Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí

Ko Hai ʻOku Fakataumuʻa Ki ai e Naunau Ko ʻEní?

Ko e naunau ko ʻení ʻoku fakataumuʻa ia ki he fakafoʻituituí mo e fāmili kotoa pē ʻi he Siasí. Naʻe fakataumuʻa ia ke tokoniʻi koe ke ke ako ki he ongoongoleleí—ʻiate koe pē pe fakataha mo ho fāmilí. Kapau kuo teʻeki ke ke ako maʻu pē ki he ongoongoleleí ʻi he kuohilí, ʻe ala tokoni ʻa e naunau ko ʻení ke ke kamata leva. Kapau kuó ke ʻosi ako maʻu pē ki he ongoongoleleí, ʻe ala tokoni ʻa e naunau ko ʻení ke ke maʻu ha ngaahi aʻusia ʻoku ʻuhingamālie angé.

Te u Fakaʻaongaʻi Fēfē ʻa e Naunau Ko ʻEní?

Fakaʻaongaʻi ʻa e naunau ko ʻení ʻi ha founga pē ʻe ala tokoni kiate koé. ʻE lava ke hoko ia ko haʻo fakahinohino pe maʻuʻanga tokoni ki hono ako fakataautaha mo fakafāmili e folofolá. Te ke lava foki ʻo fakaʻaongaʻi ia ki he efiafi fakafāmili ʻi ʻapí. ʻOku fakamamafaʻi ʻe he ngaahi fokotuʻutuʻú ha ngaahi tefitoʻi moʻoni mahuʻinga ʻi he Fuakava Foʻoú, fokotuʻu atu ha ngaahi fakakaukau mo e ʻekitivitī tokoni ki hono ako fakafoʻituituí mo fakafāmilí, pea fakaʻatā mo ha feituʻu ke lekooti ai e ngaahi ongo ʻokú ke maʻú.

Mahalo kuó ke ʻosi ako maʻu pē mo ho fāmilí ki he ongoongoleleí. Mahalo ʻoku ʻi ai hamou taumuʻa ke lau e Tohi ʻa Molomoná. Pe mahalo ʻokú ke lolotonga lau ha tohi folofola ʻe taha ki ha kalasi semineli pe ʻinisititiuti.ʻOku ʻikai fakataumuʻa ʻa e Haʻu, ʻo Muimui ʻIate Aú ke fetongi pe feʻauʻauhi mo e ʻū meʻa lelei ʻokú ke lolotonga fakahokó. ʻE lava ke ʻi ai ha ngaahi founga ke ke ako maʻu ai pē mei he Fuakava Foʻoú mo ke kei lava pē ʻo fakahoko hoʻo ngaahi ako folofola kehé. Hangē ko ʻení, te ke lava ʻo hokohoko atu hono lau e Tohi ʻa Molomoná ki hoʻo ako fakataautaha e folofolá pea lau ʻa e Fuakava Foʻoú mo ho fāmilí (pe ko hono liliu ki ha founga ʻe taha). Pe ko e lolotonga hoʻo lau e Fuakava Foʻoú, te ke lava ʻo fekumi ki ha ngaahi potufolofola ʻi he Tohi ʻa Molomoná ʻokú ne toe fakatōmamafa ʻa e meʻa ʻokú ke akó. Muimui ki he fakahinohino ʻa e Laumālié ke fakapapauʻi e founga te ke fakahoko ai hoʻo ako e folofola ʻa e ʻOtuá.

ʻOku Felāveʻi Fēfē ʻa e Naunau Ko ʻEní mo e Meʻa ʻOku Hoko ʻi he Siasí?

ʻOku fakamāʻopoʻopo ʻa e ngaahi fokotuʻutuʻu ʻi he nāunau ko ʻení ʻo fakatatau ki ha taimi tēpile laukonga fakauike. ʻOku muimui ʻa e ngaahi lēsoni ʻoku akoʻi ʻi he kalasi Palaimelí mo e Lautohi Faka-Sāpaté, ki he taimi tēpile tatau. Ke tokoniʻi hoʻo ngaahi feinga ke ako mo moʻui ʻaki e ongoongoleleí ʻi ʻapí, ʻe ʻoatu ʻe hoʻo kau faiakó ha ngaahi faingamālie ke ke vahevahe ai hoʻo ngaahi aʻusiá, fakakaukaú mo e ngaahi fehuʻi fekauʻaki mo e ngaahi potufolofola kuó ke ako he lolotonga ʻo e uiké.

ʻOku kau ʻi he Haʻu, ʻo Muimui ʻIate Au—Maʻá e Palaimelí mo e Haʻu, ʻo Muimui ʻIate Au—Maʻá e Lautohi Faka-Sāpaté, ha ngaahi fokotuʻutuʻu ki he uike kotoa pē ʻo e taʻú tuku kehe ʻa e ongo Sāpate ʻoku fai ai e konifelenisi lahí. ʻI he taimi ʻoku ʻikai ke fai ai e fakataha lotu angamaheni ʻa e Siasí koeʻuhí ko ha konifelenisi fakasiteiki pe ko ha toe ʻuhinga kehe, ʻoku fakaafeʻi koe ke ke hokohoko atu hono ako ʻa e Fuakava Foʻoú ʻi ʻapi. ʻE lava ke hiki fakalaka hoʻo ngaahi kalasi faka-Siasí mei he ʻū lēsoni ne ʻosi palaniʻi ki he ngaahi ʻaho ko iá pe ko hano fakatahaʻi ha ongo lēsoni ʻe ua, ke kei tonu pē hoʻo muimui ki he taimi tēpilé.

ʻOku Fie Maʻu Nai Ke u Muimui ki he Taimi Tēpilé?

ʻE tokoni atu ʻa e taimi tēpilé ke ke tulituli hake ki he naunau naʻe akoʻi he kalasi he Sāpaté, kae ʻoua naʻá ke ongoʻi haʻisia ki ai; ko e taimi tēpilé ko ha fakahinohino pē ia ke tokoniʻi koe ke taimi lelei hoʻo fokotuʻutuʻú. Ko e meʻa mahuʻingá ko hoʻo ako fakafoʻituitui mo fakafāmili ʻa e ongoongoleleí.