16–22 ni Janueri

Joni 1

Keitou Sa Kunea na Mesaia

Ni o wilika na Joni 1, vola na veivakauqeti vakayalo eso o ciqoma. Na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale e rawa ni vukei iko mo kila na wase oqo. Na itaviqaravi vakaturi oqo e rawa ni solia eso na vakasama ena sala mo vukei ira kina na gone me ra vulica na ivakavuvuli ena Joni 1. Na itaviqaravi baleti ira na gone qase cake e rawa ni moici, kevaka e gadrevi, me baleti ira na gone sobu.

Sureta na Veiwasei

Me vukei ira na gone me ra wasea na veika era kila me baleti Jisu, vakaraitaka na i yaloyalo eso baleti Koya ni vakayacora tiko na Nona itavi e vakamacalataki tu ena Joni 1 (vaka na buli ni vuravura se vakavulici ni kosipeli). Kerei ira na gone me ra vakamacalataka na ka e yaco tiko ena i yaloyalo.

Vakavulica na iVunau: Gone Sobu

Joni 1:1–2

A bula vata tu kei na Tamada Vakalomalagi o Jisu ni se bera ni sucu mai.

A vakavuvulitaka o Joni ni a bula vata tu kei na Kalou o Jisu Karisito ni se bera Nona mai bula e vuravura. O keda talega a bula vata tu kei na Kalou ni se bera ni da sucu mai (raica “Na Matavuvale: Ai Vakaro ki Vuravura Raraba,” ChurchofJesusChrist.org). O na vakavulica vakacava vei ira na gone na dina oqo?

iTaviqaravi e Rawa ni Caka

• Vakamacalataka ni “na Vosa” ena Joni 1:1 e tukuni Jisu tiko. Wilika i cake na tikina, ka kerei ira na gone me ra kaya “Jisu” e veigauna kece o wilika kina “na Vosa.” Vakaraitaka na ivakaraitaki ka vakatokai “Bula Taumada” (ChurchofJesusChrist.org; raica talega na Dou Raici Ira na Nomudou Lalai [2008], 15). Vakamacalataka ni a bula tu kei na Tamada Vakalomalagi o Jisu Karisito ni bera ni lako mai ki vuravura.

• Tautauri mai na vei ivurevure vakaoqo mo vakavulici ira kina na gone baleta na noda bula vata kei na Kalou ni bera ni da lako mai ki vuravura: “iVakamacala Taumada: Na iTuvatuva ni Tamada Vakalomalagi” (e Na iTukuni ena Veiyalayalati Vou, 1–5, se na kena vidio ena ChurchofJesusChrist.org) se “Bula Taumada” ena iDusidusi ki na iVolanikalou (scriptures.ChurchofJesusChrist.org).

• Sureta e dua na itubutubu me kauta mai e dua na gone dramidrami ki na kalasi. Tarogi ira na gone se a bula tu mai vei na yalona na gone dramidrami oqo ni se bera ni sucu mai. Vakananuma vei ira na gone ni ra a gone dramidrami ena dua na gauna, ka vakadinadinataka ni ra a bula tale tu ga mai lomalagi kei na Tamada Vakalomalagi vaka gone vakayalo ni bera ni ra sucu mai.

Joni 1:3

Sa bulia o Jisu na veika kecega.

Na kilai ni tavi Vakadauveibuli i Jisu Karisito sa rawa ni vukea na vakalevutaki ni nodra rokovi Koya na gone o vakavulica.

iTaviqaravi e Rawa ni Caka

• Wilika na Joni 1:3 kei ira na gone, ka vakaraitaka na i yaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Vukei ira na gone me ra cavuqaqataka na malanivosa “sa bulia na ka kecega o [Jisu Karisito].”

• Vakaraitaka ki na dua na gone e dua na i yaloyalo ni dua na ka a bulia na Turaga. Me vakamacalataka o koya vei ira na vo ni gone, ka kerei ira me ra vakilakila na cava e vakamacalataki tiko.

• Kerei ira yadua na gone me ra vakayacana e dua na ka a bulia o Jisu Karisito. Vukei ira na gone me ra vakasamataka na sala eso e rawa ni ra taqomaka kina na vuravura kei na ibulibuli tale eso ni Turaga.

Sa bulia o Jisu Karisito na vuravura kei na veika kecega sa tu kina.

Joni 1:35–51

Au rawa ni sureti ira na tani me ra lako mai vei Jisu Karisito ka vuli Vua.

Joni 1 e tiko kina na kedra itukutuku na tisaipeli ka sureti ira na tamata me ra “lako mai ka raica” ni sa Luve ni Kalou o Jisu. E rawa ni ra muria sara mada ga na gonelalai na ivakaraitaki oqo.

iTaviqaravi e Rawa ni Caka

• Vakamacalataka na sala a kilai Jisu kina o Adriu, ka tukuna na sala a qai vakavulici Pita kina o Adriu (raica na Joni 1:35–42). Wasea na sala o a kila kina na Lotu, se sureta e dua na lewenilotu vou me wasea na sala a kila kina o koya na Lotu.

• Wasea na talanoa kei Filipe ena nona sureti Nacanieli me “lako mai ka raica” (Joni 1:43–51). Vunitaka e dua na i yaloyalo kei Jisu ena dua na kateni, ka sureta e dua na gone me “lako mai ka raica” ka qai tukuna vei ira na vo ni gone na ka a raica.

• Me ra rokataka na gone na tabana ni taviqaravi ena macawa oqo, ka vakauqeti ira me ra vakayagataka ni sureta kina e dua me vulica me baleti Jisu.

• Kerea e dua na gone me tukuna na gauna a wasea kina e dua na ka, me vaka na ka ni vakatatalo se iloloma, ki na dua tale. Me da wasea beka vakacava na kosipeli? Tukuna na italanoa ni dua na gone ka wasea na kosipeli vua e dua na itokani, me vaka na “A Friend and a Missionary,” iTokani, Julai 2018, 12–13; Liaona, Julai 2018, 70–71.

Vakavulica na iVunau: Gone Qase Cake

Joni 1:1–5

A bula vata tu kei na Tamada Vakalomalagi o Jisu Karisito ni se bera ni sucu mai.

Ni se bera mada ga ni sucu mai, a vakaitavitaki Koya vakabibi o Jisu Karisito ena ituvatuva ni Tamada Vakalomalagi. Ni o wilika na Joni 1:1–5, na cava beka e uqeti iko me baleta na cakacaka i Karisito ena bula taumada?

iTaviqaravi e Rawa ni Caka

• Tarogi ira na gone kevaka era kila e dua na ka a vakayacora tu o Jisu ni se bera ni sucu mai. Sureti ira me ra vaqara isaunitaro ena Joni 1:1–5. E rawa ni veivuke me ra raica na iVakadewa i Josefa Simici, Joni 1:1–5 (ena idusidusi vakaiulutaga ni iVolatabu).

• Wasea na tikina eso ena “iVakamacala Taumada: Na iTuvatuva ni Tamada Vakalomalagi” (e Na iTukuni ena Veiyalayalati Vou, 1–5, se na kena vidio ena ChurchofJesusChrist.org). Tarogi ira na gone ena ka era sa vulica baleti Jisu Karisito.

• Ni se vo e vica na siga, sureta eso na gone me ra vakavakarau mai ki na kalasi ni vakaraitaka se vakamacalataka e dua na ka era a bulia. Vakaraitaka na i yaloyalo ni so na i bulibuli ni Turaga, ka vakayagataka na Joni 1:3 mo vakamacalataka ni sa bulia o Jisu na vuravura kei na veika kecega sa tu kina.

Joni 1:4–9

Sa noqu rarama o Jisu Karisito.

Nai vakatakarakara ni rarama sa rawa ni vukea na gone me ra kila vakamatata na iVakabula kei na Nona kosipeli. O rawa ni vakauqeti ira vakacava na gone me ra vaqara na rarama ni iVakabula ni vaka me butobuto tu na vuravura?

iTaviqaravi e Rawa ni Caka

• Sureti ira na gone me ra wilika na Same 27:1; Joni 1:4–9; Mosaia 16:9; kei na Vunau kei na Veiyalayalati 39:1–2, ena vakaraici ni malanivosa eso e tautauvata tu kei na ivolanikalou oqo. Sa tautauvata vakacava kei na rarama o Jisu Karisito?

• Vakaraitaka e dua na i yaloyalo ni iVakabula kei na so nai yaya e solia na rarama, vaka e dua nai cinalivaliva. Sa tautauvata vakacava na veika oqo kei Jisu Karisito? E rawa vakacava ni da wasea na Nona rarama vei ira tale eso? Lagata vata na “Noqu Rarama Na Turaga” (Sere ni Lotu, naba 45) se dua tale na sere baleta na rarama ni kosipeli.

• Tarogi ira na gone se cava era cakava ni ra tiko ena butobuto ka rere tu. Vakadinadinataka ni sa rawa ni ra dau gole kivua na iVakabula ni ra rere tu.

Joni 1:35–51

Vaka e dua na imuri i Jisu Karisito, sa rawa niu sureti ira na tani me muri Koya.

Vakasamataka na sala o rawa ni vakayagataka kina na ivakaraitaki ena Joni 1:35–51 mo vakauqeta na gone me ra sureti ira tale eso ni vulica tu na iVakabula.

iTaviqaravi e Rawa ni Caka

• Vukei ira na gone ni vaqara na Joni 1:35–51 me raici na veika era a kaya na tamata me sureti kina eso tale me ra vulica tu na iVakabula. Me ra vakatovotovotaka na ka era rawa ni tukuna me sureti kina e dua na itokani me vulica baleti Koya.

• Kerei ira na gone me ra vakayagataka na tabana ni taviqaravi ni macawa oqo ni cakava e dua na veisureti era rawa ni vakayagataka me sureti kina e dua na itokani se lewe ni matavuvale me vulica eso tale na ka baleti Jisu Karisito.

• Solia vei ira na gone na madigi me ra tukuna ki na kalasi e dua na ka era taleitaka. Vukea me ra raica na gone na sala e rawa ni vakataka kina na wasei ni ka tale eso eda taleitaka na wasei ni kosipeli (dua na ivakaraitaki, raica na vidio “Good Things to Share” ena ChurchofJesusChrist.org).

Vakauqeta na Vuli e Vale

Vakauqeti ira na gone ni sureta e dua era taleitaka me vulica eso tale na ka baleti Jisu Karisito.

Vakatorocaketaki ni Noda Veivakavulici

Vakayagataka na veivuke ni i yaloyalo. Raica na sala eso me vukea nodra raitayaloyalotaka na gone na ka era sa vulica tiko ena ivolanikalou. O rawa ni cakava oqo ena cakacakaniliga ni kosipeli, droini, vidio, matakau, se vakatasuasua eso.