21--27 Ianuari

Ioane 1

Ua Matou Maua le Mesia

A o e faitau ma manatunatu loloto i le Ioane 1, tusifaamaumau ni lagona uunai e te mauaina. O a savali ua e maua o le a sili ona taua ia te oe ma lou aiga? O a ni mea e mafai ona e faasoa i au vasega i le Lotu?

Tusifaamaumau Ou Lagona Uunai

Pe ua e mafaufau ea pe mata e te iloaina Iesu le Nasareta o le Alo o le Atua pe ana faapea e te ola i le taimi o Lana galuega i le olaga nei? E tele tausaga, sa faatalitali ai tagata faatuatua o Isaraelu, e aofia ai Aneterea, Peteru, Filipo, ma Natanielu, ma tatalo mo le afio mai o le Mesia folafolaina. Ina ua latou feiloai atu ia te Ia, na faapefea ona latou iloa o Ia o Le sa latou sailia? O le ala lava lea e tasi tatou te iloa uma ai le Faaola---e ala i le taliaina o le valaaulia e ‘omai i na matamata” mo outou lava (Ioane 1:39). Ua tatou faitau e uiga ia te Ia i tusitusiga paia. Ua tatou faalogo i Ana aoaoga faavae. Ua tatou matauina le ala sa Ia soifua ai. Ua tatou lagonaina Lona Agaga. I le gasologa, ua tatou iloa ai, e faapei ona iloa e Natanielu, e silafia e le Faaola i tatou ma e alofa ia te i tatou ma finagalo e tapena i tatou ia maua “mea silisili” (Ioane 1:50).

Manatu mo Suesuega Faaletagata Lava Ia o Tusitusiga Paia

O Le Evagelia a Ioane

O ai Ioane?

O Ioane o se soo o Ioane le Papatiso ma sa mulimuli ane avea ma se tasi o soo o Iesu Keriso ma se tasi o Ana Aposetolo e Toasefululua. Sa ia tusia le Evagelia a Ioane, le tele o tusi, ma le tusi o Faaaliga. I lana Evagelia, sa ia faasino ia te ia lava o le soo “ua alofaina e Iesu” ma le ‘tasi soo”(Ioane 13:23; 20:3). Sa matua malosi tele le faamaufaailoga a Ioane mo le folafolaina atu o le talalelei o lea na ia fesili ai ina ia nofo ai i le lalolagi seia aulia le Afio Mai Faalua o le Faaola ina ia ona aumaia agaga ia Keriso (tagai MF&F 7:1--6).

Tagai foi Bible Dictionary, “John” ma le “John, Gospel of.”

1 Ioane 1–5

O Iesu Keriso sa “faatasi ma le Atua i le amataga.”

Sa amata e Ioane lana Evagelia i le faamatalaina o le galuega sa faatino e Keriso a o le’i soifua mai o Ia. “Sa i le amataga … o le Lokou [Iesu Keriso] sa i le Atua.” O le a se mea ua e aoao mai fuaiupu 1--5 e uiga i le Faaola ma Lana galuega? E mafai ona e maua ni faamaninoga fesoasoani i le Faaliliuga a Iosefa Samita, Ioane 1:1–5 i le faaopoopoga i le Tusi Paia). A o amata ona e suesue i le soifuaga o le Faaola, aisea e taua ai le iloa e uiga i Lana galuega i le muai olaga?

Tagai foi “Jesus Christ Chosen as Savior,” Gospel Topics, topics.lds.org.

Ioane 1:1–18

Ua molimau atu soo o Iesu Keriso e uiga ia te Ia.

Sa musuia Ioane e saili le Faaola ona o le molimau a Ioane le Papatiso, o le sa tautino atu faapea na ‘auina mai o ia e molimau i … le Malamalama moni” (Ioane 1:8–9, 15–18). O Ioane lava ia sa tuuina atu foi lana molimau mamana i le soifuaga ma le misiona a le Faaola.

E ono malie le faia o se lisi o upumoni sa faaaofia ai e Ioane i lenei molimau tatala ia Keriso (fuaiupu 1–18; tagai foi Faaliliuga Iosefa Samita, Ioane 1:1–19 [i le faaopoopga o le Tusi Paia]). Aisea e te manatu ai na amata e Ioane lana Evagelia i nei upumoni? Mafaufau e tusi lau lava molimau ia Iesu Keriso---mata o le a se mea e te manao e faasoa? O a ni ou aafiaga na fesoasoani ia te oe e te iloa ai ma mulimuli i le Faaola? Faamata o ai e faamanuiaina pe a faalogo i lau molimau?

Ioane 1:12

O le a le uiga o le “avea ma atalii o le Atua”?

E ui o i tatou uma o atalii ma afafine agaga o le Atua, a tatou agasala ona faaesea lea pe vavaeese i tatou mai ia te Ia. Ua ofo mai e Iesu Keriso mo i tatou se ala e toe foi atu ai. E ala i Lana taulaga togiola ma lo tatou usiusitai i feagaiga o le talalelei, Na te “[tuuina mai ai ia te i tatou] le mana e toe avea ai i tatou o atalii [ma afafine] o le Atua”. Ua toefanauina i tatou ma ua toe faalelei ma lo tatou Tama, ua agavaa mo Lona tofi e faavavau ma suli o mea uma ua ia te Ia (tagai Roma 8:14–18; Iakopo 4:11).

Ioane 1:18

Pe ua vaai se tasi i le Atua?

O le Feagaiga Tuai o loo tusifaamaumau ai faataitaiga o tagata o e sa vaai i le Atua (tagai Kenese 32:30; Esoto 33:11; Isaia 6:5). Ae aisea la ua fai mai ai Ioane le Papatiso “e leai se tagata ua vaai i le Atua i soo se taimi”? O le Faaliliuga a Iosefa Samita o lenei fuaiupu (tagai Ioane 1:18, vaefaamatalaga c) ua faamanino mai ai e faaali mai le Atua le Tama i tagata, ma a Ia faaali mai, Na te molimau mai i Lona Alo. Mo se faataitaiga, ina ua faaali mai o Ia ia Iosefa Samita i le Vao Paia, na Ia tulei atu ia Iosefa, “O Lo’u Atalii Pele Lenei. Faalogo ia te Ia!” (Iosefa Samita—Talafaasolopito 1:17; tagai foi MFF 76:23). E tele isi taimi o loo tusifaamaumauina taimi na vaai ai tagata i le Atua le Tama i ni faaaliga (tagai Galuega 7:55–56; Faaaliga 4:2; 1 Nifae 1:8; MFF 137:1–3) pe faalogo foi i Lona siufofoga o molimau mai i Lona Alo (tagai Mataio 3:17; 17:5; 3 Nifae 11:6–7).

Ioane 1:19--23

O ai Elaia, ma o ai foi “lena perofeta”?

Sa taumanatunatu taitai Iutaia pe o Ioane le Papatiso sa faataunuuina le valoaga anamua e uiga i perofeta o le a i ai se aso e sau ai i tagata. Sa latou fesili ia te ia pe o ia o Elaia, lea i le faaEleni o se ta’uga o Elia, o le igoa o le perofeta sa valoia e toefuatai maia mea uma (tagai Malaki 4:5–6). Sa latou fesili foi ia te ia pe o ia o “lena perofeta,” lea e ono faasino i le “Perofeta” o loo ta’ua i le Teuteronome 18:15. Sa faamalamalama atu e Ioane e le o ia o se tasi o i latou na ae o ia o le perofeta lea na fai mai Isaia o le a teuteuina le ala mo le afio mai o le Alii (tagai Isaia 40:3).

Tagai foi i le Bible Dictionary, Elias.”

Manatu mo Suesuega Faaleaiga oTusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai ona fesoasoani le Agaga ia te oe ia iloa ai po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:

A o tatou suesueina mau, o le a tatou maua musumusuga mo o tatou olaga.

1 Ioane 4–10

E mafai faapefea ona e fesoasoani i lou aiga e vaai faalemafaufau i mea sa latou faitauina e uiga i le malamalama i nei fuaiupu? E mafai ona e tuu atu i tagata o le aiga e feauauai i le faamumuina o se moli i se potu pogisa ma faasoa mai pe o faapefea ona avea le Faaola ma malamalama i o latou olaga. A o e faitauina la le Ioane 1:4--10, e mafai e le aiga ona maua se malamalamaaga faaopoopo i le molimau a Ioane ia Iesu Keriso, o le Malamalama o le Lalolagi.

Ioane 1:35--46

Matau le molimau a Ioane le Papatiso i le fuaiupu 36. O a ni taunuuga o lana molimau? (tagai fuaiupu 35--46). O le a le mea ua aoao mai e lou aiga mai tagata o loo faamatala mai i nei fuaiupu e uiga i le ala e faasoa atu ai le talalelei?

Ioane 1:45-51

O le a le mea na fai e Natanielu na fesoasoani na te maua ai se molimau i le Faaola? Na faapefea ona tatou maua a tatou molimau?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Lo Tatou Aoao Atu

Faasoa atu lesona faatino Valaaulia tagata o le aiga e sue meafaitino e mafai ona latou maua e fesoasoani ia latou malamalama ai i mataupu faavae o loo maua i mau o loo outou faitauina o se aiga. Mo se faataitaiga, atonu latou te faaaogaina se moliga’o e fai ma Malamalama o Keriso (tagai Ioane 1:4).

Ua Foafoa e Ieova le Lalolagi, saunia e Walter Rane