27 ni Feperueri–5 ni Maji

Maciu 8; Marika 2–4; Luke 7

“Sa Vakabulai Iko na Nomu Vakabauta”

Ni o wilika na Maciu 8; Marika 2–4; kei na Luke 7 ena macawa oqo, vakasamataki ira na gone o vakavulica. Masuta me na vakauqeti iko na Yalo Tabu ena vakasama eso ka na vukei ira mera kunea na dina ena veiwase oqo.

Sureta na Veiwasei

Kerei ira na gone me ra wasea e dua na italanoa kei Jisu ni cakamana voli (raica na ituvatuva ni cakamana ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale). E rawa talega ni o vakaraitaka na iyaloyalo veisemati eso (me vaka na iVola ni iYaloyalo Vakosipeli, naba 40).

Vakavulica na iVunau: Gone Sobu

Maciu 8; Marika 2–3; Luke 7

E tu vei Jisu na kaukauwa me cakamana.

Ni o wilika na cakamana ni veivakabulai ni iVakabula, vakananuma vakatitobu na cakamana cava mo wasea. O na vukei ira vakacava na gone o vakavulica me ra kila na itavi ni vakabauta ena cakamana i Jisu?

iTaviqaravi e Rawa ni Caka

• Wasea na italanoa ni tamata tauvi paralasi ena Marika 2:1–12. Me veivuke, raica na “Wase e 23: Na Tamata Ka Sega ni Lako Rawa Tu” (e Na iTukuni ena Veiyalayalati Vou, 57–58, se na kena vidio ena ChurchofJesusChrist.org). Tukuna vei ira na gone ni tamata ka tauvi paralasi a sega ni rawa ni lako. Vukei ira me ra kila ni a vakabulai na tamata oqo mai vua na iVakabula.

• Sureti ira na gone me ra tukuna mada e dua na gauna era a tauvimate kina. Tukuna e dua na itukutuku ni nona vakabulai ira na tauvimate o Jisu, me vaka na Maciu 8:1–4, 5–13, 14–15; Marika 3:1–5; Luke 7:11–16. Sureti ira na gone me ra talanoataka tale na italanoa ena nodra vosa ga. Vakadinadinataka ni kaukauwa i Jisu e rawa ni vakabulai, vakalougatataki, ka vakacegui keda.

Maciu 8; Marika 2–3; Luke 7

Au rawa ni lomani ira na tani me vakataki Jisu.

A vakaraitaka na loloma cecere o Jisu ni vakabulai ira na tauvimate kei na vakaleqai tu. Vakananuma titobu na sala o rawa ni vakavulici ira kina na gone me ra yalololoma vei ira na tamata vakaleqai tu.

iTaviqaravi e Rawa ni Caka

• Digitaka e dua se sivia na itukutuku kei Jisu ni vakaraitaka tiko na loloma vua e dua e vakaleqai tu, me vakataka na kena ena Maciu 8:1–4, 5–13, 14–15; Marika 2:1–12; 3:1–5; Luke 7:11–16. (Raica talega na vidio “Widow of Nain” ena ChurchofJesusChrist.org.) Wasea e dua na gauna a lomani iko kina e dua ena gauna ni leqa kei na veika o a vakila. Sureti ira na gone mera wasea na veika era dui sotava.

• Vakaraitaka na vidio “Gordon Hinckley: Lessons I Learned as a Boy” se “The Coat” (ChurchofJesusChrist.org). Era a muria vakacava na ivakaraitaki i Jisu na gone ena vidio oqo? Sureti ira na gone me ra wasea na ituvaki tale eso a vakaleqai tu kina e dua. Na cava eda rawa ni cakava meda vukei ira kina?

• Lagata e dua na sere me baleta na loloma kei na yalovinaka, me vaka na “Me Tekivu Vei Au” (iVolanisere ni Gonelalai, 83).

Mai na Rere ki na Vakabauta, mai vei Howard Lyon

Marika 4:35–41

Ni’u rere se tu ena dua na ituvaki rerevaki, e rawa ni vukei au o Jisu meu loma vakacegu.

Na italanoa kei Jisu ni vakarota na cava e rawa ni vukei ira na gone me ra kila ni rawa ni solia vei ira o Koya na vakacegu ena gauna era loma rere kina.

iTaviqaravi e Rawa ni Caka

• Vukei ira na gone me ra raitayaloyalotaka ni ra vodo tiko ena waqa ni o wilika na Marika 4:35–41. (Raica talega na “Wase e 21: Vakarota o Jisu na Cagi kei na Ua,” e Na iTukuni ena Veiyalayalati Vou, 53, se na kena vidio ena ChurchofJesusChrist.org.) Kerei ira na gone me ra vakamacalataka se na vakaevei tu na ituvaki ni lomadra ke ra a tiko e kea. Na gauna cava beka era a rere kina na gone? Era a kune vakacegu beka vakacava?

• Sureti ira na gone me ra cakava na rorogo ni cava ka cegu ni dua e kaya mai “Mo cegu, mo maravu mai.” Vakadinadinataka me vaka ga na nona rawa ni solia vei keda na vakacegu o Jisu ni liwa tiko na cava e tautuba, sa rawa Vua me vakaceguya na yaloda ni da yaloca e loma.

• Vakavulica vei ira na gone na ivukivuki me salavata kei na ikatolu ni tikina ni “Tukuni Jisu Mai Vei Au” (iVolanisere ni Gonelalai, 45), ka lagata vata na qaqana ni o cakava tiko na ivukivuki.

Vakavulica na iVunau: Gone Qase Cake

Maciu 8; Marika 2–3; Luke 7

E rawa ni cakamana ki na noqu bula o Jisu ni’u vakabauti Koya.

A cakava e levu na cakamana o Jisu ena Nona gauna ni veiqaravi ena bula oqo. O na vukei ira vakacava na gone me ra kila ni yaco tiko nikua na cakamana?

iTaviqaravi e Rawa ni Caka

• Kerei ira na gone me ra digitaka e dua vei ira na cakamana oqo me ra wilika ka droinitaka: Maciu 8:1–4, 5–13, 14–15; Marika 2:1–12; 3:1–5; Luke 7:11–16. Sureti ira na gone me ra vakamacalataka na nodra droini ki na kalasi. Na cava eda vulica baleti Jisu mai na italanoa eso oqo?

• Kerei ira na gone me ra matanataka na ivakarau ni lomadra ni ra tauvimate, rarawa, rere, se lomaleqa. Ena vukei keda vakacava o Jisu ni vaka tu oqo na lomada? Vakadinadinataka ni rawa ni vukei ira na gone o Jisu ena veituvaki kece vakaoqo.

• Sureti ira na gone me ra wasea na veika era sotava ni o ira se dua era kila a ciqoma na veivakalougatataki ni matabete. A vakabulai se vakalougatataki vakacava na tamata oya?

Marika 2:15–17; Luke 7:36–50

E lomani keda o Jisu ena gauna mada ga eda ivalavala ca kina ka vinakata me vukei keda meda veivutuni.

Na itukutuku ena Marika 2:15–17 kei na Luke 7:36–50 e rawa ni vukei ira na gone me ra kila ni lomani keda o Jisu Karisito ena gauna mada ga eda ivalavala ca kina. E vinakata o Koya me vukei keda meda veivutuni ka toro voleka yani Vua.

iTaviqaravi e Rawa ni Caka

• Vola Na cava e nanuma o Jisu me baleta na ivalavala ca? kei Na cava e vakila o Jisu me baleti keda ni da ivalavala ca? ena papa ni volavola. Kerei ira na gone me ra vakasamataka na veitaro oqo ni ra wilika vata na Marika 2:15–17 ka qai wasea na nodra isau ni taro. (Sa rawa mo ni wilika vata na “Daukumuni Vakacavacava” ena iDusidusi ki na iVolanikalou [scriptures.ChurchofJesusChrist.org].) Na cava e bibi kina meda kila ni lomani keda tu o Jisu, dina ga ni da sega ni vinaka sara? Ena vukei keda vakacava na noda kila na ka oqo ni da sa gadreva meda veivutuni?

• Ni vo e vica na siga ni bera na kalasi, sureta e dua vei ira na gone kei na dua na lewe ni matavuvale me rau vakavakarau mai ki na kalasi me mai wasea na itukutuku ena Luke 7:36–50. Sa rawa me rau droinitaka na iyaloyalo eso e tukuna tiko na tiki ni italanoa eso me vakaraitaki ki na kalasi. Veivosakitaka vata kei ira na gone na cava ena vinakata beka na Turaga meda vulica mai na italanoa oqo.

Marika 4:35–41

Ni’u rere se tu ena dua na ituvaki rerevaki, e rawa ni vukei au o Jisu meu loma vakacegu.

Era gadreva ni kila na gone ni rawa ni solia vei ira na vakacegu na iVakabula ni ra sotava na cava ni bula—ena gauna oqo kei na veisiga ni mataka.

iTaviqaravi e Rawa ni Caka

• Kerea e dua vei ira na gone me vakayagataka na Marika 4:35–41 kei na iyaloyalo Sa Vunauca na Cava o Jisu (iVola ni iYaloyalo Vakosipeli, naba 40) me tukuna kina na italanoa kei Jisu ni vakarota tiko na cava. Kerei ira na gone me ra vakamacalataka se na vakaevei tu na ituvaki ni lomadra ke ra a tiko e kea.

• Sureti ira na gone me ra wasea na veika era sotava ni ra sa vakacegui ni oti na masulaki ni veivuke. Vakananuma vei ira ni vakacegu oqori sa vu mai vua na iVakabula.

• Solia vei ira yadua na gone e dua na pepa o ni uca, ka kerei ira me ra vola kina e dua na veivakatovolei ena sotava tiko beka e dua. Biuta taucoko na o ena papa ni volavola, me robota e dua na iyaloyalo ni iVakabula. Sureta e dua na gone me kauta tani e dua vei ira na o ka vakatura na sala eso eda rawa ni vukea kina e dua ena veivakatovolei oya me kune vakacegu. Ni ra sa kau tani kece na o, vakadinadinataka na kaukauwa ni iVakabula me vakaruruya na cava eso ena noda bula.

Vakauqeta na Vuli e Vale

Vukei ira na gone me ra vola e dua na qaravitavi era na vakayacora ena vukuna e dua ena macawa oqo.

Vakatorocaketaki Noda Veivakavulici

Era sa waribariba na gone. O na rairai nanuma ena so na gauna ni sa veivagolei tani mai na vuli na nodra igu na gone. Ia sa rawa ni o taracake na nodra itovo waribariba ena nomu sureti ira me ra matanataka e dua na italanoa se cakava eso na ivukivuki e salavata kei na ka e yaco tiko ena dua na sere se ivolanikalou. (Raica na Veivakavulici ena iVakarau ni Vakabula, 25.)