fatufatu E mafai e tamaiti ona fau, tusi, pe valivali se mea e faatatau i le tala po o se mataupu faavae o loo latou aoaoina.

• Auai i le faatinoina o lesona faitino E mafai ona fesoasoani se lesona faitino faigofie i lau fanau e malamalama ai i se mataupu faavae o le talalelei e faigata ona malamalama ai. A faaaoga lesona faitino, vaai ni auala e faaauai ai lau fanau i le faatinoina. O le a tele mea latou te aoaoina i se aafiaga latou te faatinoina nai lo le na o le matamata i se faataitaiga.

• Faatino i Taga A faatino e tamaiti i taga se tulaga latou te ono fetaiai i le olaga moni, o le a sili ona mafai ona latou malamalama i le ala e faatatau ai se mataupu faavae i o latou olaga.

• Fai ma toe fai ia gaoioiga. E ono moomia e tamaiti laiti ona faalogo faafia i manatu faavae ina ia malamalama ai i ai. Aua e te fefe e fai faafia tala pe faifai soo ia gaoioiga. Mo se faataitaiga, e mafai ona faatele ona e faasoa atu se tala o tusitusiga paia i ni auala eseese---faitau mai tusitusiga paia, aotele i au lava upu, faaali se vitio, tuu atu i tamaiti e fesoasoani i le faamatalaina o le tala, valaaulia i latou e faatino le tala ma isi mea.