Katubaleka iloilo‑kesa ni Valetabu e Nauvoo Illinois, mai vei Tom Holdman

23–29 ni Janueri

Maciu 3; Marika 1; Luke 3

“Dou Caramaka na Sala i Jiova”

Ni o wilika baleti Joni na Dauveipapitaiso kei na papitaisotaki i Jisu Karisito, vola na veivakauqeti kece vakayalo o ciqoma. Lako Mai, Mo Muri Au—Me Baleti Ira na Tamata Yadua kei na Matavuvale e rawa ni vukei iko ni kila vakamatata na ivolanikalou eso oqo ka vukei nomu tokona na vuli era sa cakava tiko na gone e vale.

Sureta na Veiwasei

Me soli vei ira na gone e dua na gauna me ra wasea kina na ka era sa vulica oti, vakaraitaka e dua nai yaloyalo kei Jisu ni papitaisotaki tiko. Kerei ira me ra tukuna vei iko na ka e sa yaco tiko ena i yaloyalo kei na nodra nanuma me baleta na papitaiso.

Vakavulica na iVunau: Gone Sobu

Maciu 3:13–17

Au rawa ni papitaiso me vakataki Jisu.

O rawa ni vakayagataka vakacava na i talanoa ni papitaiso i Jisu me vukea na nodra vakavakarau na gone me ra papitaiso?

iTaviqaravi e Rawa ni Caka

• Vakalekalekataka na talanoa ni papitaiso ni iVakabula (raica na Maciu 3:13–17; raica talega na “Wase e 10: Sa Papitaiso o Jisu,” e Na iTukuni ena Veiyalayalati Vou, 26–29, se na kena vidio ena ChurchofJesusChrist.org). Vakamacalataka ni o Jisu a papitaiso ena tabadromuci mai vua e dua ka tu vua na lewa ni matabete. Taleva vakavica na italanoa ka sureti ira na gone me ra wasea na veika matailalai era nanuma rawa.

• Vakaraitaka e dua nai yaloyalo ni nona papitaiso o Jisu kei na tabana ni itaviqaravi ni macawa oqo. Me ra dusia na gone na veika e tautauvata ena i yaloyalo e rua oqo. (E tiko e dua nai yaloyalo ni papitaiso i Jisu ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale.)

• Railesuva na yalayala eso era na cakava na gone ni ra sa papitaiso (raica na Mosaia 18:8–10; Vunau kei na Veiyalayalati 20:37; Ulutaga ni Kosipeli, “Papitaiso,” topics.ChurchofJesusChrist.org). Tarogi ira se o cei vei ira oqo era sa vakayacora rawa tiko.

• Sureta e dua na lewe ni matabisopi me tukuna vei ira na gone na veivakatarogi ni papitaiso ena caka vei ira ni ra se bera ni papitaiso.

• Lagata vata e dua na sere ni papitaiso, vaka na “Jisu Ni A Papitaiso” (iVolanisere ni Gonelalai, 98). Vakasamataka mo kerea e dua na gone me liutaki ira na vo ni gone ni ra lagasere.

Eda rawa ni muria na ivakaraitaki i Jisu ena noda papitaisotaki.

Maciu 3:11, 16

Sa dau vukei au na Yalo Tabu.

Me ikuri ni vakavakarau ki na papitaiso, era sa vakarau tale tikoga na gone me ra ciqoma na isolisoli ni Yalo Tabu. O na vukei ira beka vakacava?

iTaviqaravi e Rawa ni Caka

• Vakayagataka na Maciu 3:11, 16 mo vakavulici ira na gone ni a sobuti Jisu na Yalo Tabu ena gauna a papitaiso kina (a rairai mai e dua na ruve me ivakatakilakila ni sa yaco na ka oqo). Vakaraitaka nai yaloyalo Na iSolisoli ni Yalo Tabu (iVola ni Yaloyalo Vakosipeli, naba. 105), ka vakamacalataka ni da sa ciqoma na isolisoli ni Yalo Tabu ena gauna eda vakadeitaki kina.

• Kauta mai e dua na kateni ka tu kina eso na ka vaka nai yaloyalo kei Jisu, dua na tutuvi malumu, kei na kabasi se mape. Sureti ira na gone me ra digitaka e dua nai yaya, mera qai vakamacalataka se matataka vakacava e dua nai yaya na sala e rawa ni vukei keda kina na Yalo Tabu—o Koya e vakadinadinataki Jisu (raica na Joni 15:26), vakacegui keda (raica na Joni 14:26), ka vakaraitaka vei keda na sala dodonu (raica na 2 Nifai 32:5).

• Wasea na veika o sotava vakai iko ena nomu ciqoma na veivuke mai vua na Yalo Tabu.

• Sureti ira na gone me ra rogoca na sala eso e dau vukei keda kina na Yalo Tabu ni ra lagata e dua na sere baleti Koya, vaka na “Jisu Karisito” (iVolanisere ni Gonelalai, 56).

Vakavulica na iVunau: Gone Qase Cake

Maciu 3

Au sa vakalougatataki mai na cakacaka vakalotu eso ni Matabete i Eroni.

A taura tu o Joni na Dauveipapitaiso na Matabete i Eroni, kei na kena wiliki baleti koya ena Maciu 3 sa dua na madigi vinaka ni nodra vakavulici na gone me baleta na Matabete i Eroni. Vukei ira me ra kila na veivakalougatataki kei na kaukauwa e lako mai vei keda mai na matabete oqo.

iTaviqaravi e Rawa ni Caka

• Sureti ira na gone me ra cakava e dua na lisi ni i tavi ni Matabete i Eroni, ena vakayagataki ni Vunau kei na Veiyalayalati 20:46, 58–60; 84:111. Kerei ira na gone me ra raica na Maciu 3 ena ivakaraitaki ni nona qarava o Joni eso vei ira na itavi oqo. E rawa vakacava vei keda kece me da sureti ira na tani me ra lako mai vei Karisito, me vaka a vakayacora o Joni?

• Vakaraitaka eso nai yaloyalo ni lewe ni Matabete i Eroni era qarava tiko na cakacaka vakalotu ni papitaiso kei na sakaramede (raica na iVola ni Yaloyalo Vakosipeli, naba 103–4, 107–8). Veivosakitaka na sala era vakarautaki keda kina na cakacaka vakalotu oqo me da ciqomi Jisu Karisito kei na veivakalougatataki ni Nona Veisorovaki.

• Wilika vata na Vunau kei na Veiyalayalati 13:1, ka vakadinadinataka ni a vakalesuya mai o Joni na Dauveipapitaiso na Matabete i Eroni kivei Josefa Simici. Tarogi ira na gone era sa vakalougatataki vakacava ena kena sa vakalesui mai na Matabete i Eroni.

Maciu 3:13–17; Marika 1:1–11; Luke 3:2–18

Au rawa ni maroroya na noqu veiyalayalati ni papitaiso.

Na vulici tu ni papitaiso i Jisu sa vakarautaka e dua na madigi vinaka me ra vukei kina na gone ni railesuva nodra veiyalayalati ni papitaiso ka vakadeitaka tiko na kena muri.

iTaviqaravi e Rawa ni Caka

• Sureti ira na gone mera veivukevuke ena wiliki ni tikina eso mai na Marika 1:1–11. Veivosakitaka na vuna e vinakata kina na Tamada Vakalomalagi meda papitaiso. Cava na vuna a papitaiso kina o Jisu, dina ga ni sega ni gadrevi tu Vua me savai mai na ivalavala ca? Vukei ira na gone me ra raica na isaunitaro oqo ena Maciu 3:13–15 kei na 2 Nifai 31:6–7.

• Railesuva na veiyalayalati era a cakava na gone ena nodra papitaiso, kune ena Mosaia 18:8–10 kei na Vunau kei na Veiyalayalati 20:37. Sureti ira na gone me ra vola na idusidusi eso oqo ena tabana ni taviqaravi ni macawa oqo.

• Vakarautaka e vicavata na kadi veisa kei na malanivosa veisotari se i yaloyalo eso e matataka na noda veiyalayalati ni papitaiso. Vakatoboicutaki ira na kadi. Sureti ira na gone me ra veivukevuke ni vukici ira cake yarua ena dua na gauna, ni ra vakaraica na kena isa. Ni sa veisotari rawa e dua, sureti ira na gone me ra wasea na sala eso era sa maroroya tu kina na veiyalayalati oya.

• Wasea na sala e sa vakalougatataki iko kina na maroroi ni nomu veiyalayalati ni papitaiso.

Maciu 3:11, 16

Sa rawa ni tuberi au na Yalo Tabu.

Era sa vulica tiko na gone na sala me ra vakila ka muria kina na veituberi ni Yalo Tabu. Vukei ira me ra kila matua ni maroroi ni nodra veiyalayalati ni papitaiso ena vukei ira mera kilikili ni ciqoma na Nona veituberi.

iTaviqaravi e Rawa ni Caka

• Kerea na gone yadua me wilika e dua vei ira na ivolanikalou oqo ka vakamacalataka na ka e vakavulica baleta na sala e vosa kina vei keda na Yalo Tabu: Ilamani 5:30; Vunau kei na Veiyalayalati 6:23; 8:2–3; 11:12–13.

• Kerea e dua na gone me wilika na Maciu 3:11. E tautauvata vakacava kei na bukawaqa na Yalo Tabu? Taura mada, sa rawa ni veivakacegui na bukawaqa, ka sa solia na rarama me tuberi keda (raica na Joni 15:26; 2 Nifai 32:5).

• Sureti ira na gone me ra bobo ka dulaka mai na ligadra. Qai taviraka vakamamada na qeteqete ni ligadra ena dua na vuti ni manumanu se wa. Sureti ira me ra tukuna vei iko na gauna era vakila kina. Na cava e vakavuvulitaka na itaviqaravi oqo me baleta na vakilai ni veivakauqeti ni Yalo Tabu?

• Sureti ira na gone me ra wasea na veika era sa sotava kei na Yalo Tabu. Cava na vuna e vukei keda kina ni rawata na veituberi ni Yalo Tabu na maroroi ni noda veiyalayalati?

Vakauqeta na Vuli e Vale

Vakauqeta na gone yadua me tarogi ira na nodra itubutubu, lewe ni matavuvale tale eso, se itokani me baleta na nodra papitaiso.

Vakatorocaketaki Noda Veivakavulici

Vakasaqara na nomu veivakauqeti vakai iko. Kakua ni raica vaka veidusimaki na tuvatuva eso oqo ni sa dodonu mo muria ni o veivakavulici. Ia, vakayagataki ira ena kena vakasamataki na nomu veivakauqeti vakai iko ni ko raica vagumatua na nodra gagadre na gone o vakavulica. (Raica na Veivakavulici ena iVakarau ni iVakabula, 7.)