Tabaki Pita o Jisu

6–12 ni Maji

Maciu 9–10; Marika 5; Luke 9

“Sa Talai Ira na Lewe Tinikarua Oqo ko Jisu”

Ni o wilika na Maciu 9–10; Marika 5; kei na Luke 9, sa rawa mo ciqoma na veivakauqeti ni Yalo Tabu. Na veivakauqeti oqo, vata kei na Lako Mai, Mo Muri Au—Me Baleti Ira na Tamata Yadua kei na Matavuvale kei na ituvatuva oqo, e rawa ni vukei iko mo vakavakarau mo veivakavulici.

ivakatakilakila ni veiwasei

Sureta na Veiwasei

Sureti ira na gone me ra wasea e dua na ka era a kitaka me vukea kina e dua ena macawa oqo. Na cava e a cakava na iVakabula me vukei ira kina na tani?

ivakatakilakila ni veivakavulici

Vakavulica na iVunau: Gone Sobu

Maciu 9:18–30; Marika 5:22–43

O Jisu e tu vua na kaukauwa me vakabulai au.

A vakaraitaka vakawasoma na iVakabula na Nona kaukauwa me vakabulai ira era vakabauti Koya. E rawa ni o vukei ira na gone o vakavulica me ra tara cake nodra vakabauta na Nona kaukauwa veivakabulai.

iTaviqaravi e Rawa ni Caka

• Tukuna vei ira na gone na italanoa ni luvei Jairo yalewa (raica na Marika 5:22–23, 35–43). Ena tikina veiganiti ena italanoa, wilika na vosa i Jisu “Au sa kaya vei iko, tucake mai” (tikina e 41), ka sureti ira na gone me ra tucake. Vukei ira na gone me ra kila ni o Jisu e tu vua na kaukauwa me vakabulai ira na tamata ka solia vei keda na bula tawamudu.

• Vakaraitaka e dua na iyaloyalo ni itukutuku ena Maciu 9:20–22 ni o wilika na veitikina oqo. Vukei ira na gone me ra cavuqaqataka na malanivosa “Sa vakabulai iko na nomu vakabauta” (tikina e 22). Me caka oqo, sa rawa mo lesia vei ira yadua na gone e dua na vosa, me ra qai cavuta na gone na nodra vosa ena kena veitaravi dodonu vakavica vata. A vakaraitaka vakacava na marama oqo ni vakabauti Jisu Karisito? Na cava eda rawa ni cakava me vakaraitaka ni da sa vakabauti Karisito?

• Kerei ira na gone me ra bobo ka vakarorogo ni o wilika na Maciu 9:27–30. Ni o wilika na nona vakabulai ira na tamata mataboko o Jisu, sureti ira na gone me ra rai. Sureti ira na gone me ra tukuna na veika era na vakila ke a vakabulai ira o Jisu.

• Vakayagataka na tabana ni itaviqaravi ena macawa oqo me vukei ira na gone me ra vulica na italanoa ni iVakabula ni vakaturicaketaki luvei Jairo yalewa mai na mate.

na yalewa ni tara na icurucuru balavu i Jisu

Vakararavi Vua na Turaga, mai vei Liz Lemon Swindle

Maciu 10:1–10

A kaciva o Jisu e Tinikarua na iApositolo ka solia vei ira na kaukauwa me ra cakava na Nona cakacaka.

Era kila tiko beka na gone o vakavulica ni tiko e tinikarua na noda iApositolo nikua? O na vakayagataka vakacava na veitikina oqo mo vakavulici ira kina me baleta na bibi ni Apositolo ni gauna oqo kei na ka era sa kacivi me ra cakava?

iTaviqaravi e Rawa ni Caka

• Vakalekalekataka na Maciu 10:1–10 ena vosa rawarawa. Vakamacalataka ni kacivi ira na iApositolo o Jisu me ra vukei Koya ena tarai cake ni Nona Lotu. Me ra wilika na gone na kedratou i wiliwili na iApositolo ena iyaloyalo Sa Tabaki Ira na iApositolo na Karisito (iVola ni iYaloyalo Vakosipeli, naba 38) kei na dua na iyaloyalo ni Kuoramu ni iApositolo Le Tinikarua ena gauna oqo (raica na ChurchofJesusChrist.org se dua na ilavelave ni Liaona ni koniferedi raraba). Vakamacalataka ni tiko e tinikarua na noda iApositolo nikua, me vaka ga na gauna nei Jisu. Wasea na nomu ivakadinadina me baleti ira na iApositolo ni Turaga kei na dua na ka era sa vakavulica wale toka ga oqo.

• Vunia wavoki ena rumu na kedra iyaloyalo na iApositolo ni gauna oqo (e rawa ni o raica na kedra iyaloyalo ena dua na ilavelave ni Liaona ni koniferedi raraba walega oqo). Sureti ira na gone me ra vaqara na iyaloyalo, ka tukuna vei ira vakalailai me baleta na iApositolo yadua (raica na “Meet Today’s Prophets and Apostles” ena ChurchofJesusChrist.org).

• Sureta e dua na gone me taura cake e dua na iyaloyalo ni Mataveiliutaki Taumada kei na dua na iyaloyalo ni Kuoramu ni iApositolo Le Tinikarua. Kerei koya me liutaki ira na vo ni gone wavokita na rumu ki na dua na iyaloyalo kei Jisu. Vakadinadinataka ni ra sa liutaki keda vei Jisu Karisito na parofita kei na iapositolo.

ivakatakilakila ni veivakavulici

Vakavulica na iVunau: Gone Qase Cake

Maciu 9:18–30; Marika 5:22–43

O Jisu e tu vua na kaukauwa me vakabulai au.

Na wiliki ni itukutuku ni veivakabulai ni iVakabula e rawa ni vukei ira na gone o vakavulica me ra tara cake nodra vakabauti Koya. Na itukutuku oqo e rawa talega ni vukei ira me ra vakila na Nona yalololoma kei na loloma.

iTaviqaravi e Rawa ni Caka

• Wilika vata na italanoa ni nona vakabulai ira na tamata o Jisu ena Maciu 9:20–22, 27–30 kei na Marika 5:22–23, 35–43 (se vakaraitaka na vidio “Jesus Heals a Woman of Faith” kei na “Jesus Raises the Daughter of Jairus” ena ChurchofJesusChrist.org). Era a vakaraitaka vakacava na tamata ena italanoa oqo na nodra vakabauti Jisu Karisito? Na cava eda vulica baleta na iVakabula mai na veitikina oqo?

• Sureti ira na gone me ra wasea na veika era sotava se dua era kila a ciqoma e dua na veivakalougatataki ni matabete. Era a vakabulai se vakalougatataki vakacava? Vakamacalataka ni so na gauna e sega ni nona lewa na Turaga na veivakabulai mana, ia e rawa ni da vakalougatataki tikoga ena Nona loloma kei na vakacegu.

Maciu 10:1–10

Era rawa ni vakavulici au na iApositolo Le Tinikarua me baleti Jisu.

Ena veivuke vakacava na vulici ni iApositolo Le Tinikarua ena gauna i Jisu mera kila vakavinaka cake kina na gone na veika era cakava na iApositolo Le Tinikarua nikua?

iTaviqaravi e Rawa ni Caka

• Vakaraitaka na kedra iyaloyalo na iApositolo ena gauna i Jisu kei na noda gauna (raica na Sa Tabaki Ira na iApositolo na Karisito [iVola ni iYaloyalo Vakosipeli, naba 38] kei na dua na ilavelave ni koniferedi walega oqo ni Liaona). Kerei ira na gone me ra wilika na Maciu 10:7 me ra kila na ka era dau cakava na iApositolo (raica talega na Luke 9:1–2, 6; Vunau kei na Veiyalayalati 107:23).

• Sureti ira na gone me ra vola ena papa ni volavola na yacadra kece sara na iApositolo taumada me vaka era nanuma rawa. Qai kerei ira me ra vola na levu ga ni iApositolo bula era rawa ni nanuma. Me ra dikeva na nodra lisi kei na Maciu 10:2–4 kei na dua na ilavelave ni koniferedi wale tikoga oqo ni Liaona. E rawa talega ni o qitora e dua na qito ni veivakasotari me ra vakasotara kina na gone na yaca yadua ni iApositolo bula kei na kena iyaloyalo. E rawa ni kune na iyaloyalo eso ena ChurchofJesusChrist.org.

• Ni vo e vica na siga ni bera na kalasi, sureta e vica na gone mera vakavakarau mai mera mai wasea e dua na italanoa a tukuna e dua vei ira na iApositolo bula (raica na ilavelave eso ni Liaona me baleta na vakasama eso). A vakayagataka vakacava na iApositolo oya nona italanoa me vakauqeti keda me da vakataka cake na iVakabula?

• Wasea vei ira na gone e vica na ivakaraitaki ni nodra vakadinadinataki Karisito na iApositolo ni gauna oqo (raica na itukutuku ni koniferedi raraba se na “Se Bula na Karisito: Nodra iVakadinadina na iApositolo” [ChurchofJesusChrist.org]).

• Vukei ira na gone me ra cavuqaqataka ka kila na Yavu ni Vakabauta 1:6.

Luke 9:23–25

Na muri Jisu Karisito e gadrevi kina na solibula.

O na vukei ira vakacava na gone me ra kila na ibalebale ni “vakayalia” na nodra bula ni ra muria na iVakabula?

iTaviqaravi e Rawa ni Caka

• Tukuna vei ira na gone me baleta e dua na gauna o a solia tani kina e dua na ka me rawa ni o rawata kina e dua na ka vinaka cake. Sureti ira na gone me ra wasea nodra ivakaraitaki eso vakai ira. Qai wilika vata na Luke 9:23–25. Vakamacalataka ni vinakata o Jisu me da makutu me da solia tani na veika kecega me da muri Koya. E dina ni na sega beka ni kerei keda meda solia vakaidina na noda bula, na cava e kerea o Koya meda solia? (raica na Josefa Simici iVakadewa, Maciu 16:26 [ena Maciu 16:24, ivakamacala e ra e]).

• Vola e vica na itovonibula Vakarisito ena tikitiki ni pepa eso kei na kena veibasai ena veitiki ni pepa tale eso (me vaka na loloma kei na kocokoco, yalomalumalumu kei na dokadoka, kei na so tale). Vola na vosa maroroya kei na vakayalia vaka iulutaga ena papa ni volavola, ka sureti ira na gone me ra tuva na vei itovonibula ena ruku ni ulutaga veiganiti. Solia vei ira na gone na gauna me ra vakasamataka vakatitobu na itovonibula Vakarisito eso ena papa ka digitaka e dua me ra vakatorocaketaka.

ivakatakilakila ni vuli

Vakauqeta na Vuli e Vale

Sureti ira na gone me ra vakayagataka na itaviqaravi ni macawa oqo me ra vakavulica na nodra matavuvale me baleti Jisu ni vakabula na luvei Jairo yalewa.

Vakatorocaketaki Noda Veivakavulici

Vakauqeta na vakarokoroko Vukei ira na gone me ra kila ni sa dua na tiki bibi ni vakarokoroko oya na vakananumi ni Tamada Vakalomalagi kei Jisu Karisito. E rawa ni o vakananuma vei ira na gone na vakarokoroko ena nomu lagata malua se vagugutaka voli e dua na sere se vakaraitaka toka e dua na iyaloyalo kei Jisu.

tabana ni itaviqaravi: sa tu vei Jisu na kaukauwa me vakayacora na cakamana e vakalougatataki au