2–8 ni Janueri

Maciu 1; Luke 1

“Me Yaco Ga vei Au me vaka na Nomuni Vosa”

Tekivu ena wiliki ni Maciu 1 kei na Luke 1. NaLako Mai, Mo Muri Au—Me Baleti Ira na Tamata Yadua kei na Matavuvale sa rawa ni vukei iko mo kila na veiwase oqo, ka rawa ni solia vei iko na ituvatuva oqo eso na vakasama ni veivakavulici. Kevaka o gadreva na ikuri ni veivuke ena nodra vakavulici na gone sobu, raica na “Sotavi ni Nodra Gagadre na Gone Sobu” ena itekivu ni vurevure oqo.

Sureta na Veiwasei

Kerei ira na gone me ra dabe ena dua na i wirini, qai kerea e dua na gone me wasea na ka e sa vulica wale tikoga qo mai na ivolanikalou. E rawa ni vaqiqica e dua na polo na gone oya se dusia e dua tale na gone ena i wirini, ka sa nona gauna me veiwasei.

Vakavulica na iVunau: Gone Sobu

Maciu 1:18–25; Luke 1:26–38

Era a kacivaka na agilosi na sucu i Jisu.

Rau a sikovi yadua o Josefa kei Meri mai vua e dua na agilosi ka mai tukuna na sucu i Jisu Karisito. Na veika oqo sa rawa ni vukei ira na gone me ra raica na bibi ni sucu i Karisito.

iTaviqaravi e Rawa ni Caka

• Sureta na itubutubu ni dua na gone me rau lako mai ki na kalasi ka vakaisulu tu me vakataki Meri kei Josefa. Kerei rau me rau wasea na veika erau sotava me vaka e volai ena Maciu 1:18–25 kei na Luke 1:26–38.

• Tukuna na italanoa ni agilosi era rairai vei Meri kei Josefa, me vaka e volai ena veitikina oqo. (Raica talega na “Wase 2: Meri kei na Agilosi” kei na “Wase 4: Josefa kei na Agilosi,” e Na iTukuni ena Veiyalayalati Vou, 8–9, 12, se na kena vidio ena ChurchofJesusChrist.org.) O rawa ni vakaraitaka nai yaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Sureti ira na gone me ra tokaruataka lesu vei iko na italanoa.

• Sureti ira na gone me ra droinitaka nai yaloyalo ni talanoa eso e kune ena Maciu 1:18–25 kei na Luke 1:26–38.

Na iTukutuku Kacivaki, mai vei John Scott

Luke 1:5–25, 57–63

E dau sauma na noqu masu na Tamada Vakalomalagi.

Rau a rairai masuta tiko o Sakaraia kei Ilisapeci ena vuqa na yabaki me dua na luvedrau. A qai mani sauma na Tamada Vakalomalagi na nodrau masu ni a solia mai e dua na luvedrau tagane, o Joni na Dauveipapitaiso. O rawa ni vakayagataka vakacava nai talanoa oqo mo vakavulici ira kina na gone ni dau sauma na Tamada Vakalomalagi na masu?

iTaviqaravi e Rawa ni Caka

• Ena nomu vosa ga, wasea na italanoa mai na Luke 1:5–25, 57–63. O na rairai vinakata mo tokaruataka vakavica na italanoa. Lesi ira na gone me ra matataka na itavi i Sakaraia, Ilisapeci kei na agilosi ka matanataka na italanoa. Vakabibitaka na vosa ni agilosi vei Sakaraia: “Sa rogoci na nomu masu” (Luke 1:13). Wasea e dua na ka o sotava ka a sauma kina na Tamada Vakalomalagi na nomu masu.

• Vakayagataka na “Keimami Cuva Masu No” (iVolanisere ni Gonelalai, 18b) se dua tale na sere mo vakavulica kina vei ira na gone na ivakarau ni masu. Ena veigauna era lagata kina na gone na vosa “masu,” se “masumasu,” sureti ira me ra cuvara na uludra ka roqoliga.

• Kerea yadua na gone me cakava eso na ivukivuki e matataka e dua na ka e rawa ni masulaka. Me ra qai vakilakila na vo ni gone na ivukivuki cava so oya. E rawa ni ra raica na vakasama eso ena tabana ni itaviqaravi ena macawa oqo.

Luke 1:30–35

Sa Luve ni Kalou o Jisu Karisito.

Sa Luve ni Tamada Vakalomalagi kei Meri o Jisu Karisito. Na cava o rawa ni cakava me vukei ira na gone ni vulici Koya vakalevu cake?

iTaviqaravi e Rawa ni Caka

• Tukuna vei ira na gone ni a kaya vei Meri na agilosi ni na vakatokai na luvena me Luve ni Kalou (raica na Luke 1:35). Vukei ira na gone me ra tokaruataka na malanivosa “Sa Luve ni Kalou o Jisu Karisito.” Vukei ira na gone me ra kila deivaki na itubutubu i Jisu ena nodra sureti me ra droinitaka nai yaloyalo ni nodra itubutubu vakai ira. Ni ra vakayacora oqo, tukuna vei ira ni tiko talega na itubutubu i Jisu—o Meri kei na Tamada Vakalomalagi. Me kena ikuri, o Josefa a kerei me taqomaki ka qarauni Jisu ni a bula tu e vuravura.

• Wasea na nomu ivakadinadina ni sa mai Luve ni Kalou tu o Jisu, sa rawa Vua me mate ena vuku ni noda ivalavala ca ka bula tale mai. Vakaraitaka nai yaloyalo ni nona Vakamatei ka Tucaketale o Jisu (raica na iVola ni Yaloyalo Vakosipeli, naba 57, 59).

Vakavulica na iVunau: Gone Qase Cake

Maciu 1:18–25; Luke 1:5–37

E sega ni dua na ka e dredre vua na Kalou.

Na sucu i Jisu kei Joni na Dauveipapitaiso a rawa walega ena kaukauwa ni Kalou. Na vulici ni veicakamana oqo sa rawa ni vaqaqacotaka na nodra vakabauta na gone ni sa tiko vua na Kalou na kaukauwa me cakava na cakamana eso ena nodra bula.

iTaviqaravi e Rawa ni Caka

• Ni o railesuva kei ira na gone na Maciu 1:18–25 kei na Luke 1:5–37, tarogi ira na gone na taro eso me vaka “Na cava o na kaya kevaka o iko o Meri?” se “Ena vakacava tu na nomu vakanananu kevaka o iko o Sakaraia?”

• Ena vosa rawarawa, tukuna na italanoa e vakamacalataki ena Maciu 1:18–25 kei na Luke 1:5–37. Kerei ira na gone me ra laveta na ligadra ni ra rogoca e dua na ka ena rairai tawarawa ni sega na kaukauwa ni Kalou. Nai talanoa cava soti tale era rawa ni wasea na gone ka a cakava kina na Kalou e dua na ka a rairai tawarawa?

• Vukei ira na gone me cavuqaqataka na Luke 1:37. Me caka oqo, sa rawa ni o vola na tikina oqori ena papa ni volavola ka sureti ira na gone me ra cavuqaqataka vakavica. Ni ra cavuta oti vakayadua, bokoca e dua na vosa.

Maciu 1:21–25; Luke 1:30–35, 46–47

Sa Luve ni Kalou o Jisu Karisito.

Sa Luve ni Tamada Vakalomalagi kei Meri o Jisu Karisito. O na vukei ira vakacava na gone me ra vulica na dina oqo?

iTaviqaravi e Rawa ni Caka

• Kerei ira na gone me ra wilika na Luke 1:30–35, ni vaqarai voli na isau ni taro oqo: “O cei na tinai Jisu?” kei na “O cei na Tamai Jisu?” Vukei ira me ra kila ni sai Jisu Karisito duadua ga na tamata ka dua na tinana vakayago, o Meri, kei na Tamana sa tawa mate rawa, na Tamada Vakalomalagi (raica talega na 1 Nifai 11:18–21).

• Ni o wilika na veitikina oqo, sureti ira na gone me ra vakasaqara na yaca se na itutu eso i Jisu Karisito. Na cava na ibalebale ni veiyaca oqo, kei na cava era vakavulica vei keda me baleti Jisu?

• Wasea na nomu ivakadinadina me baleti Jisu Karisito, ka vakauqeti ira na gone me ra kitaka vakakina.

Luke 1:5–25, 57–66

Sa dau rogoca ka sauma na Tamada Vakalomalagi na noqu masu.

Sa dau sauma na Kalou na masu ia ka sega ga ena sala eso eda rairai namaka. O rawa ni vakayagataka vakacava na italanoa kei Sakaraia kei Ilisapeci mo vakavulica kina na dina oqo vei ira na gone?

iTaviqaravi e Rawa ni Caka

• Tarogi ira na gone se cava era na tukuna vua e dua ka a masuta e dua na veivakalougatataki ia e se bera ni ciqoma tiko. Sureti ira me ra vakasamataka tiko na taro oqo ni ra wilika vata na Luke 1:5–25, 57–66. (Raica talega na “Wase e 1: Ilisapeci kei Sakaraia” kei na “Wase e 3: Sucu o Joni na Dauveipapitaiso,” e Na iTukuni ena Veiyalayalati Vou, 6–7, 10–11, se na kena vidio ena ChurchofJesusChrist.org.) Na cava ena rairai tukuna o Sakaraia kei Ilisapeci kivua e dua ka nanuma ni sa sega ni saumi tiko mai na nona masu?

• Sureta rawa tu e vica na gone me ra wasea na veika era sotava ni a sauma na nodra masu na Tamada Vakalomalagi. Wasea e dua na gauna o a vakila kina ni a saumi na nomu masu ena dua na sala tawanamaki.

• Sureti ira na gone me ra droinitaka e dua nai yaloyalo ni gauna ka a sauma kina na Tamada Vakalomalagi e dua na masu—vakabibi e dua na nodra ga. Me ra wasea na nodra droini ki na kalasi.

Vakauqeta na Vuli e Vale

Sureti ira na gone me ra wasea ki na nodra matavuvale nai yaloyalo cava ga era droinitaka ena kalasi. Vakauqeti ira me ra taroga na nodra lewe ni matavuvale ena gauna eso a sauma kina na Kalou na nodra masu.

Vakatorocaketaki ni Noda Veivakatavulici

Vukei ira na gone sobu me ra vuli mai na ivolanikalou. Me vukei ira na gone sobu ni vuli mai na ivolanikalou, vakanamata ki na dua na tikina ena ivolanikalou se dua mada ga na malanivosa bibi. O na rairai sureti ira na gone me ra tucake se laveta na ligadra ni ra rogoca na vosa se malanivosa oya. (Raica na Veivakavulici ena iVakarau ni iVakabula, 21.)