Ki na loma ni Lekutu, mai vei Eva Koleva Timothy

30 ni Janueri–5 ni Feperueri

Maciu 4; Luke 4–5

“Sa Tu Vei Au na Yalo i Jiova”

Tekivuna na nomu vakarautaka na lesoni oqo ena wiliki ni Maciu 4 kei na Luke 4–5. Na Lako Mai, Mo Muri Au—Me Baleti Ira na Tamata Yadua kei na Matavuvale e rawa ni vukei iko mo kila na veiwase oqo, ka rawa ni solia vei iko na ituvatuva oqo eso na vakasama ni veivakavulici.

Sureta na Veiwasei

Kerei ira na gone me ra veisolitaka e dua na iyaloyalo kei Jisu mai na dua na gone ki na dua tale. Ni sa taura na iyaloyalo na gone yadua, sureti koya me wasea e dua na ka a cakava o Jisu ni a tiko e vuravura.

Vakavulica na iVunau: Gone Sobu

Maciu 4:1–11; Luke 4:1–13

Au rawa ni digitaka na dodonu me vakataki Jisu.

O ira na gonelalai era “sega ni rawa ni ivalavala ca” (Vunau kei na Veiyalayalati 29:47). Ia, na italanoa kei Jisu ni vorata tiko na veitemaki nei Setani sa rawa ni uqeti ira na gone me ra dau digitaka na dodonu.

iTaviqaravi e Rawa ni Caka

• Tukuna na italanoa ni temaki nei Jisu mai na Maciu 4:1–11. (Raica talega na “Wase e 11: Sa Temaki o Jisu,” e Na iTukuni ena Veiyalayalati Vou, 30–31, se na kena vidio ena ChurchofJesusChrist.org.) Ena vanua veiganiti eso ena italanoa, taroga, “Na cava o nanuma ni dodonu me cakava o Jisu?”

• Vakaraitaka e dua na iyaloyalo kei Jisu Karisito, ka qai vakamacalataka na digidigi eso ena rairai cakava e dua na gone lailai. Kerei ira na gone me ra taura e dua na ikalawa ki na iyaloyalo ena veigauna yadua o vakamacalataka kina e dua na digidigi vinaka. Kerei ira me ra taura e dua na ikalawa tani mai kina ena veigauna kece o vakamacalataka kina e dua na digidigi ca.

• Vukei ira na gone me ra vulica na qaqa ni dua na sere ni caka digidigi vinaka, me vaka na “Digitaka na Dodonu” (iVolanisere ni Gonelalai, 82). Vakayagataka na iyaloyalo, iyaya, se veivuke vakaiyaloyalo tale eso e semati ki na qaqana.

Luke 4:18–19

Sa noqu iVakabula o Jisu Karisito.

Na Luke 4:18–19 e vakamacalataka na ilesilesi i Jisu. O rawa vakacava ni vukei ira na gone me ra vakavinavinakataka na veika sa cakava o Koya vei ira?

iTaviqaravi e Rawa ni Caka

• Wilika na Luke 4:18–19 vei ira na gone, ka vakamacalataka na veika a talai mai kina ki vuravura o Jisu Karisito me cakava (me vakavulica vei keda na sala me da lesu tale kina vei Tamada Vakalomalagi, me vakacegui keda, ka vakabulai ira na tamata). Wasea na sala sa vakayacora kina vei iko o Koya na veika oqo.

• Sureta e vica na gone me ra vakalasutaka ni ra veilecayaki, rarawa, se tauvimate. Kerea na vo ni gone me ra matanataka na ka e rawa ni ra cakava me ra vukei ira. Vakadinadinataka ni a lako mai o Jisu Karisito me veivakavulici, veivakacegui, ka vakabulai keda, ka sa dodonu me da muria na Nona ivakaraitaki.

• Vakaraitaka na iyaloyalo kei Jisu ni vakayacora tiko na Nona ilesilesi (raica na iVola ni iYaloyalo Vakosipeli). Kerei ira na gone me ra vakamacalataka na ka e cakava tiko o Jisu ena iyaloyalo yadua. Vakaraitaka talega na kedra iyaloyalo na tamata era tovolea tiko me vakataki Jisu (o rawa ni kunea eso ena mekesini ni Lotu).

Maciu 4:18–22; Luke 5:1–11

Sa sureti keda o Jisu Karisito me da “gonedau ni tamata.”

Na kaci ni iVakabula, “Drau muri au mai, ka’u na qisi kemudrau mo drau gonedau ni tamata” (Maciu 4:19), e sa baleti keda kece, oka kina o ira na gone.

iTaviqaravi e Rawa ni Caka

• Sureta e rua na gone me dua o Saimoni Pita ka dua o Adriu ni o wilika na Maciu 4:18–22. Vukei ira na gone me vakatakila na ka erau a biuta tu mai na turaga oqo me rau muri Jisu.

• Me ra veivukevuke na gone ni tukuna na italanoa mai na veitikina oqo ena vakayagataki ni iyaloyalo e ra kei na kena ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale.

• Lagata vata e dua na sere baleta na muri Jisu Karisito, me vaka na “Meu Muria na Nona Lewa” (iVolanisere ni Gonelalai, 86). Vukei ira na gone me ra kunea na veika e tukuni ena sere era rawa ni cakava me ra muri Jisu kina.

• Vakayagataka na tabana ni itaviqaravi ena macawa oqo mo veivosakitaka kina vata kei ira na gone na sala e rawa ni ra “gonedau ni tamata” kina ena muri Jisu. E rawa talega ni o qitora e dua na qito ni veivakasotari vata kei na tabana ni itaviqaravi. Kotiva e yarua na ika tautauvata eso, vakatoboicutaka, ka sureti ira na gone me ra vukica yadudua me ra vakasotari vata.

O Karisito ni Kaciva e Rua na Tisaipeli, mai vei Gary Ernest Smith

Vakavulica na iVunau: Gone Qase Cake

Maciu 4:1–11; Luke 4:1–13

O Jisu sa vakarautaka na ivakaraitaki vei au ena vorati ni veitemaki.

O Jisu Karisito mada ga a temaki vei Setani, ia a sega ni rawai o Koya. O na vukei ira vakacava na gone ni muria na Nona ivakaraitaki?

iTaviqaravi e Rawa ni Caka

• Cakava e dua na ivolakabi ena papa ka vakayacana ena Veitemaki nei Setani kei na Kena iSau mai vei Jisu. Vukei ira na gone me ra vakalewena na ivolakabi ni vakayagataki na Maciu 4:1–11 kei na Luke 4:1–13. Tarogi ira na gone ena rawa vakacava ni ra muria na ivakaraitaki nei Jisu.

• Vola eso na ituvaki ena rairai temaki kina e dua na gone me digidigi cala. Me digitaka e dua na gone me wilika e dua, ka veivosakitaka vakalasi na ivakarau era rawa ni vorata kina na veitemaki ena ituvaki oya.

Maciu 4: 1–2

Na lolo e rawa ni vukei au meu toro voleka kivei Tamada Vakalomalagi.

Ni bera ni tekivutaka na Nona ilesilesi, a lolo ko Jisu ka “veivosaki kei na Kalou” (iVakadewa nei Josefa Simici, Maciu 4:2 [ena Maciu 4:2, ivakamacala e ra c]). Vukei ira na gone me ra raica na ivakarau e rawa ni vaqaqacotaki ira kina vakayalo na lolo ka vukei ira me ra toro voleka kivei Tamada Vakalomalagi.

iTaviqaravi e Rawa ni Caka

• Sureta e dua na gone me wilika na Maciu 4:1–2 ni vakayagataka tiko na railesuvi ni iVakadewa nei Josefa Simici e kune ena ivakamacala e ra. Na cava e cakava o Jisu me “tiko vata kei na Kalou”? Wasea na ivakarau e sa vukei iko kina na lolo mo voleka cake kivei Tamada Vakalomalagi.

• Sureti ira na gone era sa lolo oti eliu me ra wasea na veika era sotava. Era na vakamacalataka beka vakacava na lolo kivua e dua e se bera vakadua ni lolo?

• Vola na taro eso e baleta na lolo (me vaka na cava na vuna, na kena gauna, se na ivakarau ni lolo) ena tiki ni pepa eso, ka biuta ena dua na bilo. Sureti ira na gone me ra tomika e dua na taro ka tovolea me ra sauma. Na veika sotavi cava soti o rawa ni wasea se o ira na gone me baleta na lolo?

Luke 4:16–22, 28–30

O Jisu Karisito sa noqu iVakabula.

Vakananuma vakatitobu na ivakarau e sa vakalougatataka kina na nomu bula na iVakabula. O na vukei ira vakacava na gone me ra vakavinavinakataka vakalevu cake na Nona veivakayarayarataki ki na nodra bula?

iTaviqaravi e Rawa ni Caka

• Sureta e dua na gone me vakavakarau mai ki na kalasi me vakalekalekataka na Luke 4:16–30. Ena rawa ni veivuke me vakayagataki na “Wase e 17: O Ira era Cudru e Nasareci” (e Na iTukuni ena Veiyalayalati Vou, 42–43, se na kena vidio ena ChurchofJesusChrist.org). E rawa talega ni o vakaraitaka na vidio “Jesus Declares He Is the Messiah” (ChurchofJesusChrist.org).

• Wilika na Luke 4:18 ni ra vakamuria tiko na gone. Kerei ira me ra vola na veika e tukuna na iVakabula ni a mai cakava o Koya. Sureti ira na gone me ra wasea na ivakaraitaki ni so na gauna e vakayacora kina o Jisu na veika oqo, ena ivolanikalou se ena nodra bula.

• Vola ena tiki ni pepa eso na vosa “Ena vukui Jisu Karisito …” Solia e dua na pepa vei ira yadua na gone, ka sureti ira me ra vola na ivakarau era na vakacavara kina na malanivosa oqori. Me ra wasea na veika era vola.

Maciu 4:18–22; Luke 5:1–11

Sa sureti keda o Jisu Karisito me da muri Koya ka me da “gonedau ni tamata.”

Sa vuqa na sala era rawa ni muria kina na iVakabula na gone ka me ra “gonedau ni tamata” (Maciu 4:19). O na vukei ira vakacava me ra raica na nodra rawa ni veivakayarayarataki vinaka kivei ira na tani?

iTaviqaravi e Rawa ni Caka

• Sureti ira na gone me ra wilika na Maciu 4:18–22 kei na Luke 5:1–11. Era a sauma vakacava na tisaipeli i Jisu na Nona veikacivi me ra muri Koya? Na cava eda rawa ni cakava meda muria kina na nodra ivakaraitaki?

• Vakaraitaka vei ira na gone eso na iyaya ni qoli se dua na iyaloyalo ni dua na gonedau. Na cava na kena ibalebale meda “gonedau ni tamata”? Na iyaya ni cakacaka cava e tu vei keda me vukei keda me da gonedau ni tamata?

Vakauqeta na Vuli e Vale

Sureti ira na gone me ra wasea ki na nodra matavuvale na ka era sa vulica me baleta na gonedau ni tamata.

Vakatorocaketaki Noda Veivakavulici

E rawa ni ra vakila na gone na veivakayarayarataki ni Yalo. Vakavulica vei ira na gone ni yalo vakacegu, loloma, kei na lomavinaka e tiko vei ira ni ra tukuni se lagati Jisu Karisito kei na Nona kosipeli e sa vakavuna na Yalo Tabu. Na veiyalo oqo sa rawa ni tara cake na nodra ivakadinadina.