31 Tesema--6 Ianuari

Ua Ia Te I Tatou le Tiutetauave mo Lo Tatou Lava Aoaoina

O le faamoemoe o le Sau, Mulimuli Mai ia Te Au---Mo Tagata Taitoatasi ma Aiga o le fesoasoani lea ia te outou ia o mai ia Keriso ma ia atili ai ona loloto lo outou liua i Lana talalelei. E mafai ona fesoasoani lenei punaoa e te malamalama ai i tusitusiga paia ma maua ai le malosiaga faaleagaga e moomia e oe ma lou aiga. Ona saunia ai lea o oe e faasoa atu malamalamaaga i au vasega i le Lotu ma faamalosiau ai ou uso a Au Paia i a latou taumafaiga e mulimuli ia Keriso.

Tusifaamaumau Ou Uunaiga

Se a ea la oulua feau? Sa fesili Iesu i Ona soo (Ioane 1:38). Atonu e te fesili ifo foi ia te oe lava i lenei fesili---aua o mea e te maua i le Feagaiga Fou i lenei tausaga o le a faalagolago tele i mea e te sailia. “Ia outou ole atu, ona foaina mai ai lea ia te outou” o le folafolaga lea a le Faaola (Mataio 7:7) O le mea lea fai fesili e oo atu i lou mafaufau a o e suesue, ona saili lea ma le filiga mo tali. I le Feagaiga Fou o le a e faitau ai e uiga i aafiaga mamana faaleagaga a soo o Iesu Keriso. I le avea ai o se soo faamaoni o le Faaola, e mafai ona i ai a oe lava aafiaga mamana faaleagaga pe a e taliaina le valaaulia a le Faaola, o loo maua i lenei voluma paia atoa, “Sau, mulimuli mai ia te au” (Luka 18:22)

Manatu mo Suesuega Faaletagata Lava Ia

Ina ia aoao moni mai le Faaola, e tatau ona ou taliaina Lana valaaulia, “Sau, mulimuli mai ia te au.”

O le valaaulia a le Faaola, Sau, mulimuli mai ia te au,” e faatatau i tagata uma---pe tatou te fou i luga o le ala o le avea ma soo pe na tatou savalia i o tatou olaga atoa. O Lana valaaulia lenei ise alii mauoa talavou o le sa taumafai e tausia poloaiga (tagai Mataio 19:16--22). O le mea na ia aoaoina---ma le mea e tatau ia i tatou uma ona aoaoina---o le avea ma se soo o le tuuina atu lea o o tatou agaga atoa i le Tama Faalelagi ma Iesu keriso. Tatou te agai i luma i lo tatou avea ai ma soo pe a tatou faailoa atu mea o loo tatou vaivai ai, suiga, ma saili ina ia atili atoatoa ona mulimuli ia te i Laua.

O le aoao mai le Faaola e amata pe a tatou taumafai ia malamalama i mea o loo Ia aoao mai. Mo se faataitaiga, e faapefea ona loloto lou malamalama i le faamagalo atu pe a e sue auiliiliina ma nei?

O aoaoga a le Faaola (tagai Mataio 6:14–15; 18:21–35)

O se faataitaiga mai Lona soifuaga (tagai Luka 23:33–34)

Peitai, e le atoatoa le aoaoina sei vagana ua tatou mulimuli i le Faaola e ala i le ola ai i mea sa Ia aoao mai. E mafai faapefea ona atili tele lo tatou faamagalo atu?

A e fia aoao atili, taumafai e fai le gaoioiga lenei i se tasi mataupu faavae o le talalelei e pei o le alofa po o le lotomaualalo.

Ua ia te au le tiutetauave mo lo’u lava aoaoina.

Na aoao mai Elder David A. Bednar: “I le avea ai o i tatou ma ni tagata e aoao, e tatau ia te oe ma a’u ona galulue e faatino ma avea ma e anaana i le upu ae le na ona faalogologo ae tau galueaiina e isi. Pe o oe ma a’u ea o ni sui o loo galulue e faatino ma saili e aoao e ala i le faatuatua, pe o ta faatalitali ea i isi e aoao ma galueaiina i taua?… “O se tagata aoao na te faaaogaina le saolotoga e ala i le galue e faatino e tusa ai ma mataupu faavae sao, e tatalaina lona loto i le Agaga Paia ma valaaulia Ana aoaoga, o le mana molimau, ma molimau faamaonia. O le aoao e ala i le faatuatua e manaomia ona tuu i ai le faaleagaga, o le mafaufau, ma le faaletino ae le tau lava ina talia.” (“Saili e Aoao e Ala i le Faatuatua,” Ensign, Sept. 2007, 64).

O le a le uiga o le tauaveina o le tiutetauave mo lou lava aoaoina? Tagi mo tali e fetaui i le saunoaga a Elder Bednar ma i mau nei: Ioane 7:17; 1 Tesalonia 5:21; Iakopo 1:5–6, 22; 2:17; 1 Nifae 10:17–19; 2 Nifae 4:15; Alema 32:27; and Mataupu Faavae ma Feagaiga 18:18; 58:26–28; 88:118. O le a le mea ua musuia oe e fai ina ia atili ai lou tinou i le aoaoina o le talalelei?

Ou te manaomia ona iloa le meamoni mo a’u lava ia.

Atonu e te iloaina tagata e foliga mai e le mamulu lava lo latou faatuatua, tusa lava po o le a le mea e tupu i o latou olaga. Atonu latou te faamanatu atua ia te oe taupou popoto e toalima i le faataoto a le Faaola (tagai Mataio 25:1--13). O le mea atonu e te le vaaia o a latou taumafaiga filiga e faamalolosia a latou molimau o le upumoni. E tatau ona tatou sailia uma ma le filiga e faamalolosia a tatou molimau, e pei ona sa aoaoina e taupou valelea, e le mafai ona tatou nonoina le liua mai se isi lava.

E faapefea ona tatou maua ma faafailele a tatou lava molimau? Tusi i lalo ou mafaufauga ma manatunatu loloto i mau nei: Luka 11:9–13; Ioane 5:39; Ioane 7:14–17; Galuega 17:10–12; 1 Korinito 2:9–11; ma le Alema 5:45–46. (Tagai foi “Testimony,” Gospel Topics, topics.lds.org.)

E tatau ona maua e i tatou taitoatasi se molimau mo i tatou lava

O le a se mea e tatau ona ou fai pe a i ai ni a’u fesili?

A o e sailia le malamalama faaleagaga, o le a oo atu fesili i lou mafaufau. O mataupu faavae nei e mafai ona fesoasoani ia te oe e taulima ai fesili i ni auala e fausia ai le faatuatua ma le molimau:

1. Saili le malamalama atili e ala i punaoa faalelagi ua filifilia. O le Atua o le punavai o upumoni uma, ma Na te faaalia mai upumoni e ala i le Agaga Paia, o tusitusiga paia, ma Ana perofeta ma aposetolo.

2. Faatino i le faatuatua. Afai e le vave ona maua mai tali, faalagolago o le a faaalia mai e le Alii ia tali pe a sa’o le taimi. A o le taimi lenei, ia ola pea i le upumoni ua e iloa.

3. Ia tausisia se vaaiga e faavavau Taumafai e vaai atu i mea e faapei ona silasila i ai le Alii, ae le pei ona vaai i ai le lalolagi. Iloilo au fesili i le matalalaga o le fuafuaga a le Tama Faalelagi mo le faaolataga.

Manatu mo le Suesuega Faaleaiga o Tusitusiga Paia ma Afiafi Faaleaiga

A o e faitauina faatasi ma lou aiga ia tusitusiga paia, e mafai e le Agaga ona fesoasoani ia e iloa pe o a mataupu faavae e faamamafa ma talanoaina ina ia mafai ai ona talafeauga ma manaoga o lou aiga. O ni nai fautuaga nei:

Mataio 13:1–23

O se tasi o auala sili e fesoasoani ai i lou aiga e sauniuni e aoao mai le Feagaiga Fou i lenei tausaga o le toe iloilo lea o le faataoto i le lulu saito. E ono fiafia lou aiga e vaavaai i ituaiga eseese o ogaeleele lata ane i lou fale ia iloa ai ituaiga o eleele o loo faamatala mai i le faataoto. O le a se mea e mafai ona tatou faia e faato’a ae se “eleele lelei” i o tatou aiga? Mataio 13:8

Kalatia 5:22–23; Filipi 4:8

Matou te fautua atu i matua ma fanau ina ia tuu atu le faamuamua aupito maualuga i tatalo faaleaiga, afiafi faaleaiga, suesuega ma aoaoga o le talalelei, ma gaoioiga lelei atoatoa faaleaiga. Peitai, tusa pe o le a le taua ma le talafeagai o isi faatonuga po o gaoioiga, e le tatau ona faatagaina e suitulaga i tiute ua faatonuina mai e le Atua, ia e na o matua ma aiga e mafai ona faatinoina lelei” (“Tusi mai le Au Peresitene Sili,” Liahona, Tes. 1999, 1).

O le amataga o le tausaga fou o se taimi lelei lea e faia ai se fonotaga faaleaiga e uiga i le faia o lo outou aiga ia atili ona taulai atu i le talalelei. O a manatu ua oo atu ia te oe a o e faitauina faamanuiaga ma fautuaga o i le Kalatia 5:22–23 ma le Filipi 4:8? Atonu e mafai ona e tusia ni pepa faataamilo i lo outou fale e faamanatu atu ai ia te outou lava a outou sini.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o le Suesuega Faaletagata Lava Ia

Vaavaai mo le aoaoga faavae. O se aoaoga faavae, o se upumoni faavavau e le masuia. Na tautino mai e Peresitene Boyd K. Packer e faapea “o le aoaoga faavae moni e malamalama i ai, e suia uiga ma amioga” (“Little Children,” Ensign, Nov. 1986, 17). A o e suesueina ma suesueina foi e lou aiga ia tusitusiga paia, vaavaai mo upumoni ia e mafai ona fesoasoani ia te oe e te ola atili ai faapei o le Faaola.

Malamalama o le Lalolagi, saunia e Brent Borup

Ua Toetu o Ia, saunia e Del Parson