E tucake tu o Jisu ena loma ni o

Mo Kakua ni Rere, mai vei Michael Malm

13–19 ni Maji

Maciu 11–12; Luke 11

“Au na Vakacegui Kemudou”

Na vakasama ni veivakavulici eso ena ituvatuva oqo sa nakiti me vakauqeta na nomu bulika vakai iko. Vagalalataki iko ena kena vakayagataki me sotava tu na gagadre ni gone eso o vakavulica.

ivakatakilakila ni veiwasei

Sureta na Veiwasei

Vakauqeta na gone me ra wasea na ka era rawa ni cakava me qaravi kina na Turaga ena Siga ni Vakacecegu.

vakatakilakila ni veivakavulici

Vakavulica na iVunau: Gone Sobu

Maciu 11:28–30

Ena vukei au o Jisu ni’u lako mai vei Koya.

E rawa ni vakacegui na gone ni ra kila tu ni na vukei ira o Jisu ena nodra icolacola ni ra lako mai vei Koya.

iTaviqaravi e Rawa ni Caka

• Wilika na Maciu 11:28–30, ka vakaraitaka na yaloyalo ni bulumakau vakaivuataki ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Kerea na gone me ra dusia na bulumakau kei na ivua. Vakamacalataka ni rau rawa ni dreta na bulumakau vakaivuataki vata na icolacola bibi sara mai na dua ga vakai koya. Vakadinadinataka ni gauna eda rarawa, lomaleqa, se rere kina, sa rawa ni da vakasaqarai Jisu ka na vukei keda o Koya.

• Kerea e dua na gone me laveta e dua na ka bibi. Ni sa sotavi dredre tu, dolele mo veivuke. E vukei keda vakacava o Jisu me da cakava na veika dredre? Wasea e dua na gauna o vakila kina ni a vukei iko o Jisu mo cakava e dua na ka dredre, ka kerea na gone me ra wasea na veika era dui sotava.

Maciu 12:1–13

Au rawa ni vakatabuya na Siga ni Vakacecegu.

Na cava eso na sala lasa o rawa ni vakavulica kina na gone me baleta na Siga ni Vakacecegu kei na vuna eda vakatabuya kina?

iTaviqaravi e Rawa ni Caka

• Wilika na Maciu 12:10–13 i cake. Sureta na gone me ra tucake ka dabe tale ena veigauna o cavuta kina na “Siga ni Vakacecegu,” ka tokaruataka vata kei ira na malanivosa “sa [dodonu] sara me da caka vinaka ena siga ni vakacecegu” (Maciu 12:12). Na cava era nanuma ni kena ibalebale oya?

• Vakaraitaka e dua na volanivula vei ira na gone, ka vakatakilakilataka vei ira na Siga ni Vakacecegu. Na cava eda cakava tu ena vo ni siga ni macawa? Na cava eda rawa ni cakava ena Siga ni Vakacecegu me duatani kina mai na veisiga tale eso? (raica na Aisea 58:13–14).

• Kerea na gone me ra droinitaka na ka vinaka eso era rawa ni cakava ena Siga ni Vakacecegu (raica na tabana ni taviqaravi ena macawa oqo).

• Sureta na gone me ra caka vukivuki eso ena vukei ira ni nanuma na sala eda dau vakavakarau kina ki na Siga ni Vakacecegu ni ra lagata na sere “Vakarauwai” (iVolanisere ni Gonelalai, 105).

• Droinitaka na mata, daliga, gusu, kei na liga ena papa ni volavola. Kerea na gone me ra tukuna vei iko na cava e rawa ni cakava na veitiki yadua ni yagoda oqo me vakatabui kina na Siga ni Vakacecegu.

Luke 11:11–13

Sa solia vei keda na Tamada Vakalomalagi na isolisoli vinaka.

Na ivakavuvuli ni iVakabula ena Luke 11:11–13 sa rawa ni vukea na gone o vakavulica me ra kila matua ni sa lomani ira na Tamada Vakalomalagi ka vinakata tu me vakalougatataki ira.

iTaviqaravi e Rawa ni Caka

• Vakayagataka e dua na vakatakarakara ni lesoni me vakatakila na ivakavuvuli ni iVakabula ena Luke 11:11–13. Me ivakaraitaki, o rawa ni biuta na vatu ena loma ni dua na kato ni madrai se biuta na yaloyalo ni batibasaga ena loma ni dua na kateni yaloka. Kerea na gone me ra vakilakila na ka e tiko e loma, ka qai vakaraitaka vei ira. Sureta me ra sosomitaka na vatu se yaloyalo kei na dua na tiki ni madrai se yaloka. Wilika na Luke 11:11–13, ka wasea na nomu ivakadinadina ni sa lomani keda na Tamada Vakalomalagi, dau sauma na noda masu, ka vakalougatataki keda vakavuqa ena Nona Yalotabu.

• Lagata vata e dua na sere ni loloma ni Kalou, vaka na “Rogoca na Sere ni Manumanu” (iVolanisere ni Gonelalai, 16). Na cava so na isolisoli vinaka sa solia tu vei keda o Koya? Kerea na gone me ra droinitaka na yaloyalo ni veivakalougatataki eso mai vua na Tamada Vakalomalagi era sa vakavinavinakataka.

vakatakilakila ni veivakavulici

Vakavulica na Vunau: Gone Qase Cake

Maciu 11:28–30

Ena vukei au o Jisu ni’u lako mai vei Koya.

O na vukea vakacava na gone me ra kila matua ni na vakacegui ira na iVakabula mai na nodra bolebole eso ni ra lako mai vei Koya?

iTaviqaravi e Rawa ni Caka

• Sureta na gone me ra wasea e dua na gauna era a lomaleqa se nuiqawaqawa kina ena dua na ka. Sureta me ra qara vakasala ena Maciu 11:28–30 e rawa ni vukei ira ena veigauna vakaoya. E dau “vakacegui [keda]” vakacava na iVakabula? (tikina e 28).

• Sureta na gone me ra droinitaka na yaloyalo ni ka eso era sa cakava tiko me ra lako mai kina vei Jisu ka vuli Vua.

• Vukea na gone me ra cavuqaqataka nai kava ni yavu ni vakabauta. Veitalanoataka vata kei ira na sala e sa vukei keda vakayadua kina na matai ni vakavuvuli kei na cakacaka vakalotu ni kosipeli ni vakadonuya na veisureti i Jisu, “Dou lako mai vei au” (Maciu 11:28).

Maciu 12:1–13

Na Siga ni Vakacecegu sa siga ni cakavinaka e vakavolekataki au tu kivua na Kalou.

Era na vaqaqacotaki na gone o vakavulica ni o vakabibitaka na inaki kei na veivakalougatataki eso ni kena rokovi na Siga ni Vakacecegu.

iTaviqaravi e Rawa ni Caka

• Sureta e dua na gone me matanataka na tamata ka a vakabula na ligana na iVakabula (raica na Maciu 12:10–13). E rawa ni vakatarogi koya e dua tale na gone ena ka e vakila.

• Wilika vata na Maciu 12:12. Na cava so na ka vinaka eda rawa ni cakava ena Siga ni Vakacecegu? Me ra droinitaka na gone na nodra nanuma ena tabana ni taviqaravi ena macawa oqo, kotiva na tikina eso, ka veivukevuke ena vakasotari vata ni veitikina yadua.

• Vunitaka e vica na yaloyalo ni tamata e cakava tiko eso na ka e vakaraitaka na nodra lomana na Tamada Vakalomalagi ena Siga ni Vakacecegu. Kerea na gone me ra vakaraica na yaloyalo ka wasea se dau vakaraitaka vakacava na noda lomana na Kalou na vakayacori ni ka eso ena yaloyalo.

era raici ira sobu na tisaipeli na tamata ni ra lako curuma tu na loga ni witi

Era Kana Witi na Tisaipeli ena Siga ni Vakacecegu, mai vei James Tissot

Luke 11:37–42

Sa dodonu me savavuka ruarua na noqu ivalavala kei na yaloqu.

A vakatavulica na iVakabula ni sa sega ni rauta meda rairai dodonu tu vei ira na tani. Sa dodonu me savavuka talega na noda vakasama, nanuma, kei na ivalavala vuni eso.

iTaviqaravi e Rawa ni Caka

• Me vakatakilai na ka e vakavulica na veitikina oqo, vakaraitaka vei ira na gone na bilo se itawatawa tale eso e savasava tu e taudaku ka duka tu e loma. Vukea me ra vakasamataka na cava e rawa ni matataka na “taudaku ni bilo.”. Na cava e matataka na “tikina e loma”? Cava na vuna e bibi me vakasavasavataki ruarua kina na taudaku kei na lomana?

• Wilika vata na ivolanikalou tale eso e vakabibitaka na buladodonu ni lomada kei na noda ivalavala—me ivakaraitaki, Same 24:3–5; Maciu 15:7–8; Moronai 7:6–9. Veivosakitaka na vuna e vinakata kina na iVakabula me savasava vakayalo tu na yaloda kei na noda valavala vuni.

Vakauqeta na Vuli e Vale

Sureta na gone me ra wasea ki na nodra matavuvale na vakasama eso me vakatabui kina na Siga ni Vakacecegu.

Vakatorocaketaki Noda Veivakavulici

Tarogi taro eso. “Na taro e sureti ira na dauvuli ni tukuna e dua na ivakavuvuli ni kosipeli ena nodra vosa vakai ira—vakauasivi ke tarogi ena itekivu ni kalasi—sa rawa ni vukei iko ni kila na levu ni gauna o gadreva mo vakayagataka ena vulici ni vakavuvuli oya ena kalasi” (Veivakavulici ena iVakarau ni Vakabula, 32).

tabana ni itaviqaravi: au na vakatabuya na Siga ni Vakacecegu