Veivosaki o Jisu kei Nikotimo

6–12 ni Feperueri

Joni 2–4

“E Dodonu Mo Sucu Tale”

Ena kalasi lekaleka ni Lalai, ena sega na gauna mo vakavulica kece kina na ivakavuvuli bibi ena Joni 2–4. Vakasaqara na veidusimaki vakayalo me baleta na veika mo vakamatatataka me sotava vakavinaka sara na nodra gagadre na gone.

ivakatakilakila ni veiwasei

Sureta na Veiwasei

Me vakauqeti ira na gone me ra wasea na veika era vulica ka sotava tiko, tarogi ira na cava era sa cakava wale tikoga qo me ra “gonedau ni tamata” kina (Maciu 4:19). O na gadreva beka mo railesuva vata kei ira na lesoni ni macawa sa oti.

ivakatakilakila ni veivakavulici

Vakavulica na iVunau: Gone Sobu

Joni 3:1–10

Au gadreva meu papitaiso ka vakadeitaki meu lesu tale ka bula vata kei na Tamada Vakalomalagi.

O ira na gone o vakavulica era sa vakarau tiko ni taura na ikalawa bibi ni laki bula vata tale kei na Tamada Vakalomalagi ena nodra papitaiso (sucu ena wai) ka vakadeitaki (sucu ena Yalotabu). O rawa vakacava ni vukei ira me ra kila na bibi ni cakacaka vakalotu e rua oqo?

iTaviqaravi e Rawa ni Caka

• Vakalekalekataka na italanoa kei Jisu ni vakavulici Nikotimo tiko (raica na Joni 3:1–10). Yalataka vei ira na gone ni ra sa papitaiso, ena solia vei ira na Tamada Vakalomalagi na isolisoli ni Yalo Tabu.

• Vakaraitaka vei ira na gone na tabana ni itaviqaravi ena macawa oqo, ka kerei ira me ra vakamacalataka na droini. Wilika na Joni 3:5, ka vakadinadinataka ni da gadreva me da papitaiso ka vakadeitaki me da laki bula vata tale kina kei na Tamada Vakalomalagi.

• Kerei ira na gone me ra veivosakitaka na ka era dau cakava me ra savata na ligadra. Vakaraitaka na iyaloyalo E Papitaisotaki e Dua na Goneyalewa Lailai (iVola ni iYaloyalo Vakosipeli,, naba. 104), ka vukei ira na gone me ra veidutaitaka na savati ni ligada ena wai kei na veisavai vakayalo ena papitaiso.

Joni 3:16.

E lomani au na Tamada Vakalomalagi, sa solia kina vei au e dua na iVakabula.

O rawa ni vukei ira vakacava na gone me ra vulica na dina taleitaki oqo?

iTaviqaravi e Rawa ni Caka

• Kerei ira na gone me ra vakacavara na iyatuvosa vaka oqo: “Ni rau lomani au na noqu itubutubu, erau …” Wilika na Joni 3:16. Qai vukei ira yadua na gone me ra tokaruataka na Joni 3:16, ka vakaisosomitaka na vosa “na kai vuravura” ena yacadra. Vukei ira na gone me ra raica na cava e tukuna na tikina oqo a cakava na Tamada Vakalomalagi baleta ni lomani keda o Koya. Sureti ira na gone me ra droinitaka e dua na iyaloyalo kei Jisu. Me ra qai wasea vakai ira na nodra droini ka vakaraitaka na nodra lomana na iVakabula.

• Lagata vata e dua na sere baleti Jisu, vaka na “Tala Mai Na Luvena” (iVolanisere ni Gonelalai, 20). Me ra taura cake tu na gone e dua na iyaloyalo kei Jisu ena veigauna era lagata kina e dua na vosa me vaka na “Luvena,” “Jisu,” se “iVakabula.”

Joni 4:5–15

O Jisu Karisito sa noqu “wai ni bula.”

O ira kece na gone ena nomu kalasi era rawa ni kila na cava na karamaca. O na vakayagataka beka vakacava na gagadre oqori me vukea na nodra vakila na gone na levu ni noda gadreva na wai ni bula e solia tu ko Jisu Karisito?

iTaviqaravi e Rawa ni Caka

• Vakayagataka na iyaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale mo talanoataka kina baleti Jisu kei na yalewa ena tobuwai (raica na Joni 4:5–15). Kerei ira na gone me ra tukuna tale na italanoa.

• Vakaraitaka e dua na bilo wai, ka veitalanoataka kei ira na gone me baleta na vuna eda gadreva kina na wai. Vakalekalekataka na Joni 4:5–15, ka vakadinadinataka ni o Jisu Karisito kei na Nona kosipeli e solia na bula ki na yaloda, me vaka sa solia na bula ki yagoda na wai.

ivakatakilakila ni veivakavulici

Vakavulica na iVunau: Gone Qase Cake

Joni 2:1–11

Au rawa ni rokova na tinaqu me vaka a vakayacora o Jisu.

Ena vakamau mai Kena, a tukuna vei Jisu o Meri ni sa oti koso na waini. Me vaka na iVakadewa i Josefa Simici, a sauma o Jisu vei Tinana ena nona taroga, “Yalewa, na cava ko sa vinakata meu vakayacora vei iko? oqori au na vakayacora” (ena Joni 2:4, ivakamacala e ra a). O Jisu e sa ivakaraitaki ni ivakarau e dodonu me da dau raici tinada kina.

iTaviqaravi e Rawa ni Caka

• Sureti ira na gone me ra wilika na Joni 2:1–11 ka veivukevuke ena kena tukuni tale na italanoa ena nodra vosa ga.

• Kerei ira na gone me ra vola eso na ka ena gadreva kina na veivuke na tinadra. Sureti ira me ra vakatovotovotaka na ka e rawa ni ra tukuna ni ra vakayagataka eso na vosa i Jisu: “Na cava ko sa vinakata meu vakayacora vei iko?” (Joni 2:4, ivakamacala e ra a).

• Sureta eso na tina me lako mai ki na nomu kalasi ka wasea na veika era dau cakava na luvedra me vakaraitaka kina nodra rokovi ira.

Vosa tiko vei Meri ko Jisu ena kana magiti ni vakamau

E kaya ko Jisu vua na tinana, “Na cava ko sa vinakata meu vakayacora vei iko?” (iVakadewa i Josefa Simici, Joni 2:4 [ena Joni 2:4, ivakamacala e ra a]).

Joni 3:1–8

Na noda papitaiso ka vakadeitaki e sa vaka na sucu tale.

Ni da sa papitaiso, na ka a vakatoka ko Jisu me “sucu ena wai,” eda sa rawata na vakabokoci ni noda ivalavala ca ka rawa ni “curu ki na matanitu ni Kalou” (Joni 3:5). O na vukei ira vakacava na gone o vakavulica me ra kila na ibalebale ni sucu tale?

iTaviqaravi e Rawa ni Caka

• Cakava na tikitiki ni pepa eso e vakaraitaka tiko na vosa eso ni iVakabula ena Joni 3:3, ka me ra qai tuva vakadodonu na gone. E tautauvata vakacava kei na sucu tale na noda papitaiso ka vakadeitaki?

• Vakaraitaka na iyaloyalo ni dua na gone sucu vou kei na dua e papitaiso ka vakadeitaki (raica na iVola ni iYaloyalo Vakosipeli, naba. 104–5). Eda sa tautauvata vakacava kei na dua na gone sucuvou ni oti noda papitaiso ka vakadeitaki? (raica na Joni 3:3–5).

• Sureti ira na gone me ra wasea na ivakananumi ni nodra papitaiso. Wilika na Mosaia 18:8–10 kei na Vunau kei na Veiyalayalati 20:37 me railesuvi kina na veiyalayalati ni papitaiso. Vakavulica vei ira na gone ni kena vakayagataki ena vakanananu titobu na sakaramede ena veimacawa sa dua na sala me tomani kina na ivakarau ni sucu tale.

• Vukei ira na gone me ra cavuqaqataka na Yavu ni Vakabauta 1:4.

Joni 3:16–17

E lomani au na Tamada Vakalomalagi, sa tala mai kina na Luvena.

E rawa vakacava ni o vukei ira na gone me ra kila ni a talai mai ko Jisu Karisito ki vuravura me ivakaraitaki ni loloma ni Tamada Vakalomalagi?

iTaviqaravi e Rawa ni Caka

• Kerei ira na gone me ra droinitaka e dua na iyaloyalo ni nodra iloloma taleitaki kei na tamata a solia vei ira na iloloma oya. Qai kerea e dua na gone me wilika na Joni 3:16. Na iloloma cava a solia vei keda na Tamada Vakalomalagi? E vakaraitaka vakacava na Nona loloma na isolisoli oqo?

• Kerei ira na gone me ra vaqara na isau ni taro, “Cava na vuna e talai Jisu Karisito mai kina na Tamada Vakalomalagi?” ni ra wilika na Joni 3:16–17 se lagata se vakarogoca na “Tala Mai Na Luvena” (iVolanisere ni Gonelalai, 20).

Joni 4:5–23

O Jisu Karisito sa solia vei au na “wai ni bula.”

Me vaka ga a vakayagataka o Jisu na wai me vakavulica na yalewa ni Samaria, e rawa ni o vakayagataka na wai mo vakavulica vei ira na gone na vuna eda gadreva kina na kosipeli i Jisu Karisito.

iTaviqaravi e Rawa ni Caka

• Vakayagataka na Joni 4:5–23, mo vola na ivakaleleka ni yatuvosa eso mai na italanoa ni yalewa ena tobu. Kerei ira na gone me ra raica na veitikina oqo me ra tuva vakadodonu kina na iyatuvosa. Na cava a tovolea tiko o Jisu me vakavulica vua na yalewa oqo?

• Solia vei ira na gone na wai me ra gunu, ka kerei ira me ra wasea e dua na gauna era a karamaca kina. Veivosakitaka na ka eda vakila ena gauna eda sa qai gunu wai kina. Sureti ira na gone me ra cavuta na ka eso, vaka na bilo wai, e dau vakacegui keda vagauna. Na cava eso na ka vaka na “wai ni bula” e rawa ni vakacegui keda me tawamudu?

• Vola ena papa ni volavola E tautauvata vakacava kei na wai na kosipeli? Kerei ira na gone me ra vakasamataka na isaunitaro oqo ni ra wilika na Joni 4:5–23.

ivakatakilakila ni vuli

Vakauqeta na Vuli e Vale

Navuca mo kerei ira na gone me ra solia ki na lewe ni nodra matavuvale yadua e dua na bilo wai ni ra yaco i vale. Ni ra vakayacora vakakina, e rawa ni ra wasea na veika era sa vulica me baleta na wai ni bula.

Vakatorocaketaki Noda Veivakavulici

Vakayagataka na tabana ni itaviqaravi. Ni ra vakacavara na gone na tabana ni itaviqaravi, vakayagataka na gauna mo railesuva kina na ivakavuvuli mai na lesoni.

tabana ni itaviqaravi: Au gadreva meu papitaiso ka vakadeitaki