Sotavi ni Nodra Gagadre na Gone Sobu

Era sa tuvakarau ka nanamaki na gone me ra vulica na kosipeli kevaka e vakavulici tu ena sala era rawa ni kila vinaka kina. Vakauasivi kevaka o vakavulici ira na gone sobu, navuca na vakayagataki ni veimataqali taviqaravi oqo me vukea na nodra vuli.

• Lagasere. Na serenilotu kei na sere eso mai na iVolanisere ni Gonelalai e vakavulica vagumatua na ivunau. Vakayagataka na idusidusi vakaiulutaga ena daku ni iVolanisere ni Gonelalai mo raica na sere era sema tu ki na ivakavuvuli ni kosipeli eso o vakavulica tiko. Vukei ira na gone me ra semata nai tukutuku ni sere eso ki na nodra bula. Me ivakaraitaki, o rawa ni vakataroga tu na vosa se malanivosa eso ena qaqa ni sere. Me ikuri ni lagasere, sa rawa ni ra matanataka na sere na gone se vakarorogo tu ga ki na sere vaka voqa ni vakatagi ni ra vakayaco itaviqaravi tale tiko eso. Me baleta na vakasama tale eso, raica na wase “Vakayagataki ni Sereivakatagi me Vakavulici na iVunau” kei na “Nodra Vukei na Gone ni Vulica ka Nanuma na Sere ni Lalai kei na Serenilotu” ena ikuri ni vakamacala ni volavakarau oqo.

• Rogoca tu se matanataka e dua nai talanoa. Era dau taleitaka na gonelalai nai talanoa—mai na ivolanikalou, mai na nomu bula, mai nai tukutuku makawa ni Lotu se nomui volanikawa ni matavuvale, se mai na mekasini ni Lotu. Vakaraica na sala eso mo vakaitavitaki ira kina ena tukuni ni talanoa. Era rawa ni taura tu nai yaloyalo se iyaya eso, droinitaka nai yaloyalo ni ka era sa rogoca tiko, matanataka nai talanoa, se veivuke tu ena tukuni ni talanoa. Vukei ira na gone me ra kila na dina ni kosipeli eso enai talanoa o wasea.

• Wilika e dua na ivolanikalou. Era na rairai sega ni rawa ni wilivola vakalevu sara na gone sobu, ia o se rawa tikoga ni vakaitavitaki ira ena vulici ni ivolanikalou. O na rairai gadreva mo vakanamata ki na dua na tikina, malanivosa bibi, se vosa. Ni ko wilika tu icake e dua na ivolanikalou, sa rawa ni o sureti ira na gone me ra tucake se laveta na ligadra ni ra rogoca vakatabakidua na vosa se malanivosa o via vakanamata kina. Era rawa sara mada ga ni cavuqaqataka na malanivosa leleka eso mai na ivolanikalou kevaka era tokaruataka vakavica. Ni ra rogoca tu na vosa ni Kalou, era na vakila na Yalotabu.

• Mo bulabula. Baleta ni ra sa dau waribariba na gone sobu, tuva na sala eso me ra veitosoyaki kina—tayabe, ladelade, kisodali, cuva, taubale tu, kei nai vukivuki tale eso e semati ki na ivakavuvuli se talanoa o vakavulica tiko. Sa rawa talega ni yaga na veika oqo ni ko ni lagasere vata tu.

• Raica tu e dua nai yaloyalo se sarava e dua na vidio. Ni o vakaraitaka vei ira na gone e dua nai yaloyalo se vidio e sema tu ki na dua na ivakavuvuli se italanoa ni kosipeli, taroga na taro eso ena vukei ira ni vuli mai na ka era sa raica tiko. Me ivakaraitaki, o rawa ni taroga, “Na cava e yaco tiko enai yaloyalo se vidio oqo? Na cava o vakila tu kina?” Na icurucuru ni Gospel Library, GospelMedia.ChurchofJesusChrist.org, kei na children.ChurchofJesusChrist.org sa vanua vinaka mo vakaraica kina nai yaloyalo kei na vidio eso.

• Vukei ka vakayaloqaqataki ira na gone me ra wasea na veika era sotava. Ena sega soti beka ni levu na ka e tu me ra wasea na gone sobu me vakataki ira na qase cake, ia kevaka o solia vei ira na veituberi vakatabakidua, era rawa ni wasea na nodra nanuma kei na veika e sotavi ena ka era sa vulica tiko.

• Bulia. Sa rawa ni bulia, droinitaka, se rokataka na gone e dua na ka e semati ki nai talanoa se ivakavuvuli era vulica tiko. Vakauqeti ira me ra kauta i vale na ka era bulia ka wasea ki na lewe ni matavuvale me vukea na gone ni nanuma na ka era sa vulica.

• Vakaitavi ena lesoni vakainaki eso. E rawa ni vukei ira na gone e dua na lesoni vakainaki rawarawa me ra kila matua kina e dua na ivakavuvuli ni kosipeli e dredre tu me kilai. Ni dau vakayagataki na lesoni vakainaki, vakaraica na sala eso me ra vakaitavi kina na gone. Era na vuli vakalevu ena nodra veimaliwai vakaicaba mai na kena saravi tu ga e dua na ivakaraitaki.

• Matanataka Ni ra matanataka na gone e dua na ituvaki e rawa ni ra sotava ena nodra bula, sa rawa ni ra kila vakavinaka cake na sala e yaga kina ki na nodra bula na ivakavuvuli ni kosipeli.

• Tokaruataka na itaviqaravi. Era na rairai gadreva na gone sobu me ra rogoca vakavuqa na ivakavuvuli eso me ra kila tu vakavinaka. Kakua ni rere ni cakava wasoma nai talanoa se itaviqaravi eso, ena gauna ni lesoni vata sara mada ga. Me ivakaraitaki, o na via wasea vakavica e dua nai talanoa ni ivolanikalou ena sala duidui eso ena gauna ni lesoni—ena wiliki ni volanikalou, vakalekalekataki ena nomu vosa ga, vakaraitaki ni dua na vidio, nodra vukei iko na gone ena tukuni ni talanoa, nodra sureti ni matanataka na talanoa, kei na so tale. Kevaka e tokaruataki talega e vale e dua nai taviqaravi a vakayagataki ena kalasi, na kena caka veitaravi ena vukei ira na gone ni vulica ka nanuma.

• Veiwasei kei ira tale eso. Era sa taracake tiko na gone na kila vakaveimaliwai ka dau taleitaka na vuli kei na qito vakaitabavata. Vakarautaka na madigi eso me ra veiwasei, vakaitavi yadudua, ka veitokoni ni ra vuli.

• Vakaitavi ena veimataqali itaviqaravi. E dau lekaleka ga na nodra gauna ni vakarorogo na gone sobu, ka duidui tu nai walewale ni nodra vuli. Vakayagataka na veimataqali taviqaravi, ka wanonova matua nai vakatakilakila eso ni sa gadreva na gone e dua na veisau ni moimoi. Me ivakaraitaki, o na rairai gadreva mo caka veisau wasoma mai nai taviqaravi malua ka bulabula eso.

Sa tiki ni nomu itavi vaka qasenivuli ni gone sobu—me ikuri ni kena vakavulici na ivakavuvuli ni kosipeli—o ya na nodra vukei na gone ni vulica na ivakarau me ra vakaitavi vakamaqosa kina ena dua na kalasi ni Lotu. Me ivakaraitaki, era na rairai gadreva ni vulica me ra dau vakaitavi, veiwasei, rokovi ira na tani, kei na so tale. Eso na qasenivuli e vakarautaka na ivolakabi vata na ilesilesi kivua na gone yadua me vakaitavi ena dua na sala vakatabakidua ena kalasi (me vaka na masu, tauri ni dua nai yaloyalo, se veisoliyaki pepa). Na ilesilesi oqori sa rawa ni veisau e veimacawa. Oqo e vukea na nodra vakaitavitaki na gone ka vakanamata tu ki na itovo maqosa ni loma ni kalasi.

Dau yaga wasoma vei ira na gone—vakabibii o ira na gone sobu—na ivakarau tudei era sa vakamatautaki kina. Baleta ni dau lekaleka ga na nodra gauna ni vakarorogo na gone sobu ka dredre ena so na gauna me ra vakarorogo ena gauna taucoko ni kalasi, e sa dau vinaka sara ke okati tu ena ivakarau oqo na veisau wasoma mai na dua nai taviqaravi ki na dua tale. Me ivakaraitaki, na ivakarau ni nomu kalasi sa rawa ni oka kina na cegu vagauna me rokataki e dua na yaloyalo, lagati e dua na sere, kei na so tale.