Dou Kakua ni Rere, mai vei Michael Malm

13–19 ni Maji

Maciu 11–12; Luke 11

“Au na Vakacegui Kemudou”

E vakatavulica o Peresitedi Dallin H. Oaks: “Na ivolanikalou, sa ikoya na ivakatakila ni gauna sa oti, ena sega ni rawa ni kilai vinaka ke sega ni dolavi na yalo ki na ivakatakila ni gauna oqo. … Na vulici ni ivolanikalou ena rawa kina vei ira na tagane kei na yalewa me ra ciqoma na ivakatakila” (“Scripture Reading and Revelation,” Ensign, Janu. 1995, 7).

Vola na Nomu Nanuma

Ena vuqa na sala, era sa vakalomaocaocataka na Farisi kei na vunivola na veiqaravi vei Jiova. Era dau vakabibitaka vakavuqa na lawa tudei me uabaleta na dina tawamudu. Na lawa me baleta na Siga ni Vakacecegu, ka kena ibalebale me dua na siga ni vakacegu, sa icolacola bibi sara vakaira.

Oti, sa qai lako mai o Jiova vakai Koya ki vei ira na Nona tamata. A vakavulica vei ira ni inaki dina ni lotu e sega ni kena tauyavutaki na icolacola ia me ra sereki mai kina. A vakatavulica o Koya ni sa solia vei keda na Kalou na ivakaro, ka oka kina na kena rokovi na Siga ni Vakacecegu, sega ni vakasaurarataki keda ia me vakalougatataki keda. Io, sa qiqo ka rabalailai na sala vua na Kalou, ia sa lako mai na Turaga me vakaraitaka ni sa sega ni dodonu me da lakova duadua. “Dou lako mai vei au,” a kaci o Koya. Na Nona veisureti, vei ira kece era vakila na “icolacola bibi” ena vuku ni cava ga, sa ikoya me da vauci keda Vua, ka me votai o Koya ena noda icolacola. Na Nona yalayala sa ikoya “Dou na kunea kina na vakacegu ni yalomudou.” Ni vakatauvatani ki na vei ka e rawa ni vakayacori—na sasaga mo colata duadua se na vakararavi ki na iwali vakatamata— “sa rawarawa na Nona ivua, ka mamada na [Nona] icolacola.” (Maciu 11:28–30.)

Vakasama Eso ni Vuli iVolanikalou ni Tamata Yadua

Maciu 11:28–30

Ena solia vei au na vakacegu o Jisu Karisito ni‘u sa vakararavi Vua.

Eda vakaicolacola kece—eso e yaco e vakavu mai na noda ivalavala ca kei na cala, eso e yaco baleta na nodra digidigi cala eso tale, ka so e sega ni cala nei dua ia e tiki ga ni bula e vuravura. Veitalia ga na vu ni noda bula dredre, e vakatakekere vei keda o Jisu me da lako yani Vua me rawa ni vukei keda ena noda colata na noda icolacola ka kunea na vakacegu (raica talega na Mosaia 24). E vakatavulica o Elder David A. Bednar, “Ni da vakayacora na veiyalayalati tabu ka maroroya eda sa taqara na noda ivua vua na Turaga o Jisu Karisito” (“Bear Up Their Burdens with Ease,” Liaona, Me 2014, 88). Ni tiko oqo ena nomu vakasama, vakasamataka vakatitobu na vei taro eso oqo me rawa ni da kila vinaka kina na vosa ni iVakabula mai na vei tikina oqo: E rawa vakacava me‘u vakaivuataka na noqu veiyalayalati ki vua kei na iVakabula?” Na cava e gadrevi me‘u vakayacora me‘u lako mai kina vei Karisito? Ena vakasama cava e rawarawa kina na ivua ni iVakabula ka mamada na Nona icolacola?

Na taro cava tale e votu mai vei iko nio wiliwili tiko? Volai ira, ka vakasaqara na isau ni taro ena macawa oqo ena ivolanikalou kei na nodra vosa na parofita. Ena rawa ni o kunea eso na nomu sau ni taro ena itukutuku nei Elder David A. Bednar ka tukuni tiko e cake.

Raica talega na John A. McCune, “Come Unto Christ—Living as Latter-day Saints,” Liaona, Me 2020, 36–38; Lawrence E. Corbridge, “The Way,” Liaona, Nove. 2008, 34–36.

O Ira na Tisaepeli era Kana Witi ena Siga ni Vakacecegu, mai vei James Tissot

Maciu 12:1–13

“Me caka na ka vinaka ena siga ni vakacecegu.”

Na nodra ivakavuvuli na Farisi e duidui mai na nona na iVakabula ena vuqa na sala, ia vakauasivi ena ivakarau me rokovi kina na Siga ni Vakacecegu. Nio wilika na Maciu 12:1–13, o na rairai vakasamataka se e salavata tiko kei na ivakavuvuli ni iVakabula na lomamu kei na nomu itovo. Mo vakayacora oqo, vakasamataka vakatitobu eso na itukutuku vakaoqo:

• “Au sa vinakata na yalololoma, ka segai na isoro” (tikina e 7; raica na Osea 6:6).

• “Ni sa Turaga talega ni siga ni Vakacecegu na luve ni tamata” (tikina e 8).

• “O koya gona oqo sa tara kina me caka na ka vinaka ena siga ni vakacecegu” (tikina e 12).

Ena veivakauqeti vakacava na ivakavuvuli oqo ni o torova yani na Siga ni Vakacecegu?

Raica talega na Marika 2:23–3:5; Ulutaga ni Kosipeli, “Sabbath Day,” topics.ChurchofJesusChrist.org.

Maciu 12:34–37; Luke 11:33–44

Na noqu vosa kei na ivalavala e vakavotukanataka na vei ka e tu e lomaqu.

E dua na nona veivakalewai levu na iVakabula me baleti ira na Farisi oya ni ra tovolea me ra rairai buladodonu ia e sega ni savasava na nodra inaki. Nio vulica na ivakaro ni iVakabula vei ira na Farisi ena Maciu 12:34–37 kei na Luke 11:33–44, vakasamataka vakatitobu na kedrau isema na yaloda kei na noda ivalavala. Na cava na ibalebale vei iko ni malanivosa “lololo vinaka ni lomana”? (Maciu 12:35) E vakadonuya se vakacacani keda vakacava na noda vosa? (raica na Maciu 12:37). Na cava beka na ibalebale ni matamu me “vinaka”? (Luke 11:34) Vakasamataka vakatitobu na sala me “rarama na yagomu taucoko” (Luke 11:36) ena kaukauwa ni iVakabula.

Raica talega na Alama 12:12-14; Vunau kei na Veiyalayalati 88:67–68.

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 11:28–30.Ena rawa nio raitayalotaka vakavuvale na ivakavuvuli ni iVakabula ena vei tikina oqo ena nodratou veitarataravitaka na dreti ni dua na ka bibi, me ratou cakava ga vakataki iratou e liu ka qai muri ena veivuke. Na cava eso na icolacola eda dreketa tu? Na cava na ibalebale me da vakataqara vei keda na ivua i Karisito? Na iyaloyalo e tiko ena mua ni ituvatuva oqo ena vukei iko mo vakamacalataka na cava na ivua.

Maciu 12:10–13.Nio wilika me baleta na nona vakabula o Jisu e dua na tamata ena Siga ni Vakacecegu, e rawa ni dou veitalanoataka vaka matavuvale na sala eda sa “vakataucokotaki” kina mai vua na iVakabula. E rawa vakacava me siga ni veivakabulai vei keda na Siga ni Vakacecegu?

Ena veivakauqeti ni nona ivakaraitaki na iVakabula ena vei tikina oqo, e rawa ni dou biuta vata e dua na tuvatuva ni sala eso mo dou rawa ni “caka vinaka kina ena siga ni vakacecegu” (tikina e 12). Raica me dou okata na madigi eso me dou qaravi ira kina na tamata. E rawa ni veivuke me maroroi na nomudou ituvatuva ka me qai dau raici lesu ena vei Sigatabu ka sa bera mai.

Luke 11:33–36.Vakasamataka vakatitobu na sala o na vakavulica kina na nomu matavuvale na ibalebale ni “rarama na yagomu taucoko” (tikina e 34, 36). Ena veivuke beka e dua na lesoni ivakaraitaki ni dua na iyaya? E rawa talega ni dou veitalanoataka na sala eso me kau mai kina na rarama ni iVakabula ki na noda bula, noda itikotiko, kei na vuravura. Me baleta na vakasama eso, raica na vidio “The Light That Shineth in Darkness,” ChurchofJesusChrist.org.

Luke 11:37–44.De vinaka me dou veitalanoataka vaka matavuvale na vei tikina oqo ni dou sava yaya ni kana vata tiko. E rawa ni dou veitalanoataka na vuna ena dua kina na vakasama sega ni vinaka kevaka me da savata ga na taudaku ni vei ka me vaka na veleti kei na bilo. Sa rawa mo qai semata oqo ki na gagadre me da yalododonu sega walega ena noda ivalavala e taudaku ia ena noda vakasama kei na lomada.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Serenilotu vakaturi: “Lawa ni Turaga,” Serenilotu, naba 69.

Vakatoroicaketaki ni Vuli ni Tamata Yadua

Mo vakaivakarau. Ena yaco ena so na siga me na dredre se sega soti ni bibi na vulici ni ivolanikalou mai na kena o nuitaka tiko. Kakua ni guce! E vakatavulica o Elder David A. Bednar taught, “Na noda vakaivakarautaka tiko na vakayacori ni vei ka lalai ena rawa ni mua yani ki na vei ka bibi vakayalo” (“More Diligent and Concerned at Home,” Liaona, Nove. 2009, 20).

“Vakataqara vei kemudou na noqu ivua, ka vuli vei au, niu sa yalomalua ka yalomalumalumu: dou na kunea kina na vakacegu ni yalomudou” (Maciu 11:29). iTaba © iStockphoto.com/wbritten