taura tu o Jisu na gonelailai

Ko sa Nodra Qasenivuli na Gone

Sa kacivi iko na Kalou mo vakavulici ira na Luvena ena ivakarau ni iVakabula. O sa vakatikori ki na veikacivi oqo ena dodonu ni lewa ni Nona matabete tabu. Kevaka mada ga o sega ni kenadau ena veivakavulici, ni ko bula kilikili, masu e veisiga, ka vulica na ivolanikalou, ena solia vei iko na Tamada Vakalomalagi na veivakauqeti kei na kaukauwa ni Yalo Tabu me vukea na nomu rawaka (raica na 2 Nifai 33:1).

Sa luve ni Tamada Vakalomalagi o ira ko sa nuitaki tu ni qarava, ka sa kila tu o Koya na nodra gagadre kei na sala vinaka duadua me ra tarai kina. Ni ko vakasaqara ena masumasu na veivakauqeti ni Yalo Tabu, ena tuberi iko o Koya ena nomu vakavakarau kei na gauna o veivakavulici tiko kina. Ena vakatakila vei iko o Koya na ka mo na kaya kei na ka mo na cakava (raica na 2 Nifai 32:5).

Kakua ni beca na taledi ni dua na gone me kila matua na kosipeli. Ena veitiki kece sara ni nodra bula, era sa tauri tukutuku tu na gone vakamareqeti oqo, ena tuvai kei na vakamakaretaki ni nodra nanuma, kei na caka ka wasei ni vakadidike eso. Sa dina vakabibi tu oqo ena kosipeli, ni ra sa tuvakarau ka nanamaki na gone ni vulica na veika dina rawarawa. Sa kaukauwa ka savavuka na nodra vakabauta na veika vakayalo, ka sa madigi tu ni vuli na veigauna taucoko. Era qarava tu ena yalorawarawa na ka era sa vulica, kevaka mada ga e se bera ni taucoko na nodra kilaka. Oqo na sala sa dodonu me da ciqoma taucoko kina na kosipeli. Me vaka a vakavulica na iVakabula, “O koya ena sega ni vakabauta na matanitu ni Kalou me vaka na gonelailai, ena sega sara ni curu kina” (Luke 18:17).

Na veikacivi ni nodra vakavulici na gone e sa dua na inuinui cecere, ka sa matau me da vakadrukai tu ena gauna eso. Ia nanuma tu ni a kacivi iko na Tamamu Vakalomalagi, ka na tokoni iko o Koya. Oqo na cakacaka ni Turaga, ka na vakalevutaka o Koya na nomu rawaka, solisoli, kei na taledi ni ko veiqaravi “ena yalomu taucoko, igu, vakasama kei na kaukauwa” (Vunau kei na Veiyalayalati 4:2), ka na vakalougatataka nodra bula na gone o vakavulica na nomu veiqaravi.