E Vakavulici Ira na Tamata o Jisu ena Baravi, mai vei James Tissot

20–26 ni Feperueri

Maciu 6–7

“Ni sa Vakatavulici Ira me Vaka e Dua sa Tu Ga Vua na Lewa”

Tekivu ena wiliki ni Maciu 6–7, ni o vakasamataki ira tiko na gone o vakavulica. Na itukutuku cava soti mai na veiwase oqo era gadreva me ra rogoca? Na Lako Mai, Mo Muri Au—Me Baleti Ira na Tamata Yadua kei na Matavuvale kei na ituvatuva oqo sa rawa ni veivuke ni solia vei iko na vakasama ni veivakavulici eso e gadrevi.

Sureta na Veiwasei

Kerei ira na gone me ra wasea na ka era a cakava ena macawa sa oti me ra dua na rarama se ivakaraitaki kivua e dua.

Vakavulica na iVunau: Gone Sobu

Maciu 6:5–13

Au rawa ni masu kivua na Tamaqu Vakalomalagi me vakai Jisu.

Era rawa ni vulica na gone me ra masu mai na rogoci ni nodra masu eso tale. O na vukei ira vakacava me ra vuli mai na masu i Jisu Karisito ena veitikina oqo?

iTaviqaravi e Rawa ni Caka

• Railesuva na ivakavuvuli i Jisu me baleta na masu ena Maciu 6:5–13. O na rairai vakayagataka na “Wase e 20: Veituberi ena Masu o Jisu” (e Na iTalanoa ena Veiyalayalati Vou, 51–52, se na kena vidio ena ChurchofJesusChrist.org).

• Vakayagataka na tabana ni itaviqaravi ni macawa oqo me vukei ira na gone me ra nanuma na veitiki duidui ni masu.

• Droinitaka na ligadra na gone yadua ena dua na tiki ni pepa. Veitalanoataka na veika e dodonu me da cakava ena ligada ni da masu. Ena veidroini yadua, vola e dua na ka eda dau cakava me da vakaraitaka na vakarokoroko ni da masu (me vaka na, cuva ni uluda, bobo na matada, kei na so tale).

• Lagata vata kei ira na gone e dua na sere me baleta na masu, me vaka na “Keimami Cuva Masu No” (iVolanisere ni Gonelailai, 18b), ka wasea nomu ivakadinadina ena kaukauwa ni masu. Sureti ira na gone mera wasea na veika era sotava baleta na masu.

Au rawa ni masu kivua na Tamaqu Vakalomalagi me vakai Jisu.

Maciu 7:12

E dodonu meu kitaka vei ira na tani na veika au vinakata mera kitaka vei au.

Na ivakavuvuli nei Jisu ena Maciu 7:12—dau kilai talega me Lawa Koula—e tiko kina e dua na idusidusi rawarawa me baleta noda ivakarau vei ira na tani. Na cava ena vukei ira na gone o vakavulica me ra bulataka na ivakavuvuli oqo?

iTaviqaravi e Rawa ni Caka

• Wilika na Maciu 7:12, ka tokaruataka ena vosa rawarawa eso me ra rawa ni kila na gone. Vukei ira na gone me ra vakasamataka eso na sala me ra vakaotia kina e dua na iyatuvosa vakaoqo: “Au dau taleitaka ni ra ena vukuqu na tani.” Ni oti na iyatuvosa yadua, sureti ira me ra tokaruataka vata kei iko, “Sa dodonu kina meu vei ira na tani.”

• Lagata vata kei ira na gone e dua na sere o vakila ni vakadeitaka na Maciu 7:12, me vaka na “Dauloloma ko Jisu” (iVolanisere ni Gonelalai, 39). Cakava eso na ivukivuki rawarawa me salavata kei na sere. Taroga vei ira na gone na ka era sa vulica me baleta na noda ivakarau vei ira na tani mai na ivakaraitaki ni iVakabula.

• Sureti ira na gone me ra vola na veika vinaka era dau cakava vei ira na nodra itubutubu kei ira na lewe ni matavuvale. Wilika na Maciu 7:12, ka sureti ira na gone me ra vola na veika vinaka e rawa ni ra cakava ki na nodra matavuvale.

Maciu 7:24–27

Au rawa ni tara cake e dua na yavu kaukauwa ena noqu muri Jisu.

Na vakayagataki ni talanoa vakaibalebale ni iVakabula ena tarai ni dua na vale ena nuku se na vatu sa rawa ni dua na sala guiguilecavi dredre ni nodra vakavulici na gone me baleta na bibi ni kena cakacakataki na veika eda sa vulica.

iTaviqaravi e Rawa ni Caka

• Lagata vata kei ira na gone na “Tara Vale” (iVolanisere ni Gonelalai, 132), ka matanataka toka me sala vata kei na qaqana.

• Vakayagataka na Maciu 7:24–27 mo vakavulica kina na kedrau duidui na tamata vuku kei na tamata lialia. Sureti ira na gone me ra vakalasutaka ga ni ra tara tiko e dua na vale. E rawa vakacava ni da vaka na tamata vuku?

• Me ra droinitaka na gone na iyaloyalo eso ni italanoa vakaibalebale ni tamata vuku kei na tamata lialia.

Vakavulica na iVunau: Gone Qase Cake

Maciu 6–7

Na Vunau mai na Ulunivanua e tu kina na itukutuku me baleti au.

Na veiwase oqo e tu kina e vuqa na itukutuku e rawa ni yaga vei ira na gone o vakavulica. Wilika ni o vakasamataki ira tiko na gone. Na cava e vakaibalebale vakalevu vei iko?

iTaviqaravi e Rawa ni Caka

• Vakananuma vei ira na gone ni ra sa vulica tiko mai na veika a vakavulica o Jisu ena Vunau ena Ulunivanua. Na dina cava soti e rawa ni ra nanuma ni ra vulica ena macawa sa oti?

• Vola ena papa eso na malanivosa mai na Vunau ena Ulunivanua kei na so tale na malanivosa ka sega ni tu ena ivolanikalou. Sureti ira na gone me ra vakatakila mai na malanivosa cava so e lako mai na Vunau ena Ulunivanua. Kerei ira mera wasea na veika era sa vulica mai na ivakavuvuli eso oqo.

• Digitaka e vica na tikina mai na Maciu 6–7 o nanuma ni na vakaibalebale vei ira na gone. Vola na kena isema eso ni ivolanikalou ena kadi, qai vunia wavoki ena rumu. Me ra lai vakaraica mai na gone, wilika na veitikina, ka vakamacalataka na vuna e bibi kina vei ira na ivakavuvuli eso oqo.

• Wasea e dua na nomu malanivosa taleitaki mai na Maciu 6–7, ka vakamacalataka na vuna o taleitaka kina. Kevaka e dua na nodra malanivosa taleitaki na gone, sureti ira me ra wasea na vuna era taleitaka kina kei na cava era vulica mai kina.

• Lagata kei ira na gone e dua na sere me baleta na iVakabula, kei na Nona ivakavuvuli, me vaka na “Meu Na Muri Jisu Tu” (iVolanisere ni Gonelalai, 40). Tarova na sere ni o lako mai ki na dua na malanivosa e semati ki na dua na ivakavuvuli e vakavulici ena Maciu 6–7. Vukei ira na gone me ra vakasotara vata na veika era sa vulica tiko mai na wase eso oqo.

Maciu 6:5–13; 7:7–11

Na Tamada Vakalomalagi ena rogoci au ka sauma noqu masu.

Ni o vulica na Maciu 6:5–13; 7:7–11, na cava o nanuma era gadreva na gone me ra kila me baleta na masu?

iTaviqaravi e Rawa ni Caka

• Sureti ira na gone me ra wilika i cake na Maciu 6:9–13 ka qai vola na veika a cavuta na iVakabula ena Nona masu. E rawa vakacava ni da muria na Nona ivakaraitaki ni da masu?

• Lagata vata kei ira na gone e dua na sere me baleta na masu, me vaka na “Bera Ni Ko Gole Yani” (Sere ni Lotu, naba 78). Vukei ira na gone ni vakasaqara na qaqana me laurai na vuna eda dau masu kina kei na veivakalougatataki e yaco mai ena masu.

• Vukei ira na gone me ra cavuqaqataka na Maciu 7:7 ena qitotaki ni dua na qito vakaoqo: Dua na gone me cavuqaqataka na imatai ni vosa se malanivosa mai na tikina ka qai viritaka na polo kivua e dua tale na gone, o koya me qai cavuqaqataka na vosa se malanivosa e tarava.

• Matanataka na Maciu 7:9–10 vata kei ira na gone ni vakayagataki na iyaya ni drama rawarawa. Kerei ira na gone me ra wasea na veika e vakavulica oqo vei ira me baleta na masu.

• Wasea e dua na gauna a saumi mai kina nomu masu.

Maciu 6:19–21

Au rawa ni vakasaqara na iyau tawamudu mai na iyau vakavuravura.

O na vukei ira vakacava na gone o vakavulica me ra vakabibitaka cake na veika tawamudu mai na veika vakavuravura?

iTaviqaravi e Rawa ni Caka

• Kauta mai e dua na kato ni “iyautalei” e tawani tu kina na iyaya se iyaloyalo eso ka matataka na veika e vakabibitaka o vuravura—me vaka, na ilavo se iyaya ni vakatatalo eso. Wilika vata na Maciu 6:19–21 ka qai kerei ira na gone me ra vukei iko ni vakasamataka na iyau vakalomalagi e rawa ni sosomitaka na veika vakavuravura ena loma ni kato.

• Sureti ira na gone me ra vakayacana se droinitaka eso na ka era rawa ni cakava me ra “kumuna vata na … iyau mai lomalagi” (Maciu 6:20).

Vakauqeta na Vuli e Vale

Sureti ira na gone me ra wasea vata kei na nodra matavuvale na nodra ivakavuvuli talei mai na Vunau ena Ulunivanua.

Vakatorocaketaki Noda Veivakavulici

Segata mo kilai ira vinaka na nomu lewenikalasi. O sa kilai ira na gone o vakavulica. Ena rairai gadrevi me na vakavoui na vakasama eso ena ituvatuva oqo me sotava vakavinaka na gagadre ni nomu kalasi. O na rairai vinakata mo railesuva kece na itaviqaravi e volai tu ena ituvatuva oqo, sega ni itaviqaravi walega e baleta na nodra yabaki na gone o vakavulica, mo kunea kina na vakasama eso me baleta na nomu kalasi. (Raica na Veivakavulici ena iVakarau ni iVakabula, 7.)